ЮТВ телеканал (унӑн хуҫи – Юрий Гурьянов) Тӗмен тӑрӑхӗнчи йӑхташсем патне тухса кайнӑ. Ку хыпара асӑннӑ тӑрӑхри чӑвашсен ассоциацийӗн ертӳҫи пулса ӗҫленӗ Ираида Маслова Фейсбукра пӗлтернӗ.

Уйрӑм ҫыннӑн ҫак каналӗ тӗрлӗ регионта тӗпленнӗ ентешсен наципе культура автономийӗсемпе туслӑ ҫыхӑну йӗркеленӗ.

Халӗ асӑннӑ канал Тӗмен тӑрӑхӗнче сюжетсем ӳкерет. Телеканала кӗтсе илес ӗҫе тивӗҫлипе йӗркелессишӗн асӑннӑ тӑрӑхри чӑвашсен «Тӑван» пӗрлешӗвӗн президенчӗ Н.Н. Герасимов нумай тӑрӑшнине пӗлтернӗ Ираида Маслова. Хальлӗхе «ЮТВ» Горьковка ялӗнче пулнӑ, «Земляки» (чӑв. Ентешсем) телепроект валли сюжетсем ӳкернӗ.

Тӗменти чӑваш культурин область центрӗнче культура, ӳнер, ӑслӑлӑх ӗҫченӗсем пуҫтарӑннӑ. Йӑхташӑмӑрсем юрланӑ та, ташланӑ та, наци апат-ҫимӗҫӗпе хӑналанӑ.

Чӑваш Ен Сывлӑх сыхлав министерствин Президент пепкеллӗх центрӗнче организмра кӑшӑлвируса хирӗҫ ятарлӑ белок (вырӑсла ӑна антитела теҫҫӗ) пуррине палӑртма май пур. Тӗпчев меслечӗ – иммуноферментлӑ анализ.

Анализа Шупашкарти Ярославль урамӗнчи 48-мӗш ҫуртри репродуктивлӑ пулӑшу кӳрекен 2-мӗш уйрӑмӗн хуҫалӑх расчечӗн пайӗнче (вӑл «Республика лапамӗ» чарӑнура вырнаҫнӑ) йышӑнаҫҫӗ: тунтикун, юнкун кӗҫнерникун – ирхи 7 сехет те 30 минутран пуҫласа 9 сехет те 30 минутчен; шӑматкун – 8 сехетрен пуҫласа 12 сехетчен. Ҫумра паспорт тата укҫа кирлӗ.

Анализ париччен 2-3 сехет маларах апат ҫимелле мар, пирус туртма юрамасть. Газсӑр тӑрӑ шыв ӗҫнишӗн тем мар.

Анализ парас тесен 8 (8352) 62-02-84 телефонпа тунтикунтан пуҫласа эрнекун таран ирхи 8 сехетрен тытӑнса 14 сехетчен шӑнкӑравласа ҫырӑнмалла.

Кӑшӑлвирус пирӗн тӑрӑхра алхасма ниепле те пӑрахмасть-ха. Мӗн тӑвӑн, чирлисемех урам тӑрӑх ирӗклӗн ҫӳренине каласа кӑтартаҫҫӗ те, вӑл амака часах ҫӗнесси пулмасть пулӗ. Пӗрисем хӑйсем чирлине сисмесӗрех юлаҫҫӗ, хӑшӗсем ура ҫинче ҫӑмӑллӑнах ирттерсе яраҫҫӗ, виҫҫӗмӗшӗсем выртмаллипех выртаҫҫӗ, вилекенсем те пур.

Официаллӑ статистикӑӗа ӗненсен пирӗн республикӑра ҫулталӑк пуҫланнӑранпа 2 983 ҫын чирленӗ, ҫав шутра – 23 ҫын.

Иртсе кайнӑ талӑкра тата тепӗр виҫӗ ҫын вилнӗ. Ҫапла вара кӑшӑлвирус диагнозӗллӗ 37 ҫын вилнӗ.

Кӑҫалхи ҫулла ача уйлӑхӗсене ӗҫлеттермессине эпир маларах пӗлтернӗччӗ.

ptoday.ru сайтри сӑн

Улатӑрта пурӑнакан хӗрарӑм ӗҫсӗр тесе пособи илсе пурӑннӑ. Унӑн кӗсйине пӗтӗмпе 83 пин тенкӗ кӗнӗ.

Улатӑрти районсен хушшинчи прокуратура палӑртнӑ тӑрӑх, 2019 ҫулхи кӑрлачран пуҫласа ҫак 55 ҫулти хӗрарӑм ӗҫсӗррисен йышне тӑнӑ. Паллах, куншӑн ӑна уйӑхсерен пособи панӑ. Янтӑ укҫа унӑн енчӗкне кӗнӗ.

Анчах ҫак хӗрарӑм пӗлтӗр ҫурла-чӳк уйӑхӗсенче Улатӑрти пӗр коммерци организацийӗнче килӗшӳпе ӗҫленӗ.

Организацире вӑл шалу илсе тӑнӑ. Анчах кун пирки ӗҫпе тивӗҫтерекен центра пӗлтермен. Ҫапла майпа вӑл пособие саккуна пӑсса илсе тӑнӑ.

lexinform.com.ua сайтри сӑн

Пандеми пуҫланнӑранпа Чӑваш Енре 5253 ҫын кӑшӑлвируспа чирленӗ. Юлашки талӑкра 59 ҫыннӑн инфекци пуррине палӑртнӑ.

Ӗнертенпе тепӗр 20 ҫын сывалнӑ. Ку таранччен 2960 ҫын инфекцие парӑнтарнӑ. Паянхи кун 2293 ҫын сипленет.

Шел те, паянхи кун тӗлне тепӗр ҫын кӑшӑлвируса парӑнтарайман, пурнӑҫран уйрӑлнӑ. Ҫапла майпа инфекцие пула вилнисен йышӗ республикӑра 34 ҫынна ҫитнӗ.

cap.ru сайтри сӑн

Куславкка районӗнчи Куснар ялӗнче строительство ӗҫӗ хӗрсех пырать. Ӑна авӑн уйӑхӗн 1-мӗшӗччен вӗҫлемелле. Куснарта ҫӗнӗ вӗренӳ ҫулӗ тӗлне ҫӗнӗ шкул хута яма шантарнӑ.

ЧР Вӗренӳ министерстви пӗлтернӗ тӑрӑх, строительство ӗҫӗн 83 процентне вӗҫленӗ. Шкула ҫурла уйӑхӗн 15-мӗшӗ тӗлне туса ҫитермелле.

Шкулта 165 ача валли вырӑн пулӗ. Пӗлӳ ҫурчӗ ҫумӗнче ача пахчи тӑвӗҫ. Унта вара 40 шӑпӑрлан ҫӳрӗ. Шкулта стадион та тӑваҫҫӗ.

Подряд организацийӗ шалти ӗҫсене пӗтернӗ. Халӗ киплӗ хатӗр-хӗтӗре туянаҫҫӗ.

Сӑмах май, кӑҫал Куславкка хулинче 160 шӑпӑрлан валли ача пахчи тума тытӑнӗҫ.

admbal.ru сайтри сӑн

Раҫҫейри тӗп суйлав комиссийӗ Конституцие кӗртме палӑртнӑ тӳрлетӳсем тӗлӗшпе иртнӗ сасӑлава пӗтӗмлетнӗ. Ҫӗршывра пурӑнакансен 68 проценчӗ сасӑлава хутшӑннӑ. Вӗсенчен чылайӑшӗ тӳрлетӳсене ырланӑ.

Тӗп суйлав комиссийӗ Конституцие кӗртме палӑртнӑ тӳрлетӳсем тӗлӗшпе иртнӗ Пӗтӗм Раҫҫейри сасӑлав пӗтӗмлетӗвӗ пирки ҫирӗплетнӗ постановление йышӑннӑ.

Документра палӑртнӑ тӑрӑх, сасӑлава пынисен 77,92 проценчӗ тӳрлетӳсене ырланӑ. Сасӑлава килнисен 21,27 проценчӗ Конституцие улшӑнусем кӗртессине хирӗҫ.

pxhere.com сайтри сӑн

Утӑ уйӑхӗн 2-мӗшӗнче Вӑрмар районӗнчи Саруй ялӗ ҫывӑхӗнчи пӗвере арҫын путса вилнӗ. Вӑл 46 ҫулта пулнӑ.

Инкеклӗ лару-тӑру министерстви пӗлтернӗ тӑрӑх, пӗвере ҫав вырӑна шыва кӗмешкӗн туман. Арҫын вара ҫакна шута илмен – ҫавӑнтах чӑмпӑлтатма шут тытнӑ.

Шел те, ку инкекпе вӗҫленнӗ. Ҫитменнине, арҫын ӳсӗр пулнӑ. Унӑн виллине ял ҫыннисем тупнӑ, вӗсемех ӑна ҫыран хӗррине кӑларнӑ

Чӑваш автономи облаҫне йӗркеленӗренпе 100 ҫул ҫитнине халалласа Чӑваш кӗнеке издательстви «Вместе. Пӗрле» открыткӑсен пуххи кӑларнӑ.

24 открыткӑран тӑракан комплект тӑван республикӑмӑрӑн хулисемпе районӗсен илемӗпе паллаштарӗ. Открыткӑсем ҫинче Шупашкарти паллӑ вырӑнсемпе пӗрлех республикӑрисем те сӑнланнӑ. Сӑмахран, Канаш районӗнчи Мӑкӑр ялӗнчи чукун ҫул кӗперӗ, Пӑрачкаври чиркӳ, Ҫӗрпӳри хӗрарӑмсем мӑнастирӗ. Вӗсем ҫеҫ-и, республикӑра ытарайми хитре вырӑнсем татах нумай.

Открыткӑсене Чӑваш кӗнеке издательствин лавккисенче туянма пулать тесе пӗлтернӗ Чӑваш Ен цифра таланӑвӗ, информаци политикин тата массӑллӑ коммуникацисен министерстви.

Паян, утӑ уйӑхӗн 3-мӗшӗнче, Станислав Ильин 70 ҫулхи юбилейне паллӑ тӑвать. Ӑна поэт-юрӑҫ, публицист, редактор, халӑх пултарулӑхне аталантаракан евӗр пӗлеҫҫӗ. Вӑл — Чӑваш Республикин тава тивӗҫлӗ культура ӗҫченӗ, Н. Талвир ячӗллӗ литература премийӗн лауреачӗ, юрӑ ҫыракансен Аристарх Орлов-Шуҫӑм ячӗллӗ конкурсӗн ҫӗнтерӳҫи.

Станислав Ильин Патӑрьел районӗнчи Сӑкӑт ялӗнче ҫуралнӑ. Унӑн ашшӗ Сӑкӑтри ял хорӗн ертӳҫи Петр Ильин пулнӑ.

Станислав Петрович И.Н. Ульянов ячӗллӗ Чӑваш патшалӑх университетӗнче вӗреннӗ. Ялти клуб пуҫлӑхӗнче, вӗрентекенте, Чӑваш радиора музыка программисен редакторӗнче, Республикӑн халӑх пултарулӑх ҫуртӗнче информаципе аналитика пайӗн заведующийӗнче ӗҫленӗ.