Ҫак кунсенче Шупашкарта тӑванла казах халӑхӗн ку чухнехи паллӑ поэчӗн Жан Бахытӑн (Бахытжан Канапьяновӑн) «Хӑйӑрлӑ сехет» ятлӑ кӗнеки кун ҫути курнӑ. Унта пултаруллӑ сӑвӑҫӑн Чӑваш халӑх поэчӗ Валери Туркай чӑвашла куҫарнӑ, тӗрлӗ ҫулсенче ҫырнӑ сӑввисем кӗнӗ.

Бахытжан Мусаханович Канапянов – Казахстан Ҫыравҫисен пӗрлӗхӗн правленийӗн секретарӗ, Семипалатинскри Шакарим ячӗллӗ патшалӑх унивеситечӗн хисеплӗ профессорӗ, Кокшетау хулин хисеплӗ гражданинӗ, Казахстан Республикин тава тивӗҫлӗ деятелӗ, нумай сумлӑ премисен лауреачӗ, унӑн пултарулӑхне пӗтӗм тӗнче пӗлекен Олжас Сулейменов, Андрей Вознесенский поэтсем тата ыттисем те пысӑк хак панӑ.

Жан Бахытӑн сӑввисем чӑвашла халиччен пичетленмен.

Паллӑ казах поэчӗн ҫӗнӗ кӗнеки — Валери Туркай чӑваш вулаканне парнеленӗ черетлӗ парне. Кун умӗн вӑл, чӑвашла куҫарса, А.Пушкин, А.Чехов, Р.Гамзатов, Г.Тукай, М.Джалиль, М.Карим, К.Отаров, К.Кулиев, Т.Шевченко кӗнекисене, Кавказ халӑхӗсен поэзийӗн антологине, белорус поэзийӗн антологине, Атӑлпа Урал тӑрӑхӗнче пурӑнакан халӑхсен поэзийӗн антологине тата ытти чылай паха та кӑсӑклӑ кӗнекене халӑх патне ҫитернӗччӗ.

Малалла...

Тедрос Гебреисус.

Ӑнӑҫлӑ сипленме е чир-чӗр ересрен сыхланас тесен ҫынсен хӑйӗн сывлӑхӗшӗн тӑрӑшмалла: зарядка тумалла, уҫӑлса ҫӳремелле, эрех-сӑрапа пылак шывсене сахалрах ӗҫмелле тата табак туртма пӑрахмалла, — пӗлтернӗ пӗтӗм тӗнчери сывлӑх сыхлав организацийӗн (ПТССО) пуҫлӑхӗ.

ПТССО тӗп директорӗ Тедрос Гебреисус коронавируса хирӗҫ ӑнӑҫлӑ кӗрешес тӗлӗшпе эрех-сӑра ӗҫме тата пирус туртма пӑрахма, ҫавӑн пекех спортпа туслашма чӗнсе каланӑ. Кун пирки вӑл тӗнчере пандеми сарӑлнине халалласа ирттернӗ брифингра каланӑ.

ПТССО пуҫлӑхӗ ӗнентернӗ тӑрӑх, кунашкал мерӑсем чирлесе ӳкнисене хӑвӑртрах сывалма пулӑшӗҫ.

«Ҫак йывӑр вӑхӑтра хамӑр ӳт-пӳпе психика сывлӑхне ҫирӗплетни питӗ кирлӗ. Ҫакӑ сире малашлӑхра ҫеҫ мар пулӑшӗ, эсир COVID-19 чирлесе ӳкрӗр пулсан та ҫӗнтерме май парӗ. Пӗрремӗшӗнчен, хӑвӑрӑн иммунитет системине йӗркеллӗ ӗҫлеме пулӑшакан тутлӑхлӑ тата сывӑ апат ҫийӗр. Иккӗмӗшӗнчен, эрех-сӑра сахалрах ӗҫӗр тата пылак шӗвексенчен пӑрӑнӑр», — тенӗ Гебреисус.

Виҫҫӗмӗшӗнчен, ПТССО пуҫлӑхӗ шутланӑ тӑрӑх, пирус туртма пӑрахмалла — ку сиенлӗ йӑла «COVID-19 ернӗ хыҫҫӑн ытти чир-чӗрсене аталантарма пултарать».

Малалла...

Тӗнче коронавирусран хӑраса ларнӑ вӑхӑтра Шупашкар районӗнчи ватӑсем акӑлчан чӗлхине ӑша хываҫҫӗ. Ҫак эрнере унта пӗрремӗш заняти иртнӗ.

Шупашкар районӗнчи халӑха социаллӑ пулӑшу кӳрекен центрти «Английский для всех» (чӑв. Акӑлчан чӗлхи пурин валли те) занятие социаллӑ консультаци уйрӑмӗн пуҫлӑхӗ Ирина Серапионова ирттернӗ. Вӗренме пынисем — «Оптимист» клуба ҫӳрекен хастарсем.

Халӑха социаллӑ пулӑшу кӳрекен центрти специалистсем шухӑшланӑ тӑрӑх, ют чӗлхе вӗренни ватӑсемшӗн питех те усӑллӑ. Пуҫ мимине ӗҫлеттернӗ май вӑл ватӑласран пулӑшать.

Акӑлчан чӗлхине пӗчӗкшерӗн вӗренме сӗнеҫҫӗ. Ирхи гимнастика евӗр. Сахалшар тата вӗҫӗмех. «Тӑрӑшсан пурте вӗренейӗҫ», — хавхалантараҫҫӗ унта ватӑсене.

cap.ru сайтри сӑн

Ҫӗмӗрле хула администрацийӗн пуҫлӑхӗ Алексей Григорьев отставкӑна кайнӑ. Кун пирки хула администрацийӗн сайтӗнче хыпарланӑ.

58 ҫулти Алексей Григорьев ӗҫрен яма ыйтса ҫырнӑ заявление Ҫӗмӗрле хулин депутатсен пухӑвӗн ларӑвӗнче пӑхса тухнӑ. Ҫапла майпа вӑл пуш уйӑхӗн 18-мӗшӗнчен Ҫӗмӗрле хула администрацийӗн пуҫлӑхӗ шутланмасть.

Вӑл ку тивӗҫе 2017 ҫулхи юпа уйӑхӗнче пурнӑҫлама тытӑннӑ. Хальлӗхе унӑн тивӗҫӗсене пуҫлӑхӑн экономика тата финанс ыйтӑвӗсемпе ӗҫлекен ҫумӗ, финанс пайӗн пуҫлӑхӗ Елена Туличева пурнӑҫлать.

ptproc.ru сайтри сӑн

Канаш станцийӗнче ҫамрӑк ҫынсем электропуйӑс вакунӗсене ӳкерсе пӗтернӗ. Ҫак ӗҫе камсем тунине каярах палӑртнӑ. Вӗсем – Самар облаҫӗнче пурӑнакан виҫӗ ҫын.

Ку ӗҫ-пуҫ пӗлтӗр чӳк уйӑхӗнчех пулса иртнӗ. Вандалсене тупса палӑртас тӗллевпе специалистсем ятарласа халӑх тетелӗсене тишкернӗ. Ҫапла майпа прокуратура тӗнче тетелӗнче ҫакнашкал ӳкерчӗксем вырнаҫтарнӑ ҫынсене шыраса тупма хӑтланнӑ. Ҫак ӗҫе тума пултарнӑ ҫынсене ку мелпе тупма май килнӗ.

Вандал ӗҫне ушкӑнпа тунӑшӑн нумайран та 3 ҫуллӑха хупма пултараҫҫӗ. Ҫак ҫынсен харпӑрлӑх хуҫине тӑкака саплаштармалла пулӗ. Пӗтӗмпе – 26 пин тенкӗ.

Ҫӗрпӳ районӗнчи Виҫпӳрт Салинче пурӑнакан хӗр Дарья Сорокина Пӗрремӗш каналпа кӑтартакан «Мужское / Женское» программӑран пулӑшу ыйтнӑ.

17-ри пике ӗнентернӗ тӑрӑх, унӑн амӑшӗ эрех ӗҫет, хӗрарӑмӑн урӑ кунӗ сахал. Эрне ӗҫмесӗр пурӑнать те сиенлӗ ҫав йӑлапа каллех туслашать. Хӗр халӗ Ҫӗрпӳре общежитире пурӑнать. Килте амӑшӗпе, Людмила Григорьевнӑпа, пурӑнма май ҫук. Ашшӗ те ӗҫсе тарӑхтарнӑ.

Людмила Сорокина хӑйне лайӑх амӑшӗ тесе шухӑшлать. Хӗрӗ ҫамрӑклах эрех-сӑрапа туслашнине пӗлтерет. Каччӑсене ылмаштарать тесе ҫӗршыв илтмелле тӑван хӗрне ӳпкелет. Амӑшӗн чӗри кулянать, ҫавна май алли эрех черкки патне туртӑнать имӗш. Хӗр, чӑн та, йӗркене пӑснӑ тӗслӗхсем пулкаланӑ иккен. Ӗнер эфира тухнӑ кӑларӑмра ҫемьери пӑтӑрмаха тишкерчӗҫ.

cap.ru сайтри сӑн

РФ Президенчӗ Владимир Путин Чӑваш Енри виҫӗ ҫынна Крым кӗпернӗ тунӑ ҫӗрте хастар ӗҫленӗшӗн чысланӑ. Кун пирки ЧР влаҫ органӗсен сайтӗнче пӗлтернӗ.

Пуш уйӑхӗн 18-мӗшӗнче Владимир Путин Чӑваш Енри виҫӗ ҫынна чысланӑ. Дмитрий Гаврилов электросварщик III степень «Тӑван ҫӗршыв умӗнчи тава тивӗҫлӗ ӗҫсемшӗн» ордена тивӗҫнӗ. Александр Акимов монтажнике Хисеп орденне панӑ. Производство енӗпе ӗҫлекен директорӑн ҫумне Николай Горлова II степень «Тӑван ҫӗршыв умӗнчи тава тивӗҫлӗ ӗҫсемшӗн» ордена тивӗҫнӗ.

Сӑмах май, Крым кӗперне тунӑ ҫӗре 15 пин инженерпа рабочи хутшӑннӑ. Кӗпере 2015 ҫулта тума тытӑннӑ, вӑл 19 ҫухрӑм тӑршшӗ.

www.instagram.com/pressa_gcheb сайтри сӑн

Тӗнчере коронавирус сарӑлнӑ май унран хӳтӗленмелли мерӑсем йышӑнаҫҫӗ. Шупашкарта троллейбуссене дезинфекцилеме пуҫланӑ.

Роспотребнадзор транспортсене хлор извеҫӗн виҫӗ процентлӑ ирӗлчӗкӗпе кунне икӗ хутран кая мар дезинфекцилемелле.

Шупашкарти троллейбус управленийӗ те ҫакна пурнӑҫлать. Вӑл кунне 198 троллейбуса маршрута кӑларать. Вӗсем 190 пин ытла пассажира илсе ҫӳреҫҫӗ. Транспорта хлор ирӗлчӗкӗнче йӗпетнӗ татӑкпа сӑтӑрса тухаҫҫӗ, сирпӗтеҫҫӗ. Пӗр троллейбуса тасатма 3 литр ирӗлчӗк кирлӗ.

Троллейбуссене пандеми пуҫланиччен те дезинфекциленӗ-мӗн, анчах халӗ ӑна ҫынсем маска тӑхӑнса пурнӑҫлаҫҫӗ.

pravdapfo.ru сайтри сӑн

Паян, пуш уйӑхӗн 20-мӗшӗнче, кӑнтӑрла Шупашкарта харпӑр ҫуртра пушар тухнӑ. Шел те, унта ҫынсем шар курнӑ, инкексӗр пулман.

Пушар Иккӗмӗш Путепровод урамӗнчи ҫуртра алхаснӑ. Ҫав самантра килте кинемей икӗ мӑнукӗпе пулнӑ. Ачасем – 2-ре тата 4 ҫулта. Ҫулӑм алхасма тытӑнсан ҫӑлавҫӑсем, тухтӑрсем ҫитнӗ. Шел те, кинемейпе мӑнукӗсене ҫӑлма май килмен.

Малтанлӑха пӗлтернӗ тӑрӑх, ватӑ ҫынпа ачасем сӗрӗмпе наркӑмӑшланса вилнӗ. Халӗ пушар ӑҫтан тухнине тӗпчеҫҫӗ. Вилнӗ ҫынсен тӑванӗсемпе психологсем ӗҫлеҫҫӗ.

Елчӗк районӗнчи Курнавӑш ял тӑрӑхӗн депутачӗ ачана амантнӑ. Ҫавӑншӑн ӑна суд явап тыттарма йышӑннӑ.

Пӑтӑрмах пӗлтӗрхи утӑ уйӑхӗн 26-мӗшӗнче пулса иртнӗ. Тӑрӑм ялӗпе хӑйӗн машинипе вӗҫтерсе пыраканскер 13-ри ачаран иртес тенӗ. Лешӗ велосипедпа ярӑннӑ. Велосипедистран иртсе кайнӑ чух водитель хӑвӑртлӑха чакарман. Кун пирки РФ Следстви комитечӗн Чӑваш Енри управленийӗн пресс-службинче пӗлтереҫҫӗ.

Машина ҫапса кайнӑ ачан сывлӑхне хытах амантнӑ.

Суд депутат тӗлӗшпе ирӗклӗхе 1 ҫуллӑха чакарма йышӑннӑ. Ҫав вӑхӑтра арҫыннӑн ҫуран ҫӳреме тивӗ, мӗншӗн тесен транспорт рулӗ умне ларма юрамасть тесе йышӑннӑ. Следстви управленийӗн пресс-службинче хыпарланӑ тӑрӑх, приговор саккунлӑ вӑя хальлӗхе кӗреймен-ха.