Хӗл мучи Чӑваш Енри ачасене те килсе курӗ. Ҫак асамҫӑ тӗрлӗ хулана ҫитет. Шупашкар та ҫав списока лекнӗ.
Хӗл мучи пуйӑсӗ республикӑн тӗп хулинче ҫак канмалли кунсенче, раштав уйӑхӗн 4-мӗшӗнче, чарӑнӗ. Вӑл Аслӑ Устюгран ҫитӗ, унпа пӗрле ытти асамҫӑ та пулӗ.
Хӗл мучи пуйӑспа килӗ. Унта ачасене йышӑнмалли вакун, вӑйӑсемпе квестсем ирттермелли вакунсем, ресторан, сувенирсем сутакан лавкка пулӗҫ.
Сӑмах май, Хӗл мучи пуйӑсӗ юпа уйӑхӗн 22-мӗшӗнче ҫула тухнӑ, вӑл 100 хулара чарӑнӗ.
Атӑл пӑрӗ ҫинче пулӑҫсен сезонӗ пуҫланнӑ. Паян чутах 33 арҫын пӑр катӑкӗ ҫинче ларса кайман.
Пулӑҫсем Ҫӗнӗ Шупашкар ҫывӑхӗнче, ГЭС патӗнче, пулӑ тытса ларнӑ. Тӑрук пӑр катӑлнӑ та шыва май юхма пуҫланӑ. Ҫав пӑр катӑкӗн серепине 30 пулӑҫ лекнӗ.
Ҫалавҫӑсем патне 10 сехетре хыпар ҫитнӗ. Пулӑҫсене ҫӑлма Ҫӗнӗ Шупашкарти, Сӗнтӗрвӑрринчи тата Шупашкарти ҫӑлавҫӑсем ҫитнӗ.
11 сехетре 33 пулӑҫа ҫыран хӗррине кӑларнӑ.
Шупашкарти 1-мӗш Кӑнтӑр тӑкӑрлӑкӗнчи пӗр ҫурт миграци ыйтӑвӗпе ӗҫлекен ҫынсене иккӗлентерме тытӑннӑ. Унта 60 ытла ҫын пропискӑра тӑнӑ.
Вӗсем вырӑна ҫитсе курнӑ та - унта пурӑнмалли юрӑхлӑ ҫурт та пулман, стенасем кӑна.
Ҫӗр хуҫи - 53 ҫулти арҫын. Вӑл тӗрӗссине каласа кӑтартнӑ. Хайхискер унта хӑйӗн пӗлӗшӗсене, 60 ҫынна, пропискӑна тӑратнӑ. Лешсем хӑйсен ачисене прописка панӑ.
Арҫын тӗлӗшпе пуҫарнӑ пуҫиле ӗҫе суда пӑхса тухма панӑ.
Канмалли кунсенче тинех Шупашкарти Граждан урамӗпе общество транспорчӗ ҫӳреме тытӑнӗ. Раштавӑн 4-мӗшӗнче ҫӗнӗ асфальтпа 11-мӗш троллейбус тата автобуссем ҫӳреме тытӑнӗҫ.
Транспорт Чапаев савучӗ еннелле ҫӗнӗ асфальтпа кайӗ, каялла - Энтузиастсен урамӗпе. Халӗ ҫул хӗресленекен вырӑнта светофора ҫутма хатӗрленеҫҫӗ.
Подрядчик раштав уйӑхӗ вӗҫлениччен икӗ сий асфальт сарма шантарнӑ. Ытти ӗҫе ҫуркунне пурнӑҫлама тытӑнӗҫ.
Шупашкар хулинчи ведомство тулашӗнчи хуралта ӗҫлекенсем патрульте ҫӳренӗ май Иван Яковлев проспектӗнчи суту-илӳпе кану центрӗнче вырнаҫтарнӑ хавхаллӑ сигнализаци ӗҫлеме тытӑнни пирки пӗлнӗ.
Росгвардире ӗҫлекенсем пӗр тӑхтамасӑр асӑннӑ адреспа ҫула тухнӑ. Йӗрке хуралҫисем сыхлакан объектра арҫынна тытса чарнӑ. Лавкка ӗҫченӗсен сӑмахӗпе килӗшӳллӗн тытса чарнӑ ҫын 80 пин ытла тенкӗлӗх тавар вӑрлама хӑтланнӑ.
Полици уйрӑмне илсе ҫитернӗ хыҫҫӑн эрехпе ӳсӗрӗлни каҫранах курӑнакан гражданин хӑйне агрессивлӑ тыткалама, япӑх сӑмахсемпе ятлаҫма пуҫланӑ.
Хамӑр тӑрӑхрах пурӑнакан 34 ҫулти ҫын тӗлӗшпе РФ Пуҫиле кодексӑн 158 статьян 1 пайӗ (вӑрлани) тӑрӑх пуҫиле ӗҫ пуҫарнӑ.
Ҫак эрнери ытларикун Шупашкарти «Университет» микрорайонта ҫӗнӗ ача пахчи уҫӑлнӑ. Унта хӗрлӗ хӑю касма тӳре-шара пырса ҫитнӗ, ашшӗ-амӑшӗпе шӑпӑрлансене пухнӑ.
«Ҫыхӑнура» форумра пӗлтернӗ тӑрӑх, ача пахчине тӳре-шарапа фотографсене ҫеҫ кӗртнӗ. Ачасемпе ашшӗ-амӑшне урамра хӑварнӑ. Пӗчӗккисем хоккейла вылянӑ, пысӑк пуканесемпе савӑннӑ, шӑпӑрлансене аниматорсем хаваслантарнӑ. Урамра 13 градус таран сивӗ пулнӑран ачасене ашшӗ-амӑшӗ хӑвӑртрах киле илсе кайма васканӑ.
Ача пахчине 2021 ҫулхи авӑн уйӑхӗнчех хута ямалла пулнӑ. Хӗрлӗ хӑю каснӑ пулин те, вӑл ачасене халех йышӑнмӗ: вӗренӳ учрежденийӗ ӗҫлеме лицензи илсе ӗлкӗреймен.
Чӑваш Енри ача ҫурчӗсем ӳлӗмрен пӗр орган тытӑмӗнче пулӗҫ. Кун пирки республикӑн Элтеперӗ ҫумӗнчи ятарлӑ канашӑн ӗнерхи ларӑвӗнче сӳтсе явнӑ. Унта Ачалӑх вунӑҫуллӑхӗпе ҫыхӑннӑ мероприятисем пирки калаҫнӑ. Опекӑпа попечительство органӗсене 2024 ҫулччен пӗр органа пӑхӑнмалла тӑвасси пирки те сӑмах хускатнӑ.
Ларура палӑртнӑ тӑрӑх, юлашки 15 ҫулта пирӗн республикӑра тӑлӑх тата ашшӗ-амӑшӗн хӳттисӗр юлнӑ ачасен йышӗ икӗ хутчен чакнӑ. Паян ун пек ачасен йышӗ 2,4 пинпе танлашать. Тӑлӑхсене тата ашшӗ-амӑшӗн хӳттисӗр юлнисене ҫемьене илесси те икӗ хута яхӑн ӳснӗ.
Паян пирӗн республикӑра тӑлӑх ачасен пилӗк организацийӗ ӗҫлет. Вӗсенчен виҫҫӗшӗ (Пӑрачкаври ача ҫурчӗ, Шупашкарти тата Ҫӗмӗрлери тӑлӑх тата ашшӗ-амӑшӗн хӳттисӗр юлнӑ ачасен центрӗсем) Чӑваш Енӗн Вӗрентӳпе ҫамрӑксен политикин министерствине пӑхӑнса тӑраҫҫӗ, «Малютка» ача ҫурчӗ — Сывлӑх сыхлав министерствине, Кӳкеҫри ӑсран аталанса ҫитеймен ачасен интернат-ҫурчӗ — Ӗҫ тата социаллӑ хӳтлӗх министерствине. Вӗсене ӳлӗмрен пӗр орган тытӑмне куҫарасшӑн.
Шупашкарти "Университет" микрорайонта ыран ҫӗнӗ ача пахчи уҫӑлӗ. Вӑл "Маленькие академики" /чӑв. "Пӗчӗк академиксем"/ ятлӑ. Вӑл Кураков бульварӗнчи 1-мӗш ҫуртра вырнаҫӗ.
Чӑннипе, ача пахчи ҫулталӑк кая юлса уҫӑлать. Унӑн пӗлтӗр кӗркуннех ачасене йышӑнмалла пулнӑ. Анчах подрядчик объекта вӑхӑтра туса пӗтермен.
Виҫӗ хутлӑ ача пахчине ҫулталӑк ҫурӑран аслӑрах 250 шӑпӑрлан ҫӳрӗ. Унта 14 ушкӑн йӗркелӗҫ. Ачасен бассейнра чӑмпӑлтатма та май пулӗ.
Чӳк уйӑхӗн 26-мӗшӗнче ҫуралнисене тӗрленӗ кипке парнелесси йӑлана кӗнӗ. Ку акци пирӗн республикӑра виҫҫӗмӗш хут иртнӗ. Ҫак кун ҫуралнисем "Тӗрӗре ҫуралнисем" акцие хутшӑнакансем пулса тӑраҫҫӗ.
Кӑҫал чӳкӗн 26-мӗшӗнче пепкелӗх центрӗнче 10 ача ҫуралнӑ: 6 арҫын ачапа 4 хӗрача.
Ҫӗнӗ Шупашкарти перинаталь центрӗнче 5 пепке кун ҫути курнӑ. Чӑваш тӗррин кунӗнче ҫуралнисене пурне те чӑваш тӗрриллӗ кипке парнеленӗ.
Василий Чапаевӑн мӑнукӗн ачи вилнӗ. Чӑваш наци музейӗ пӗлтернӗ тӑрӑх, Евгения Чапаевӑн чӗри чӳк уйӑхӗн 26-мӗшӗнче тапма чарӑннӑ.
Евгения Артуровна 62 ҫулта пулнӑ. Вӑл Мускавра пурӑннӑ пулсан та Чӑваш Енпе тачӑ ҫыхӑну тытнӑ. Шупашкартах унӑн хӗрӗ Василиса ҫуралнӑ, кунтах мӑнукӗ Андрей кун ҫути курнӑ, ачана пирӗн хулара тӗне кӗртнӗ.
Евгения Артуровна Чӑваш Ене тӑтӑшах килнӗ. Вӑл «Василек» калавсен пуххине кӑларнӑ, «Мой неизвестный Чапаев» кӗнекене кун ҫути кӑтартнӑ.
Евгения Артуровна юлашки хутчен Шупашкарта ҫу уйӑхӗн 28-мӗшӗнче пулнӑ, В.И.Чапаев ячӗллӗ музея ҫитнӗ. Ӑна ҫӗнетнине курса ӑшӑ сӑмахсем ҫырса хӑварнӑ.
+7.4 °C