«Чеб.ру» сайтри сӑн

Паян Шупашкарта «Раҫҫейӗн симӗс ылтӑнӗ» Пӗтӗм Раҫҫейри фестиваль старт илнӗ. Вӑл утӑ уйӑхӗн, 19-мӗшӗччен пырӗ.

Ҫак тапхӑрта сӑра вӗретекен 26 предприяти хӑйсен продукцийӗпе паллаштарӗҫ: Мускав, Чӗмпӗр, Самар, Пенза, Томск облаҫӗсенчен, Тутарстанран, Мари Элтен, Чӑваш Енрен, Мускав тата Санкт-Петербург хулисенчен.

Вырӑнти 30 кафе-ресторан тата фермер хуҫалӑхӗсем сӗтел ҫине блюдӑсем тата ҫыртмӑшсем лартӗҫ.

«Чеб.ру» сайтри сӑн

«Уҫӑ хула» порталта сасӑлав вӗҫленнӗ. Апла кам тивӗҫӗ-ха кӑҫал «Шупашкарӑн хисеплӗ ҫынни» ята?

Шупашкарти Чапаев ячӗллӗ производство пӗрлешӗвӗн директорӗ Михаил Резников чи нумай сасӑ пухнӑ. Уншӑн респондентсен 59 проценчӗ сасӑланӑ. Пӗтӗмпе 5 пин ҫын унта хутшӑннӑ.

Сасӑлав пӗтӗмлетӗвӗсене Шупашкар хула пухӑвӗн депутачӗсене пӑхса тухма парӗҫ. Вӗсем татӑклӑ йышӑну тӑвӗҫ.

"Првда ПФО" тӗнче тетеленчи хаҫатри сӑнӳкерчӗксемпе усӑ курса Таисия Ташней хатӗрленӗ коллаж

Шупашкарӑмӑр кӳлмекӗ чӑннипех те илемлӗ. Унта курса ҫӳремелли-паллашмалли чылай. Ҫавӑн пек вырӑнсенчен пӗри — Истори тӳремӗ. Унта ҫавра тенкелсемпе кантак витринӑлла сӗтелсем пур. Унта Чӑваш Енен историйӗпе ҫыхӑннӑ артефактсемпе паллашма пулать.

Анчах Шупашкара нумаях пулмасть килнӗ хӑна, РСФСР Верховнӑй Совечӗн депутачӗ (1990–1993 ҫҫ.) ҫын, эксперт, консультант Валерий Михайлов, йӑнӑш асӑрханӑ. Андриян Николаев космонавта халалланӑ экспозицире ентешӗмӗр уҫлӑха пӗрремӗш хут хӑпарсан орбитӑра 18 талӑк ирттернӗ тесе ҫырса хунӑ. Тӗрӗссипе вара — 4 кун. Иккӗмӗш хутӗнче вӑл 17 талӑк та 16 сехет те 59 минут пулнӑ.

cap.ru сайтри сӑн

Ыран, утӑ уйӑхӗн 12-мӗшӗнче, Шупашкарта ретро-троллейбуспа ярӑнма май пулӗ. 1964 ҫулта линине тухнӑ ЗИУ-5 троллейбуспа хула тӑрӑх хӑйне евӗр экскурси ирттерӗҫ. Вӑл «Чукун ҫул вокзалӗ» чарӑнуран ҫула тухӗ, тек ниҫта та чарӑнмӗ, экскурси 2 сехете тӑсӑлӗ. Троллейбусра апат ҫиме юраманни пирки асӑрхаттараҫҫӗ.

Экскурси тӳлевлӗ. Билет хакӗ — 200 тенкӗ, 7 ҫул тултарман ачасене — тӳлевсӗр. Билета малтан (8352) 44-29-84 телефон номерӗпе саккас туса хумалла.

«Контактри» сӑн

Йӑлана кӗнӗ тӑрӑх, ҫурла уйӑхӗнче Шупашкар ҫуралнӑ кунне уявлӗ. Вӑл ҫурлан 16-17-мӗшӗсенче иртӗ. Кӑҫал та тӗп мероприятисем Константин Иванов скверӗнче, Хӗрлӗ лапамра тата Юрӑ уйӗнче пулӗҫ.

Мускав ҫыранӗнче иртнӗ ӗмӗрӗн 60-70 ҫулсен ретроспективине йӗркелӗҫ. Ҫав вӑхӑтри юрӑ-кӗвӗ янӑрӗ, ҫавӑн пекех «Атӑл ҫинчи джаз» фестиваль иртӗ. Юрӑ уйӗнче спортсменсем тупӑшӗҫ, унта тӗрлӗ чемпионат пулӗ. Хӗрлӗ лапамра – «Шупашкар ҫемйи» фестиваль, Республика тӳремӗнче «Кадрта – хула» курав иртӗҫ.

Йӑлана кӗнӗ тӑрӑх, «Ҫӑлтӑрпа зарядка» та иртӗ. Каҫхине вара Раҫҫейри паллӑ эстрада юрӑҫи Шупашкар ҫыннисемпе хӑнисене саламлӗ. Кам килӗ? Унӑн ятне хальлӗхе пӗлтермен.

Инкеклӗ лару-тӑру министерстви тунӑ сӑн

Ӗнер каҫхине Шупашкарта иртен-ҫӳрен ача макӑрнине илтнӗ те ҫӑлавҫӑсене чӗннӗ. Ача сасси 8-мӗш хутран илтӗннӗ.

Вӑл килте пӗчченех юлнӑ иккен. Ӑна пиччӗшӗ пӑхнӑ, анчах каҫхине урама тухнӑ. Хӗрачан телефонӗ сӳнсе ларнӑ та вӑл хӑранипе макӑрма тытӑннӑ, чӳречене уҫнӑ.

Вырӑна ҫӑлавҫӑсем ҫитнӗ. Алексей Петров автопусмапа хӑпарса хваттере балкон урлӑ кӗнӗ. Вӗсем асламӑшне (е кукамӑшне) пӗрле кӗтсе илнӗ.

cap.ru сӑнӳкерчӗкӗ

Чӑваш Енри фермерсен пӗрремӗш агромаркечӗ ута уйӑхӗн 18-мӗшӗнче уҫӑлӗ. Кун пирки республика Правительствин Председателӗ Сергей Артамонов халӑх тетелӗсенчен пӗринче хыпарланӑ.

Аса илтерер, агромаркет ячӗ - «Пехет». Вал «Каскад» суту-илӳ ҫурчӗн цоколь хутӗнче вырнаҫӗ.

Унччен пушӑ пулнӑ лаптӑк калама ҫук илемленсе кайнӑ-мӗн. Унта халӗ - йывӑҫ витринӑсем, илемлӗ ытти хатӗр-хӗтӗр, капарлатнӑ колоннӑсем. Унта кӗрсен чӑваш наци элемӗсем куҫа тӑрӑнаҫҫӗ. Вырӑнти художниксем чуна парса ӗҫленӗ.

«Пехет» 40 ытла фермер продукцине туянма май килӗ: аш-пӑшпа сӗт-ҫу, сыр, пыл, чей, пахчаҫимӗҫ, ҫӗрулми, ҫӑкӑр, пулӑ тата ытти те пулӗ. Унсӑр пуҫне халӑх промыслисемпе паллашма тата наци сувенирне туянма май килӗ.

Агромаркета 5-мӗш тата 13-мӗщ маршрутсемпе ҫитме меллӗ.

cap.ru сӑнӳкерчӗкӗ

Шупашкар хулинче пурӑнакансем интернет пулмасан та общество транспорчӗ ҫинче ҫул укҫи тӳлеме пултараҫҫӗ.

Республикӑн Цифра аталанӑвӗн министерствинче пӗлтернӗ тӑрӑх, терминалсем малатнхиллех ӗҫлеҫҫӗ, укҫана тытса юлни пирки хыпар каярах, интернет ҫыхӑнӑвӗ ӗҫлесе кайсан, ҫитӗ — ҫавӑ ҫеҫ.

Маларах республика Элтеперӗ Олег Николаев регионти Цифра аталанӑвӗн тата Транспорт министерствисене транспортри тӳлев системине интернет ҫук вӑхӑтра та йӗркеллӗ ӗҫлеттерсе яма хушнӑ. «ЕТК» компани ку ыйту татӑлнине пӗлтернӗ.

pravdapfo.ru сайтран илнӗ сӑнӳкерчӗк

Шупашкарти А.Г. Николаев ячӗллӗ аэропортра каллех юсав ӗҫне пурнӑҫлама палӑртаҫҫӗ. Анчах хальхинче — самолетсене анса лармалли тата вӗҫсе хӑпарса каймалли ҫула.

Аэропорта тӗплӗн юсама халӗ подрядчика шыраҫҫӗ. Контрактӑн пуҫламӑш хакӗ - 819 миллион та 494 пин тенкӗ.

Ӗҫӗн заказчикӗ - «Администрация гражданских аэропортов» (чӑв. Граждан аэропорчӗсен администрацийӗ) федерацин патшалӑхӑн унитарла предприятийӗ. Юсава аэропорт ӗҫленӗ вӑхӑтрах пурнӑҫласшӑн. Юсав вӑхӑчӗ — 1 ҫулта пӗр уйӑх ҫурӑ.

Аэродрома тӗплӗн юсамалли проект патшалӑх экспертизи витӗр тухнӑ.

Ҫӗмӗрле хулинче Владимир Ильич Ленинӑн палӑкне… ҫӳп-ҫап купи ҫинче тупнӑ. Кунашкал сӑнӳкерчӗк вырӑнти пабликсенче курӑннӑ. «Ҫӗмӗрлери декоммунизаци: унта хула лапамӗнчи Ленин палӑкне свалкӑна янӑ», - тесе ҫырнӑ унта.

Кивӗ монумента тӗп лапамран илсе пӑрахнӑ. Ун вырӑнне ҫӗннине лартнӑ, анчах вӑл калӑпӑшӗпе унчченхинчен пӗчӗкрех.