Шупашкарта пурӑнакан 25-ри хӗрарӑм амӑшне вӗлерме тӑнӑ.
Авӑн уйӑхӗн 16-мӗшӗнче 15 сехетре хайхискерпе 48 ҫулти амӑшӗ хирӗҫсе кайнӑ. Пӑтӑрмах хулари Граждан урамӗнчи нумай хваттерлӗ пӗр ҫуртра пулса иртнӗ. Тарӑхса кайнӑ хӗрӗ алла ҫӗҫӗ ярса илсе амӑшне хырӑмӗнчен тата ҫурӑмӗнчен 7 хутран кая мар ҫӗҫӗпе чикнӗ. Унтан вӑл килӗнчен тухса утнӑ.
Суранланнӑ хӗрарӑм хваттертен тухма пултарнӑ, унтан вӑл кӳршисенчен пулӑшу ыйтнӑ, лешсем васкавлӑ пулӑшу тухтӑрӗсене чӗнсе илнӗ.
Амӑшӗпе хирӗҫнӗ хыҫҫӑн 25-ри хӗр хулари кафесенчен пӗрне кайнӑ, унта пынисемпе хирӗҫме тытӑннӑ. Унтан ӑна йӗрке хуралҫисем тытса кайнӑ.
Хӗре хальлӗхе психиатри больницине вырнаҫтарнӑ. Амӑшне вӗлерме тӑнӑшӑн ун тӗлӗшпе пуҫиле пуҫарнӑ.
Ҫитес ҫул нарӑс уйӑхӗн 1-мӗшӗнче Раҫҫейре Амӑшӗн капиталне индексацилӗҫ. Ҫапла вӑл 12,4 процент хӑпарӗ.
Ҫав тапхӑртан пӗрремӗш ачашӑн паракан тӳлев 589,5 пин тенкӗ пулӗ, икӗмӗшӗшӗн – 779 пин тенкӗ. Хальхи вӑхӑтра ку тӳлевсем 524,5 пинпе тата 693,1 пин тенкӗпе танлашаҫҫӗ.
Ашшӗ-амӑшӗ пӗрремӗш ачишӗн амӑшӗн капиталне илнӗ пулсан иккӗмӗшӗ ҫуралсан ҫемьене 189,5 пин тенкӗ парӗҫ.
Ҫӗмӗрле районӗнче пурӑнакан 40 ҫулти арҫын арӑмӗпе ывӑлне сӑлтавсӑр-мӗнсӗрех хӗнеме юратнӑ. Пуҫтах арҫынна пула ҫемье 2021 ҫулхи ҫурла уйӑхӗн пуҫласа 2022 ҫулхи нарӑс уйӑхӗччен темиҫе хут та шар курнӑ.
Хӑйне тата 10 ҫулти ывӑлне арҫын хӗнени ҫинчен хӗрарӑм йӗрке хуралҫисене пӗлтернӗ.
Сӑмах май, арҫынна ачана воспитани парас тӗлӗшпе тивӗҫлипе тӑрӑшманшӑн темиҫе хутчен те явап тыттарнӑ.
Судпа психиатри экспертизи ирттернӗ хыҫҫӑн арҫын ӑс-тӑн енчен сыах марри палӑрнӑ. Суд ӑна психиатри больницинче ирӗксӗр сиплентерме йышӑннӑ.
Чӑваш Республикин Юстици енӗпе ӗҫлекен патшалӑх служби пӗлтернӗ тӑрӑх пирӗн республикӑра уйрӑлакансен йышӗ сахал. Ҫак кӑтартупа Атӑлҫи федераллӑ округра Чӑваш Ен 2-мӗш вырӑн йышӑнать. Раҫҫей Федерацийӗнче вара — 5-мӗш вырӑн.
2022 ҫулталӑкӑн ҫичӗ уйӑхӗ хушшинче республикӑра пӗр пин ҫын ҫине 3,6 уйрӑлу пырса тивет. Раҫҫейре вӑтамран ҫак кӑтарту 4,5 танлашать, Атӑлҫи федераллӑ округра — 4,0. Сакӑр уйӑх хушшинче вара республикӑра 2936 ҫемье арканнӑ. Пӗлтӗр ку кӑтарту 2942 танлашнӑ пулнӑ.
РФ Президенчӗ Владимир Путин Раҫҫейри нумай ачаллӑ ҫемьесене «Ашшӗ-амӑшӗн мухтавӗ» орденпа тата орден медалӗпе чысласси пирки хушу алӑ пуснӑ. Ҫак списокра Чӑваш Енри ҫемьесем те пур.
Пирӗн республикӑри виҫӗ ҫемьене орден медалӗпе чысланӑ. Вӗсем – Алексейпа Татьяна Зайцевсем, Дмитрипе Марина Леонтьевсем, Геннадипе Вера Яковлевсем.
Сӑмах май, унччен Владимир Путин орден медальне тивӗҫнӗшӗн – 200 пин, ордена илнӗшӗн 500 пин тенкӗ пама сӗннӗ.
Ҫак кунсенче Строительство министерствинче 18 ҫул тултарман 7 е ытларах ачана ӳстерекен ҫемьесене сертификат панӑ. Вӗсем унпа мӗн тӑвассине пӗлтернӗ. Пӗрисем хатӗр кӗтес туянасшӑн, теприсем ҫурт хӑпартасшӑн. Анчах чи кирли - ҫак сертификатпа ҫулталӑк вӗҫлениччен усӑ курмалла.
Строительство министерстви пӗлтернӗ тӑрӑх, кунашкал пулӑшупа ҫитес ҫул та тивӗҫтерӗҫ. Ҫитменнине, 2023 ҫул республикӑра Телейлӗ ачалӑх ҫулталӑкӗ пулӗ.
Васильевсем Правительство ҫуртне ҫемйипех килнӗ. Вӗсем 7 ачана воспитани параҫҫӗ. Васильевсем 42 тӑваткал метрлӑ икӗ пӳлӗмлӗ хваттерте пурӑнаҫҫӗ. Паллах, хӗсӗк. Ку сертификат вӗсемшӗн чӑн-чӑн парне пулнӑ.
Вӑрмар районӗнче пурӑнакан Егоровсен ҫемйинче 10-мӗш ача ҫуралнӑ. Апла вӗсем «Амӑшӗ героиня» ята илме пултараҫҫӗ. Аса илтерер: ҫак ята РФ Президенчӗ Владимир Путин ҫирӗплетнӗ. Ҫак ята парсан ҫемьене 1 миллион тенкӗ уйӑрса параҫҫӗ.
Сӑмах май, ҫӗртме уйӑхӗн 1-мӗшӗ тӗлне республикӑра 10 е ытларах ачана воспитани паракан вунӑ ҫемье пулнӑ. Халӗ ав Вӑрмар районӗнчи Егоровсем те ҫав йыша кӗнӗ.
Улатӑрта пурӑнакан Викторпа Нина Куричковсем ҫурлан 26-мӗшӗнче ылтӑн туйне паллӑ тунӑ. Вӗсене администраци ӗҫченӗсем саламланӑ.
Виктор Михайловичпа Нина Михайловна хайне евӗр лару-тарура паллашнӑ. Иртнӗ ӗмӗрӗн 70-мӗш ҫулӗсенче пулнӑ ку. Вӗсем иккӗшӗ те 1-мӗш маршрутпа ҫӳрекен автобуса кӗтсе тӑнӑ. Ҫавӑн чухне вӗсен туслӑхӗ пуҫланнӑ, кайран вӑл юратӑва куҫнӑ.
Анчах вӗсене уйрӑлу кӗтнӗ: Виктора ҫара илнӗ. Вӗсем пӗр-пӗрин патне 2 ҫул ҫыру ҫӳретнӗ. 1972 ҫулхи ҫурла уйӑхӗнче Викторпа Нина пӗрлешнӗ.
Куричковсем хӗрпе ывӑл ҫуралнӑ. Халӗ ылтӑн туя паллӑ тунӑ мӑшӑр мӑнукӗсемпе савӑнса пурӑнать.
Йӗпреҫ районӗнче 37 ҫулти арҫынна явап тыттарма йышӑннӑ. Вӑл хӑйӗн ачи ҫинчен манса кайнӑ.
Тӗпренчӗкӗсене пулӑшман ашшӗ-амӑшне саккун явап тытарма ирӗк парать. Йӗпреҫ арҫынни тӗлӗшпе РФ Пуҫиле кодексӗн 157-мӗш статйин 1-мӗш пайӗпе пуҫиле ӗҫ пуҫарнӑ.
Хайхин 2018 ҫулхи ҫӗртме уйӑхӗнчен тытӑнса алимент парӑмӗ ҫур миллиона яхӑн (403 пин) тенкӗ пухӑнса кайнӑ. Судра арҫын айӑпа йышӑннӑ. Ӑна ҫулталӑк хушши ӗҫлеттерсе юсантарма, ҫав вӑхӑтра ӗҫ укҫин 10 процентне патшалӑх валли тытса юлма йышӑннӑ.
Шупашкар хулинче пӗр хӗрарӑм ют ҫын ачине илсе кайнӑ. Шӑпӑрлан хулари кӳлмекре кӳмере выртнӑ.
Пӑтӑрмах ҫурла уйӑхӗн 17-мӗшӗнче 16 сехетре пулса иртнӗ. Симӗс тӗслӗ кӳмери ача ҫухални пирки полицие пӗлтернӗ. Пӑтӑрмах вырӑнне ҫывӑхри полици нарячӗсем пырса ҫитнӗ. Вӗсем видеокамерӑсене пӑхнӑ та симӗс кӳмеллӗ хӗрарӑма Ярославль урамӗнче асӑрханӑ. Кам ачине тӗксе пынине хӗрарӑм ӑнлантарса парайман — вӑл вил ӳсӗр пулнӑ.
Пӗчӗк арҫын ачана больницӑна илсе кайнӑ. Тепӗр сехетрен ача амӑшӗ те тупӑннӑ.
Ҫӗмӗрлере пурӑнакан 31 ҫулти хӗрарӑм йӗрке хуралҫисене ӑнлантарса панӑ тӑрӑх, 11 уйӑхри ывӑлне кӳмере ӳсӗр хӗрарӑмпа, хӑйӗн тусӗпе, хӑварнӑ. Аслӑ хӗрӗпе амӑшӗ аттракционсем патне кайнӑ. Телефон кӳмере пулнӑ. Амӑшӗ кайран пӑхать те — кӳме те, ача та ҫук. Вара вӑл ҫынсене полицие шӑнкӑравлама ыйтнӑ.
Икӗ хӗрарӑма та — ача амӑшне те, унӑн тусне те — административлӑ майпа явап тыттарма йышӑннӑ.
-12.7 °C