«Хыпар» издательство ҫурчӗн сӑнӳкерчӗкӗ

«Хыпар» издательство ҫурчӗн ӗҫченне Ирина Клементьевӑна «Чӑваш Республикин культурӑн тава тивӗҫлӗ ӗҫченӗ» хисеплӗ ят пама йышӑннӑ. Хушӑва республика Элтеперӗ Олег Николаев паян алӑ пуснӑ.

Ирина Клементьева – РФ Журналистсен союзӗн членӗ, Чӑваш Республикин Пуҫлӑхӗн стипендине икӗ хутчен тивӗҫнӗ, Чӑваш енри журналистсен союзӗн Ҫемен Элкер ячӗллӗ тата Леонид Ильин ячӗллӗ премийӗсен лауреачӗ.

«Хыпар» издательство ҫуртӗнче пӗлтернӗ тӑрӑх, «издательство ҫурчӗн шеф-редакторӗ Ирина Николаевна – хаҫат ӗҫне чунпа парӑннӑ ҫын. Вӑл кунта 2000 ҫултанпа ӗҫлет: «Чӑваш хӗрарӑмӗ» хаҫат корреспонденчӗ, «Хыпар» хаҫат тишкерӳҫи пулнӑ, 2021 ҫултанпа – шеф-редактор».

Ирина Клементьева Чӑваш патшалӑх университетӗнчен вӗренсе тухнӑранпах «Хыпарта» ӗҫлет. «Хӑйӗн статйисенче политика, вырӑнти хӑй тытӑмлӑх, ял аталанӑвӗн ыйтӑвӗсене ытларах хускатать. Унӑн тӗпчевӗсем тӗрлӗ шайри конкурссенче мала тухаҫҫӗ. Паян вӑл «Хыпар» хаҫат содержани тӗлӗшӗнчен пуян та тулли пултӑр тесе тӑрӑшать. Ӗҫтешӗмӗр ҫакӑн пек пысӑк чыса тивӗҫнӗшӗн эпир, «Хыпар» издательство ҫурчӗн коллективӗ, чунтан савӑнатпӑр», — тенӗ издательство ҫурчӗн директорӗ - тӗп редакторӗ Дмитрий Моисеев.

Малалла...

«Контактри» сӑн

Шупашкар округӗн пуҫлӑхне Владимир Михайлова Хисеп хучӗпе чысласси пирки хушӑва ЧР Элтеперӗ Олег Николаев паян алӑ пуснӑ. Ӑна ҫак сумлӑ хутпа вырӑнти хӑйтытӑмлӑх аталанӑвне тӳпе хывнӑшӑн тата нумай ҫул тӳрӗ кӑмӑлпа ӗҫленӗшӗн наградӑлама йышӑннӑ.

Владимир Михайлов – 39 ҫулта, вӑл Шупашкар округне 2023 ҫулхи чӳк уйӑхӗнченпе ертсе пырать. Унччен, 2020-2023 ҫулсенче, Тӑвай районӗн пуҫлӑхӗ пулнӑ.

Владмир Михайлов Тӑвай районӗнчи Вӑрманхӗрри ялӗнче 1987 ҫулта ҫуралнӑ. 2009 ҫулта И.Я.Яковлев ячӗллӗ Чӑваш патшалӑх педагогика университетӗнчен вӗренсе тухнӑ. Унта вӑл «Технологи тата предпринимательлӗх» специальноҫпе вӗреннӗ. Муниципалитет службине киличчен «Электросбыт» тулли мар яваплӑ обществӑра директор ҫумӗ пулнӑ.

https://chuvgpu.ru сайтӗнчи сӑн ӳкерчӗк

Юпа уйӑхӗн варринче чӑвашри паллӑ философ, педагог, шкулпа ӑслӑлӑх ертӳлӗхӗнче вӑрах ӗҫлесе палӑрнӑ тӑрӑшуллӑ та тӑнлӑ ҫын — Шӑмӑршӑ енчи Курнавӑш каччи Герольд Никифорович Плечов тӗпчевҫӗ 90 ҫул тултарнине паллӑ турӗ. Вӑл Чӑваш педагогика институтӗнче вӗреннӗ, кайран унтах вӗрентнӗ, аслӑ ҫыннӑмӑр Иван Яковлев пурнӑҫӗпе пултарулӑхне никам пек мар тимлӗн тӗпчесе кӗнекесем кӑларнӑ. Ун ӗҫӗсене пичете хатӗрленӗ.

Иван Яковлев ячӗллӗ Чӑваш патшалӑх педагогика университечӗ Герольд Плечов яковлевҫӑ юбилейӗ тӗлне паха курав йӗркеленӗ, пысӑк конфереци ирттернӗ.

Ватӑ тӗпчевҫе чысласа Раҫҫей философӗсен обществин Чӑваш уйрӑмӗнче — «София шкулӗ» клубра — ирӗклӗ калаҫу ирттернӗ. Студент-философсем хӑйсен аслӑ тусӗн кӗнекисене вулаҫҫӗ. Яшсемпе пӗрле эпӗ те — иртнине аса илсе — ӑна ӑшшӑн саламлатӑп.

Г.Н. Плечов сӑнне-ятне философ-ӑсчахсен пӗрлӗх кӗнекине туллин кӗртме палӑртнӑ.

zolotoyvityaz.ru сӑнӳкерчӗкӗ

«Чӑваш Ен» патшалӑх телерадиокомпанийӗнче ӗҫлекенсем хисеплӗ ята тивӗҫнӗ.

«Культура, телерадиовещани енӗпе тӑрӑшса тата нумай ҫул тухӑҫлӑ ӗҫленӗшӗн» асӑннӑ учреженири икӗ ҫынна «Чӑваш Республиикн культурӑн тава тивӗҫлӗ ӗҫченӗ«» ят пама йышӑннӑ. Вӗсем: Лидия Белокудренко тата Наталия Егорова.

Лидия Николаевна — телевиденипе радиовещанин информаципе тематика программисен службин информаципе тематика вещанийӗн пайӗн шеф-редакторӗ, Наталия Александровна — асӑннӑ пайӑн ятарлӑ корреспонденчӗ.

Чӑваш Ен радиовне йӗркеленӗренпе кӑҫал 100 ҫул ҫитнӗ, Чӑваш телевиденийӗ вара 65-ре. Ҫавна май уява ҫитес эрнере, юпа уйӑхӗн 23-мӗшӗнче, Чӑваш патшалӑх филармонийӗнче ирттерме палӑртнӑ. Уяв программи 15 сехетре пуҫланӗ.

Ольга Тургайӑн халӑх тетелӗнчи страницинчен илнӗ сӑнӳкерчӗк

Ольга Тургая Чӑваш Республикин Хисеп грамотипе наградӑлама йышӑннӑ. Хушӑва республика Элтеперӗ Олег Николаев ӗнер, юпа уйӑхӗн 15-мӗшӗнче, алӑ пуснӑ.

Ольга Николаевна – «Чӑваш Ен» патшалӑх телерадиокомпанийӗнче радиовещани пайӗнче шеф-редактор пулса ӗҫлет.

Вӑл 1963 ҫулта Свердлов облаҫӗнче Зюрзя разъездӗнче ҫуралнӑ. И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. «Хатӗр пул» журналта, «Коммунизм ялавӗ» хаҫатра, «Ялав» журналта, Чӑваш Республикин Кӗнеке палатинче, телевиденире ача-пӑчапа ҫамрӑксен программисен аслӑ редакторӗ пулса та ӗҫленӗ.

Ольга Тургай — прозаик, публицист, драматург. Унӑн пьесисемпе республикӑри театрсенче спектакльсем лартаҫҫӗ. Вӑл — темиҫе кӗнеке авторӗ.

cheb-centr.soc.cap.ru сӑнӳкерчӗкӗ

Паян Шупашкарта 101 ҫулти тухтӑра саламланӑ. Михаил Сорокин тахҫанах тава тивӗҫлӗ канура-ха. Анчах вӑл травматологра ӗҫленине унӑн вӗренекенӗсем тата пӗрле тӑрӑшнисем паян та асра тытаҫҫӗ. Вӑл Хусанти медицина институтӗнчен вӗренсе тухнӑ. 1959-1991 ҫулсенче Шупашкар хулинче тӗп травматолог пулса тӑрӑшнӑ.

Михаил Григорьевича черетлӗ сумлӑ ҫуралнӑ кунпа саламлама хулари тӳре-шара тата Шупашкар хулинчи халӑхӑн социаллӑ ыйтӑвӗсене тивӗҫтрекен комплекслӑ центртан пырса ҫитнӗ.

Михаил Григорьевич патне Владимир Путин Президентӑн саламлӑ открыткине те ҫитернӗ. Тата, паллах, чечек ҫыххи тата асӑнмалӑх парне парнеленӗ.

Ватӑ ҫын хӑнасене ӑспа-тӑнпа, ура ҫинче кӗтсе илнӗ, иртни ҫинчен те каласа кӑтартнӑ.

Чӑваш патшалӑх аграри университетӗнче ҫак аслӑ шкула 20 ҫул ытла ертсе пынӑ Николай Кириллова халалласа астӑвӑм хӑми уҫнӑ.

Ректор тивӗҫӗсене пурнӑҫлакан Надежда Алтынова Николай Кириллович аслӑ шкула ансат мар вӑхӑтра ертсе пынине, ял валли ҫӗр-ҫӗр лайӑх специалист хатӗрленине палӑртнӑ.

Николай Кириллов Вӑрнар районӗнчи Авруй ялӗнче 1948 ҫулхи юпан 7-мӗшӗнче ҫуралнӑ. Чӑваш патшалӑх ял хуҫалӑх институтӗнче вӑл 1980 ҫулта анатомипе физиологи кафедринче доцентра ӗҫлеме пуҫланӑ. 1989 ҫултанпа вӗренӳ ӗҫӗ енӗпе проректор пулнӑ. 1995 ҫулта доктор диссертацине хӳтӗленӗ.

Николай Кириллович аслӑ шкула 21 ҫул ертсе пынӑ: 1991 ҫултан пуҫласа 2012 ҫулччен. Вӑл 2024 ҫулхи юпа уйӑхӗн 8-мӗшӗнче пурнаҫран уйрӑлнӑ.

«Контактри» сӑн

Тӗлӗнмелле паттӑр вӑл – Николай Горшков. 26-мӗш пушар чаҫӗнче водительте ӗҫлекенскер 18 ҫулти хӗре пушарта ҫӑлнӑ.

Ҫав кунхине унӑн канмалли кун пулнӑ. Ялта пушар тухни пирки пӗлтерсен вӑл пӗр тӑхтамасӑр инкек вырӑнне чупса ҫитнӗ.

Унта ӑна пӑлханса ӳкнӗ хӗрарӑм кӗтсе илнӗ, вӑл пӳртре хӗрӗ юлнине, вал унтан тухайманнине каланӑ. Ҫакна пӗлсен Николай Горшков ӗҫтешӗсем килессе кӗтсе тӑман – тӗтӗмлӗ ҫурта кӗрсе хӗре ҫавӑтса тухнӑ.

«Контактра» халӑх тетелӗнчи сӑн

Ҫӗнӗ Шупашкар хулинче пурӑнакан тыл ӗҫченӗ Галина Лаптенкова 95 ҫул тултарнине уявланӑ.

Вӑл Ҫӗмӗрле районӗнчи Турхан ялӗнче ҫуралнӑ.

Шкула кӳршӗ Хутарти шкула вӗренме ҫӳренӗ. Шкул хыҫҫӑн вара Калининӑри педучилищӗре пӗлӳ илнӗ. Педагогика институтӗнче физикӑпа математика факультетӗнче вӗренсе диплом илсен вӑл Приморье тӑрӑхне тухса кайнӑ. Анчах вӑхӑт иртсен тӑван тӑрӑхнех таврӑннӑ, пурнӑҫне педагогикӑна халалланӑ.

Галина Лаптенкова мӑшӑрӗпе 54 ҫул пурӑннӑ. Вӗсем Ҫӗнӗ Шупашкарта тӗпленнӗ, виҫӗ ывӑл ҫуратса вӗсене ура ҫине тӑратнӑ.

Галина Романовна – тыл ӗҫченӗ. Вӑрҫӑ ҫулӗсенче ырми-канми тӑрӑшса ӗҫленӗшӗн вӑл тӗрлӗ медале тивӗҫнӗ.

«Контактри» сӑн

Чӑваш Республикинчи ҫамрӑк усламҫӑ Пӗтӗм Раҫҫейри конкурсра палӑрнӑ, ҫӗнтерӳҫӗсен йышне лекнӗ. Ӑна Мускавра иртнӗ «Ылтӑн кӗркунне» куравра чысланӑ.

Сӑмах – Хӗрлӗ Чутай округӗнчи Светлана Михопарова пирки. Светлана «АПКри хӗрарӑмсем» конкурсра 3-мӗш вырӑна тухнӑ.

Вӑл Хӗрлӗ Чутай тӑрӑхӗнче «Санккино» сыр савучӗ уҫнӑ, ӑна ертсе пырать. Предприятире талӑкра 25 тонна сӗтрен продукци хатӗрлеҫҫӗ. Пӗр уйӑхра «Санккино» туса кӑларнӑ 80 тонна сыр тӗрлӗ региона ӑсанать.

Сӑмах май, ҫамрӑк усламҫӑ вырӑнти шкула та пулӑшать. Пурӑна киле Светлана Михопарова савутра ӗҫлекенсене пурӑнмалли кӗтеспе тивӗҫтересшӗн.