1obl.ru сайтри сӑн

Раштав уйӑхӗн 4-5-мӗшӗсенче юн нумай ҫунӑ хыҫҫӑн халӑх тетелӗсенче ҫулсене тасатманни пирки ҫӑхав нумайланнӑ. Ытларах – Шупашкарта, Ҫӗнӗ Шупашкарта, Улатӑрта, Етӗрне тата Шупашкар округӗсенче пурӑнакансенчен.

Ҫула хырман тӑк ӑҫта ҫӑхав ҫырмалла? Федераци трассисене «Волго-Вятскупрдор» пӑхса тӑрать, ҫак сайтра ҫӑхав ҫырма пулать: www.rosavtodor.ru. Вырӑнти ҫулсене муниципалитетӑн тасатмалла.

Муниципалитетсен хушшинчи ҫулсене юртан тасатманни пирки ҫак номерпе шӑнкӑравласа пӗлтермелле: 8-919-971-01-08. Е бота ҫырмалла: @Roadmonitor_bot.

carsweek.ru сӑнӳкерчӗкӗ

Ҫул-йӗр ҫинче пулса иртекен инкексемпе ҫыхӑннӑ лару-тӑрӑва кӑҫалхи 10 уйӑхпа тишкернӗ те, вӑл кӑткӑссине палӑртнӑ. Паян ҫак ыйтӑва Правительство ларӑвӗнче сӳтсе явнӑ.

Инкексен шучӗ пӗлтӗрхи танлаштаруллӑ тапхӑртинчен 12,1 процент, аманнисен шучӗ 11,1 процент чакнӑ пулин те вилекенсен йышӗ нумайланнӑ.

Чӑваш Енӗн Патшалӑх автоинспекцийӗн пуҫлӑхӗ Владмир Романов палӑртнӑ тӑрӑх, ҫул ҫинчи инкексен тӗп сӑлтавӗсен шутӗнче машинӑсем хӑвӑртлӑха ӳстернипе, хирӗҫ килекен ҫул ҫине тухса кайнипе, пӗр машинӑран тепри иртсе кайнӑ чух йӗркене пӑхӑнманнипе, ҫул хӗресленнӗ тата ҫуран каҫмалли вырӑнсенче асӑрханманнипе ҫыхӑннӑ.

21.мвд.рф сӑнӳкерчӗкӗ

Паян ирпе, ирхи 7 сехет те 20 минутра, Куславкка муниципаллӑ округӗнче пысӑк инкек пуса ирнӗ. Унта харӑсах тӑватӑ ҫын пурнӑҫӗ татӑлнӑ, пӗри суранланнӑ.

«М-7» федераци ҫулӗ ҫинче «Mitsubishi Outlander» тата «Scania» автомобильсем инкеке лекнӗ.

Йӗрке хуралҫисем малтанласа паӑртнӑ тӑрӑх, кроссовер хирӗҫ килекен ҫул ҫине сиксе тухнӑ та унта фурӑпа пырса ҫапӑннӑ. Инкекре ҫӑмӑл машина водителӗ тата салонти виҫӗ пассажир вилнӗ, йывӑр тиев турттаракан автомобиль водителӗ аманнӑ.

Вилнӗ ҫынсем — Хусанта пурӑнаканскерсем.

Прокуратура архивӗнчи сӑн

Елчӗк муниципаллӑ округӗнче Кӳлпуҫ ялӗнче унччен хытӑ сийлӗ ҫул пулман. Йӗпе-сапара унта пылчӑк ҫӑрӑлнӑ кӑна.

Вырӑнти влаҫ ҫула прокуратура тавӑҫ тӑратсан кӑна йӗркене кӗртнӗ. Ӗҫне вара кирлӗ хутсене приставсене парсан кӑна тунӑ - щебень сарса панӑ.

Халӗ ял ҫыннисем пылчӑк ӑшӗнче ҫӑрӑлмаҫҫӗ.

"Автодор" архивӗнчи сӑн

Ҫак кунсенче М-12 тӳлевлӗ ҫул ҫинче строительсем Атӑл урлӑ хывнӑ кӗпер ҫинче асфальт сарса пӗтернӗ. Вӑл - ҫак ҫул ҫинчи чи вӑрӑм кӗпер: 3362 метр тӑршшӗ, 25 метр сарлакӑш.

Халӗ унта тимӗр картасем вырнаҫтараҫҫӗ. Кайран кӗпер ҫинче ҫутӑ тӑвӗҫ.

Палӑртмалла: ҫак кӗпере 2021 ҫулхи чӳк уйӑхӗнче тума пуҫланӑ. Ӑна ҫывӑх вӑхӑтра, раштав уйӑхӗн 19-мӗшӗнче, уҫасшӑн. Ҫавӑн чухнех машинӑсем Мускавран Хусана ҫӳреме тытӑнӗҫ. Хальхи вӑхӑтра ҫул Мускавран пуҫласа Арзамас таран уҫӑ.

t.me/pro_cheby каналтан илнӗ сӑнӳкерчӗк

Шупашкар хулинчи «Граждан урамӗ» чарӑнура ҫынсем валли тротуар пӑхса хӑварман. Ҫулла халӑх ҫул хӗрринче курӑк акнӑ вырӑн ҫийӗн утнӑ пулсан халӗ, ҫумӑрлӑ ҫанталӑкра, ҫынсем машинӑсем ҫӳремелли ҫул тӑрӑх хутлаҫҫӗ. Пылчӑкра вараланса пӗтес килмест-ҫке.

Ҫавӑн пек вырӑн Кӳкеҫре те пур. Унти Совет урамӗнче темиҫе ҫул каялла ҫӗнӗ ача пахчи уҫрӗҫ. Ун умӗнче машинӑсене лартмалли вырӑн туса хӑварнӑ-ха, анчах тротуар ҫук. Халӑхӑн ирӗксӗрех е машина ҫулӗпе утма тивет, е курӑка таптаса.

cap.ru сайтри сӑн

Сӗнтӗрвӑрри тата Куславкка муниципаллӑ округсем ҫак пулӑма тахҫантанпах кӗтнӗ. Икӗ округа ҫыхӑнтаракан ҫула тинех уҫнӑ.

Эппин, халӗ ҫак икӗ муниципаллӑ округра пурӑнакансем ҫул ҫинче 1,5 сехет таран сахалрах ирттерме пултараҫҫӗ.

ЧР Элтеперӗ Олег Николаев каланӑ тӑрӑх, республикӑра хытӑ сий сарман ҫулсене, асфальт ҫула ҫыхӑнтаракансене, пӗтерме тӑрӑшаҫҫӗ. Тепрехинче Элӗк тата Хӗрлӗ Чутай округӗсенчи 3,5 ҫухрӑм тӑршшӗ ҫула асфальт сарасшӑн. Унашкаллисем Вӑрнар, Красноармейски, Йӗпреҫ, Пӑрачкав округӗсенче те пур.

cap.ru сӑнӳкерчӗкӗ

2024 ҫулта Шупашкарпа Ҫӗнӗ Шупашкара виҫӗ троллейбус маршручӗ ҫыхӑнтарӗ. Чи малтан 62-мӗш номерли ҫула тухӗ. Вӑл республикӑн тӗп хулинчи Чапаев ячӗллӗ приозводство пӗрлешӗвӗнчен пуҫласа Ҫӗнӗ Шупашкарти «Иваново» чарӑнӑва ҫитӗ хутлӗ.

Ку хыпара республика Элтеперӗ Олег Николаев «Грани» хаҫат редакцине панӑ интервьюра пӗлтернӗ.

«Муниципалитетсен хушшинчи автобус маршурчӗсене троллейбуссемпе ылмаштарасшӑн. Троллейбуссем хӑтлӑрах, хӑрушсӑртарах, вӗсен салонӗ те пысӑкрах», – тенӗ Олег Николаев.

Каярах ҫула 60-мӗш (Шупашкарти «Университет» – Ҫӗнӗ Шупашкарти «Химтехникум») тата 61-мӗш маршрутсем (Шупашкарти «Медицина центрӗ» – Ҫӗнӗ Шупашкарти «Иваново») тухӗҫ.

forum.na-svyazi.ru сайтран илнӗ сӑн

Сӗнтӗрвӑрри районӗнчи Маклашки ялӗнче пурӑнакансене ҫул ыйтӑвӗ пӑшӑрхантарать. Вӗсем ЧР Элтеперӗ Олег Николаев ирттернӗ тӳрӗ линие те ку ыйтӑва янӑ.

Ыйтӑва айккине сирсе хӑварман. Сӗнтӗрвӑрри район администрацийӗ ҫак ҫула 2024 ҫулӑн пӗрремӗш ҫурринче юсассине пӗлтернӗ. Проектпа смета документацине хатӗрлеҫҫӗ. Палӑртмалла: ҫул 1,6 ҫухрӑм тӑршшӗ.

Сӑмах май, тӳрӗ линие сӗнтӗрвӑррисенчен 55 ыйту килнӗ. Вӗсенчен 30 ытларахӑшӗ Маклашки ҫулӗпе ҫыхӑннӑ.

© shutterstock.com

Кӗркунне пуҫланнӑ хыҫҫӑн ҫул-йӗр правилисенче улшӑнусем вӑя кӗнӗ. Ытти пайсене тӗрӗсленисӗр пуҫне ГИБДД ӗҫченӗсем малашне авто фарисем ҫинче хӳтлӗх пленки пуррине пӑхӗҫ, вӑл пулсан, ҫутӑна пач тӗксӗмлетмест пулин те, штраф ҫырса парӗҫ.

Ҫӗнӗ правилӑсем тӑрӑх машинӑн фарисене нимӗнле майпа та «апгрейдлама» юрамасть. Ку йӗркене пӑссан водителе 500 тенкӗлӗх штрафлӗҫ, ҫакна КоАПӑн 12.5 статйин 3-мӗш пайӗнче ҫырса ҫирӗплетнӗ.

Штрафланисӗр пуҫне автоинспекторсем йӗркене пӑсакан пленкӑна вунӑ кунран кая юлмасӑр сӳсе пеме ыйтӗҫ. Ку ӗҫе пурнӑҫламасан автомобиль тӳрех учетран тухӗ, водителе вара тата тепӗр 5 пин тенкӗлӗх штраф ҫырса парӗҫ е 3 уйӑхлӑха правасӑр та хӑварма пултарӗҫ.

Ҫакӑн пек ҫирӗп йышӑнӑва мӗнпе сӑлтавланине ӑнлантарса паман. Унччен малтан ӑнсӑртран чул таврашӗ лексе сиенлетесрен машина оптикине хӳтӗлени водительсене укҫа-тенке перекетлеме май панӑ.