Сергей Журавлев сӑнӳкерчӗкӗ

Ҫӗнӗ Шупашкарти Таврапӗлӳпе истори музейӗнче «Санӑн яту - Ҫӗнтерӳҫӗ» сӑнӳкерчӗксене куравӗ уҫӑлнӑ.

Тӗрлӗ ҫулта ӳкернӗ сӑнӳкерчӗксен авторӗсенчен ытларахӑшӗ пирӗн хушӑмӑрта ҫук та ӗнтӗ. Тӗслӗхрен, Александр тата Георгий Костинсем, Семен Игнатьев, Вячеслав Романов, Иван Никифоров тата ыттисем.

Курава хатӗрлессишӗн Сергей Журавлев фотоӑста нумай тӑрӑшнӑ тесен те йӑнӑшмӑпӑр. Вӑл, Чӑваш Енри фотокорреспондентсен музейне пуҫарса янӑскер, ӗлӗкхи чылай сӑнӳкерчӗке перекетлӗн пухса пынӑ. Курав валли ҫавсене ҫӗнетсе хатӗрленӗ.

Куравра Валерий Железняковӑн сӑнӳкерчӗкӗсен «Ҫӗнтерӳ кунӗ» ярӑмӗ те вырӑн тупнӑ. Вӗсене пурне те пӗр кун — ҫу уйӑхӗн 9-мӗшӗнче, анчах тӗрлӗ ҫулта, — пурнӑҫланӑ.

cap.ru сӑнӳкерчӗкӗ

Ҫӗнтерӳ кунне халалланӑ мероприятисем ҫу уйӑхӗн 9-мӗшӗнче Шупашкарта 10 сехетре пуҫланӗҫ. Ирхи 10 сехетре «Ҫӗнтерӳ» мемориал паркӗнчи Ӗмӗр сӳнми ҫулӑм патне тӳре-шарапа ветерансем чечек хума пуҫтарӑнӗҫ.

12 сехетре Республика тӳремӗпе Шупашкарти гарнизонӑн пӗрлештернӗ полкӗн тата ҫар техникин парачӗ иртӗ. Унта 1000 ытла ҫын хутшӑнмалла. Парада 100 ытла ҫар техникине илсе тухӗҫ.

Ҫӗнтерӳ парачӗ «Вилӗмсӗр полк» пӗтӗм ҫӗршыври акципе малалла тӑсӑлӗ. Вӑл 13 сехетре пуҫланӗ. Унта 20 пине яхӑн ҫын хутшӑнӗ. Унта хутшӑнакансем 11 сехет те 30 минутран Наци вулавӑшӗ умне пухӑнма тытӑнӗҫ. Колоннӑсем 12 сехет те 30 минутра хускалӗҫ.

15 сехетре Хусанкай ячӗллӗ культура керменӗ умӗнче «Ҫӗнтерӳ вальсӗ» акци иртӗ. 19 сехетре Хӗрлӗ лапамра концерт пуҫланӗ. 21 сехетре Ҫӗнтерӳ салючӗ пулӗ.

https://chuvrdub.ru сӑнӳкерчӗкӗ

Ҫу уйӑхӗн 6-мӗшӗнче Чӑваш Енре «Книжный марш Победы» (чӑв. Ҫӗнтерӗвӗн кӗнеке маршӗ) патриотизм акцийӗ иртӗ. Ӑна Чӑваш Енӗн Ача-пӑчапа ҫамрӑксен вулавӑшӗ ирттерет.

Республикӑри районсемпе хуласенче ҫар пулӑмӗсемпе ҫулӗсене халалланӑ 77 кӗнекепе паллаштарӗҫ. Вӗсене йӑтса Нихҫан сӳнми ҫулӑм тата вӑрҫӑра пуҫ хунисене асӑнса лартнӑ палӑк патне ҫитӗҫ.

Акцие хутшӑнакан кӗнексен шутӗнче — Юрий Бондаревӑн «Горячий снег», Владимир Богомоловӑн «Иван», Борис Васильевӑн «А зори здесь тихие» тата «В списках не значился», Валентин Катаевӑн «Сын полка», Борис Полевойӑн «Повесть о настоящем человеке», Михаил Шолоховӑн «Судьба человека» кӗнекисем.

Чӑваш авторӗсен кӗнекисем те акцие хутшӑнӗҫ. Ҫав шутра — Леонид Агаковӑн «Солдатские дети», Илпек Микулайӗн «Вӑрҫӑпа ҫӗнтерӳ», Иван Лисаевӑн «Вунпиллӗкре эпӗ, комбат...» тата ыттисем.

ШӖМ тунӑ сӑн

Хӗрарӑм Патӑрьел тӑрӑхӗнче пулнӑ чухне кафене кӗрсе апатланнӑ та ӑнсӑртран банк карточкине ҫухатнӑ. Вӑл ҫуккине тепӗр кун ҫеҫ, карточка ҫинчен укҫа пӗтме пуҫлани ҫинчен хыпарлакан смс-ҫырусем килме тытӑнсан, асӑрханӑ.

Хӗрарӑм кун пирки полицие пӗлтернӗ. Карточкӑна тупнӑ ҫынна икӗ сехетренех тупса палӑртнӑ. Видеокамерӑсене пӑхнӑ, карточкӑпа тӳленӗ вырӑнсенче ӗҫлекен сутуҫӑсемпе калаҫнӑ.

Карточкӑна райцентртан инҫех мар вырнаҫнӑ ялта пурӑнакан, унччен судпа айӑпланнӑ арҫын тупнӑ. 44 ҫултискер спорт костюмӗ, темиҫе кӗпе тата калуш туяннӑ, 3 пин ҫур ытла тенкӗ пӗтернӗ.

Ун тӗлӗшпе пуҫиле ӗҫ пуҫарнӑ. Арҫын тӑкака саплаштарма шантарнӑ.

"За рулем" порталти сӑн

Ҫӗмӗрле тӑрӑхӗнче пантон кӗпер ӗҫлеме пуҫланӑ. Вӑл Ҫӗмӗрле хулипе Чулхула облаҫӗнчи Нават ялне ҫыхӑнтарать.

Унччен унта пӑр урлӑ каҫмалли кӗпер пулнӑ. Пӑр ирӗлме, шыв шайӗ хӑпарма пуҫласан ӑна илнӗ.

Ака уйӑхӗн вӗҫӗнче пантон кӗпере пуҫтарма тытӑннӑ. Хальлӗхе вӑл тӗрӗслев режимӗнче ӗҫлет. Официаллӑ майпа ӑна ҫу уйӑхӗн 4-6-мӗшӗсенче уҫма палӑртнӑ.

ШӖМ тунӑ сӑн

Ака уйӑхӗн 30-мӗшӗнче Вӑрнар поселокӗнче пурӑнакан 58 ҫулти арҫын полицие ҫитнӗ. Унӑн икӗ машинине тапратса тарнӑ иккен.

Арҫын каланӑ тӑрӑх, Ҫӑкаллӑ Явӑшри унӑн ял хуҫалӑх кооперативӗнчен Лада Нивӑна тата Газеле тапратса тарнӑ. Машинӑсен алӑкӗ питӗрӗнчӗк пулман. Тапратмалли уҫҫи те унтах пулнӑ.

Вӑрӑсене ҫав кунпх тупнӑ. Вӗсем - 19-ти тата 20-ри каччӑсем, Ҫӑкаллӑ Явӑшрах пурӑнаҫҫӗ. Хайхискерсем судпа унччен те миҫе хут айӑпланнӑ.

Ӗҫ-пуҫ акӑ мӗнлӗ пулса иртнӗ. Икӗ каччӑ акан 29-мӗшӗнче ҫӗрле пӗрер машина тапратса кайнӑ. Аӗри транспорта килӗ умне лартса хӑварнӑ иа ҫыварма кӗнӗ. Тепри вара машинӑна кӳршисен тӗлӗнче хӑварнӑ. Каччӑсем айӑпне йышӑннӑ. Вӗсен тӗлӗшпе пуҫиле ӗҫ пуҫарнӑ.

Следстви комитечӗ тунӑ сӑн

Тӑвай районӗнче пурӑнакан арҫын килте патронсем упранине тупса палӑртнӑ. РФ Следстви комитечӗн Чӑваш Енри следстви органӗсем ун тӗлӗшпе пуҫиле ӗҫ пуҫарнӑ.

Следстви версийӗ тӑрӑх, 2016 ҫулхи ҫулла 50 ҫулти арҫынна пӗлӗшӗнчен 1732 патрон еткерлӗхе лекнӗ. Вӗсем спорт тата сунар пӑшалӗ валли. Экспертиза палӑртнӑ тӑрӑх, патронсен пӗр пайӗ пеме юрӑхлӑ.

Арҫын тӗлӗшпе пуҫарнӑ пуҫиле ӗҫе малалла тӗпчеҫҫӗ. Тӗрлӗ экспертиза ирттерӗҫ, кӳнтеленсенчен ыйтса пӗлӗҫ.

cap.ru сайтран илнӗ сӑн

Ҫу уйӑхӗн 1-мӗшӗ тата 9-мӗшӗ мӗнпур почта уйрӑмӗсенче канмалли кунсем пулӗҫ.

Ака уйӑхӗн 30-мӗшӗнче тата ҫу уйӑхӗн 8-мӗшӗнче почта уйрӑмӗсем пӗр сехет маларах хупӑнӗҫ.

Ҫу уйӑхӗн 2-мӗшӗнче почта уйрӑмӗсем яланхи графикпа ӗҫлӗҫ, 3-мӗшӗнче клиентсене шӑматкунхи графикпа йышӑнӗҫ, ҫу уйӑхӗн 10-мӗшӗнче вара — вырсарникунхи ӗҫ графикӗпе.

Ҫу уйӑхӗн 4-мӗшӗнчен пуҫласа 7-мӗшӗччен ҫӗршыври пӗтӗм почта уйрӑмӗсем яланхи режимпа ӗҫлӗҫ.

Почта уйрӑмӗсен ӗҫ графикне тӗплӗн пӗлес тесен е картта ҫинче ҫывӑхри уҫӑ уйрӑма тупас тесен pochta.ru сайтра е почтӑн мобильлӗ приложенинче пӑхмалла. Ҫак каҫӑпа мобильлӗ хатӗрпе каҫсан унта приложение вырнаҫтарма май пур.

Хӗрлӗ Чутай районӗн арҫынни Мускавран килме тухсан ҫухалнӑ. Тӑванӗсем каланӑ тӑрӑх, вӑл Щелково автовокзалӗнче киле килме билет туяннӑ. Анчах Чӑваш Ене ҫитеймен.

Дмитрий Бахметьев Мускавра 10 ҫул ытла ӗҫлет. Вӑл 29-та. Тӑванӗсем каланӑ тӑрӑх, Дмитрий ку таранччен кун пек ҫухалса ҫӳремен.

Дмитрий патне шӑнкӑравласа ҫитме ҫук, телефонӗ ҫутӑ мар. Ҫухалнӑ чухне унӑн пӗрле хура чӑматан пулнӑ.

Дмитрий Бахметьева курсан 8 800 700 54 52 е 112 номерпе шӑнкӑравламалла.

Чӑваш наци телерадиокомпанийӗ директорсӑр тӑрса юлнӑ. Унччен ку тивӗҫе Светлана Губанова пурнӑҫланӑ. Халӗ вӑл ӗҫрен кайнӑ.

Аса илтерер: 50 ҫулти Светлана Губанова ку должноҫе килнӗренпе ҫулталӑк та ҫитмен. Вӑл – Мускавран. Ун пирки тӗнче тетелӗнче информаци сахал. Вӑл НТВ телеканалта малтан – журналистра, унтан продюсерта ӗҫлени паллӑ.

Хальлӗхе директор тивӗҫӗсене Марина Макарова пурнӑҫлать.