pikabu.ru сӑнӳкерчӗкӗ

Федерацин хӑрушсӑрлӑх службин погранподразделенийӗ Шупашкарти аэропортра ют ҫӗршыври рейссене йышӑнма хатӗр. Кун пирки республикӑн влаҫ органӗсен офицаллӑ порталӗнче пӗлтернӗ.

Пассажирсемпе тиевсене тӗрӗслемелли пункта 2025 ҫул пуҫламӑшӗнче ӗҫлеттерсе ярасшӑн. Кун пирки Раҫҫейӗн Федерацин хӑрушсӑрлӑх службин Сарту тата Самар облаҫӗсенчи Пограничник управленийӗн пуҫлӑхӗ Юрий Урванов Чӑваш Ен Элтеперӗпе Олег Николаевпа тӗл пулсан пӗлтернӗ.

Элтепер каланӑ тӑрӑх, ҫитес ҫул Шупашкартан Турцие авиайрессем уҫасшӑн.

catcher.fish сайтри сӑн

Йӗпреҫ муниципаллӑ округӗнче Кире юханшывӗ урлӑ хывнӑ кӗпере юсаса пӗтернӗ. Ӑна «Хӑрушсӑр тата пахалӑхлӑ ҫулсем» наци проекчӗпе килӗшӳллӗн тунӑ.

Кӗпер ҫине плита хунӑ, гидроизоляцие улӑштарнӑ, ҫӗнӗ хӳтӗлев сийӗ тунӑ, диформациленнӗ ҫӗвӗсене ҫӗнетнӗ.

Кунсӑр пуҫне кӗперпе ҫӳреме хӑрушсӑр пултӑр тесе перилӑсем лартнӑ.

cap.ru сӑнӳкерчӗкӗ

Авӑн уйӑхӗн 6-мӗшӗнчен, паянтан, «Шупашкар - Ҫӗньял-Покровски» маршрут ҫӳреме тытӑнать. Кун пирки ЧР Транспорт министерстви пӗлтерет.

Тахҫан ку маршрут пулнӑ-ха, анчах тупӑш паманнипе перевозчик ӑна пӑрахӑҫланӑ. Халӗ ку ӗҫе ҫӗнӗ хуҫа илнӗ. Ӑна уҫӑ конкурссӑрах суйланӑ.

Транспорт кунне 3 хут ҫӳрӗ: 6:10, 7:10 тата 16:30 сехетсенче (Бабушкин тӑкӑрлӑкӗнчи 8-мӗш «а» ҫурт патӗнчен тапранӗ). Ҫӗньял-Покровскинчен рейс 6:40, 7:40 тата 17:00 сехетсенче кайӗ.

forum.na-svyazi.ru сӑнӳкерчӗкӗ

Чӑваш Енӗн прокуратуринче Патӑрьелти ҫула прокуратура ҫине тӑнипе юсанине пӗлтереҫҫӗ.

Унти Ленин урамӗнчи 17-мӗш ҫурт патӗнчен пуҫласа 30-мӗш патне ҫитичченхи ҫул ванса пӗтнӗ. Ун пек ҫулпа пыракан машинӑсем инкеке те лекме пултарнӑ.

Прокуратура начсар ҫула юсама вырӑнти администрацие суд урлӑ хистенӗ. Ҫавӑн хыҫҫӑн тин ҫула йӗркене кӗртнӗ, ӑна юсанӑ.

t.me/gibdd121 сӑнӳкерчӗкӗ

Етӗрне муниципаллӑ округӗнче ҫамрӑксем мопедпа мотоблокпа пырса ҫапӑннӑ.

Етӗрне тӑрӑхӗнчи Лапракассинче пурӑнакан яшсем

мопедпа пынӑ чухне мотоблок ҫине пырса кӗнӗ.

Инкекре мопед пассажирӗ аманнӑ.

Пӑтӑрмах ҫурла уйӑхӗн 16-мӗшӗнчи ҫӗрле пулнӑ. Мопеда тытса пынӑ 17 ҫулти ҫамрӑк хирӗҫ килекен мотоблокпа пырса ҫапӑннӑ. Инкекре мопед ҫинче ларса пынӑ 14 ҫулти яш пуҫне амантнӑ. Вӑл халӗ пульницӑра сипленет.

Мопед ҫинчисем те, мотоблок хуҫи те урӑ пулнӑ.

forum.na-svyazi.ru сӑнӳкерчӗкӗ

Шупашкартан Хусана пассажирсене Атӑл тӑрӑх турттарса ҫӳрекен «Валдай» карапа юсама кӗртсе лартнӑ. Профилактика тӗллевӗллӗ юсав ҫурла уйӑхӗн 9-мӗшӗччен тӑсӑлӗ.

Маларах Шупашкарти юханшыв порчӗ «Валдай 45Р-12» карапа (вӑл пассажирсене иккӗмӗш номерпе турттарнӑ) ҫурла уйӑхӗн 3, 4, 5-мӗшӗсенче ҫула тухмассине пӗлтернӗччӗ-ха. Ҫурла уйӑхӗн 5-мӗшӗнче юханшыв порчӗ тӗп двигателӗн турбини начар ӗҫленине тупса палӑртнине хыпарланӑ. Юсав ҫурла уйӑхӗн 9-мӗшӗччен пырӗ.

«Татарстан Республикин флочӗн» «Метеорӗсем» те халӗ ҫӳреме чарӑннӑ. Вӗсене Зеленодольскри заводра юсӗҫ.

cap.ru сӑнӳкерчӗкӗ

Чӑваш Енре «Валдай» карапсемпе ҫӳрекенсем йышлӑ. Кӑҫалхи икӗ уйӑхра кӑна вӗсем 12,7 пин пассажира илсе кайнӑ. Вӗсенчен 8,6 пинӗ «Шупашкар — Хусан» маршрута суйласа илнӗ, 4 пин ытларах ҫын — Свияжска.

Кунсӑр пуҫне Шупашкарти юханшыв порчӗ 413 теплохода йышӑннӑ, вӗсемпе 60 пине яхӑн пассажир килсе кайнӑ.

Ҫак цифрӑсем ҫынсем шыв тӑрӑх уҫӑлса ҫӳреме, унта-кунта ҫитсе курма юратнине ҫирӗплетсе параҫҫӗ.

Ҫитес ҫул Куславккапа Сӗнтӗрвӑрринче причалсем тӑвасшӑн.

cap.ru сӑнӳкерчӗкӗ

Вӑрнар муниципаллӑ округӗнче «Шӑхасан - Нурӑс» ҫула юсӗҫ. Ӑна «Хӑрушлӑхсӑр паха ҫулсем» наци проекчӗпе килӗшӳллӗн ҫӗнетӗҫ.

Пӗтӗмпе 4 ҫухрӑм ҫула юсӗҫ. Ҫавӑн пекех автобус чарӑнӑвӗсене, ҫуран каҫмалли вырӑнсене, тротуарсене ҫӗнетӗҫ, светофорсем вырнаҫтарӗҫ. Ҫул ҫинче ҫутӑ та пулӗ.

Малтанлӑха палӑртнӑ тӑрӑх, килӗшӗве авӑн уйӑхӗн 5-мӗшӗнче алӑ пусмалла.

«Ҫыхӑнура» форумран илнӗ сӑнӳкерчӗк

Кӳкеҫе тата Шупашкара нумаях пулмасть ҫӗнӗ маршрутпа ҫыхӑнтарнӑ.

Утӑ уйӑхӗн 9-мӗшӗнчен 153-мӗш маршрут хутлама тытӑннӑ. Вӑл хулари Павлов мичман урамӗнчен ҫула тухса Гузовский урамӗпе, Мускав проспекчӗпе, Калинин урамӗпе, унтан Гагарин тата Октябре 50 ҫул урамсемпе кайса Мир проспектне тухать, унтан Эгер бульварӗпе тата 9-мӗш Пилӗкҫуллӑх урамӗпе хӑпарать. Кайран Вӑрнар шосси – Ишлей шосси – Ҫӗнӗ Лапсарти Совхоз урамӗ – «М-7» ҫулпа кайса Кӳкеҫри Совет урамне ҫитет.

Маршрут хуҫи — Олег Евсюков усламҫӑ. Вӑл унччен пассажирсене 234-мӗш маршрутпа (Шупашкар – Ҫӗнӗ Шупашкар) турттарнӑ.

forum.na-svyazi.ru сӑнӳкерчӗкӗ

Паян, утӑ уйӑхн 29-мӗшӗнче, Мускавран Шупашкара килекен пуйӑс кая юлса ҫитӗ. Кун пирки Горьки чукун ҫулӗ асӑрхаттарнӑ.

Мурома состав расписанипе ҫитнӗ, «Арзамас-2» станцие — 56 минут юлса. Канаша вӑл 89 минут кая юлса ҫитнӗ. Ҫавна май Шупашкара та фирма пуйӑсӗ каярах килнӗ.

072Г-мӗш номерлӗ «Мускав – Шупашкар» графикпа килет. Шупашкара вӑл 13 сехет те 10 минутра ҫитӗ.