Чӑваш Енӗн тӗп хулинче сӑра фестивале шавласа та кӗрлесе иртет.
Халӑх тетелӗнчи «Правда ПФО» хаҫат пӗлтернӗ тӑрӑх, пӗр кунхине пуҫне чӑваш эрешӗллӗ масмак тӑхӑннӑ хӗр кроссовкие сӑра ярса ӗҫнӗ. Ӑна телеканалсенчен пӗри хӑйӗн репортажӗнче пысӑк планпах кӑтартнӑ.
Чӑваш эрешӗллӗ масмак тӑхӑннӑ хӗр сӑрана кроссовкие ярса ӗҫнине мӗншӗн телевизорпах кӑтартнине те, ун пек шоуна мӗншӗн хатӗрленине те эпир пӗлеймӗпӗр ӗнтӗ. Тен, чӑваш сӑрине ҫавӑн пек рекламӑлас тенӗ-ши, тен, чӑваш хӗрӗ маттуррине кӑтартаса парас тенӗ-ши?
Шупашкарта правасӑр водителӗн машинине туртса илнӗ.
Хулара пурӑнакан арҫынна водитель прависӗр руль умне ларнишӗн унччен икӗ хутчен явап тыттарнӑ-ха. Апла пулин те вӑл йӗркене пӑснӑ. Ҫул-йӗр хӑрушсӑрлӑхӗн инспекторӗсем виҫҫӗмӗш хутӗнче Шупашкар районӗнчи Хыркасси ялӗ патӗнче тытса чарнӑ. Йӗрке хуралҫисене вӑл ӑнлантарнӑ тӑрӑх, «Haval F7X» машина рулӗ умне арӑмӗ ыйтнӑран ларнӑ, хӗрарӑм хӑйӗн савнӑ упӑшкин водитель удостоверенийӗ ҫуккине (тӗрӗсрех, ӑна туртса илнине) пӗлмен имӗш.
Суд 34 ҫулти арҫыннӑн машине туртса илме йышӑннӑ. Ӑна РФ Пуҫиле кодексӗн 264,3 статйин 1-мӗш пайӗпе явап тыттарса 240 сехет ӗҫлеттерме йышӑннӑ. Унсӑр пуҫне водитель правине тата тепӗр 1 ҫул тата 8 уйӑхсӑр памалла мар тунӑ.
Мӑшӑр пӗрле пулса туяннӑ машинӑна вара конфискацилеме йышӑннӑ. Машина сутса тунӑ укҫа патшалӑх хыснине кайӗ.
Утӑ уйӑхӗн 27-мӗшӗнче Шупашкар хулинче 3-мӗш хутран 2 ҫулти арҫын ача ӳкнӗ.
Ку Трактор тӑвакансен проспектӗнчи ҫуртра пулнӑ. Ача пӳлӗмре пӗчченех юлсан чӳрече янахӗ ҫине хӑпарнӑ та москитлӑ сетка ҫине таяннӑ. Паллах, вӑл ӑна чӑтайман, ача аялалла вирхӗннӗ. Ӑна пульницӑна илсе кайнӑ, халӗ пӗчӗкскере тухтӑрсем пулӑшу параҫҫӗ.
Аса илтерер: нумаях пулмасть Канаш хулинче 4 ҫулти арҫын ача 4-мӗш хутран ӳкнӗ. Ӑна та пульницӑна илсе кайнӑ. Вӑл та чӳрече янахӗ ҫине хӑпарса москитлӑ сетка ҫине таяннӑ. Чӳрече ҫинче блокиратор пулнӑ, анчах ҫав самантра вӑл уҫӑ тӑнӑ.
Шупашкар хулинче пурӑнакан 24 ҫулти арҫын тӳлевсӗр пӗлтерӳсен сайтӗнче смарт-куҫлӑх туянас тенӗ. Анчах кирлӗ тавар вырӑнне сутуҫӑ ӑна сӗлӗ хӑрпӑкӗ ярса панӑ.
Кун хыҫҫӑн каччӑ полицие кайса заявлени ҫырнӑ. Вӑл смарт-куҫлӑх илес тесе сутуҫа 24 пин тенкӗ куҫарса панӑ. Тавара постамата илсе ҫитерессе кӗтнӗ. Унта вара ӑслӑ куҫлӑх вырӑнне селӗ хӑрпӑкӗ пулнӑ.
ШӖМ тӗнче тетелӗнче тавар туяннӑ чухне питӗ асӑрханма ыйтать. Шел те, ултавҫӑсем ҫынсене шӑнман пӑр ҫине лартса янӑ тӗслӗхсем нумайлансах пыраҫҫӗ.
Шупашкар хулинчи Президент пепкелӗх центрӗнче ҫуралнӑ чухне 745 грамм таякан, 36 сантиметр тӑршшӗ пулнӑ ачана пӑхса ӳстернӗ.
Пулас амӑшӗ пульницӑна юн нумай кайнипе килнӗ. Тухтӑрсем часрах кесарево туса ачана касса кӑларнӑ. Пепке 26-мӗш эрнере ҫут тӗнчене килнӗ. Пӗчӗк виҫеллӗ пулнӑран ача пурнӑҫпа вилӗм хушшинче кӗрешнӗ. Телее, виҫӗ уйӑхран пепке вӑй илнӗ, амӑшӗпе Светланӑпа ӑна киле кӑларнӑ. Ун чухне ача 2900 грамм тайнӑ, 47 сантиметр тӑршшӗ пулнӑ. Килте пӗчӗкскере пиччӗшӗ, ашшӗ тата аслашшӗ-кукамӑшӗ кӗтнӗ.
Ӗнер, утӑ уйӑхӗн 25-мӗшӗнче Шупашкар хулинче «Раҫҫейӗн симӗс ылтӑнӗ» фестиваль уҫӑлнӑ. Кӑҫал пӗчӗк юбилей темелле – 5-мӗш хут ирттереҫҫӗ ӑна.
Хальхинче фестивале 28 производитель тата 35 общепит заведенийӗ хутшӑнма кӑмӑл тунӑ. Вӗсен йышӗнче – пысӑк компанисем тата крафт производителӗсем.
Кӑҫал ӗҫлӗ программӑна та тимлӗх уйӑрӗҫ. Утӑ уйӑхӗн 30-мӗшӗнче фестивальпе килӗшӳллӗн «Раҫҫей хӑмли» конференци иртет. Унта Раҫҫейри 19 регионти 58 эксперт, ӑслӑлӑх, промышленность, вӗренӳ представителӗсем пухӑнӗҫ. Вӗсем ҫитӗнӳсене кӑна мар, хӑмла ӑстисен умӗнче тӑракан тӗллевсене те сӳтсе явӗҫ: селекци аталанӑвӗ, ҫӗнӗ технологисене пурнӑҫа кӗртесси, ӳсен-тӑрана хӳтӗлемелли хальхи йышши хатӗрсем кӑларасси тата ытти те.
Канаш муниципалитет округӗнче паян ҫӗрле пушар пулнӑ. Унта 200 ытла рулон утӑ ҫунса кайнӑ. Пушар Пукӑртан ялӗнче пулнӑ. Ҫулӑм 240 тӑваткал метр лаптӑка ярса илнӗ.
Инкеклӗ лару-тӑру министерствин Чӑваш Республикинчи Тӗп управленийӗ пӗлтернӗ тӑрӑх, ҫак кунах Улатӑр округӗнчи Стемас ялӗнче пӳрт ҫуннӑ. Канаш хулинче тата Сӗнтӗрвӑрри округӗнчи Ҫатракасси ялӗнче мунчасене ҫулӑм ярса илнӗ.
Шупашкар хулинчи Уруков урамӗнче вара трактор хыпса илнӗ. Пушара ҫийӗнчех сӳнтернӗ. Анчах ҫулӑм мотор отсекне тата кабинӑна сиенлетме ӗлкӗрнӗ.
Кӑҫал «Раҫҫей мисӗ» ята тивӗҫнӗ Валентина Алексеева Филипп Киркоровӑн клипӗнче ӳкерӗнет.
Палӑртса хӑварар: паллӑ юрӑҫ пирӗн ентеше Хусанта иртнӗ «БРИКС мисӗ» ята ҫӗнсе илнӗ хыҫҫӑн асӑрханӑ. Вӑл ӑна шӑпах ҫавӑн чухне хӑйӗн клипӗнче ӳкерӗнме сӗннӗ.
Хальхи вӑхӑтра пултарулӑх ушкӑнӗ – Турцири Капподокире. Унта Филипп Киркоровӑн «Луиза» юрри тӑрӑх валли ӳкереҫҫӗ. Валентина Алексеева та ҫавӑнтах.
Мӗнех, ӑнӑҫу сунатпӑр пирӗн ентеше!
Хӗрлӗ Чутай округӗнче пурӑнакан Яндайкинсем ҫемье ҫавӑрнӑранпа 55 ҫул ҫитнине паллӑ тунӑ.
Галина Васильевнӑпа Алексей Ивановичӑн юрату историйӗ интереслӗ: вӗсем пӗр-пӗрне пӗрремӗш хут автобусра курнӑ та туслашнӑ. Ун чухне каччӑ хӗре вырӑн панӑ. Нумай та вӑхӑт иртмен – икӗ уйӑхран вӗсем туй туса пӗрлешнӗ.
Яндайкинсем тивӗҫлӗ канӑва тухиччен Шупашкар хулинче ӗҫлесе пурӑннӑ. Галина Васильевна ҫӗвӗ фабрикинче, ҫар савутӗнче вӑй хунӑ. Алексей Иванович кун-ҫулне чукун ҫулпа ҫыхӑнтарнӑ. Вӑл хулари предприятире стропальщикре тата крановщикре вӑй хунӑ.
«Юратса пӗрлешнӗ пулсан пӗр-пӗрне пурнӑҫ тӑршшӗпе юратмалла, яланах килӗшӳре пурӑнмалла», – тет мӑшӑр. Ҫак сӑмахсене тӗпе хурса пурӑнаҫҫӗ Яндайкинсем. Ҫамрӑксене те ҫакнах сунаҫҫӗ.
Ӗнер, каҫ кӳлӗм, Шупашкар хулинчи «Промтрактор» савут патӗнче тӗтӗм тухнине ҫынсем хулан чылай кӗтесӗнчен курнӑ. Мӗн ҫуннӑ унта?
Инкеклӗ лару-тӑру министерствин Чӑваш Енри Тӗп управленийӗ пӗлтернӗ тӑрӑх, савутӑн пӗр цехӗнче пушар тухнӑ. Ҫулӑма пӗр сехет ҫурӑра сӳнтерсе пӗтернӗ.
Ведомство пӗлтернӗ тӑрӑх, пушар тухни пирки 17 сехет те 21 минутра пӗлтернӗ. Вырӑна ҫӑлавҫӑсем, полици ӗҫченӗсем тата тухтӑрсем ҫитнӗ. Пушара 4 техника тата 10 ҫын сӳнтернӗ. Телее, инкекре никам та шар курман.
+20.2 °C