cap.ru сайтри сӑн

Ҫӗрпӳ округӗнчи Ҫитчарак ялӗнче пурӑнакан Римма Захаровӑна «Амӑшӗ-героиня» ята панӑ. Хушӑва РФ Президенчӗ Владимир Путин алӑ пуснӑ.

Римма Николаевнӑпа Леонид Иванович 10 ача ӳстернӗ: 6 ывӑл тата 4 хӗр. Виҫҫӗшӗ вӗренеҫҫӗ-ха, ыттисем вара ҫемье ҫавӑрса мӑнуксем парнеленӗ. Захаровсен пӗтӗмпе 13 мӑнук. Икӗ аслӑ ачи – нумай ачаллӑ, пӗр ывӑлӗ ятарлӑ ҫар операцине хутшӑнать.

Аса илтерер: «Амӑшӗ-героиня» ята тивӗҫнисене 1 миллион тенкӗ параҫҫӗ.

Чӑваш Ен ПТРК видеовӗнчен илнӗ сӑнӳкерчӗк

Тутарстанри Сиктӗрмере Петӗр Хусанкай ҫуралса ӳснӗ ҫурт вырӑнӗнче ҫӗнӗ пӳрт лартӗҫ. Вӑл авалхи пӳрт пек пулӗ. Унта музей уҫӗҫ.

Чӑваш Енӗн патшалӑх телерадиокомпанийӗн журналисчӗ Алексей Енейкин пӗлтернӗ тӑрӑх, «ку вырӑнта тахҫан малтан Петӗр Хусанкай пурӑннине ҫак чул ҫинчи плитана вуласа пӗлме пулать. Ӑна вырнаҫтариччен поэт ҫурчӗ пулнӑ тӗле килен-каян ҫак ятарласа лартнӑ чӑрӑш тӑрӑх пӗлнӗ. Ҫывӑхри хыр йывӑҫӗ вара кунта сӑвӑҫ пурӑннӑ чухнех ӳснӗ».

Сиктӗрме ялӗнчи Иван Казанков аслӑ поэт ҫуртне ҫӗнетмеллех тесе шутланӑ май унта ӗлӗкхи ҫурта аса илтерекен кивӗ пура лартнӑ. Ӑна кӑҫалах туса пӗтерсе пӳртре Хусанкай музейне уҫма палӑртаҫҫӗ.

К.В. Иванов ячӗллӗ вулавӑш сӑнӳкерчӗкӗ

Юпа уйӑхӗн 14-мӗшӗнче Шупашкарти Константин Иванов ячӗллӗ Литература музейӗнче Алексей Афанасьев ҫыравҫӑ /1925–1985/ ҫуралнӑранпа 100 ҫул ҫитнине халалланӑ литературӑпа музыка уявӗ иртнӗ.

Вулавӑшӑн халӑх тетелӗнчи пабликӗнче хыпарланӑ тӑрӑх, ҫыравҫӑ Тутарстанри Потап-Тӑмпӑрлӑ чӑваш ялӗнче ҫуралса ӳснӗ. Вырӑсла, удмуртла, тутарла лайӑх пӗлнӗ, ҫамрӑк чухне шкул ачисене удмурт чӗлхине вӗрентнӗ.

Мероприятие Литература музейӗн наука ӗҫченӗ Галина Еливанова ертсе пынӑ. Вӑлах пухӑннисене ҫыравҫӑн пурнӑҫӗпе тата пултарулӑхӗпе кӗскен паллаштарнӑ.

Мероприятие писательсемпе журналистсем, юрӑҫсем, Алексей Андрияновичӑн тӑванӗсем пуҫтарӑннӑ. Ҫыравҫӑн хӗрӗ Лира Белякова ашшӗне ӑшӑ сӑмахсемпе аса илнӗ.

«Контактри» сӑн

Ҫӗрпӳ округӗнчи Паваркассинче пурӑнакан Александр Андреев 100 ҫул тултарнӑ.

Александр Андреевич Тӑван ҫӗршывӑн Аслӑ вӑрҫи ҫулӗсенче колхозра конюхра ӗҫленӗ. Кайран сысна пӑхнӑ. 1954, 1955, 1956 ҫулсенче «Республикӑри чи лайӑх сысна пӑхакан» ята тивӗҫнӗ вӑл. Кайран, иртнӗ ӗмӗрӗн 70-80-мӗш ҫулӗсенче, Александр Андреевич фермӑра ӗне сунӑ, «Цивиль» совхозра поварта та ӗҫленӗ. Унӑн чун киленӗҫӗ те пулнӑ — вӑл вырӑнти «Кӑмӑл» ансамбльте юрланӑ.

Юбилейра Александр Андреева РФ Президенчӗн Владимир Путинӑн саламлӑ открыткине парнеленӗ.

Чӑваш АССРӗн тава тивӗҫлӗ тухтӑрӗ Михаил Сорокин паян 100 ҫул тултарнӑ. Вӑл травматологи уйрӑмне 51 ҫул ертсе пынӑ.

Михаил Сорокин Вӑрмар районӗнчи Эҫпепе ялӗнче ҫуралса ӳснӗ. Тӑван ҫӗршывӑн Аслӑ вӑрҫи вӑхӑтӗнче вӑл Сӑр юханшывӗ хӗррине окоп чавма кайнӑ. Кайран ӑна фронта илнӗ. Пӗр ҫапӑҫу унӑн шухӑшне тӗпрен улӑштарнӑ – вӑл пурнӑҫне медицинӑпа ҫыхӑнтарма палӑртнӑ. Вӑрҫӑран таврӑнсан Михаил Григорьевич Хусанти мединститутра вӗреннӗ, унтан – Ленинградри аслӑ шкулта.

«Контактри» сӑн

Сӗнтӗрвӑрри округӗнчи Карапаш ялӗнче пурӑнакан Любовь Сударкина 100 ҫулхи юбилейне паллӑ тунӑ.

Тӑван ҫӗршывӑн аслӑ вӑрҫи вӑхӑтӗнче вӑл колхозра ӗҫленӗ. Вӑрҫӑ пӗтсен вӗренес тесе агроном специальноҫне илнӗ, кайран вара педагогикӑна ӗҫлеме куҫнӑ. Ҫапла вӑл биологипе хими учителӗнче 30 ҫул ытла вӑй хунӑ.

Студент чухне Любовь Филипповна Апполон ятлӑ ҫар ҫыннине килӗштернӗ. Каччӑ Балтика флотӗнче службӑра тӑнӑ, хӗр вара ӑна 5 ҫул кӗтсе пурӑннӑ. Ҫулталӑкран ҫамрӑксем ҫемье ҫавӑрнӑ. Вӗсем 43 ҫул пӗрле пурӑннӑ, ҫурт лартнӑ, 3 ача ҫуратса ӳстернӗ. Халӗ Любовь Филипповнӑн — 6 мӑнук, 11 кӗҫӗн мӑнук.

vk.com/wall-228649350_151 сӑнӳкерчӗкӗ

Чӑваш академи драма театрӗнче ӗнер, юпа уйӑхӗн 11-мӗшӗнче, Тани Юна халалланӑ кинокаҫ иртнӗ.

Тани Юн — чӑвашсен пӗрремӗш актриси.

Театра пухӑннисем чӑваш кинематографине пуҫарса янин историйӗпе паллашнӑ, «Чӑвашкино» ӳкернӗ пӗрремӗш киносене пӑхнӑ.

Пухӑннисем умӗнче Алексей Киров тата Анна Мюресова тухса калаҫнӑ. «Священная роща», «Ял», «Страна Чувашская» киносене пӑхнӑ, вӗсене сӳтсе явнӑ.

cap.ru сӑнӳкерчӗкӗ

Юпа уйӑхӗн 15-мӗшӗнче Чӑваш Енӗн Наци вулавӗшӗнче Станислав Юхтар художникпа тӗлпулу иртӗ.

Вӑл — Чӑваш Республикин халӑх художникӗ, Нестӗр Янкас премийӗн лауреачӗ, Ҫеҫпӗл Мишши премийӗн лауреачӗ. Тӗлпулӑва художникӑн 65 ҫулхине халалланӑ.

Станислав Михайлов (Юхтар) 1960 ҫулхи чӳк уйӑхӗн 3-мӗшӗнче Ҫӗрпӳ районӗнчи Вӑрӑмҫут ялӗнче ҫуралнӑ. Чӑваш патшалӑх педагогика институтӗнчен вӗренсе тухнӑ хыҫҫӑн 40 ҫула яхӑн рисовани, ӗҫ, черчени учителӗнче тӗрлӗ ҫӗрте ӗҫленӗ, темиҫе шкулта директор пулса тимленӗ.

Станислав Николаевич — этнофутурист. Вӑл истори, культура темине, чӑваш мифологине юратать. Кӗнеке графикипе геральдика хайлавӗсен авторӗ.

archives21.rchuv.ru сӑнӳкерчӗкӗ

Паян, юпа уйӑхӗн 10-мӗшӗнче, Михаил Юрьев (Нямань) ҫуралнӑранпа 115 ҫул ҫитнӗ. Вӑл — писатель, поэт, драматург, литература критикӗ, библиограф, журналист, тӑлмачӑ, СССР журналистсен союзӗн членӗ, Чӑваш АССР тава тивӗҫӗ культура ӗҫченӗ.

Михаил Иванович Етӗрне уесӗнчи Ҫирӗклӗ ялӗнче (халӗ вӑл Красноармейски тӑрӑхне кӗрет) ҫуралнӑ.

Ҫамрӑклах «Хатӗр пул» журналӑн яваплӑ секретарӗ пулса тӑрӑшма тытӑннӑ. 1941 ҫулхи пуш уйӑхӗнче ӑна «Чӑваш коммуни» хаҫатӑн тӗп редакторӗн ҫумӗ пулма шаннӑ, анчах вӑрҫӑ пуҫлансан ӑна унта илсе кайнӑ. Унтан таврӑнсан та хаҫатра тата пичетпе ҫыхӑннӑ ӗҫре тӑрӑшнӑ.

chgtrk.ru видеовӗнчен илнӗ сӑнӳкерчӗк

Комосмольски районӗнчи «Кӗтне» ентешлӗх Каҫал тӑрӑхӗнче ҫуралнӑ сумлӑ ентешне, Куҫма Турхана, асра тытать. Вӑл Комсомольски тӑрӑхӗнчи Вӑрманхӗрри Чурачӑк ялӗнче ҫуралнӑ.

Паллӑ писатель тата прозаик ҫуралнӑранпа кӑҫалхи юпа уйӑхӗн 8-мӗшӗнче 110 ҫул ҫитнӗ. Ҫав ятпа ентешӗсем вилтӑприне йӗркене кӗртнӗ: тайӑлнӑ палӑка тӳрлетнӗ, саспаллисене сӑрланӑ, тӑпри ҫине никӗс хурса бетон плита сарнӑ. Писатель Карачурари 3-мӗш масар ҫинче ӗмӗрлӗх канӑҫне тупнӑ. Кун пирки Чӑваш Ен патшалӑх телерадикомпанийӗн журналисчӗ Алексей Енейкин телесюжетра пӗлтернӗ.

Куҫма Турханӑн «Сӗве Атӑла юхса кӗрет» романне пӗлмен чӑваш та ҫук пулӗ.