cap.ru сӑнӳкерчӗкӗ

Чӑваш ЕНре пурӑнакан ҫынсен аллинче вӑтамран банк карттисем виҫшер.

Кӑҫалхи утӑ уйхӗн 1-мӗшӗ тӗлне Чӑваш Ен ҫыннисем валли 4,3 миллион тенкӗ банк картти кӑларнӑ. Кашни ҫын пуҫне вӑтамран — виҫшер карттӑ.

Чӑваш Енре 952 банкомат тата 40 пин ытла POS‑терминал пур.

Кӑҫалхи кӑрлач-утӑ уйӑхӗсенче 489,5 миллиард тенкӗлӗх 319 миллион транзакци пулнӑ.

«Контактра» халӑх тетелӗнчи сӑн

Чӑвашҫӑкӑрпродукчӗ Китая ҫӑнӑх ӑсатма тытӑннӑ. Предприяти Россельхознадзорӑн ҫирӗп тӗрӗслевӗ витӗр тухнӑ, ҫӑнӑха экспорт тума Китай влаҫӗсенчен ирӗк илнӗ.

Китая ӑсатма тытӑнни производство калӑпӑшне ӳстерме май парӗ. Ку, ЧР Ял хуҫалӑх министерстви пӗлтернӗ тӑрӑх, тӗнче шайӗнче чӑваш продукцийӗн пысӑк пахалӑхне ҫирӗплетет.

Палӑртмалла: Чӑвашҫӑкӑрпродукчӗ Узбекистанпа экспорт йӗркеленӗ. Хальччен 70 тонна ҫӑнӑх ӑсатнӑ.

fool.com сӑнӳкерчӗкӗ

Китай автомашинӑсем валли натрипе ионлӑ аккумулятора пуҫласа сертификациленӗ. Кун пек аккумулятор 15 минутра 80 процент таран тулса ҫитет иккен. Ӑна шухӑшласа кӑлараканни — CATL.

Электромобильсем валли ҫӗнӗ йышши аккумуляторсене 2026 ҫулта йышлӑ туса кӑларма тытӑнасшӑн.

Натриллӗ ун пек аналог литий аккумултортан 10 хут йӳнӗрех-мӗн. 25 ҫула пырать, 30 градус сивӗре те ӗҫлет, 40 градус сивӗре те зарядкӑна лартма пулать тесе пӗлтереҫҫӗ.

glava.cap.ru сӑнӳкерчӗкӗ

Шупашкарта вырнаҫнӑ «Агромаш» завод Китай лицензийӗпе трактор кӑларма пуҫлӗ.

Коммуналлӑ урамра вырнаҫнӑ асӑннӑ предприятире иртнӗ эрнере Олег Николаев Элтепер пулнӑ. Предприятин гендиректорӗ Алексей Яковлев пӗлтернӗ тӑрӑх, Китайра ял хуҫалӑх техникине туса кӑларакан производительпе пӗлтӗр килӗшӳ тунӑ. Ҫавна май Чӑваш Енри завод «Агромаш-Lovol TD904» туса кӑларма пуҫласшӑн. Малтанласа машина комплекчӗсене пухасшӑн, кайран пӗтӗмпех кунта туса кӑларасшӑн.

Чӑвашстат сӑнӳкерчӗкӗ

Официаллӑ статистикӑна ӗненсен Чӑваш Енре пурӑнакансем вӑтамран 72 пин тенкӗ ӗҫлесе илеҫҫӗ. Сӑмах организацисенче тӑрӑшакансем пирки пырать.

Унта ҫӗртме уйӑхӗнчи вӑтам шалу 72 пин те 808 тенке ларнӑ. Ҫулталӑк каяллахинчен ку цифра 8,6 пин тенкӗ пысӑкрах.

Пӗлтӗрхи авӑн уйӑхӗнченпе республикӑри вӑтам шалу 60 пинрен чакса курман.

cap.ru порталтан илнӗ сӑнӳкерчӗк

Шупашкарта пуҫласа алӑк куравӗ иртӗ. Мероприяти икӗ куна пырӗ. Вӑл авӑн уйӑхӗн 17–18-мӗшӗсенче пулӗ.

Курав-форума пӗтӗм Раҫҫей шайӗнче йӗркелеме палӑртнӑ. Унта алӑк туса кӑларакансем, ҫав енӗпе тӑрӑшакан дизайнерсем пуҫтарӑнӗҫ.

«Двери России – 2025» (чӑв. Раҫҫей алӑкӗсем — 2025) форум-курав «Шупашкар-Аренӑра» иртӗ.

minec.cap.ru сӑнӳкерчӗкӗ

Чӑваш Енри патшалӑхӑн мӗнпур пурлӑхне приватизацилесшӗн, тепӗр майлӑ каласан, сутса ярасшӑн.

Республикӑн Экономика аталанӑвӗн тата пурлӑх хутшӑнӑвӗсен министерствинче пӗлтернӗ тӑрӑх, 2026-2028 ҫулсенчи приватизаци планӗн проектне хатӗрленӗ.

Патшалӑх пурлӑхне пуянсене сутса ярса 2026 ҫулта 23,5 миллионран кая мар тенкӗ тупӑш курасшӑн, 2027 ҫулта — 23 миллион тенкӗ ытла, 2028 ҫулта — 21,3 миллион тенкӗ.

Паянхи куна Чӑваш Енӗн харпӑрлӑхӗнче 5 унитарлӑ предприяти, 19 акционер обществин акцийӗсем, тулли мар яваплӑ 3 обществӑри тӳпе, 2 акционер обществи шутланать-мӗн.

minec.cap.ru сӑнӳкерчӗкӗ

Чӑваш Енри EMRA бренда Раҫҫейри «Знай наших» (чӑв. Пирӗннисене пӗл) бренд йышне лекнӗ. «Потребитель таварӗсем» пӗтӗм ҫӗршыври конкурсра бренд иккӗмӗш вырӑн йышӑннӑ.

Компани шӑл тасатмалли паста, ҫӑвара чӳхемелли, шӑл тасатмалли щеткап туса кӑларать. «Эмра» таварне тӗрлӗ маркетплейсра, Wildberriesран пуҫласа «Золотое яблоко» (чӑв. Симӗс панулми) таранах тупса илме пулать.

«Предприятие эпир 2020 ҫулта уҫрӑмӑр. Унччен эпир ике тӗрле продукци кӑларна пулсан паян 45 тӗрлӗ. Эпир чи лайӑх технологисене пурнӑҫа кӗртетпӗр тата чи лайӑх стоматологсемпе ӗҫлетпӗр», - тенӗ компанире.

minec.cap.ru сӑнӳкерчӗкӗ

Паян, ута уйӑхӗн 24-мӗшӗнче, 14 сехетре Шупашкарти «Манӑн бизнес» центрӑн конференц-залӗнче усламҫӑсем Татьяна Федирко усламҫӑпа тӗл пулӗҫ. Мероприятие йӗркелекенни —Чӑваш Енри экспорт пулӑшӑвӗн центрӗ.

Маларах асӑннӑ хӗрарӑм хӑйӗн сайтра тӗл пулакан ҫипуҫне Сауд Аравийӗнчи VIP-клиентсене сутать иккен тата Катар хулинче тӗрлӗ вӗренӳ йӗркелет.

«Кун пек усламҫӑсемпе тӗлпулусем тӗнчери рынока тухакан предпринимательсене питех те кирлӗ. Татьяна Федирко опычӗ тӗрлӗ йӑнӑшран асӑрханма пулӑшать», — тенӗ Чӑваш Енри экспорт пулӑшӑвӗн центрӗн ертӳҫи Артем Захаров.

Тӗлпулура усламҫӑсем араб ҫӗршывӗсемпе епле ҫыхӑну тытмалли пирки ыйтса пӗлейӗҫ.

cap.ru сӑнӳкерчӗкӗ

Чӑваш Енри алӑк туса кӑларакан «Гармония» компани хӑйӗн продукцине Перси заливӗнчи ҫӗршывсене, ҫав шутра Арабсен Пӗрлештернӗ Эмирачӗсене, ӑсатасшӑн.

Чӑваш Енри компани Екатеринбургра утӑ уйӑхӗн 7-10-мӗшӗсенче иртекен «Иннопром» пӗтӗм тӗнчери промышленность куравне республика делегацийӗпе пӗрле хутшӑнать. Унта вӑл «Majdalina Group» компанипе килӗштерсе ӗҫлесси ҫинчен калакан килӗшӗве алӑ пуснӑ. Документра палӑртнӑ тӑрӑх, Чӑваш Енри компани хӑйӗн проекчӗсене Перси заливӗнчи ҫӗршывсенче, ҫав шутра маларах эпир асӑннӑ Арабсен Пӗрлештернӗ Эмирачӗсенче, пурнӑҫа кӗртесшӗн.

«Гармония» компанин производстви Ҫӗрпӳре, Шупашкарта тата Ҫӗнӗ Шупашкарта вырнаҫнӑ. Предприяти хӑйӗн продукцине Казахстана, Грузине, Таджикистана, Каркӑстана ӑсатнӑ.