Прокуратура архивӗнчи сӑн

Прокуратура Йӗпреҫ округӗнчи ҫулсене юртан мӗнле тасатнине тӗрӗсленӗ. «Нурӑс - Патӑрьел - Елчӗк» тата «Йӗпреҫ - Березовка - Кудеиха» ҫулсене «Дортех» организаци япӑх пӑхса тӑни палӑрнӑ. Чылай ҫӗрте ҫул хӗррине, тротуарсене хырман, юр 15 сантиметртан ҫӳллӗрех пулнӑ. Ҫул ҫине хӑйӑрпа тӑвар хутӑшне те сапман, чарӑнусем патне пынӑ ҫӗрте те кӑпӑшка юр выртнӑ.

«Дортех» тӗлӗшпе административлӑ ӗҫ пуҫарнӑ, должноҫри ҫынна 20 пин тенкӗлӗх штрафланӑ.

photoby.ru сӑнӳкерчӗкӗ

«М-7» автоҫулӑн Горьки ҫул пӑрӑнчӑкӗнчен пуҫласа Кӳкеҫе ҫитичченхи участокне килес ҫул юсас шанчӑк пур. Кун пирки республика Элтеперӗ Олег Николаев палӑртса хӑварнӑ.

Асӑннӑ лаптӑка юсаса ҫӗнетессипе ҫыхӑннӑ проект пур иккен. Объекта пилӗк ҫулхи плана кӗртнӗ.

«Ҫул-йӗрҫӗсемпе кашни тӗл пулмассеренех юсав ӗҫне пуҫӑнма ыйтса вӗсене васкататӑп. Унти пӑкӑ ҫынсене самай кансӗрлеҫҫӗ. Ку ыйтупа кӑҫал мар пулсан килес ҫул ӗҫлеме тытӑнатпӑрах тесе шухӑшлатӑп», — тенӗ республика ертӳҫи.

cap.ru сӑнӳкерчӗкӗ

«М-7» ҫул ҫинче пӗрремӗш электрозаправка уҫӑлнӑ. Асӑннӑ комплекс ҫулӑн 620-мӗш километрӗнче, Муркаш муниципаллӑ округӗнчи Тереҫ ялӗ тӗлӗнче вырнаҫнӑ. Сӑмах май каласан, ҫав тӗлте — «Ҫеҫпӗл» предприяти.

Электрозаправка аслӑ ҫулпа иртсе пыракан машинӑсемшӗн питех те меллӗ. Комплекс талӑкӗпех ӗҫлӗ.

Заправкӑна уҫма республика Элтеперӗ Олег Николаев, промышленноҫпа энергетика министрӗ Борис Марковцов, ҫут ҫанталӑк ресурсӗсен тата экологи министрӗ Эмир Бедертдинов пырса ҫитнӗ.

Электрозаправкӑра харӑсах виҫӗ машинӑна зарядкӑна лартса хума пулать. Двигателе туллин вӑй илтерме пӗр сехетрен сахалрах вӑхӑт кирлӗ, кӑштах вӑй хушма темиҫе сехет те ҫитет.

t.me/mintrans21 сӑнӳкерчӗкӗ

Иртнӗ эрнере Шупашкарти троллейбуссенче «мулкачсене» шыранӑ. Аса илтерер: общество транспортӗнче билетсӑр ҫӳрекенсене ҫапла калаҫҫӗ. Ҫула билетсӑр тухакансене 500 тенкӗ штраф тӳлеттереҫҫӗ.

Тӗрӗслевҫӗсем 1-мӗш тата 17-мӗш маршрутпа ҫула тухнӑ троллейбуссенче пулнӑ. Контролёрсем — Чӑваш транспорт управленийӗн ӗҫченӗсем.

Чӑваш Енӗн Транспорт министерствинче пӗлтернӗ тӑрӑх. билетсӑр пассажирсем тупӑнман.

"Автодор" сӑнӳкерчӗкӗ

Ҫил-тӑмана пула паян ирхи 5 сехетрен Чӑваш Енре, Тутарстанра тата Мари Элте федераци трассисенче йывӑр тиевлӗ машинӑсене, автобуссене ытлашши ҫӳреме чарнӑ. Ку «Атӑл» М-7,«Ҫӗрпӳ - Чӗмпӗр» А-151, «Вятка» Р-176 ҫулсене пырса тивет.

Кунсӑр пуҫне «Восток» М-12 ҫулӑн пӗр пайне, Канашран Шали таран, хупнӑ.

"Автодор" сӑнӳкерчӗкӗ

Ҫил-тӑмана пула тӳлевлӗ М-12 ҫула вӑхӑлӑха хупнӑ. Анчах веҫех мар.

Паян ирхине «Автодор» хыпарланӑ тӑрӑх, М-12 ҫинче Тутарстан еннелле каякан ҫула хупнӑ.

«684-836-мӗш ҫухрӑмсенче (Канаш - Шали) машинӑсене яман», - ҫапла пӗлтернӗ «Автодор» пресс-служби.

forum.zarulem.ws сӑнӳкерчӗкӗ

Патшалӑхӑн ҫул-йӗр хӑрушсӑрлӑхӗн инспекторӗсем Шупашкар ҫыннисене машинӑпа инҫе ҫула тухма сӗнмеҫҫӗ. Ялан мар-ха. Паян. Ҫил-тӑман вӗҫтернӗрен ҫулсем ҫинче 10 баллӑ пӑкӑ пулса тӑнӑ.

Инспекторсем ҫул ҫинче питех та асӑрхануллӑ пулма, ҫул-йӗр правилисене ҫирӗп пӑхӑнма сӗннӗ.

Хула урамӗсем тасатса тӑракан «Дорэкс» организаци кӑнтӑрла 96 ҫул-йӗр рабочийӗ тата 110 техника, унсӑр пуҫне субпорядчиксен техники ӗҫленине пӗлтернӗ. Каҫхине тата ҫӗрле урамсене 60-а яхӑн техника тасатса тӑрӗ.

turvopros.com сӑнӳкерчӗкӗ

Кӑрлач уйӑхӗн 12-мӗшӗнче Шупашкартан Мускава каҫхи авиарейспа вӗҫсе кайма ӗмӗтленнӗ пассажирсен тепӗр ирччен кӗтме тивнӗ.

Асӑннӑ рейспа хутлакан «Победа» авиакомпанин самолёчӗ ҫула 10 сехет те 30 минут кая юлса хускалнӑ.

Шупашкара Мускавран вӗҫсе килнӗ самолёт анса ларнӑ хыҫҫӑн унӑн тӗп шассинче пушар пирки систерекен тытӑм ӗҫлесе кайнӑ. Ҫавӑн хыҫҫӑн пилотсем «Тревога» сигнал панӑ. Инкекпе ҫӑлав расчечӗсем ҫийӗнчех ура ҫине тӑнӑ.

Телее, ним те ҫунма пуҫламан. Самолёта ятарлӑ вырӑна туртса илсе кайса лартнӑ.

ШӖМ видеовӗнчен илнӗ сӑнӳкерчӗк

Паян ирпе Шупашкарта икӗ троллейбус ҫапӑннӑ. Вӗсем 5-мӗш тата 9-мӗш маршрутпа ҫӳрекенскерсем. Пӑтӑрмах ирхи 7 сехетре пулса иртнӗ.

Чӑваш Енӗн Шалти ӗҫсен минисерствин пресс-службинче хыпарланӑ тӑрӑх, «Николаев урамӗ» чарӑнӑва ҫитнӗ чухне 5-мӗш троллейбус водителӗ 9-мӗш маршрутпа ҫӳрекеннипе пырса ҫапӑннӑ. Малтанласа шухӑшланӑ тӑрӑх, пӑтӑрмах транспорт пӗр-пӗр хушшинче пулмалли инҫӗше пӑхӑнманнипе ҫыхӑннӑ.

Троллейбуссенчен пӗрин водительне, 25 ҫулти каччӑна, тата пилӗк пассажира тухтӑр пулӑшӑвӗ кирлӗ пулса тухнӑ.

Тӗнче тетлӗнче тӗрлӗ ҫӑлкуҫ пӗлтернӗ тӑрӑх, тӳлевлӗ М-12 ҫул ҫинчи заправкӑсем патӗнче черетсем пулнӑ. Ҫавна май «Автодор» унта ҫӗнӗ заправкӑсем тӑвас ӗҫе хӑвӑртлатма шантарнӑ.

«Автодор» пӗлтернӗ тӑрӑх, хальлӗхе унта 18 заправка тата 4 контейнерлӑ АЗС ӗҫлет. Пӗтӗмпе – 22 заправка. Ҫӗнӗ ҫул хыҫҫӑнхи каникулта ытларах Муром тата Арзамас патӗнче, Мускава кӗнӗ ҫӗрте черетсем пулнӑ.

Сӑмах май, унччен влаҫ М-12 ҫул ҫинче кашни 50 ҫухрӑмра заправка пулассине пӗлтернӗ. Тӳрех – икӗ енчен.