«Контактри» сӑн

Шупашкарта «Пӗчӗк тӑван кӗтесӗн тӑван ячӗсем» проектпа килӗшӳллӗн виҫҫӗмӗш мурала ӳкерсе пӗтернӗ. Вӑл Трактор тӑвакансен проспектӗнчи 17-мӗш ҫуртӑн 25-мӗш корпусӗнче вырнаҫнӑ.

Мурала ҫамрӑк ӳнерҫӗсем Ксения Кокель тата Дмитрий Егоров ӳкернӗ. Ӑна ҫак кунсенче савӑнӑҫлӑ лару-тӑрура уҫнӑ.

Стена ҫине Совет Союзӗн Паттӑрӗн Александр Боголюбовӑн портретне сӑнланӑ. Вӑл Шупашкарта ҫуралса ӳснӗ, Граждан тата Тӑван ҫӗршывӑн Аслӑ вӑрҫисене хутшӑннӑ. Паттӑр 1945 ҫулта Хӗрлӗ Ҫӑлтӑра тивӗҫнӗ. Вӑл ун чухне генерал-полковник званийӗпе пулнӑ.

cap.ru сайтри сӑн

Ҫӗнӗ Шупашкар хулинчи Совет урамӗнчи 21-мӗш ҫурт стени ҫине мурал ӳкереҫҫӗ. Ӑна хула тата «Химпром» йӗркеленнӗренпе 65 ҫул ҫитнине халалланӑ.

Ку вырӑна ахальтен суйламан. Унти хваттерсене малтан хулана тунӑ строительсене тата «Химпром» ӗҫченӗсене валеҫсе панӑ. Унта халӗ те Социализмла Ӗҫ Паттӑрӗсем пурӑнаҫҫӗ: Аркадий Алексеев тата Александр Колыванов. Ҫавӑн пекех паянхи кун ку ҫуртра хулари пӗрремӗш ҫынсем кун кунлаҫҫӗ.

Шупашкар хулинчи халӑхӑн социаллӑ ыйӑвӗсене тивӗҫтерекен комплекслӑ центр йывӑр лару-тӑрури ҫемьесенче ӳсекен ачасем валли кӑҫал та «Помоги собраться в школу!» (чӑв. Шкула пуҫтарӑнма пулӑш) акци ирттерет.

Акци ҫурла уйӑхӗн 21-мӗшӗнче иртӗ. Вӑл ирхи 10 сехетрен пуҫласа 16 сехетчен пырӗ. Ашшӗ-амӑшӗ хӑйсен ачисем валли шкул формине, кӗпе, ача-пӑча ытти таварне суйласа илме пултарӗ.

Ачаллӑ ҫемьесене Шупашкарти 324-мӗш Стрелоксен дивизийӗн урамӗнчи 21А ҫуртра вырнаҫнӑ Ҫемье МФЦинче кӗтеҫҫӗ.

Ыйтса пӗлмели телефон номерӗсем: 8 (8352) 51-02-68, 51-29-77.

78.ru сайтри сӑн

Ҫӗнӗ Шупашкарта пурӑнакан 90-ри кинемей ултавҫӑсене 1 млн тенкӗ парас тесе Хусана таксипе кайнӑ.

Ун патне стационар телефонӗ ҫине хӑйӗнпе «ҫыхӑну компанийӗн ӗҫченӗ» тесе паллаштарнӑ ҫын шӑнкӑравланӑ, абонент тӳлевне пӗчӗклетме тесе паспорт даннӑйӗсене ыйтса илнӗ. Кайран кинемей патне «йӗрке хуралҫинчен» шӑнкӑрав килнӗ, вӑл вара унӑн укҫине такам туслӑ мар ҫӗршыва куҫарма пултарнине пӗлтернӗ, счетне тӗрӗслеме хушнӑ.

Кинемей ывӑлне тата банк ӗҫченӗсене тӑванӗсене пулӑшмалла тесе ӗнентернӗ, банка кайса 1 млн тенке счет ҫинчен илнӗ. Ывӑлӗ кӑшт аяккарах пӑрӑнсан ултавҫӑсен чӗнсе панӑ таксие ларса Хусана вӗҫтернӗ, унта код сӑмахне каланӑ арҫынна ҫак укҫана тыттарнӑ. Каялла та таксипех килнӗ.

ria.ru сайтри сӑн

Амӑшӗ кухньӑна тухнӑ та пӳлӗм алӑкӗ питӗрӗнсе ларнӑ, шалта вара 1,5 ҫулти ача юлнӑ. Ку Шупашкарти общежитире пулнӑ.

Хӗрарӑмӑн полицирен пулӑшу ыйтма тивнӗ. Пӗчӗк ача пӳлӗмре каҫӑхса кайсах макӑрнӑ. Ҫитменнине, чӳрече уҫӑ пулнӑ, ача москитлӑ сетка ҫине таянса аялалла ӳкме пултарнӑ.

Полицин кӗҫӗн лейтенанчӗ Руслан Анюров тата аслӑ лейтенанчӗ Азер Мамедов пӳлӗм алӑкне уҫайман, урамран пӑрӑх тӑрӑх хӑпарма шутланӑ. Руслан Анюров пӑрӑхпа виҫҫӗмӗш хута хӑпарнӑ, напарникӗ троспа страховка тунӑ. Ҫапла вӗсем хӑрушлӑха лекнӗ пӗчӗк ачана ҫӑлнӑ.

«Чеб.ру» сайтри сӑн

Шупашкарта ҫулсерен чи лайӑх картише палӑртасси йӑлана кӗнӗ. Конкурса кӑҫал та ирттереҫҫӗ.

Пӗтӗмпе 5 номинацие хутшӑнма 5 заявка килнӗ. Конкурса нумай хваттерлӗ картишсем те, харпӑр ҫуртсемлӗ секторсем те, социаллӑ тытӑмри учрежденири картишсем те хутшӑнаҫҫӗ.

Номинацисенче ҫӗнтерекенсене премипе хавхалантарӗҫ. Кӑҫал приз фончӗ 350 пин тенкӗпе танлашать.

ШӖМ тунӑ сӑн

Шупашкарти таксист кинемее ултавҫӑсене укҫа парасран ҫӑлса хӑварнӑ. Укҫи сахал мар – 600 пин тенкӗ ытла.

89 ҫулти кинемей патне «телефон ҫыхӑнӑвӗнче ӗҫлекен ҫын» шӑнкӑравланӑ та «килӗшӗве тӑсмалла» тата «укҫана сыхласа хӑвармалла» тесе ӗнентерсе 600 пин ытла тенкине счет ҫинчен илме ӳкӗте кӗртнӗ. Кинемей укҫана сумкӑна хурса тепӗр региона парса яма тесе такси чӗннӗ.

Анчах таксист тӳрех сисчӗвленнӗ: кинемей шанчӑксӑртарах калаҫнӑ, вӗчӗрхеннӗ. Водитель укҫана кӳршӗ региона илсе каяс вырӑнне полицие ҫитнӗ. Кинемее укҫана тавӑрса панӑ, унпа тата тӑванӗсемпе калаҫу ирттернӗ. Таксиста вара Тав хучӗ панӑ.

cap.ru порталтан илнӗ сӑнӳкерчӗк

Юлашки ҫулсенче патшалӑх хӗрарӑмсем ача ҫуратчӑр тесе темле пулӑшу та шухӑшласа кӑларать. Кирек епле япалан та икӗ енӗ пур. Анчах паянхи пирӗн хыпарӑмӑр ун пирки мар та шала кӗрсе каяр мар.

Чӑваш Енӗн транспорт предприятийӗ те ача чухне ҫуратсан укҫа парса пулӑшать-мӗн. Кун пек йӗркене пурнӑҫа кӗртме пуҫлани иккӗшӗш ҫул иккен. Ку пулӑшупа хальлӗхе 4 ҫемье усӑ курнӑ.

Аса ҫуратсан ҫемьене 50 пин тенкӗ сертификат параҫҫӗ. Ӑна ҫемье хӑй пӗлнӗ пек усӑ курма пултарать.

in.pinterest.com сайтри сӑн

Шупашкарта полицейскисем ҫемьери пӑтӑрмаха лӑплантарма кайсан шар курнӑ.

Ҫурлан 5-мӗшӗнче Николаев урамӗнче пурӑнакан упӑшкипе арӑмӗ вӑрҫӑнса кайсан полици чӗннӗ. Хваттерте нимӗҫ овчарки пулнӑ. Полицейскисем ӑна ваннӑйне хупма ыйтнӑ.

Пакунлисем кил хуҫисемпе калаҫса ларнӑ вӑхӑтра йытӑ ваннӑйӗнчен тухса пӗрин ҫине сиксе ӳкнӗ. Полицейскин хайне хӳтӗлесе ӑна пӑшалтан пеме тивнӗ.

Пакунли кайран больницӑна кайнӑ – унӑн кӗлетки ҫинче йытӑ ҫыртнӑ йӗрсем пуррине палӑртнӑ. Халӗ ШӖМ ку тӗслӗх тӗлӗшпе тӗрӗслев ирттерет.

«Контактри» сӑн

Шупашкар ҫуралнӑ кунне уявлама хатӗрлет. Йӑлана кӗнӗ тӑрӑх, Хула кунӗнче ҫӑлтӑрпа зарядка иртет. Хальхинче кам килӗ? Кӑҫал сывӑ пурнӑҫ йӗркине пӑхӑнакансене Вячеслав Василевский зарядка тутарӗ. Вӑл — тӗнче чемпионӗ, Раҫҫейӗн тава тивӗҫлӗ спорт мастерӗ, паллӑ телеертӳҫӗ. Вӑл Хула кунӗнче «Ҫӑлтӑрпа – зарядка» акцие ирттерӗ. Унпа пӗрле тӗнчен нумай хут чемпионӗ Алексей Соловьев та сцена ҫине тухӗ.

Кӑҫал акци Юрӑ уйӗнче ҫурла уйӑхӗн 17-мӗшӗнче 10 сехетре иртӗ.