forum.na-svyazi.ru сайтран илнӗ скриншот

Шупашкарти Чапаев поселокӗнче «Атал» стадион умӗнче ларёксем уҫса тултарнӑ. Унччен унта маршруткӑсем хӑйсен рейсӗсене кӗтсе ларнӑ.

Темиҫе ҫул каялла Шупашкарта суту-илӳ павильонӗсене хупма тытӑнчӗҫ, ҫавна тӳре-шара киосксем хулана сӑнсӑрлатнипе сӑлтавларӗҫ. Халӗ, ав, каллех павильонсем уҫӑлма пуҫларӗҫ. Ӑна-кӑна тӗшмӗртекенсем палӑртнӑ тӑрӑх, вӗсенче санитари нормине пӑхӑнса ӗҫлеме май ҫук, мӗншӗн тесен канализаци тата шыв ҫук. Ҫӗр лаптӑкне кама тата мӗнле майпа уйӑрса пани те иккӗлентерет тесе шухӑшлаҫҫӗ.

inosmi.ru сайтри сӑн

Шупашкарти 74 ҫулти хӗрарӑм ултавҫӑсене ӗненсе 3,5 миллион тенкӗ ҫухатнӑ.

Ун патне палламан ҫынсем ҫурла уйӑхӗн вӗҫӗнчех шӑнкӑравланӑ. «Домофон ӗҫлет-и?» – тесе кӑсӑкланнӑ. Ӑна вара чӑнах та юсамалла пулнӑ иккен. Хӗрарӑм смс-ҫырупа килнӗ кода пӗлтернӗ. Кайран ун патне татах палламан ҫынсем шӑнкӑравланӑ. Пӗри ҫӗнӗ телефон туянса тӗрлӗ счет ҫине укҫа куҫарма хушнӑ.

Ҫак кунсенче хӗрарӑм патне «ФСБ ӗҫченӗ» шӑнкӑравланӑ. Хльхинче такамсем пенсионеркӑн хваттерне сутма хӑтланнине хӑратнӑ. Хӗрарӑм кун пирки хӗрне пӗлтермен, тӳрех риэлтор патне ҫул тытнӑ. Вӑл хваттере мӗншӗн сутма палӑртнине ӑна та каламан.

Ултавҫӑсен серепине лекнине ӑнлансан ватӑ хӗрарӑм полицие кайнӑ.

cheb-centr.soc.cap.ru сӑнӳкерчӗкӗ

«Хӗрӗхри юрату. Вӑл тата хӗрӳрех», — тесе юрлатчӗ пӗр юрӑҫ хӑй вӑхӑтӗнче. Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрти стационар уйрӑмӗнче пурӑнакан Мильковсем хӑйсен телейне 70 ҫул урлӑ каҫсан тупнӑ.

Паян та 74 ҫулти Галина Александровнӑпа 75-ри Сергей Степанович пӗрне пӗри юратса та хисеплесе, пӗр-пӗрин ҫине ӑш пиллӗн те юратуллӑн пӑхса пурӑнаҫҫӗ.

Паян республикӑра суйлав пуҫланчӗ те, суйлава та вӗсем пӗрле кайнӑ. Таҫта аякка мар-ха. Ватӑсене хӗрхенсе центр суйлав комиссийӗн членӗсене социаллӑ учреждение йыхравланӑ. Центрта унта-кунта тухса ҫуреймен ватӑсем те пурӑнаҫҫӗ-ҫке.

«На связи» форумри сӑн

Чӑваш транспорт управленийӗ пӗлтернӗ тӑрӑх, 60-мӗш троллейбус Ҫӗнӗ Шупашкартан килнӗ чухне «Ҫӗнӗ хула» микрорайон урлӑ кайӗ.

«Химтехникум – Университет» маршрутпа ҫӳрекен троллейбус Шупашкар еннелле кайнӑ чухне Сӗнтӗрвӑрри ҫулӗнчен «Ҫӗнӗ хула» микрорайона пӑрӑнса кӗрӗ. Кайран ҪҪХПИ посчӗ пулнӑ вырӑнтан тухӗ. Малалла вара хӑйӗн ҫулӗпех кайӗ.

Хальлӗхе маршрут хӑҫан улшӑнассине пӗлтермен.

"Контактри" сӑн

Парӑмҫӑ суд приставӗсенчен... балкон ҫинче пытаннӑ. Ку пӑтӑрмахла истори – Шупашкарти 37 ҫулти арҫын пирки.

Вӑл 15 ҫулти хӗрӗшӗн алимент тӳлемен. Парӑм сахал мар пухӑннӑ: 350 пин тенке ҫитнӗ.

Куншӑн ӑна административлӑ майпа явап тыттарасшӑн пулнӑ, анчах арҫын суд йышӑнӑвне пурнӑҫламан, алимент тӳлемен. Кайран вуҫех ҫухалнӑ. Суд приставӗсем ӑна хваттерне шырама кайсан тупайман. Тепрехинче каллех шыраса хваттере килнӗ те ӑна ӑнсӑртран балкон ҫинче тупнӑ. Вӑл приставсем килмессерен пытанса ларнӑ иккен. Халӗ ун тӗлӗшпе уголовлӑ ӗҫ пуҫарма хатӗрленеҫҫӗ.

Шупашкарта нумай хваттерлӗ ҫуртра ритуаллӑ пулӑшу кӳрекен лавкка уҫнӑ. Илпек урамӗнчи ҫуртсенчен пӗринче вырнаҫнӑ ку лавкка унта пурӑнакансене килӗшмен.

Лавккана хурлӑхлӑ ҫынсем ялан кӗрсе тухнине, кӑшӑлсемпе тупӑксем йӑтнине кунсерен пӑхса ларни темле хавас ҫын кӑмӑлне те пусарӗ. Ҫитменнине тата ун пек лавккана пурӑнмалли ҫуртра уҫма юрамасть.

Кӑлтӑка Шупашкарти Ленин районӗнчи прокуратура тупса палӑртнӑ. Суд усламҫӑна унта суту-илӳ тума чарнӑ.

чеб.ру сӑнӳкерчӗкӗ

Шупашкарти кивӗ Правительство ҫуртне юсаса ҫӗнетме тата тепӗр 4 миллион та 775 пин тенкӗ тухса кайӗ. Ку укҫана юсавпа реставраци ӗҫӗн документацине ҫӗнетме уйӑрма йышӑннӑ.

Юсав ӗҫне 2022 ҫулта пуҫӑннӑ. Пӗрремӗш контракта Хусанти «Консорциум Строительных Компаний» предприяти алӑ пуснӑ. Иккӗмӗш контракта та унпах алӑ пуснӑ. Унӑн виҫи 616,06 млн тенкӗпе танлашнӑ.

Кайран контрактпа ҫыхӑннӑ пӑтӑрмах ҫиеле тухсан контракта пӑрахӑҫланӑ.

«Контактри» сӑн

Шупашкарти 38-мӗш шкулта Чӑваш Республикин тава тивӗҫлӗ учительне Иван Дубанова халалласа мурал уҫнӑ.

Иван Степанович ҫак шкулта 40 ҫула яхӑн ӗҫленӗ, ачасене географи предметне вӗрентнӗ. Вӑл Горький хулинчи педагогика институтӗнче аслӑ пӗлӳ илнӗ.

Ачасене вӗрентнисӗр пуҫне Иван Дубанов экскурсисемпе экспедицисем йӗркеленӗ. Вӑл 15 кӗнеке пичетлесе кӑларнӑ, ҫак йышра тавра пӗлӳ тата топонимика словарӗсем пур.

Иван Степанович пирӗнтен нумаях пулмасть, 2024 ҫулхи раштавӑн 31-мӗшӗнче, ӗмӗрлӗхех уйрӑлса кайнӑ.

chgtrk.ru сайтри сӑн

Улатӑрта унччен ҫав вырӑнта пушӑ вырӑн пулнӑ, халӗ вара унта – «Улатӑрӑн авиаци йӑлисем» сквер.

Ӑна хулари «Электроприбор» савут хута янӑ. Сквера чӑн-чӑн МиГ-29 самолет вырнаҫтарнӑ. Ӑна РФ Хӳтӗлев министерстви урлӑ туяннӑ. Самолет – 1985 ҫулта туса кӑларнӑскер.

Сквера хӑтлӑлатнӑ чухне таврапӗлӳҫӗсемпе, тӗпчевҫӗсемпе канашланӑ. Палӑртмалла: вӑрҫӑччен Улатӑрта аэроклуб пулнӑ, вӑрҫӑ вӑхӑтӗнче вара унта ҫар летчикӗсене хатӗрлемелли база вырнаҫнӑ. Ку хулара Совет Союзӗн Паттӑрӗ Муса Манаров тата Раҫҫей Паттӑрӗ Николай Бударин ӳснӗ.

«Контактри» сӑн

Ҫӗнӗ Шупашкарта ҫӗнӗ мурала уҫнӑ. Вӑл – спутник хула йӗркеленнӗренпе 65 ҫул ҫитнине халалланӑскер.

Мурала Совет урамӗнчи 21-мӗш ҫурт стени ҫинче курма пулать. Ӑна Никита Романов ӳкернӗ.

Ҫак мурала ӳкерме пуҫлани пирки унччен сайтра пӗлтернӗччӗ. Аса илтерер: вӑл хула тата «Химпром» пӗрлӗхне кӑтартать. Ҫак ҫурта ахальтен суйламан. Унта хӑй вӑхӑтӗнче хулан пӗрремӗш строителӗсене тата «Химпромра» ӗҫлекенсене хваттер панӑ.