stihi.ru сайтри сӑн

Ака уйӑхӗн 12-мӗшӗнче ирхине Комсомольскинче канализаци ҫӑлкуҫӗнче ача виллине тупнӑ. Тӗрӗссипе, вӑл йӗркеллӗ пепке те пулса ҫитеймен. Специалистсем палӑртнӑ тӑрӑх, вӑл 24-25 эрнесенче ҫеҫ. Ҫапла пӗлтерет Следстви комитечӗ.

Ҫакӑ паллӑ: варта аталанса ҫитеймен ачана вӗлернӗ йӗрсем ҫук. Халӗ следовательсем ӗҫ-пуҫа уҫӑмлатаҫҫӗ, судпа медицина экспертизи ирттереҫҫӗ.

Тӗрӗслев ирттернӗ хыҫҫӑн тивӗҫлӗ йышӑну тӑвӗҫ.

Ольга Тимофеева архивӗнчи сӑнӳкерчӗк

Чӑваш халӑх сайчӗн редакторӗ Николай Плотников Никита Бичурин ячӗллӗ ордена тивӗҫнӗ. Ку хыпара республикӑн Наци вулавӑшӗн ӗҫченӗ Ольга Тимофеева Фейсбукра Чӑваш Енри таврапӗлӳҫӗсен пӗрлӗхӗн страницинче пӗлтернӗ.

Асӑннӑ медале «таврапӗлӳ аталанӑвне пысӑк тӳпе хывнӑшӑн» параҫҫӗ. Таврапӗлӳҫӗсен сайтӗнчи хыпар тӑрӑх хакласан, ун пек ордена тӗрлӗ ҫулта Виталий Станьял, Эдуард Бахмисов, Галина Соловьёва, Сантр Пикл, Олег Цыпленков, Николай Казаков тата ыттисем тивӗҫнӗ.

Аҫтахар (Николай) Плотникова Чӑваш таврапӗлӳҫисен пӗрлӗхӗн пухӑвӗнче чысламалла пулнӑ. Чӑваш халӑх сайчӗн редакторӗ унта хутшӑнайман, ҫавна май каярах чысланӑ. Чӑваш тӗнчин аталанӑвне капашсӑр пысӑк тӳпе хывакан маттур ҫамрӑк кӑкӑр ҫине ордена Чӑваш Енри таврапӗлӳҫӗсен пӗрлӗхӗн ертӳҫин ҫумӗ Галина Соловьёва ҫакса янӑ.

Ырӑ хыпарпа Фейсбукра паллашнисем Аҫтахар Плотникова саламласа ҫырнӑ. «Тӗлӗнмелле пысӑк ӗҫ тӑвать чӑвашлӑха упраса хӑварас тесе, патшалӑхран пӗр пус илмесӗр. Турӑ упратӑр пирӗн Микулая», — тесе шӑрҫаланӑ, сӑмахран, Тимӗр Тяпкин.

smartik.ru сайтри сӑн

Ака уйӑхӗн 11-мӗшӗнче Шупашкарти нумай ачаллӑ ҫемьере чутах пысӑк инкек пулман. Вӗсем сӗрӗмпе наркӑмӑшланнӑ.

Ҫемье Кӗремечке урамӗнче пурӑнать. Ашшӗ-амӑшӗ тата виҫӗ ачи харпӑр ҫуртра сӗрӗмпе наркӑмӑшланнӑ. Ачасене пульницӑна илсе кайнӑ. Аслисем те Васкавлӑ медпулӑшу пульницин токсикологи уйрӑмӗнче выртаҫҫӗ. Вӗсен сывлӑхӗ питех йывӑр мар.

Малтанлӑха пӗлтернӗ тӑрӑх, тӗтӗм тухмалли вырӑн хупланса ларнӑ. Ҫавна май килте газ пухӑннӑ. Хальлӗхе ҫурта газ пымалла мар тунӑ.

Владимир Михайлов тунӑ сӑн

Йӑлана кӗнӗ «Ҫуркунне» ял хуҫалӑх продукцийӗн ярмӑркки кӑҫал ака уйӑхен 17-мӗшӗнче пуҫланӗ те ҫу уйӑхӗн 9-мӗшӗнче вӗҫленӗ. Ку пахчаҫӑсемшӗн питӗ усӑллӑ тата меллӗ. Унта вӗсем пахча ӗҫӗсем пуҫланиччен вӑрлӑх, калча туянма пултараҫҫӗ.

Шупашкар хула администрацийӗ ял хуҫалӑх продукцине сутмалли тӑватӑ вырӑна палӑртнӑ. Суту-илӳ точкисем «Николаевски» суту-илӳ комплексӗнче, «Шупашкар» пасарта, «Кӑнтӑр-хӗвеланӑҫ» суту-илӳ комплексӗнче, «Амазони» паркра пулӗҫ.

Чӑваш Республикин ача-пӑчапа ҫамрӑксен вулавӑшӗ «Ялан янра, чӑваш чӗлхи!» ятпа онлайн-фестиваль ирттерет. Ӑна ҫӗнӗ чӑваш ҫырулӑхне йӗркеленӗренпе 150 ҫул ҫитнине тата Чӑваш чӗлхи кунне халалланӑ.

Илемлӗ вулакансен фестивальне чӑваш чӗлхин илемлӗхӗпе пуянлӑхне упраса хӑварас тӗллевпе ирттереҫҫӗ.

Аса илтерер: ака уйӑхӗн 25-мӗшӗнче ҫулсеренех Чӑваш чӗлхи кунне уявлаҫҫӗ. Ӑна 1992 ҫулхи ака уйӑхӗн 9-мӗшӗнче Чӑваш Республикин Верховнӑй Совечӗн Президиумӗн йышӑнӑвӗпе ҫирӗплетнӗ. Ку куна ытахальтен суйламан. Ун чухне чӑваш ҫырулӑхне тата алфавитне йӗркеленӗ Иван Яковлев ҫуралнӑ.

Кӑҫал та, пӗлтӗрхи пекех, Ҫу уйӑхӗн 1-мӗшӗ онлайн мелпе иртӗ. Кун пирки паян Правительство ҫуртӗнче иртнӗ планеркӑра калаҫнӑ. Ку ыйтупа культура министрӗ Светлана Каликова калаҫнӑ.

Паллах, ку кӑшӑлвируспа ҫыхӑннӑ. Ҫавна май тӳре-шара Шупашкар урамӗсенче уяв колоннисене уттармалла мар тесе йышӑннӑ. Кун вырӑннӗ ӗҫ коллективӗсем халӑх тетелӗсенче #1маячувашия хэштегпа сӑнӳкерчӗксем тата видеороликсем вырнаҫтарӗҫ. Министр пуҫарӑвне ЧР Элтеперӗ Олег Николаев та ырланӑ.

Ҫапах Ҫӗнтерӳ парадне ирттерӗҫ. Мероприятие онлайн мелпе трансляци тӑвӗҫ. Ку халӑх йышлӑ пухӑнасран сыхлӗ. Концерт ирттерессине тата салют ярассине хальлӗхе татса паман.

pop-music.ru сайтри сӑн

Шупашкарта пурӑнакан арҫын баян сутса ултавҫӑ аллине ҫакланнӑ. Кун пирки вӑл ӗнер полицие пырса пӗлтернӗ.

Арҫын каласа кӑтартнӑ тӑрӑх, вӑл тӗнче тетелӗнче баян сутасси пирки пӗлтерӳ вырнаҫтарнӑ. Ӑна туянакан ҫын часах тупӑннӑ. Хайхискер тӳрех укҫа тӳлеме шантарнӑ, каҫӑ ярса панӑ. Унпа кайсан арҫын банк карттин даннӑйӗсене ҫырнӑ.

Каярахпа вӑл карточка ҫинчи укҫана тӗрӗсленӗ. Кун хыҫҫӑн тин вӑл хӑйне улталанине ӑнланнӑ. Унӑн карточки ҫинчен 7 пин ытла тенкӗ ҫухалнӑ.

Кун тӗлӗшпе пуҫиле ӗҫ пуҫарнӑ.

Чӑваш публицисчӗн сӑмахӗ

Ака уйӑхӗн 11-мӗшӗнче Чӑваш халӑх сайчӗн корреспонденчӗ Ҫӗнӗ Шупашкарта хӑнара пулнӑ. 10-мӗш пилӗкҫуллӑх урамӗнче «Турист» магазин вырнаҫнӑ 9 хутлӑ ҫуртӑн картишӗнче пӗр микроавтобусӑн хыҫалти кантӑкӗнче чӑвашла ҫырнине асӑрхарӑм. «Folkswagen» минивэн ҫинче «Турӑпа пӗрле» тесе ҫырнӑ.

Эпӗ савӑнтӑм. Апла чӑвашлӑх Ҫӗнӗ Шупашкарта пур тесе.

1960 ҫултан пуҫласа ҫак ҫамрӑк хулапа химкомбинат ҫӗкленӗ чух, унта СССРӑн тӗрлӗ ҫӗртен нумай чӑваш мар ҫынсем ӗҫлеме те пурӑнма килчӗҫ. Кайран «аталаннӑ социализм» вӑхӑтӗнче Ҫӗнӗ Шупашкарта вырӑс чӗлхи кӑна хуҫаланма пуҫларӗ.

Анчах, 1986 ҫултан пуҫласа Михаил Горбачёвӑн Перестройка ҫулӗсенче майӗпен наци юхӑмӗсем ҫӗкленнӗччӗ. Чӑваш хастарӗсем Чӑваш Республикинче Иван Яковлев ячӗллӗ пӗрлӗхе, ЧОКЦ, ЧОКЦ-2, ЧАП, ЧНК йӗркелерӗҫ. Ҫӗнӗ Шупашкарта ҫурри ытла чӑвашсем пурӑнма пуҫларӗҫ. Майӗпен урамра та чӑвашла калаҫни илтӗнме пуҫланчӗ. Халь нумай чӑвашсем хамӑр тӑван чӗлхепе уҫҫӑн калаҫма вӑтанма пӑрахрӗҫ.

...Хайхи «Folkswagen» ҫумӗнче арҫынпа хӗрарӑм тӑнӑччӗ.

Малалла...

Иртне эрнере Якутск хулинче кикбоксинг енӗпе Раҫҫей чемпионачӗ иртнӗ. Тӗнче класлӑ спорт мастерӗ Полина Петухова унтан ҫӗнтерӳпе таврӑннӑ.

Ринга 380 яхӑн спортсмен тухнӑ. Вӗсем 40 ытла регионтан килсе ҫитнӗ. Полина ҫурмафиналта Питӗрти спортсменпа вӑй виҫнӗ. Финалта вара Тулӑри спортсменкӑпа тупӑшнӑ. Сергей Шабердин тренер патӗнче ӑсталӑхне туптакан Полина 52 килограмм тайман виҫе категорийӗнче мала тухнӑ. Ҫапла вӑл 2022 ҫулта АПШра иртекен Пӗтӗм тӗнчери ҫапӑҫу искусствин вӑййисене кайма путевка ҫӗнсе илнӗ.

Палӑртмалла: Полина Петухова Раҫҫей шайӗнчи ӑмӑртусенче тӑваттӑмӗш хут ҫӗнтернӗ.

Чӑваш ҫыравҫи, сӑвӑҫи, драматургӗ Юхма Мишши ака уйӑхӗн 10-мӗшӗнче 85 ҫул тултарнӑ. Вӑл 1936 ҫулхи акан 10-мӗшӗнче Чӑваш Енӗн Патӑрьел районӗнчи Сӑкӑтра ҫуралса ӳснӗ. Патӑрьелӗнчи вӑтам шкулта, Чӑваш патшалӑх педагогика институтӗнче пӗлӳ пухнӑ. Шкулта ачасене вӗрентнӗ, пӗр хушӑ Чӑваш кӗнеке издательствинче редакторта ӗҫленӗ.

Юбилей ячӗпе ҫыравҫӑна Мускаври чӑвашсем саламланӑ. «Пурнӑҫ илемӗпе, ачусен, мӑнукусен ырлӑхӗпе савӑнса пурӑнӑр. Эсир пирӗншӗн яланах ырӑ тӗслӗх вырӑнӗнче пулнӑ, 300 ытла кӗнеке ҫырса кӑларнӑ. Малашне те чӑвашлӑхшӑн тӑвакан пархатарлӑ ӗҫӳсем хавхалану кӳччӗр. Вулакансене ҫӗнӗ хайлавсемпе савӑнтарма калем яланах ҫивӗч пултӑр. Сирӗншӗн ҫутаттӑр илемлӗ ҫут ҫӑлтӑр, ҫӗклентӗр ӑшпиллӗ хӗвел, савӑк сар кайӑк ҫӗн юрӑ юрлатӑр», — тесе ҫырнӑ саламра.