chgign.ru сӑнӳкерчӗкӗ

Филологи наукисен кандидачӗ Станислав Александров (Убасси) пурнӑҫран уйрӑлса кайнӑ. Ку хыпара ҫак йӗркесен авторӗ Чӑваш патшалӑх гуманитари ӑслӑлӑхӗсен сайтӗнче паян курчӗ. Хыпара тӑватӑ кун каяллах, ҫурла уйӑхӗн 21-мӗшӗнче, вырнаҫтарнӑ.

Асӑннӑ институтра Станислав Алексеевич 1985–1987, 1989–1992 ҫулсенче литература пайӗн аслӑ ӑслӑлӑх ӗҫченӗ, 2017–2018 ҫулсенче редакципе издательство пайӗн заведующийӗн заместителӗ пулса тӑрӑшнӑ.

Станислав Алексеевич А.Н. Горький ячӗллӗ Тӗнче литературин институтӗнчӗн аспирантуринчен вӗренсе тухнӑ.

cap.ru сайтри сӑн

Ҫӗмӗрле хулинче ҫуралса ӳснӗ хӗр ТНТ каналпа пыракан «Погоня» ятлӑ кӑларӑма хутшӑнать.

Сӑмах — Катерина Решнова пирки. Вӑл — актриса тата телеертӳҫӗ. Чылайӑшӗ ӑна «The Телки», «Девушки с Макаровым» тата ытти сериалта курма пултарнӑ. Хальхи вӑхӑтра вӑл «Утро. ТНТ» кӑларӑм ертсе пырать.

«Погоня» кӑларӑмра пирӗн ентеш ыттисемпе пӗрле экстремаллӑ условисенче укҫа ҫӗнсе илессишӗн кӗрешет. Катерина ҫак шоу ӑна самантлӑха ачалӑха таврӑнма, вӑйӑсене аса илме май пуррипе илӗртнине палӑртнӑ.

cap.ru сайтри сӑн

И.Я.Яковлев ячӗллӗ Чӑваш патшалӑх педагогика университечӗн ют чӗлхесен факультетӗнчен вӗренсе тухнӑ Юлия Максимова карьеринчи пӗрремӗш кунсенчех ЧР Элтеперӗн Олег Николаевӑн куҫаруҫи пулнӑ.

Юлия ҫак кунчене Хусанта иртнӗ «Ростки: Россия и Китай – взаимовыгодное сотрудничество» Пӗтӗм тӗнчери форумра ӗҫленӗ. Унта вӑл Чӑваш Ен тата Китай партнерӗсен калаҫӑвӗнче куҫаруҫӑ пулнӑ.

Юлия кун валли пӗр уйӑх хатӗрленнӗ: терминсене вӗреннӗ, Администрацири ӗҫтешӗсенчен консультаци илнӗ. «Чӗлхене пӗлни кӑна мар, стреслӑ лару-тӑрура хӑвна алӑра тытни те пӗлтерӗшлӗ», - тенӗ вӑл.

Телеграмри «Пуринчен малтан» каналта вырнаҫтарнӑ сӑнӳкерчӗк

Шупашкара Валерия Ланская актриса тата юрӑҫ килнӗ. Кун пирки Телеграмри «Пуринчен малтан» каналта паян хыпарланӑ.

Хӗрарӑм Чӑваш Енӗн вӗрентӳ ӗҫченӗсен августри конференцине хутшӑннӑ иккен. Валерия Ланская Раҫҫейри «Знание» обществӑн лекторӗ шутланать.

Валерия ҫемьере мӗне мала хумалли, ҫемье телейӗ мӗнрен тӑни пирки каласа кӑтартнӑ. Ачана тӗрлӗ енлӗ аталантармаллине палӑртса хӑварнӑ.

Валерия палӑртса хӑварнӑ тӑрӑх, унӑн ывӑлӗ тенниспа, гимнастикӑпа, музыкӑпа кӑсӑкланать иккен. Унсӑр пуҫне программӑлама хӑнӑхать тата акӑлчан чӗлхине ҫине тӑрса вӗренет.

Геннадий Дегтярёв чӗлхеҫе хисеплӗ ят панӑ. Вӑл «Чӑваш Республикин вӗрентӗвӗн тава тивӗҫлӗ ӗҫченӗ» ята тивӗҫнӗ. Ҫапла пӗлтерет «Пуринчен малтан» телеграм-канал.

Геннадий Анатольевич — Чӑваш патшалӑх гуманитари ӑслӑлӑхӗсен институчӗн ертсе пыракан ӑслӑлӑх ӗҫченӗ, филологи ӑслӑлӑхӗсен кандидачӗ. Халӗ ав ӑна сумлӑ ятпа чысланӑ.

Хушӑва Чӑваш Республикин Элтеперӗ Олег Николаев алӑ пуснӑ.

«Контактри» сӑн

Шупашкарта ӳснӗ мусӑкҫӑ тата актер Кирилл «Батишта» Петров ТНТпа кӑтартакан «Знахарь» сериалта ӳкерӗннӗ. «Батиштӑна» ытларах «Банд’Эрос» ушкӑн юрӑҫи пек пӗлеҫҫӗ. Юлашки вӑхӑтра вара вӑл тӗрлӗ сериалта тата фильмра ӳкерӗнет. Актер Шупашкарта тахҫантанах пулманнине пытарман.

«Хальччен Шупашкар палламалла мар улшӑннӑ ахӑртнех. Ҫӗнӗ кӑнтӑр районӗ, уйрӑмах Хусанкай урамӗ, яланах манӑн чӗрере. Унта манӑн ачалӑх иртнӗ, унта эпӗ пултарулӑхри пӗрремӗш утӑмсене тунӑ», — ҫапла пӗлтернӗ актер.

Лидия Филиппова страницинчен илнӗ сӑнӳкерчӗк

Ку хыпара ҫак йӗркесен авторӗ ӑнсӑртран, халӑх тетелӗнчи хыпартан пӗлчӗ.

Тӗрӗссипе, хыпарӗ пачах урӑххи ҫинчен. Унта Лидия Филиппова ҫыравҫӑ Канаш районӗнчи Малтикас ялӗнче тӗрлӗ вӑрҫӑра пуҫ хунӑ ентешӗсене асӑнса та сума суса палӑк уҫни пирки хӑпартланса та хавхаланса пӗлтернӗ, ырӑ ӗҫе хутшӑннисене тав тунӑ. Пӗр предложенипе вара хӑйне «Малтикас ялӗн хисеплӗ гражданинӗ» ят панӑшӑн ентешӗсене тав тунӑ.

Лидия Филиппова — писатель, поэт, журналист, публицист, филологи наукисен кандидачӗ, Нестер Янкас премийӗн лауреачӗ. Унӑн литературӑри псевдонимӗсем: Амина Турхан, Алла Давыдова, Лида Ригель.

Канӑҫсӑр чунлӑ хастар тӑван чӗлхемӗршӗн, тӑван тӑрӑх аталанӑвӗшӗн, сумлӑ ентешсене тивӗҫлипе асра тытассишӗн чылай ӗҫ туса ирттерет.

vk.com/chnmuseum сӑнӳкерчӗкӗ

Чӑваш Ен наци музейӗнче Совет Союзӗн Геройӗн Александр Боголюбов генерал-полковникӑн мӑнукӗ Александр Боголюбов пулнӑ.

Музейра пӗлтернӗ тӑрӑх, Чӑваш Ене вӑл арӑмӗпе, хӑйӗн аслашшӗн муралне уҫнӑ ҫӗре килнӗ. Геройӑн сӑнӳкерчӗкне Шупашкарти Трактор тӑвакансен проспектӗнчи 17-мӗш ҫуртӑн 25-мӗш корпусӗ ҫине ӳкерсе хунӑ.

Чӑваш наци музейӗнче Александр Боголюбовпа ҫыхӑннӑ пуян материалсем упранаҫҫӗ иккен. Мухтавлӑ ентешӗмӗр ҫуралнӑранпа кӑҫал 125 ҫул ҫитнӗ.

Александр Боголюбов генерал-полковникпа мӑшӑрӗ Ирина Николаевна пӗр ывӑл ҫуратса ӳстернӗ. Вӑл Сергей ятлӑ. Сергей Александрович профессор 88-та пулин те ӗҫлет. Унӑн вара виҫӗ ывӑл. Асли, аслашшӗ ячӗлли, Александр Сергеевич — биолог, эколог, географ, биологи наукисен кандидачӗ. Унӑн арӑмӗ те Чӑваш Енрен.

"Контактри" сӑн

ВТБ банк менеджерӗ Михаил Осипов тивӗҫлӗ канури арҫынна ултавҫӑсене 7 миллион тенкӗ куҫарса парасран ҫӑлнӑ.

Ӗҫ-пуҫ ҫапла пулнӑ. Ватӑ арҫын банка пырса пухнӑ укҫине йӑлтах, процентсем ҫухалнине пӑхмасӑр, илесшӗн пулнӑ. Хӑй питӗ пӑлханнӑ. Менеджер сисчӗвленнӗ, пӗр иккӗленмесӗр полици чӗннӗ.

Кайран ҫакӑ паллӑ пулнӑ: ватӑ арҫын ҫӗрӗпе «ятарлӑ службӑсен» ӗҫченӗсемпе калаҫнӑ-мӗн. Лешсем унӑн укҫи хӑрушлӑхра пулнине, ӑна часрах «хӑрушсӑр счет» ҫине куҫармаллине ӗнентернӗ.

Михаил Осипова шалти ӗҫсен министрӗн тивӗҫӗсене пурнӑҫлакан Иван Языковӑн Тав хучӗпе чысланӑ.

«Контактри» сӑн

Хӗрлӗ Чутай округӗнчи Денис Лобастов ача чухнех вӗлле хурчӗсемпе кӑсӑкланнӑ. Халӗ вара ку унӑн ӗҫӗ те, чун киленӗҫӗ те пулса тӑнӑ.

Паянхи кун Денис 250 вӗлле тытать. Унӑн 6 утарӗ Сӑр юханшывӗ хӗрринче вырнаҫнӑ. Кунсӑр пуҫне вӑл Хӗрлӗ Чутайра, Етӗрнере, Шупашкарта лавккасем тытать.

Денис ҫӗнӗ тухнологисемпе усӑ курать. Вӑл вӗлле хурчӗсене ҫӑка пылӗ тума та «вӗрентет», дрессировка тӑвать. Лайӑх сӗнӳ парать вӑл: сахӑра пылпа улӑштармалла, шывра пыл ирӗлтерсе ӗҫмелле.