forum.na-svyazi.ru сӑнӳкерчӗкӗ

Чӑваш Енӗн прокуратуринче Патӑрьелти ҫула прокуратура ҫине тӑнипе юсанине пӗлтереҫҫӗ.

Унти Ленин урамӗнчи 17-мӗш ҫурт патӗнчен пуҫласа 30-мӗш патне ҫитичченхи ҫул ванса пӗтнӗ. Ун пек ҫулпа пыракан машинӑсем инкеке те лекме пултарнӑ.

Прокуратура начсар ҫула юсама вырӑнти администрацие суд урлӑ хистенӗ. Ҫавӑн хыҫҫӑн тин ҫула йӗркене кӗртнӗ, ӑна юсанӑ.

culture.cap.ru сӑнӳкерчӗкӗ

Ыран, авӑн уйӑхӗн 5-мӗшӗнче, Чӑваш Енре Андриян николаев ҫуралнӑранпа 95 ҫул ҫитнине халалласа мероприятисем иртӗҫ.

Сӗнтӗрвӑрри районӗнчи Шуршӑлта ҫуралса ӳснӗ Андриян Николаев — икӗ хут Совет Союзӗн Геройӗ, СССР летчик-космонавчӗ, авиацин генерал-майорӗ, Чӑваш Республикин хисеплӗ ҫынни.

Паян пирӗн тӑрӑха Ярославль ҫӗрӗ ҫинчи хӑнасем килсе ҫитнӗ. Вӗсем В.В. Терешкован «Космомс» музейӗн директорӗ Игорь Зуб тата РФ Патшалӑх Думин дептучӗн В.В. Терешкован пулӑшуҫи Кира Крайнова.

Ҫавӑн пекех пирӗн тӑрӑха Раҫҫей Федерацийӗн Геройӗ, Раҫҫейӗн лётчик-космонавчӗ Сергей Авдеев килсе ҫитӗ.

Улатӑрта виҫӗ ҫӑлтӑрлӑ хӑна ҫурчӗ хута янӑ. Ячӗ – «Эрьзя». Ӑна Улатӑрти паллӑ ҫынна, Степан Эрьзя скульптора тата ӳнерҫе, халалласа ят панӑ.

Хӑна ҫурчӗ Мускав урамӗнче вырнаҫнӑ. Унччен унта ача пахчи, И.Н.Ульянов ячӗллӗ ЧПУ филиалӗ пулнӑ, анчах ҫурта темиҫе ҫул каялла ишсе антарнӑ. Ҫулталӑк ҫурӑ каялла вара ун вырӑнӗнче 20 вырӑнлӑх хӑна ҫурчӗ тума тытӑннӑ. Ку – «Электроприбор» савутӑн инвестици проекчӗ.

Хӑна ҫуртне Степан Эрьзян картинисем илем кӳреҫҫӗ. Хӑна ҫурчӗ юпа уйӑхӗнче алӑкӗсене уҫӗ.

Аня Спиридонова архивӗнчи сӑн

Кӗркунне ҫӑвӗпе мӗн ӗҫленин тухӑҫне курма пулать. Шупашкарта пурӑнакан Аня Спиридонова хӑй ӳстернӗ пахча ҫимӗҫ мӗн пысӑкӑш пулнине сӑн ӳкерсе халӑх тетелӗнчи страницине вырнаҫтарнӑ.

Вӗсен пахчинче кавӑнсем хальлӗхе 200 тата 250 килограмм таяҫҫӗ. Вӗсене татман-ха, ҫавӑнпа малалла ӳсеҫҫӗ. Мӗн пысӑкӑш пулассине, тен, Аня кайран татах кӑтартӗ.

"На связи" сайтри сӑн

Паян кӑнтӑрла «Энӗш» автоҫул ҫинче, Канаш хулипе Тӑвай хушшинче, Тӑвай округӗнчи Вырӑс Нӑрваш ялӗ ҫывӑхӗнче, тырӑ тултарнӑ прицеп ҫаврӑнса ӳкнӗ.

Самосвалӑн номерӗсем – Тутарстанран. Прицеп ун умӗнче тӳнсе кайнӑ, тырӑ ҫул тӑрӑх сапаланнӑ. Хальлӗхе авари мӗне пула тухнине пӗлтермен.

Авари хыҫҫӑн Канаш еннелле ҫул хупӑннӑ – прицеп ҫул варринчех выртнӑ. Машинӑсем хирӗҫ ҫулпа иртсе кайнӑ. Унта вара – ҫул-йер правилисене пӑсакансене ӳкерекен камера пур.

Астӑватӑр-и: пӗлтӗр те кӗркунне лайӑх ҫанталӑкран пуҫланнӑччӗ. Кӑҫал та ҫаплах.

Синоптиксем пӗлтернӗ тӑрӑх, типӗ те уяр ҫанталӑк авӑн уйӑхӗн 19-мӗшӗччен тӑрӗ. Кӑнтӑрла 25 градус таран ӑшӑтни пӗрре мар пулӗ. Авӑн пуш уйӑхӗпе танлашать теҫҫӗ те – кӑҫал пуш уйӑхӗн типӗ тата ӑшӑ килнӗччӗ.

Уйӑхӑн иккӗмӗш ҫурри климатпа килӗшӳллӗн пулӗ. Ун чухнехи норма – 12-17 градус ӑшӑ, каҫсерен – 4-9 градус ӑшӑ.

Юпа уйӑхӗнче кӗркунне туйӑнма тытӑнӗ, ҫумӑр ҫума пуҫлӗ. Ҫумӑр нумайлӑхах килӗ – чӳк варричченех нӳрӗ ҫанталӑк тӑрӗ. Юпан иккӗмӗш ҫурринче сивӗтӗ, юр ҫума лартма та пултарӗ. Анчах, ахӑртнех, ирӗлӗ. Пӗтӗмӗшле илсен, чӳк уйӑхӗ ытти чухнехинчен ӑшӑрах пулӗ.

Малтанлӑха пӗлтернӗ тӑрӑх, чӳк варринче 25 градус таран сивӗтме пултарӗ, уйӑх вӗҫлениччен юр хулӑнӑшӗ 30 сантиметра ҫитме пултарать.

cap.ru сӑнӳкерчӗкӗ

Шупашкарти шыв управҫине 4 пин пуҫ стерлядь пулӑ янӑ. Вӗтӗ пулла шыва ярасси пирки малтан Раҫҫейӗн пулӑ агентствин Атӑлпа Кама территорийӗнчи управленийӗпе калаҫса татӑлнӑ.

Вӗтӗ пулла Шупашкарти «Роланд» ресторан патӗнчи лапамра янӑ. Унта маларах асӑннӑ управлени ӗҫченӗсем тата Шупашкар хулин ҫурт-йӗрпе коммуналлӑ хуҫалӑх управленийӗн специалисчӗсем хутшӑннӑ.

Тӗнче тетелӗнчи сӑнӳкерчӗксемпе усӑ курса хатӗрленӗ коллаж

Чӑваш Ен Элтеперӗ черетлӗ йыша пысӑк шайри наградӑсемпе чыслама йышӑннӑ. Ҫав шутра медальпе ордена тивӗҫнисем те пур.

«Чӑваш Республики умӗнчи тава тивӗҫлӗ ӗҫсемшӗн» ордена «Ядринмолоко» обществӑн президенчӗ (должноҫӗ ҫапларах иккен) Николай Малов агропромышленноҫа аталантарнӑшӑн тата общество пурнӑҫӗнчи хастарлӑхшӑн тивӗҫнӗ.

«Чӑваш Республики умӗнчи тава тивӗҫлӗ ӗҫсемшӗн» орден медалӗпе те предприяти ертӳҫине чыслас тенӗ. Ку медале «Трактор завочӗсем» концернӑн генеральнӑй директорне Андрей Водопьянова промышленноҫа аталантарнӑшӑн пама йышӑннӑ.

cap.ru сӑнӳкерчӗкӗ

Ӗнер, авӑн уйӑхӗн 3-мӗшӗнче, Чӑваш Енре Пӗрлӗхлӗ кӗрешӗвӗн «Кӗрешӳ» республикӑри центрӗ уҫӑлнӑ. Ӑна Шупашкарти 11-мӗш спорт шкулӗнче йӗркеленӗ.

Ҫӗнӗ центрта 500 ытла ачапа ҫамрӑк тренировкӑна ҫӳрейӗҫ, вӗсемпе 10 преподаватель ӗҫлӗ.

Малтанласа центрта каратэ, киокушин, хутӑш ҫапӑҫу, панкратион, хӗвелтухӑҫ кӗрешӗвӗ, кудо енӗпе уйрӑмсем ӗҫлӗҫ, каярах кӗрешӗвӗн ытти енӗпе уҫӑлӗҫ.

Кӗрешӳ центрӗнче пысӑк шайри ӑмӑртусене ирттерме палӑртаҫҫӗ.

"Чеб.ру" сайтри сӑн

Ҫитес ҫул Республика кунӗ ӑҫта иртесси паллӑ. Йӑлана кӗнӗ тӑрӑх, паллах, Шупашкарта пулӗ. Тата уяв мероприятийӗсем Етӗрне округӗнче иртӗҫ. Республика кунне ирттерме шӑпах ҫак округ тивӗҫнӗ.

Аса илтерер: кӑҫал уяв Шупашкарта тата Тӑвай округӗнче пулнӑ. Сӑмах май, ҫитес ҫул Чӑваш автономи облаҫӗ йӗркеленнӗренпе 105 ҫул ҫитет.