mk103.med.cap.ru сӑнӳкерчӗкӗ

Шупашкарта васкавлӑ пулӑшура ӗҫлекен тухтӑрсем чӗри тапма чарӑннӑ ҫынна вилӗмрен ҫӑлса хӑварнӑ.

Раштав уйӑхӗн 18-мӗшӗнче шурӑ халатлисем 45 ҫулти арҫын патне кайнӑ. Вӑл йывӑррӑн сывланӑ, унӑн тути кӑвакарса кайнӑ. Тухтӑрсем пырса ҫитсе ӑна пулӑшма тытӑннӑ вӑхӑтра арҫын тӑнне ҫухатнӑ, сывлама пӑрахнӑ.

Маргарита Давыдова тухтӑрпа Екатерина Баринова фельдшер парӑнман. Вӗсем чӗрепе ӳпке реанимацийӗ ирттерме йышӑннӑ. Тепӗр 10 минутран арҫыннӑн чӗри ӗҫлесе кайнӑ.

Кайран ӑна пульницӑна илсе кайнӑ. Халӗ вӑл унта сипленет.

21.rospotrebnadzor.ru сайтри сӑн

Республикӑра ОРВИпе чирлекен нумайланнӑ. Ытларахӑшӗ – ачасем. Кун пирки Роспотребнадзор пӗлтерет.

Иртнӗ эрнере республикӑра 151 ҫын гриппа чирленине палӑртнӑ. Вӗсенчен 51-шӗ- аслӑ ӳсӗмри ҫынсем, 100-шӗ – 17 ҫул тултарманнисем. Ведомство палӑртна тӑрӑх, ӳпке шыҫҫипе те чирлекен нумай. Ҫавна май Шупашкарти пӗр шкул дистанци мелӗпе вӗренет. Республикӑри тӗрлӗ округри 37 шкулти 1-5 класс дистанци мелӗ ҫине куҫнӑ.

forum.na-svyazi.ru сайтри сӑн

ЧР Цифра министерстви халӗ те «Хыпар» хаҫат валли редактор шырать. Тепӗр 7 районти хаҫатӑн та редакторсем ҫук.

Аса илтерер: юпа уйӑхӗнче конкурс ирттерессине пӗлтернӗ. Конкурса раштавӑн 13-мӗшӗнче пӗтӗмлетмелле пулнӑ. Анчах ӑна кӑрлач уйӑхӗччен тӑснӑ. Цифра министерстви документсене кӑрлач уйӑхӗн 25-мӗшӗччен йышӑнӗ.

Палӑртмалла: Пӑрачкав, Куславкка, Ҫӗрпӳ, Канаш, Елчӗк, Тӑвай тата Йӗпреҫ муниципалитет округӗсенчи хаҫатсем валли редактор шыраҫҫӗ.

21.мвд.рф сӑнӳкерчӗкӗ

Ӗнер, раштав уйӑхӗн 18-мӗшӗнче, «Атӑл» автомобиль ҫулӗ ҫинчи инкекре виҫҫӗн аманнӑ.

Ирхи 4 сехет те 30 минутра пулса иртнӗ инкекре «Киа Рио» машина водителӗ хирӗҫ килекен ҫул ҫине тухса кайса «КамАЗ» фурӑпа ҫапӑннӑ.

Иномарка рулӗ умӗнчи 57 ҫулти водителе больницӑна илсе кайнӑ, ҫывӑх вӑхӑтра вӑл унта сыватӗҫ. Машинӑри икӗ пассажир килте сипленӗҫ.

chnmuseum.ru сӑнӳкерчӗкӗ

Раштав уйӑхӗн 22-мӗшӗнче Чӑваш тӗррин музейӗнче «Ҫынсене илем кӳрӗр» курав уҫӑлӗ.

Унта хӑйӗн касса хатӗрленӗ хитре япалисемпе – шкатулкисемпе, вазисемпе, ламписемпе, арламалли ураписемпе тата ыттипе – Раҫҫейӗн тава тивӗҫлӗ учителӗ Валерий Кудряшов тата унӑн вӗрентекенӗсем паллаштарӗҫ.

Валерий Кудряшов Шупашкарти 49-мӗш шкулта технологи учителӗнче тӑрӑшать. 2000 ҫулта шкулта «Наследие» (чӑв. Эткерлӗх) ача-пӑча производство пӗрлешӗвне уҫнӑ. Унӑн хӑйӗн уставӗ, бизнес-планӗ, тавар бренчӗ пур. 2003 ҫултанпа компани Чӑваш Енри Ремеслениксен гильдийӗн пайташӗ.

chuvbook.ru сӑн ӳкерчӗкӗ

Раштав уйӑхӗн 14-мӗшӗнче К.В. Иванов ячӗллӗ Литература музейӗнче Зинаида Осипован «Любимая кукла. Юратнӑ пукане» ача-пӑча кӗнекине хӑтлама пуҫарӑннӑ. Унта ачасем тата ваттисем пухӑннӑ.

Хӑтав тӗлне музей «Поэтесса Зинаида Осипова» курав хатӗрленӗ. Унта ҫыравҫӑ мӑшӑрӗпе — паллӑ чӑваш ҫыравҫипе тата драматургӗпе, врачпа, Петр Осиповпа — сӑнланнӑ ӳкерчӗксем йышлӑ. Вӗсенче Оисповсен ачисем, мӑнукӗсем. Мӑнукӗсенчен пӗри, Ирина Иваницкая, – пианист.

«Любимая кукла. Юратнӑ пукане» – поэтӑн иккӗмӗш кӗнеки. Пӗрремӗшне автор пурӑннӑ вӑхӑтра, 1967 ҫулта, «Золотое детство» ятпа кун ҫути кӑтартнӑ.

chnmuseum.ru сӑнӳкерчӗкӗ

Куславкка районӗнчи Куснар ялӗ ҫывӑхӗнче уҫӑлнӑ ҫӗнӗ музей аслӑ ҫул хӗрринче аякранах курӑнса ларать.

Кӑҫалхи юпа уйӑхӗн 28-мӗшӗнче ӗҫлесе кайнӑскер «Чӗмсӗр чикӗсен строителӗсем» мемориалта вырнасӑ.

Чӑваш наци музейӗнче пӗлтернӗ тӑрӑх, унта йӑлана кӗнӗ музей формачӗсемпе пӗрлех хальхи вӑхӑтри техника майӗсемпе те усӑ курнӑ.

Пысӑк ҫутӑ экранӗ Сӑрпа Хусан хӳтӗлев чиккисене тунисене халалланӑ видеопа ҫӗрӗпех паллаштарса тӑрать. Ҫавӑ «М7» ҫул ҫинченех курӑнса ларать.

Музейра – мультимеди информаци сӗтелӗсем, плазма панель, лазер проектор, акустика тытӑмӗ.

cap.ru сӑнӳкерчӗкӗ

Ҫак кунсенче тыл ӗҫченӗ тата ӗҫ ветеранӗ Анастасия Егорова 100 ҫул тултарнӑ. Ҫак ятпа ун патне РФ Президентӗнчен Владимир Путинран саламлӑ ҫыру килнӗ.

Анастасия Александровна Шупашкарта пурӑнать. Вӑрҫӑ вӑхӑтӗнче вӑл Йӗпреҫри лесопилкӑра ӗҫленӗ, лашапа ҫӗрулми турттарнӑ. Вӑрҫӑ пӗтсен колхозра тӑрӑшнӑ.

Анастасия Егорова виҫӗ ача ҫуратса ӳстернӗ. Халӗ унӑн икӗ мӑнук, пӗр кӗҫӗн мӑнук пур. Вӗсемпе савӑнса пурӑнать вӑл.

"Чеб.ру" сайтри сӑн

Паян Шупашкар хулин пуҫлӑхне суйлас ыйтупа конкурс комиссийӗн ларӑвӗ иртнӗ. Кандидатсем тӑваттӑн пулнӑ: хула пуҫлӑхӗн тивӗҫӗсене пурнӑҫлакан Денис Спирин, Шупашкар хула администрацийӗн вӗренӳ управленийӗн ертӳҫи Алексей Лукшин, Шупашкаор хулин ҫурт-йӗр фончӗн пуҫлӑхӗ Андрей Шестаков, «ЭДО» тулли мар яваплӑ общество директорӗн ҫумӗ Николай Голубцов.

Ларура икӗ кандидата суйланӑ: Алексей Лукшин тата Денис Спирин. Ыран Шупашкар хула пухӑвӗн депутачӗсем уҫӑ сасӑлавра икӗ кандидатран пӗрне суйлӗҫ.

Инкеклӗ лару-тӑру министерстви тунӑ сӑн

Канмалли кунсенче республикӑра пулнӑ пушарсенче икӗ ҫыннӑн пурнӑҫӗ татӑлнӑ. Инкексем Муркаш тата Елчӗк муниципалитет округӗсенче пулнӑ.

Муркаш тӑрӑхӗнчи Анатри Панкли ялӗнче 77 ҫулти арҫын хӑйӗн килӗнче ҫунса вилнӗ. Малтанлӑха пӗлтернӗ тӑрӑх, пушар юсавсӑр электрокӑмакана пула тухнӑ.

Кӗҫӗр Елчӗк тӑрӑхӗнчи Таяпа Энтри ялӗнче пушар пулнӑ. Унта 36 ҫулти кил хуҫи ҫунса вилнӗ. Халӗ ӗҫ-пуҫа уҫӑмлатаҫҫӗ.