Кӳршӗ Мари Республикинче ҫухалнӑ ҫынна Чӑваш Енре тупнӑ. Арҫын ӑс-тӑнӗ арпашӑннипе аптӑрать.
Ҫухалса кайнӑскере ҪҪХПИ ӗҫченӗсем тупнӑ. Чӳк уйӑхӗн 27-мӗшӗнче ҫул-йӗрпе патруль служби Шупашкар районӗнче патрульте пулнӑ. Пакунлисем «Вятка» ҫул хӗррипе пыракан ҫынна курсан чарӑннӑ. Арҫын хӑй Мари Элта утнӑ пек калаҫнӑ. Йӗрке хуралҫисем унӑн сывлӑхӗпе кӑлтӑксем пуррине асӑрхасан ӑна полици уйрӑмне илсе ҫитернӗ.
Арҫын камне палӑртсан унӑн арӑмӗпе, кӳршӗ республикӑри хӗрарӑмпа, ҫыхӑннӑ. Вӑл йӗрке хуралҫисене тав тунӑ. Упӑшки килтен чӳк уйӑхӗн 26-мӗшӗнче тухса кайнӑ-мӗн, телефонне пӗрле илмен.
ЧР ШӖМӗ банкоматран ют ҫын карттине илсе кайнӑ хӗрарӑма шырать. Вӑл ҫав карточкӑпа лавккасенче таваршӑн тӳленӗ тесе шутлаҫҫӗ.
Полици ҫав хӗрарӑма палласа илмешкӗн пулӑшу ыйтать. Вӑл банкоматран ют ҫын карточкине илсе кайни видеокамера ҫине лекнӗ. Ку Шупашкарти Ленин Комсомолӗн урамӗнче пӗлтерхи ҫурла уйӑхӗнчех пулнӑ. Ҫын карточкипе вӑл кайран ҫӗнӗ кӑнтӑр районӗнчи лавккасенче таваршӑн тӳленӗ.
Чӳк уйӑхӗн 24-мӗшӗнче 55 ҫулти арҫын полицие пынӑ та хӑй ултавҫӑсен аллине лекни пирки каласа кӑтартнӑ. Вӑл хӗллехи шинӑсем илме шухӑшланӑ, тӗнче тетелӗнче пӗлтерӳсем шыранӑ.
Арҫын кирлӗ шинӑсене тупсан сутуҫа 22 пин тенкӗ куҫарса панӑ. Анчах вӑл шинӑсене илеймен, сутуҫӑ та йӗп пек ҫухалнӑ. Арҫын каланӑ тӑрӑх, ытти чухне вӑл тӗнче тетелӗнче тавар туяннӑ чухне ҫынсем ун пирки мӗн ҫырнине вуласа пӗлнӗ. Хальхинче вара вӑл ҫакна укҫа куҫарсан ҫеҫ тунӑ.
Кун тӗлӗшпе пуҫиле ӗҫ пуҫарнӑ. Йӗрке хуралҫисем ҫак ӗҫе тунӑ ҫынна шыраҫҫӗ.
Паян Шупашкарти 28-мӗш шкулта ачасене эвакуациленӗ. Пӗлӳ ҫурчӗ кӑнтӑр поселокӗнче Ашмарин урамӗнче вырнаҫнӑ.
Шкулта бомба хуни пирки хыпар килнӗ. Вырӑна Росгварди, полици ӗҫченӗсем ҫитнӗ, пӗлӳ ҫуртне тӗплӗн тӗрӗсленӗ. Кун валли ҫур сехет кирлӗ пулнӑ. Ҫав вӑхӑтра ачасем урамра пулнӑ, вӗсене эвакуациленӗ.
Эвакуаци вӑхӑтӗнче нимӗнле пӑтӑрмах та пулман. Тӗрӗслев ирттернӗ хыҫҫӑн ачасем каллех парта хушшине ларнӑ та малалла вӗреннӗ.
Шупашкарта хӗрарӑм банка пысӑк укҫа куҫарса пама кайнӑ та полицие лекнӗ. Ҫапла вӑл ултавҫӑсен аллине каллех лекесрен хӑтӑлнӑ.
Чӳк уйӑхӗн 12-мӗшӗнче 56 ҫулти хӗрарӑм кредит илнӗ, 1,5 миллион тенкине куҫарса пама хӑтланнӑ. Юрать, банк ӗҫченӗ ӑна вӑхӑтра чарнӑ. Вӑл ку ӗҫ иккӗленӳллӗ пулнине сиснӗ. Банк ӗҫченӗ тӳрех полицейскисене чӗннӗ.
Ҫакӑ паллӑ: хӗрарӑм малтанхи кун 3 миллион тенкӗ кредит илнӗ, хӑйӗн 150 пин тенкине хушнӑ та ултавҫӑсене куҫарса панӑ. Банк ӗҫченӗсем ӑна кун пирки ӑнлантарнӑ.
Ҫӗмӗрлере пурӑнакан 33 ҫулти арҫын «банк ӗҫченӗсене» пулӑшас тесе хӑй укҫа ҫухатнӑ. Вӑл 1,4 миллион тенкӗ кредит илсе ӑна ултавҫӑсене куҫарса панӑ.
Чӳк уйӑхӗн 2-мӗшӗнче ҫак арҫын полицие пырса пулӑшу ыйтнӑ. Вӑл каланӑ тӑрӑх, ун патне палламан ҫын шӑнкӑравланӑ, вӑл банк ӗҫченӗ имӗш. Хайхискер такам арҫын ячӗпе кредит илме хӑтланни пирки каланӑ. Вӑл арҫынна хураха тытмашкӑн кредит заявки пама сӗннӗ.
Ку 1 миллион та 430 пин тенкӗлӗх кредит илнӗ. Счета вӑл хӑй ҫеҫ кӗме пултарнине ӗненнӗ. Ултавҫӑ аллине лекни пирки шутлама та пултарайман. Каллех кредит илме хушсан тин ултавҫӑ тӗлне лекнине ӑнкарнӑ. Анчах счечӗ ҫинчи укҫи пулман ӗнтӗ.
Паян 13 сехетре Шупашкарти «Ҫӗнӗ хула» микрорайонта арҫын ҫӳллӗшӗнчен ӳкнӗ. Ку Прокопьев урамӗнчи 4-мӗш ҫуртра пулнӑ. Арҫын 8-мӗш хутран ӳкни паллӑ. Анчах мӗнле сӑлтава пула аялалла ӳкнине хальлӗхе палӑртман.
Вырӑна полицейскисем, тухтӑрсем ҫитнӗ. Шурӑ халатлисем арҫын вилнине палӑртнӑ. Вӑл 32 ҫулта пулнӑ.
Халӗ кун тӗлӗшпе следстви умӗнхи тӗрӗслев ирттереҫҫӗ.
Паян пӗтӗм Шупашкар ура ҫине тӑнӑ. Ҫурҫӗр-хӗвеланӑҫ районӗнче пӑшаллӑ арҫын ҫӳренине курнӑ. Мӗн пулса иртнӗ-ха паян хулара?
Шупашкарта пурӑнакан 55 ҫулти арҫын 11 сехетре хӑйӗн хваттерӗнче, Гузовский урамӗнчи 30-мӗш ҫуртра, пӑшалтан пенӗ. Унтан вӑл подъезда тухнӑ. Кун пирки арҫыннӑн тӑванӗ полицие пӗлтернӗ.
Пӑшаллӑ арҫынна полици нарячӗ шырама тытӑннӑ. Вӑл ӑҫталла кайнине «Хӑрушсӑр хула» камерисемпе сӑнанӑ: арҫын Гузовский урамӗнчен Горький проспекчӗ еннелле утнӑ.
1,5 сехет ҫурӑран ӑна Сверчков урамӗнче, Атӑл хӗрринчи вӑрманта, тупнӑ. Вӑл полицейскисене курсан тарма хӑтланнӑ. Анчах ӑна ҫавӑрса илнине ӑнансан хайхискер хӑйне тӗллесе пенӗ. Вӑл ҫавӑнтах вилнӗ. Юрать-ха, урӑх никам та аманман.
Ача пахчинче воспитательте ӗҫлекен 52 ҫулти хӗрарӑм ултавҫӑсене 2 миллион тенкӗ ытла куҫарса панӑ. Кун пирки вӑл полицие пӗлтернӗ.
Палламан ҫын ун патне юпа уйӑхӗн 11-мӗшӗнче шӑнкӑравланӑ. Вӑл банк ӗҫченӗ имӗш. Хайхискер каланӑ тӑрӑх, унӑн ячӗпе такам кредит илесшӗн, укҫине вӑрласшӑн. Палламан ҫынсем хӗрарӑм патне 4 кун шӑнкӑравланӑ. Юлашкинчен хӗрарӑм кредит илнӗ, укҫине вӗсене куҫарса панӑ. Ултавҫӑсем «вӑрттӑн операцие» татас мар тесе кун пирки никама та пӗлтерме хушман.
Хӗрарӑм кредит илнӗ чухне хваттерне салук хунӑ. Ултавҫӑсене вӑл 2 млн ытла тенкӗ куҫарса панӑ. Кун тӗлӗшпе пуҫиле ӗҫ пуҫарнӑ.
Ҫӗмӗрлери йӗрке хуралҫине кӳршӗ республикӑри арҫын уринчен ҫыртнӑ. Куншӑн ӑна колоние ӑсатнӑ.
ШӖМ пӗлтернӗ тӑрӑх, ку кӑҫал ака уйӑхӗн 17-мӗшӗнче ҫӗрле пулнӑ. Ӳсӗр арҫын хӑна ҫуртӗнче йӗркене пӑснӑ, хӑйне тивӗҫлипе тытман. Полицейскисем килнӗ, Хусан арҫынни вӗсене хирӗҫ тӑнӑ.
Хайхи ӳсӗр арҫын урайне ӳксе пӗр полицейские уринчен ҫыртнӑ. Ӑна полици уйрӑмне илсе ҫитерсе протокол ҫырнӑ. Халӗ суд пулнӑ. 35 ҫулти арҫынна пӗтӗмӗшле режимлӑ колоние 2 ҫул та 1 уйӑхлӑха ӑсатнӑ.
+21.3 °C