Ҫӗнӗ маршрут

Ҫӗртме уйӑхӗн 1-мӗшӗнчен Ҫӗнӗ Шупашкартан Шупашкара ҫӳрекен 61-мӗш троллейбус кӑштах маршрутне улӑштарӗ. Троллейбуссем «Шупашкар» суту-илӳ центрӗ патӗнчен Эгер бульварне, Ҫӗнӗ автовокзал енне, пӑрӑнмӗҫ, 9-мӗш Пилӗкҫуллӑх проспекчӗпе кайса «Пичет ҫурчӗ» патӗнчен иртӗҫ. Малалла хальхи маршрутпах кайӗҫ.

Маршрут ҫинче 14 троллейбус ӗҫлет. 2 транспорт резервра пулмалла. Аса илтерер: вӑл Ҫӗнӗ Шупашкарти «Иваново» микрорайона Шупашкарти Медицина центрӗпе ҫыхӑнтарать.

Шупашкарти Лапсар проездне тинех юсама пуҫланӑ. Шӑтӑк-путӑкла ҫав ҫул пирки тахҫанах калаҫаҫҫӗ. Нумаях пулмасть лав вырӑнтан хускалнӑ.

Чӑваш Енӗн Строительство министерствинче пӗлтернӗ тӑрӑх, юсав ӗҫне ҫанталӑк май парсан тӳрех тытӑннӑ. «Объект ҫав тӑрӑхри районсенче пурӑнакансемшӗн ҫеҫ мар, экономикӑшӑн та пӗлтерӗшлӗ», — тесе хыпарлать маларах асӑннӑ ведомство. Унта пысӑк промышленность предприятийӗсем вырнаҫнӑ.

chgtrk.ru сайтри сӑн

Ҫулла Шупашкартан Калининграда тата Махачкалана самолетсем вӗҫме тытӑнӗҫ.

Калининграда ҫӗртмен 20-мӗшӗнче рейс уҫӗҫ. Шупашкартан самолет ытларикун тата эрнекун вӗҫӗ, каялла – юнкун тата шӑматкун.

Махачкалана вара самолет ҫӗртмен 21-мӗшӗнчен вӗҫме тытӑнӗ. Рейс юнкун тата шӑматкун пулӗ, каялла – кӗҫнерникун тата вырсарникун.

Рейссене Airbus 320 самолетсем пурнӑҫлӗҫ.

tambov.mk.ru сайтри сӑн

Шупашкарти арҫын лӑпкӑ кӑна пурӑннӑ. Тӑрук пӗр кунхине ун патне суд приставӗсем килсе 400 пин тенкӗ парӑма татмалли пирки асӑрхаттарнӑ. Арҫын ӑнланман: ара, вӑл нимӗнле кредит та илмен-ҫке-ха.

Ӗҫ-пуҫ вара ҫапла пулса тухнӑ иккен: 2021 ҫулхи кӑрлач уйӑхӗнче ултавҫӑсем суя паспортпа усӑ курса ун ячӗпе икӗ банкра кредитсем илнӗ. Ҫапла парӑм пухӑнса та пухӑнса пынӑ.

Арҫын Ленин районӗн прокуратуринчен пулӑшу ыйтнӑ. Тӗрӗслев ирттернӗ хыҫҫӑн материала полицие панӑ, унта вара пуҫиле ӗҫ пуҫарнӑ.

"На связи" форумри сӑн

Шупашкарти Ленин проспектӗнчи 21-мӗш ҫуртра 1967-2002 ҫулсенче общество деятелӗ, финанс министрӗ пулнӑ Аркадий Гладков пурӑннӑ. Ҫак, кунсенче унта астӑвӑм хӑмине ҫакнӑ.

Хӑмана уҫнӑ ҫӗре унӑн тӑванӗсем, ҫывӑх ҫыннисем килнӗ. Хӑйӗн аслӑ ӗҫтешне хисеп тума пӗрремӗ вице-министр – финанс министрӗ Михаил Ноздряков та ҫитнӗ.

Аркадий Михайлович Канаш районӗнчи Пикших ялӗнче ҫуралнӑ. Чӑваш Ен министерствинче ахаль ревизортан министра ҫитнӗ.

vtomske.ru сайтри сӑн

Шупашкарта васкавлӑ медпулӑшу водителӗ 18 ҫул тултармасӑрах руль умне ларнӑ ҫамрӑка тытса чарма пулӑшнӑ.

Ҫамрӑка чарас тесе йӗрке хуралҫисем хыҫҫӑн хӑваланӑ. Васкавлӑ медпулӑшу водителӗ Виталий Андреев ҫакна асӑрхасан вӗсене пулӑшас тенӗ – ҫула пӳлнӗ. Ҫапла ВАЗ-2109 машинӑпа пынӑ ҫамрӑкӑн чарӑнма тивнӗ.

Республикӑри катастрофа медицинин тата васкавлӑ пулӑшу центрӗнче Виталий Владимировича куншӑн ырӑ сӑмах каланӑ. Сӑмах май, вӑл экстреннӑй служба водителӗнче 14 ҫул ӗҫлет.

Вера Иванова сӑнӳкерчӗкӗ

Пурнӑҫӑн кирек хӑш тапхӑрӗнче те ҫынсем тӗрлӗ йывӑрлӑхпа тӗл пулаҫҫӗ. Ӗҫре те, килте те, ҫын ҫине тухсан та пӑшӑрханмалли, кулянмалли тупӑнса тӑрать.

Ӗҫре ывӑнса та йӑлӑхса ҫитнине ҫӗнтереме пулӑшас тӗллевпе Шупашкар хулинчи халӑхӑн социаллӑ ыйтӑвӗсене ӗҫтерекен комплеслӑ центрта психологпа та занятисем ирттереҫҫӗ. Марина Назарова психолог маларах ун пеккисене социаллӑ ӗҫченсем валли йӗркеленӗ пулсан паян унти специалистсем валли ирттернӗ.

Ыран, Ҫӗнтерӳ кунӗнче, Ҫӗнӗ Шупашкарта Nordtroll NTR-120MT музей троллейбусӗ ҫула тухӗ. Унӑн номерӗ – 1091.

Ку троллейбуса Ҫӗнӗ Шупашкара 1997 ҫулхи ҫурла уйӑхӗнче илсе килнӗ, ҫурлан 26-мӗшӗнче ӑна маршрут ҫине кӑларнӑ. Вӑл – Раҫҫейре тата тӗнчере Nordtrol-120MTr моделӗн юлашки экземплярӗ.

2023 ҫулта ҫак троллейбус музей экспоначӗн статусне тивӗҫнӗ.

Ыран Ҫӗнтерӳ кунне уявланӑ май Шупашкарти «Модӑсен ҫурчӗ», «Наци конгресӗ» тата «Дзержинский» урамӗ чарӑнусем патӗнчен иртсе ҫӳрекен общество транспорчӗ 23 сехет те 59 минутчен ӗҫлӗ. Ҫавӑн пекех муниципалитетчен хушшинчи 101с тата 331 маршрутсем часах ҫӳреме пӑрахмӗҫ.

Ҫавӑн пекех 1, 4 тата 8-мӗш маршрутсем ҫинче троллейбуссем ытарах ҫӳрӗҫ. Уяв мероприятийӗсем вӗҫленнӗ май 61 тата 62-мӗш троллейбуссен пӗр пайӗ маршрутсене улӑштарӗҫ.

«Ҫыхӑнура» порталти сӑн

Шупашкарта ҫу уйӑхӗн 9-мӗшӗнче, Ҫӗнтерӳ кунӗнче, Шупашкарта хӑрушсӑрлӑх мерисемпе тивӗҫтерес тесе мобильлӗ ҫыхӑну чӑрмавлӑрах ӗҫлеме пултарӗ. Ҫавӑн пекех хӑш-пӗр ҫӗрте транспорта ҫӳреттермӗҫ.

Аса илтерер: кӑҫал Шупашкарта ҫар техникин парачӗ, «Вилӗмсӗр полк», «Ҫӗнтерӳ ҫуртисем» акцисем иртӗҫ, каҫхине салют пулӗ. Ҫавӑн пекех вӑрҫӑ вӑхӑтӗнчи тумтирӗн «Ҫӗнтерӳ моди» ретро-фестиваль йӗркелӗҫ.