Pixabay.com сӑнӳкерчӗкӗ

Чӑваш Енри пӗчӗк ялсене те интернет ҫитӗ. Ҫӗршыври пӗчӗк ялсене тӗнче тетелне тухмашкӑн май туса парассипе ҫыхӑннӑ пуҫару пирки «Парламентская газета» хаҫат пӗлтерет.

Маларах та ҫапларах йышӑну тунӑччӗ. Ҫавна май пирӗн тӑрӑхри чылай яла телефон тата интернет ҫыхӑнӑвне ҫитернӗччӗ. Анчах ун чухне тӗнче тетелне килсерен тухма 500 ҫынран ытларах пурӑнакан ялсене ҫеҫ май туса панӑччӗ, 250-500 ҫынлисене – Wi-Fi урлӑ.

Ҫӗршыв Правительствин хальхи саккун проектӗнче 100-тен ытларах ҫын пурӑнакан ялсем пирки каланӑ.

Ҫӗнӗ йышӑну сахал йышлӑ ялсенче пурӑнакансене хӳтӗлессине, ҫыхӑну инфраструктурине ҫӗршывӗпех сарма май парассине палӑртнӑ.

Правительство сӗнӗвне ҫывӑх вӑхӑтри пленарлӑ ларусенчен пӗринче пӑхса тухма шухӑшлаҫҫӗ.

"Про Город" сайтри сӑн

Ҫанталӑк ӑшӑтнӑ-ӑшӑтман республикӑра типӗ курӑк ҫунтарма тытӑннӑ. Ҫак кунсенче кунашкал темиҫе тӗслӗх пулнине палӑртнӑ.

Официаллӑ даннӑйсене ӗненес тӗк, пуш уйӑхӗн 28-мӗшӗнче Чӑваш Енре типӗ курӑк ҫуннӑ вун-вун тӗслӗхе шута илнӗ. Атӑл леш енче, халӑх каннӑ вырӑнта, типӗ курӑк хыпса илнӗ 40 ытла тӗслӗх пулнӑ.

Тӳре-шара ҫынсене тимлӗрех пулма ыйтать. Тепӗр хутчен аса илтерер: ку тапхӑрта, коронавирус саралнӑ чухне, килте ларма хушнӑ тӑк ҫакна пурнӑҫламалла.

"Про Город" сайтри сӑн

Паян республикӑра ӑшӑ та хӗвеллӗ ҫанталӑк тӑчӗ. Анчах РФ Президенчӗ Владимир Путин коронавируса пула килтен тухса ҫӳреме сӗнмен. Анчах ҫакна хӑшӗ-пӗри шута илмен – ҫутҫанталӑк лапамне канма кайнӑ.

Атал леш енче, Сосновкӑра тата Октябрьски поселокӗнче, ҫул хӗрринче машинӑсем лартса тухнӑ. Халӑх корреспонденчӗ «Про Город» хаҫата каласа кӑтартнӑ тӑрӑх, унта канмалли вырӑнсене йӑлтах йышӑнса пӗтернӗ.

Аса илтерер: Владимир Путин пуш уйӑхӗн 28-мӗшӗнчен пуҫласа акан 5-мӗшӗччен ҫынсене ӗҫлеме сӗнмен. Ҫакна коронавирус тӑрук хӑвӑрт сараласран тума йышӑннӑ.

Коронавируспа чирлекенсен йышӗ хӑҫан чакасси паллӑ. Раҫҫей Сывлӑх сыхлав министерствин тӗп эпидемиологӗ Николай Брико «Интерфакса» пӗлтернӗ тӑрӑх, чирлекенсен шучӗ ака уйӑхӗн вӗҫӗ – ҫу уйӑхӗн пуҫламӑшӗнче чакма пултарать.

РФ Сывлӑх сыхлав министерствин тӗп эпидемиологӗ ҫирӗплетнӗ тӑрӑх, китай коронавирусӗ респиратор инфекцийӗсен ушкӑнне кӗрет. Ун пек чир-чӗр кӗрхи-хӗллехи вӑхӑтра вӑйлӑ аталанать.

Брико каланӑ тӑрӑх, вирус динамики унпа чирлекенсен шучӗ сасартӑк нумайланнине пӗлтермест. Цифрӑсем пысӑкланни тӗрӗсленисен йышӗ ӳснипе ҫыхӑннӑ.

Коронавирус тестне халӗ ӳйрӑм ҫын лабораторийӗсемпе клиникисенсе те пурнӑҫлаҫҫӗ.

Коронавирус тахҫантанпах аталанакан чир-чӗрпе нушаланакансемшӗн тата иммунитет чакнӑ ватӑсемшӗн ҫеҫ хӑрушшине аса илтернӗ. Ҫӗршывӑн тӗп эпидемиологӗ каланӑ тӑрӑх, чирлисен 80 проценчӗ чире ҫӑмӑллӑн тӳссе ирттерет.

Яндекс.карта сӑн ӳкерчӗкӗ

Ҫитес эрнене пирӗн ҫӗршывра канмалли эрне тесе пӗлтерчӗҫ. Чӑваш Ен Пуҫлӑхӗн тивӗҫӗсене вӑхӑтлӑх пурнӑҫлакан Олег Николаев ҫавна май ҫӗнӗ мера йышӑнчӗ. Ӗнерхи хушура вӑл пуш уйӑхӗн 28-мӗшӗнчен театрсемпе кинотеатрсен, спортзалсемпе стадионсене ҫеҫ мар, кафе-столовӑйсене те хупмалли пирки каланӑ.

Коронавирус чирӗнчен сыхланас енӗпе йӗркеленӗ Шупашкарти оперативлӑ штаб ӗнер пӗлтернӗ тӑрӑх, хулара общество апатланӑвӗн 240 предприятийӗ ӗҫлет. Вӗсенчен 51 кафе ака уйӑхӗн 5-мӗшӗччен хупӑннӑ. 18 предприяти апата киле ҫитерсе паиӗ. Ҫав шутра — «Парус», «Евразия», «Вилкобар», «Хочу пельмени».

Эрех сутакан13 организаци (халӑхра вӗсене «разливайка» теҫҫӗ) ҫӳлтен сӗннине итлемен. Ҫав йышра — «Хамӑр ял» общество тытса тӑракан 7 кафе, «Русский характер» обществӑн — 2 кафе; «Два вкуса» обществӑн — 4 кафе.

cdnuploads.aa.com.tr сайтри сӑн

Ӗнер Шупашкарта Чукунҫул вокзалӗнче пуйӑсран пӗр ҫынна пульницӑна илсе кайни пирки пӗлтернӗччӗ. Аса илтерер: ҫав ҫын чикӗ леш енчен килнӗ, Шупашкара Муска урлӑ пуйӑспа ҫитнӗ. Ҫул ҫинче унӑн ӳт температури хӑпарса кайнӑ. Арҫыннӑн коронавирус пулма пултарнине шута илсе ӑна тата унпа пӗрле вакунра пулнӑ ҫынсене ятарлӑ бригада пульницӑна эвакуациленӗ.

Телее, ҫав ҫыннӑн коронавирус пулни ҫирӗпленмен. Ӑна тухтӑрсем малашне те сӑнаса тӑрӗҫ. Сӑмах май, хальлӗхе пирӗн республикӑра пӗр ҫыннӑн ҫеҫ ҫак диагноз ҫирӗпленнӗ.

Тухтӑрсем сӑнаса тӑракан ҫынсен йышӗ вара ӳссех пырать. Паян шурӑ халатлисем 746 ҫынна пӑхса тӑраҫҫӗ. Ӗнер ку хисеп 503-пе танлашнӑ.

gagarinmall.ru сайтри сӑн

Раҫҫейри хӑш-пӗр регион, ҫав шутра Чӑваш Ен те, коронавируса пула йышӑнма сӗннӗ мерӑсене пурнӑҫламан-мӗн. Регионти влаҫсене кинотеатрсене, ачасен вылямалли пӳлӗмӗсене, каҫхи клубсене, йышпа канмалли ытти вырӑна пуш уйӑхӗн 23-мӗшӗнчех хупма каланӑ иккен.

Ҫакна 38 регионта ҫийӗнчех пурнӑҫланӑ, ыттисем ку ыйтӑва вӑхӑтра татса паман. Ҫав шутра – Чӑваш Ен те.

Кинотеатрсен харпӑрҫисен ассоциацийӗ ҫак ыйтӑва вӑхӑтра татса паман хуласен списокне хатӗрленӗ. Унта ҫаксем кӗнӗ: Белгород, Волгоград, Йошкар-Ола, Астрахань, Иркутск, Новосибирск, Ярославль тата Шупашкар. Палӑртмалла: ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев кинотеатрсене пуш уйӑхӗн 25-мӗшӗнче хупма сӗннӗ.

Кун пекех пулсан Шупашкарти аэропортӑн вӑхӑтлӑх хупӑнасси ҫеҫ юлать пулӗ. Аса илтерер: паянтан, пуш уйӑхӗн 28-мӗшӗнчен, Nordwind Airlines (ку компани «Северный ветер» тулли мар яваплӑ общество ятпа регистрациленнӗ) Шупашкара вӗҫме пӑрахӗ.

Халӗ тата «Победа» лоукостер авиапассажирсене пӑшӑрхантарнӑ. Ӗнер, пуш уйӑхӗн 27-мӗшӗнче, компани кун пирки сайтӗнче пӗлтернӗ. Ҫавна пассажирсене те вӑл электрон ҫырупа хыпарланӑ. Туянса хунӑ билет укҫине туллин тавӑрса пама шантарнӑ.

Лоукостер самолетсене ака уйӑхӗн 1-мӗшӗнчен вӗҫтерме пӑрахӗ. Ку мера ҫу уйӑхӗн 31-мӗшӗччен пырӗ. Самолетсене авиакомпани ҫӗршывӗпех ҫӳретме чарӗ. Ҫак мера Раҫҫей Правительствин йышӑнӑвӗпе килӗшсе тӑнине пӗлтернӗ.

Шупашкара хальхи вӑхӑтра Мускавран икӗ, Питӗртен пӗр компани ҫеҫ хутланине шута илсен аэропортӑн вӑхӑтлӑх хупӑнасси ҫеҫ юлать пулӗ.

Кислов вырӑнне Аршинова йышӑнассине Чӑваш халӑх сайчӗ унччен пӗлтернӗччӗ. Аса илтерер, «Пӗрлӗхлӗ Раҫҫей» парти ертӳҫи Дмитрий Медведев регионсенчи уйрӑмсен секретарӗсем пулма тивӗҫ кандидатсемпе, пурӗ 13 ҫынпа, тӗл пулнӑччӗ. Кун пирки партин сайтӗнче пӗлтернӗччӗ. Ҫав йышра РФ Патшалӑх Думин депутачӗ Алена Аршинова та пулнӑччӗ.

Пуш уйӑхӗн 26-мӗшӗнчен РФ Патшалӑх Думин депутачӗ Алена Аршинова партин Чӑваш Енри уйрӑмӗн секретарӗн тивӗҫне пурнӑҫлама тытӑннӑ. Ку хыпара депутат Фейсбукра пӗлтернӗ.

Ҫапла вара 35 ҫулти Алена Аршинова 65 ҫулти Юрий Кислова ылмаштарнӑ.

Чӑваш Енри общество транспорчӗ ҫитес эрнере канмалли кун графикӗ ҫине куҫӗ. Кун пирки республикӑн Транспорт тата ҫул-йӗр хуҫалӑхӗн министерствинче пӗлтернӗ.

Ведомствӑра ҫак йышӑнӑва туни ытахальтен мар. Республикӑра эпидемие хирӗҫ тӑрӑм йышӑннӑ, ҫӗршыв Президенчӗ ҫитес эрнере канмалли кунсем пулӗҫ тесе пӗлтерчӗ.

Чылай организаци-учреждени каннине кура ҫитес эрнере ҫул ҫинче халӑх сахалтарах ҫӳрӗ тесе шухӑшлаҫҫӗ. Хулара та, муниципалитетсем хушшинче те. Ҫавна май пуш уйӑхӗн 30-мӗшӗнчен пуҫласа ака уйӑхӗн 5-мӗшӗччен транспорт ҫӗнӗ режимпа ӗҫлӗ.

Чӑваш Ен Транспорт тата ҫул-йӗр хуҫалӑхӗн министерствинче транспорта пӗрмай дезинфекцилемеллине аса илтереҫҫӗ. Ҫакна Роспотребнадзор сӗнӗвне тӗпе хурса пурнӑҫламалла.