"Контактри" сӑн

Ҫӗмӗрле округӗнчи Ҫӗмӗрле ялӗнче пурӑнакан Роман Клячкин 10 ҫулта кӑна-ха. Ӑна вара халех ҫамрӑк фермер теме пулать. Вӑл хӑйӗн видеоблогне йӗркеленӗ, унта ялти пурнӑҫ пирки каласа кӑтартать.

Арҫын ача килти хур-кӑвакала, чӑх-чӗпе пӑхма пулӑшать. Пуласлӑхра вӑл ялтах юлма ӗмӗтленет, Рома ӗне, сурӑх, сысна, чӑх-чӗп усрасшӑн. Ӑна ялта пурӑнма питӗ килӗшет: унта хулари пек шавлӑ мар тет.

Ромӑна видеоблогра контент тума ҫемйи пулӑшать. Ача пӗҫерме те юратать. Уйрӑмах - икерчӗ.

fotobus.msk.ru сайтри сӑн

Авӑн уйӑхӗн 1-мӗшӗнчен Канаш хулинче общество транспорчӗпе ҫӳремелли билет хакӗ ӳсӗ - 5 тенкӗ хӑпарӗ. Хальхи вӑхӑтра билет 30 тенкӗ тӑрать. Кӗркуннерен вара 35 тенкӗ пулӗ.

Палӑртмалла: Канашра перевозчиксем хӑйсен тарифӗсемпе ӗҫлеҫҫӗ, ҫавна май хаксене хӑйсем палӑртма пултараҫҫӗ.

Авӑнӑн 1-мӗшӗнчен Канаш билет хакӗпе республикӑри чи хаклӑ хула пулӗ.

Патшалӑх автоинспекцийӗн сайтӗнчи сӑн

Вӑрнар муниципаллӑ округӗнче йӗрке хуралҫисем комбайнера чарнӑ. Вӑл ӳсӗр пулнӑ.

Комбайн «Шупашкар - Сурски» автоҫулпа пынӑ.

Сӑмах май, пӗлтӗр раштав уйӑхӗнче «Комсомольски - Елчӗк - Пӑва» ҫул ҫинче инспекторсем трактор-погрузчике чарнӑ. Водитель ӗҫ хыҫҫӑн базӑна таврӑннӑ. 53 ҫулти водитель ӳсӗр пулнӑ. Ку кӑна мар, унччен ӳсӗрле руль умне ларнӑшӑн унӑн правине те туртса илнӗ пулнӑ.

2gis.ru сайтри сӑн

Шупашкар ҫуралнӑ кунне уявланӑ чухне троллейбуссемпе автобуссем ытларах вӑхӑт ҫӳрӗҫ. Кун пирки хула мэрӗ Владимир Доброхотов пӗлтернӗ.

Шӑматкун, ҫурла уйӑхӗн 17-мӗшӗнче, общество транспорчӗ ҫур ҫӗрччен ҫӳрӗ. Вырсарникун вара, ҫурла уйӑхӗн 18-мӗшӗнче, автобуссемпе троллейбуссем ҫур ҫӗр иртни 1 сехетчен пассажирсене илсе ҫӳрӗҫ.

Кӑҫал Шупашкар 555 ҫул тултарӗ. Уява Шаман юрӑҫ, «Вӗршӗнсем» пилотаж ушкӑнӗ килӗҫ.

chgtrk.ru видоевӗнчен илнӗ сӑнӳкерчӗк

Канаш тӑрӑхӗнчи Матьшӳ ялӗ хӑйӗн 305-мӗш ҫулхине уявланӑ. Асӑннӑ ял Ҫеҫпӗл ялӗ ҫывӑхӗнче вырнаҫнӑ.

Чӑваш Енӗн патшалӑх телерадиокомпанийӗ пӗлтернӗ тӑрӑх, Матьшӳ ялӗнче халӗ 139 ҫын пурӑнать. Пӗр ӗмӗр каялла вара налук тӳлекенсем кӑна 800 ытла ҫын пулнӑ. Ачасемпе пӗрле халӑх шучӗ пинрен те иртнӗ. Ялта 8 кооператив ӗҫленӗ. Ҫил арманӗ, ҫӑкӑр завочӗ, ҫӑм таптармалли цех, чӑпта ҫапакансен лаҫҫи тата ытти артель тавраш ӗҫленӗ.

t.me/chuvashenkalasat каналтан илнӗ сӑнӳкерчӗк

«Чӑваш Ен ют ҫӗршыври ҫынсемшӗн илемӗпе, пуян историйӗпе кӑна мар, тивӗҫлӗ шайри медицина пулӑшӑвӗ кӳнипе те паллӑ», — тесе ырланӑ Телеграмри «Чӑваш Ен калаҫать» каналта.

Иртнӗ 5 ҫулта пирӗн республикӑна чикӗ леш енчен 32 пин ҫын ҫав тӗллевпе килнӗ. Ҫулталӑк пуҫланнӑранпа пирӗн тӑрӑхра 7 пин те 500 ҫын сипленнӗ.

Медицина туризмӗ уйрӑмах Чӑваш Ене терапи, хирурги, офтальмологи, эндокринологи, гинекологи енӗпе уйрӑмах илӗртет-мӗн.

"Контактри" сӑн

Кӗҫех «Россия 1» телеканалпа «Классная тема!» шоу виҫҫӗмӗш сезонне уҫӗ. Унта хутшӑнакансене суйланӑ ӗнтӗ. Вӗсен йышӗнче пирӗн ентеш те Петр Михеев пур, вӑл Шупашкарти 2-мӗш лицейре истори предметне вӗрентет.

Телешоуна педагогсен сумне ӳстерес, чи лайӑххисене кӑтартас тӗллевпе ирттереҫҫӗ. Ку сезонра 6500 заявка килнӗ. Чи кеҫӗнни - 21 ҫулта, чи асли 77-ре пулнӑ. Комисси ҫурма финал валли 35 педагога суйланӑ. Шӑпах ҫавӑнта лекнӗ Петр Павлович.

Проектра хӑйӗн предмечӗн материалне ӑнланмалла тата интереслӗ каласа кӑтартакан вӗрентекен ҫӗнтерӗ. Унӑн парне пулӗ: федераци каналӗнче автор вӗренӳ шоуне кӑтартӗ.

"На связи" форумри сӑн

Ҫитес вӑхӑтра патшалӑх служащийӗсем валли ҫӗнӗ награда пулӗ. «За безупречную государственную гражданскую службу Чувашской Республики» ятлӑ вӑл вырӑсла. Ӑна кӗҫех патшалӑх наградисен йышне кӗртӗҫ.

Ку наградӑна патшалӑх службинче 10 ҫултан сахал мар ӗҫлекенсем илме пултарӗҫ. Ун ҫинче тӑватӑ вӗҫлӗ ҫӑлтӑр пулӗ, ун ҫине «Служить во благо»/«Ырлӑхшӑн ӗҫленӗшӗн» тесе ҫырӗҫ. Тепӗр енче «Чӑваш Республикин патшалӑх граждан службинче тӳрӗ кӑмӑлпа ӗҫленӗшӗн» и «За безупречную государственную гражданскую службу Чувашской Республики» тени пулӗ.

tclife.ru сайтри сӑн

Республикӑри 10 округ Сосновский пултӑранӗпе кӗрешме хушма укҫа ыйтнӑ. Вӗсен йышӗнче - Улатӑр, Вӑрнар, Йӗпреҫ, Канаш, Куславкка, Комсомольски, Хӗрлӗ Чутай, Етӗрне, Елчӗк, Патӑрьел округӗсем. Вӗсене пӗтӗмпе 4,5 миллион тенкӗ уйӑрса парӗҫ. Ку укҫапа 2,85 тӑваткал ҫухрӑм лаптӑк ҫинчи Сосновский пултӑранне пӗтерме май парӗ.

Палӑртмалла: ҫулталӑк пуҫланнӑранпа ҫак наркӑмӑшлӑ курӑкпа кӗрешме 11,4 миллион тенкӗ уйӑрнӑ.

cap.ru сӑнӳкерчӗкӗ

Мария Мамаева куҫ курманнисен хушшинче иртнӗ Раҫҫей чемпионатӗнче ылтӑн медаль илнӗшӗн премие тивӗҫнӗ. Ӑна республика хыснинчен парӗҫ, хушӑва ЧР Элтеперӗ Олег Николаев алӑ пуснӑ.

Премие спортсменкӑна пӗр хутчен парӗҫ. Вӑл 12 пин тенкӗпе танлашать.

Аса илтерер: чемпионат ака уйӑхӗн 6-11-мӗшӗсенче Калугӑра иртнӗ. 17 ҫулти Мария Мамаева унта ылтӑн медальсӗр пуҫне кӗмӗл тата пӑхӑр медальсем ҫӗнсе илнӗ. Ҫӗртме уйӑхӗнче вара вӑл Раҫҫей Кубокӗнче ишессинче ӑмӑртса икӗ ылтӑн, икӗ кӗмӗл тата пӗр пӑхӑр медальсем ҫӗнсе илнӗ.