cap.ru сайтри сӑн

Пуйӑс-музей кӗҫех Шупашкара ҫитӗ. Тӑван ҫӗршывӑн вӑрҫине халалланӑ пуйӑс Раҫҫейӗпех ҫӳрет. Пирӗн пата вӑл ака уйӑхӗн 28-мӗшӗнче ҫитсе чарӑнӗ.

Пуйӑс – Тӑван ҫӗршывӑн вӑрҫине халалланӑ хӑйне евӗр курав. Унта шкул ачисем, студентсем кайса курма пултараҫҫӗ. Куракансене 10 сехетрен пуҫласа 20 сехетчен йышӑнаҫҫӗ.

Сӑмах май, ҫу уйӑхӗн 9-мӗшӗнче Шупашкарта Ҫӗнтерӳ парачӗ иртӗ. Репетици вӑхӑтӗне тӗп урамсемпе ҫӳрекен общество транспортне урӑх ҫулпа ярӗҫ. Парад кӑшӑлвируса пула ветерансемсӗр иртӗ.

allvag.ru сӑнӳкерчӗкӗ

Чӑваш Енӗн Экономика аталанӑвӗн тата пурлӑх хутшӑнӑвӗсен министерстви «Volkswagen Phaeton» автомобильсем сутассине пӗлтернӗ. Аукцион ҫу уйӑхӗн 27-мӗшӗнче ирхи 9 сехетре пуҫланӗ.

Асӑннӑ икӗ машинӑна республикӑна Михаил Игнатьев ертсе пынӑ вӑхӑтра туяннӑ. Ҫӗнӗ чухне пӗр машина хакӗ 8,5 миллион тенкӗпе танлашнӑ. Халӗ аукционти пуҫламӑш хака 847 пин тенкӗ пулӗ тесе палӑртнӑ.

Аукционта ытти машинӑна та сутӗҫ. Сӑмахран, 2007 ҫулта туса кӑларнӑ «Mersedes-Benz» автомобилӗн пуҫламӑш хакӗ — 852 пин тенкӗ, 2002 ҫулхи «ГАЗ 3102» — 24 пин, 2004 ҫулти «ВАЗ-21099» — 11 пин, «УАЗ 39629» санитари автомобилӗ — 15 пин, 1988 ҫулхи «ГАЗ-САЗ-3507» — 52,1 пин, 1996 ҫулхи «УАЗ-315-12» — 37,3 пин.

Унсӑр пуҫне «Амур-М» катера та сутасшӑн. Унӑн пуҫламӑш хакӗ — 23 пин тенкӗ. Вӑл ҫалавпа шырав службин балансӗ ҫинче тӑнӑ.

rustur.ru сайтри сӑн

Ака уйӑхӗн 20-мӗшӗнче Шупашкар районӗнчи агрофирма ертӳҫи полицие пырса нуши пирки каласа кӑтартнӑ. 32 ҫулти арҫын пӗлтернӗ тӑрӑх, ӑна ултавҫӑсем шӑнман пӑр ҫине лартса янӑ.

Вӑл тӗнче тетелӗнче сӗлӗ сутнине курнӑ, ӑна туянас тесе сутуҫӑ патне шӑнкӑравланӑ та калаҫса татӑлнӑ хыҫҫӑн 165 пин тенкӗ куҫарса панӑ. Анчах кун хыҫҫӑн вӑл тавара кӗтсе илеймен.

Ҫакӑн хыҫҫӑн ҫеҫ вӑл улталаннине чухланӑ, полицие кайнӑ. Ку тӗслӗх тӗлӗшпе пуҫиле ӗҫ пуҫарнӑ. Йӗрке хуралҫисем ҫав ҫын кам пулнине палӑртас тӗллевпе ӗҫлеҫҫӗ.

Ильдус Шаравдинов архивӗнчи сӑн

Иртнӗ канмалли кунсенче Шӑмӑршӑ районӗнчи «Чӑваш вӑрманӗ» наци паркӗнче чутах пушар тухман.

Ака уйӑхӗн 17-мӗшӗнче Ильдус Шаравдинов тата унӑн мӑшӑрӗ Татьяна Кучек поселокне тӑванӗсем патне ҫитнӗ. Кӑнтӑрла арҫын ашшӗпе пӗрле УАЗпа ҫӑлкуҫа шыв ӑсма кайнӑ. Ҫав вӑхӑтра унӑн мӑшӑрӗ инҫех мар уҫӑлса ҫӳренӗ, кун пирки вӑл упӑшкине пӗлтернӗ.

Хӗрарӑм сӑрт ҫинелле хӑпарса пӑхнӑ та курах кайнӑ: курӑк ҫунать. Вӑл кун пирки упӑшкине кӑшкӑрса пӗлтернӗ. Лешсем икӗ фляга шыв тултарса ҫулӑма сӳнтерме кайнӑ.

Юрать, ҫулӑм вӑйлах сарӑлса ӗлкӗреймен, вӗсем ӑна сӳнтернӗ. Пушар электролини юсавсӑрлӑхне пула тухнӑ. Ҫиле пула пралуксен изоляторӗ ӳкнӗ. 5 минут маларах ҫеҫ Ильдус ашшӗпе ҫав вырӑнтан иртсе кайнӑ, йӑлтах йӗркеллӗ пулнӑ. Вӑхӑтра тӗтӗм шӑршине туйни инкекрен ҫӑлнӑ.

Чӑваш Енре юлашки вӑхӑтра санитари авиацийӗ аталаннине Чӑваш халӑх сайтне вулакансем пӗлеҫҫӗ ӗнтӗ. Кая юлмасӑр пулӑшмалли чирлӗ ҫынсене республикӑн аякри районӗсенчен Шупашкарти пульницӑсене илсе килеҫҫӗ. Пӗр пациента Мускава та вертолетпа илсе кайнӑччӗ.

Чирлӗ ҫынна ҫитес ҫӗре вӑхӑтра илсе каяссишӗн яваплисем — пилотсем. Ҫавӑн пеккисенчен пӗри — Ирина Долинина. Вӑл – иккӗмӗш пилот.

Санитари вертолёчӗн иккӗмӗш пилотӗнче ӗҫлекен

Ирина Мускав тӑрӑхӗнче ҫуралнӑ. Омскри вӗҫев училищинче вӗреннӗ. Хальлӗхе Ирина 200 сехет ытла вӗҫме ӗлкӗрнӗ. Кӗҫех вӑл сывлӑш суднин командирӗ пулӗ. Ирина космонавтсен отрядне лекме ӗмӗтленет.

"Про Город" сайтӗнчен илнӗ сӑн

Николай Никитин ывӑлӗпе пӗрле «Шупашкар – Муркаш» маршрутпа пассажирсене илсе ҫӳреҫҫӗ. Вӗсем 2000-мӗш ҫул пуҫламӑшӗнче ӗҫлеме тытӑннӑ.

Ашшӗпе ывӑлӗ палӑртнӑ тӑрӑх, телей укҫара мар. Вӗсем кашни 5 ҫулта пассажирсене тӳлевсӗр ӗҫлемелли кун тӑваҫҫӗ. Хальхинче вӑл тӑваттӑмӗш хут иртнӗ. Ку акци паян пулнӑ. Ашшӗпе ывалӗ кунӗпех ҫынсене тӳлевсӗр илсе ҫӳренӗ. Пӗтӗмпе 61 рейс тунӑ, 20 автобус ҫӳренӗ.

Ашшӗпе ывӑлӗшӗн ку тӑкаклӑ, ҫапах ӳкӗнмеҫҫӗ вӗсем. Вӗсен маршручӗсемпе кунне вӑтамран 750-800 ҫын ҫӳрет.

Юнкӑра пурӑнакан Александра Викторова кӑмӑллӑ. Шупашкара кайса килме 140 тенкӗ кирлӗ. Тӳлевсӗр илсе ҫӳренӗ чухне вӑл маршрут хуҫине ҫӑкӑрлӑх укҫа куҫарса парса тав сӑмахӗ калать.

"Лиза Алерт" архивӗнчи сӑн

Хусанта пурӑнакан Юрий Варламович Кузнецов Вӑрмар районӗнчи Кивӗ Вӑрмар поселокне арӑмӗн вилтӑпри ҫине килнӗ те ҫухалнӑ. Килте вӑл виҫӗ кун ҫук ӗнтӗ.

Арҫын ака уйӑхӗн 18-мӗшӗнче килнӗ. Тепӗр икӗ кунран тӑванӗсем сехӗрленсе ӳкнӗ. Унӑн сывлӑхӗ те хавшакрах, ҫанталӑк та ав лайӑхах мар. Нимеҫӗсем ӑна шырама пуҫланӑ, вӑрмансене, ҫарма-ҫатрана ҫаврӑннӑ, анчах кӑлӑхах.

Тӑванӗсем Юрий Кузнецов ҫухални пирки акан 20-мӗшӗнче каҫхине пӗлтернӗ. Ҫур ҫӗр иртни 2 сехет тӗлне нимеҫӗсем пӗтӗм масара пӑхса ҫаврӑннӑ, арҫын ӑҫталла кайма пултарнине палӑртнӑ.

79 ҫулти арҫын 170 сантиметр ҫӳллӗш, вӑтам кӗлеткеллӗ, ҫӳҫӗ шуралнӑ. Вӑл хура куртка, кӑвак джинс, хура кроссовка тӑхӑннӑ пулнӑ. Мӗн те пулин пӗлекенсене полицие шӑнкӑравлама ыйтаҫҫӗ.

worldofmeat.ru сайтри сӑн

Пӗлтӗр республикӑра кашни ӗне пуҫне укҫа панӑччӗ. Кӑҫал та ку йӑлана малалла тӑсасшӑн-мӗн. Анчах тӳре-шара калаҫнӑ тӑрӑх, пӗлтӗрхинчен 100 тенкӗ ытларах тӳлесшӗн. Ҫапла пӗлтерет ЧР Ял хуҫалӑх министерстви.

Ведомство кӑҫал та ӗне усракансене укҫан пулӑшма сӗннӗ. Пӗр ӗнешӗн – 2400, икӗ ӗнешӗн – 3400-шар тенкӗ, виҫӗ тата ытларах ӗнешӗн 4400-шар тенкӗ парасси пирки шухӑшлаҫҫӗ.

Аса илтерер: пӗлтӗр ку виҫе 100 тенкӗ сахалрах пулнӑ. Пӗр выльӑхшӑн – 2300, икӗ выльӑхшӑн 3300-шар тенкӗ, виҫӗ тата ытларах выльӑхшӑн 4300-шар тенкӗ панӑ.

Ӗнер, ака уйӑхӗн 19-мӗшӗнче, Атӑлҫи транспорт прокуратурин Чӑваш Енри прокурорӗпе Чӑваш Республикин Элтеперне Олег Николаева паллаштарнӑ. Ку должноҫе Александр Кудряшов йышӑннӑ.

Ҫӗнӗ прокурор ҫинчен Атӑлҫи транспорт прокурорӗ Дмитрий Конош каласа кӑтартнӑ. Вӑл Кудряшов пирки профессионал, прокуратура умӗнчи тӗллевсене тивӗҫлипе пурнӑҫлама пӗлекен ҫын тесе ырланӑ.

Александр Кудряшов Чӑваш Енри Шӑмӑршӑ районӗнче ҫуралнӑ. Прокуратура тытӑмӗнче 2003 ҫултанпа тӑрӑшать. Карьерӑна Чӑваш Енри транспорт прокурорӗн ҫумӗнчен тытӑннӑ. 2016 ҫулта ӑна Мари Элти транспорт прокурорӗ пулма шаннӑ.

Шупашкар районӗнчи Кӳкеҫ поселокӗнче хуҫасӑр йытӑсене усрамалли приют уҫӗҫ. Ку хыпара Чӑваш Ен Элтеперӗ Олег Николаев Инстаграмра пӗлтернӗ.

Республика ертӳҫи ӗнер Шупашкар районӗнче пулнӑ. Ҫавна май вӑл приюта хатӗрленипе те паллашнӑ.

Сӑмах май каласан, кӳкеҫсем хуҫасӑр йытӑсем йышлине тӗнче тетелӗнчи халӑх ушкӑнӗсенче тӑтӑшах пӗлтеретчӗҫ. Ун пеккисем ытти тӑрӑхра та пур. Йытӑсене персе пӑрахма юрамасть – чӗрчунсене хӳтӗлекенсем ҫакӑн пирки вӗҫӗмех сӑмах хускатаҫҫӗ.

Приют тума республика хыснинчен укҫа уйӑрма пӑхса хӑварнӑ. Пурӗ 8 миллион тенкӗ. Хуҫасӑр йытӑсене район центрӗнчи ветеринари станцийӗ пулнӑ вырӑнта усрӗҫ. Малтанласа унта 15 йытӑ усрамалӑх вырӑн пулӗ, республика хыснинчен укҫа уйӑрсан – 150 йытӑлӑх.

Приютра ӳлӗмрен ҫулталӑкне 3 пине яхӑн йытта стерилизацилеме, вакцинацилеме тата сиплеме май килӗ.