chgtrk.ru видеовӗнчен илнӗ скриншот

Калмӑк Республикинче пурӑнакан пирӗн ентеш Петр Леонтьев 100 ҫулхи юбилейне паллӑ тунӑ. Кун пирки Чӑваш Енӗн патшалӑх телерадиокомпанийӗн сюжетӗнче пӗлтернӗ.

Вӑрҫӑ ветеранӗ Ҫӗрпӳ районӗнчи (халӗ — Шупашкар районӗнчи) Шорти Марка ялӗнче ҫуралса ӳснӗ.

1943-мӗш ҫулта вӑл салтак атти тӑхӑннӑ. Аслӑ Ҫӗнтерӗве Берлинта кӗтсе илнӗ.

Петр Леонтьев Сталинград ГЭСне тунӑ ҫӗрте те тӑрӑшнӑ, Элистари нимӗҫсем аркатнӑ университет ҫуртне юсама та хутшӑннӑ. Унтах ҫемье ҫавӑрса пӗр ывӑл ура ҫине тӑратнӑ.

forum.na-svyazi.ru сайтран илнӗ сӑнӳкерчӗк

Ӗнер, юпа уйӑхӗн 7-мӗшӗнче, хӑй вӑхӑтӗнче Шупашкарти электроаппаратура завочӗн гендиректорӗнче ӗҫленӗ Алексей Ильбеков вилнӗ. Вӑл хӗрӗх ҫулта ҫеҫ пулнӑ.

Мускаври автотранспорт институтӗнче вӗреннӗ. Хӑйӗн карьерине Шупашкарти агргат заводӗнче токарьтен пуҫланӑ. 10 ҫул хушшинче вӑл производство пуҫлӑхне ҫитнӗ. Кайран «Трактор заводчӗсем» концернта, «Сарэкс», «Четра – Промышленные машины» заводсенче ӗҫленӗ. 2021-2023 ҫулсенче вӑл электроаппаратура завочӗн гендиректорӗ пулнӑ. Ытти вырӑнта та пысӑк должноҫсенче тӑрӑшнӑ. Юлашки вӑхӑтра «ВНИИР-Прогресс» обществӑн гендиректорӗн ҫумӗ пулнӑ.

3-меш лицейӑн халӑх тетелӗнчи страницинчен илнӗ сӑнӳкерчӗк

Шупашкарти 3-мӗш лицейра ӗҫлекен Маргарита Степанова «Чӑваш Республикин халӑх учителӗ» ята тивӗҫнӗ. Маргарита Ивановна педагогика тата ачасене воспитани парас ӗҫре чылай ҫул тухӑҫлӑ ӗҫлет-мӗн. Ҫавӑнпа ӑна Чӑваш Ен Элтеперӗ ҫапла хавхалантарас тенӗ.

Маргарита Ивановна Тутарстанри Черемшан вырӑс ялӗнче 1945 ҫулхи раштав уйӑхӗн 24-мӗшӗнче ҫуралнӑ. Ашшӗ шофер пулнӑ, амӑшӗ — вырӑс чӗлхипе литература учителӗ. Хӗрача амӑшӗ пекех педагог ӗҫне суйласа илес тенӗ. Хусанти педагогика институтӗнчен вӗренсе тухнӑ.

cheb-centr.soc.cap.ru сӑнӳкерчӗкӗ

Левтина Марье (Алевтина Нестерова) ҫыравҫӑ Шупашкар хулинчи ватӑсем валли хӑйӗн кӗнекисене парнеленӗ. Ӑна вӑл хулари халӑхӑн социаллӑ ыйтӑвӗсене тивӗҫтерекен комплекслӑ центра пырса панӑ.

Центр ӗҫченӗ Татьяна Ильина каласа кӑтартнӑ тӑрӑх, ҫыравҫӑ хӑйӗн пӗрремӗш пьесине 11 ҫулта чухне ҫырнӑ та унтанпа алла калем тытмасӑр пурӑнман.

Ҫыравҫӑ парнеленӗ «Три солнышка», «Цыганская кровь», «Театр - манӑн шӑпа» тата ытти кӗнекене центрӑн социаллӑ ӗҫченӗсем вулама юратакан ватӑсем патне ҫитерсе парӗҫ.

vk.com/dramteatr21 сӑнӳкерчӗкӗ

Чӑваш патшалӑх академи драма театрӗн артисчӗ Евгений Урдюков театр ӳнерне аталантарас ӗҫе курӑмлӑ тӳпе хывнӑшӑн тата пултарулӑх ӗҫӗнче тухӑҫлӑ тӑрӑшнӑшӑн Чӑваш Республикин Элтеперӗн Тав хутне тивӗҫнӗ.

Ҫак маттур артист Шӑмӑршӑ районӗнчи Ҫӗнӗ Чӗпкас ялӗнче 1989 ҫулта ҫуралнӑ. 2011 ҫулта вӑл Чӑваш патшалӑх культурӑпа ӳнер инстиутутӗнчен вӗренсе тухнӑ та эпир маларах асӑннӑ театрта ӗҫлеме пуҫланӑ.

cheb-centr.soc.cap.ru сӑнӳкерчӗкӗ

Шупашкарта пурӑнакан 99 ҫулти ватӑ, вӑрҫӑ ветеранӗ,нумай ҫул тухтӑр пулса ӗҫленӗ, тӗп врач та пулнӑ Михаил Сорокин паян та вулавӑша ҫӳреме юратать.

Михаил Григорьевича библиотекӑна хӑй тӗллӗн кайса килме йывӑртарах. Ҫавӑнпа ӑна хулари халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем илсе кайса килнӗ.

«Ӑслӑ, пурне те астӑвакан ҫынпа вӑхӑта ирттерме мана питех те кӑҫӑклӑ пулчӗ», — каласа кӑтартнӑ центр специалисчӗ Татьяна Васильева.

«Контактри» сӑн

«Пуринчен малтан» телеграм-канал пӗлтернӗ тӑрӑх,Ҫӗмӗрле округӗн «Вперед» хаҫачӗн тӗп редакторне сумлӑ ятпа чысланӑ. Анна Аношина Чӑваш Республикин культурӑн тава тивӗҫлӗ ӗҫченӗн ятне тивӗҫнӗ. Хушӑва Чӑваш Республикин Элтеперӗ Олег Николаев алӑ пуснӑ.

Анна Аношкина район хаҫатне 2017 ҫултанпа ертсе пырать. Издательство ӗҫӗнче вӑл 2006 ҫултанпа вӑй хума тытӑннӑ. Хӑйне пултаруллӑ йӗркелӳҫӗ пек кӑтартса Анна Аношкина ертӳҫӗ должноҫӗ таран ҫитнӗ. Сӑмах май, вӑл пӗлтӗр Мускавра Владимир Путин президентӑн пресс-конференцине хутшӑннӑ.

Чӑваш академи драма театрӗн сӑнӳкерчӗкӗ

Паян Иван Мучи актер, писатель-сатирик ҫуралнӑранпа 130 ҫул ҫитнӗ. Кун пирки Чӑваш патшалӑх академи драма театрӗ халӑх тетелӗнчи хӑйӗн страницинче аса илтерет.

«Иван Мучи – Иван Илларионов ҫыравҫӑн хушма ячӗ. Пурнӑҫ ҫулӗ вӑрӑмах пулман унӑн. Апла пулин те ячӗ-сумӗ халӑхра, республика пичетӗнче лайӑх ҫирӗпленсе юлнӑ.

Граждан вӑрҫи хыҫҫӑн вӑл Хусанти пӗрремӗш чӑваш театрӗнче артист пулса ӗҫленӗ. 1922 ҫулта театрпа пӗрле Шупашкара куҫса килнӗ. Пӗр вӑхӑт «Канаш» хаҫат редакцийӗнче вӑй хунӑ. И.Мучи чӑвашсен сатира журналне, «Капкӑна», пуҫласа яраканӗ», — аса илтернӗ хыпарта.

cheb-centr.soc.cap.ru сӑнӳкерчӗкӗ

Шупашкарта пурӑнакан Вера Ятманова паян 102 ҫул тултарнӑ. Кинемее ҫав ятпа Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн ӗҫченӗсем саламланӑ. Юлашки вӑхӑтра кинемее асӑннӑ учрежденин социаллӑ ӗҫченӗ киле пырса пулӑшса тӑрать.

Вера Ятманова Етӗрне районӗнче ҫуралнӑ. Вӑл вӑхӑтри нумай ҫын пек вӑрҫӑ вӑхӑтӗнчи тата ун хыҫҫӑнхи ҫулсенчи терте те курнӑ. Кайран, Ял хуҫалӑх институтӗнчен вӗренсе тухсан, зоотехникра ӗҫленӗ. Кайран вӗсем упӑшкипе Шупашкар куҫса килнӗ, кунта Электроаппаратура заводне ӗҫе вырнаҫнӑ.

Мӑшӑр икӗ хӗр ҫуратса ӳстернӗ. Паян ватӑ ҫынна мӑнукӗ тата мӑнукӗн икӗ ачи пӑхать, социаллӑ ӗҫчен вара пулӑшса тӑрать.

Халӗ ватӑ ҫын урама тухса ҫуреймест-ха, анчах хваттерте утса ҫӳрет. вӑй ҫитернӗ ӗҫе хӑех пурнӑҫлать.

vk.com/chansamble21 сӑнӳкерчӗкӗ

Ӗнер, авӑн уйӑхӗн 24-мӗшӗнче, Лолита Чекушкина композитор 60 ҫул тултарнӑ.

Лолита Васильевна 1972-1980 ҫулсенче С. Максимов ячӗллӗ ача-пӑча музыка шкулӗнче фортепиано класӗнче вӗреннӗ. Унтан Шупашкарти Ф. Павлов ячӗллӗ музыка училищинче тата Чулхулари М. Глинка ячӗллӗ патшалӑх консерваторийӗнче вӗреннӗ.

1989-2000 ҫулсенче Вырӑс драма театрӗнче музыка пайӗн заведующийӗнче тӑрӑшнӑ, преподаватель те пулса тимленӗ. Республикӑри тӗрлӗ культура учрежденийӗпе тачӑ ҫыхӑну тытса ӗҫлет, вӗсем валли кӗвӗ-ҫемӗ хайлать.