Ольга Иванован халӑх тетелӗнчи страницинчен илнӗ сӑнӳкерчӗк

Нумаях пулмасть Чӑваш кӗнеке издательствинче Улькка Эльменӗн «Интернетри юрату» кӗнеки кун ҫути курнӑ.

Издательствӑн редакторӗ Ольга Иванова халӑх тетелӗнчи хӑйӗн страницинче пӗлтернӗ тӑрӑх, Улькка Эльменӗн алҫырӑвӗ ачасемпе ҫамрӑксем валли чӑвашла ҫырнӑ произведенисен 2023 ҫулхи конкурсӗнче ҫӗнтернӗ.

«Улькка Эльменӗн ҫӗнӗ кӗнеки яшсемпе хӗрсемшӗн кӑна мар, ашшӗ-амӑшӗшӗн те интереслӗ, усӑллӑ пулӗ, мӗншӗн тесен автор повеҫре паянхи ҫивӗч ыйтусене хускатнӑ, кулленхи йывӑрлӑхсене татса памалли ҫул-йӗре тӗпченӗ, сӑнарсене ӗнентерӳллӗ калӑпланӑ», — тесе хыпарланӑ кӗнеке иззадтельствин ӗҫченӗ.

"Контактри" сӑн

Канаш округӗнчи Шаккӑл ялӗнче пурӑнакан Мария Рытова 101-мӗш ҫуралнӑ кунне паллӑ тунӑ.

Мария Петровна ҫак ялтах ҫуралса ӳснӗ. Ҫамрӑклӑхӗ вӑрҫӑпа пӗр килнӗ. Вӑл окоп та чавнӑ, вӑрман та каснӑ, Хусанти чукун ҫула тунӑ ҫӗрте те ӗҫленӗ. Ҫав вӑхӑтсем манӑҫман, алли-ури те ӑна пулах сураҫҫӗ.

1945 ҫулта тин фронтран таврӑннӑ Иван Рытов хӗре асӑрханӑ. Кӗҫех ҫӗнӗ ҫемье чӑмӑртаннӑ. Вӗсем 6 ача ҫуратса ӳстернӗ. Халӗ Мария Петровна 11 мӑнукӗпе, кӗҫӗн мӑнукӗсемпе савӑнса пурӑнать.

cap.ru сӑнӳкерчӗкӗ

Шупашкарти 4-мӗш гимнази валли тинех директор тупӑннӑ. Ку вырӑна унччен физкультура учителӗнче ӗҫленӗ Максим Валерьевич Антонов йышӑннӑ.

Палӑртмалла: гимназире 2022 ҫулхи авӑн уйӑхӗнченпе директор ҫук. Унччен директор унта Андрей Михайлов пулнӑ. Максим Валерьевич 1996-2002 ҫулсенче Йӗпреҫ округӗнчи Пысӑк Упакассинчи шкулта физкультура учителӗнче ӗҫленӗ. Кайран Йӗпреҫри 2-мӗш шкулта тӑрӑшнӑ, 2006-2018 ҫулсенче ӑна ертсе пынӑ.

Чӑваш кӗнеке издательствин сӑнӳкерчӗкӗ

Чӑваш кӗнеке издательствинче «Юманлӑх ҫулҫӑ тӑкмарӗ» романӑн иккӗмӗш кӗнеки пичетленсе тухнӑ.

Издательствӑра хыпаралнӑ тӑрӑх, Алексей Афанасьевӑн «Юманлӑх ҫулҫӑ тӑкмарӗ» романӗ кивелми произведенисен шутне кӗрет. Чӑваш Республикин наци библиотеки хатӗрленӗ «Вуламалли 100 кӗнеке» списока та ахальтен лекмен вӑл. Вулакансем ыйтнипе Чӑваш кӗнеке издательстви ӑна тепӗр хут кӑларма йышӑннӑ. Пӗлтӗр пӗрремӗш кӗнеки кун ҫути курнӑ, кӑҫал — иккӗмӗшӗ.

Кӗнеке авторӗ – Тутарстанри Потап-Тӑмпӑрлӑ чӑваш ялӗнче ҫуралса ӳснӗ Алексей Афанасьев прозаик, поэт тата куҫаруҫӑ. Вӑл ҫамрӑк чух шкулта ачасене удмурт чӗлхине вӗрентнӗ. «Нарспи» поэмӑна, «Айтар» драмӑна тата ытти хӑш-пӗр произведение удмуртла куҫарнӑ.

Паян кӑнтӑрла Хусанта пӑр ҫунӑ. Ун хыҫҫӑн хӑш-пӗр урамра пӑр выртнӑ.

«Чӑваш Енри ҫанталӑк» проект авторӗ Владимир Михайлов пӗлтернӗ тӑрӑх, паян Атӑлҫи тӑрӑхӗнче Кристи ятлӑ Атлантика циклонӗ хуҫаланать. Вӑл Чӑваш Енрен айккинчен иртсе кайнӑ.

Ҫӗнӗ Шупашкарта ирхине вӑйлӑ ҫумӑр ҫунӑ, пӑр та ӳкнӗ. Унтан Зеленодольск енне кайнӑ. Кӑнӑрла вара Хусана ҫитнӗ.

Синоптиксем пӗлтернӗ тӑрӑх, пирӗн республикӑра циклон тата темиҫе кун хуҫаланӗ, хушӑран аслатиллӗ ҫумӑр ҫукалӗ.

"Контактри" сӑн

Шупашкарти Машиностроительсен тӑкӑрлӑкӗнче, «ЦветыТорг» лавккан курттӑммӑн илмелли базӑра, ҫурт стенине графиттипе илемлетнӗ. Унччен ҫав икӗ хутлӑ ҫурт тӗксӗммӗн курӑнса ларнӑ. Вӑл - Текстильмаш корпусӗсенчен пӗри.

Ҫак илем авторӗ - Ксения Кокель ҫамрӑк ӳнерҫӗ. Вӑл Хевеш урамӗнчи 30-мӗш ҫурт ҫине чӑваш хӗрарӑмне ӳкернӗ.

Сӑмах май, утӑ уйӑхӗн 20-мӗшӗнче ҫак вырӑнта Ҫырла фестивалӗ иртнӗ.

"Чӑваш Ен" ПТРК тунӑ видео скринӗ

Шӑматкун, утӑ уйӑхӗн 27-мӗшӗнче, Дмитрий Мулендеев фристайлҫӑ авланнӑ. Мӑшӑрӗ те унӑн хӑйӗн пекех спортсменка, слалом-гигант дисциплинӑра ӑмӑртать. Вӑл - Полина Смоленцова.

Дмитрий Мулендеев нарӑс уйӑхӗн 11-мӗшӗнче Раҫҫейри фристайл енӗпе пӗрлештернӗ командӑн чи вӑйлӑ тренерӗсене Спартакиадӑра чысланӑ чухне качча тухма ыйтни пирки пӗлтернӗччӗ. Каччӑ хӗре ылтӑн ҫӗрӗ тӑхӑнтартса ҫемье ҫавӑрма ыйтнӑ. Полина хирӗҫ пулман.

Мулендеевсен туйӗ Шупашкарта иртнӗ. Ӑна вӗсем чӑвашсен йӑли-йӗркине тӗпе хурса ирттернӗ.

gcheb.cap.ru сӑнӳкерчӗкӗ

Шупашкар хули 555 ҫул тултарнине халалласа ирттерекен уяв кунӗнче республикӑмӑр тӗп хулине «Стрижи» (чӑв. Вӗршӗн) авиаци ушкӑнӗ килӗ. Маттур лётчиксен ӑсталӑхӗпе хула ҫыннисем ҫурла уйӑхӗн 17-мӗшӗнчех киленме пултарӗҫ, мӗншӗн тесен ҫав кун пилотаж ушкӑнӗ тренировка ирттерӗ.

Авиашоу ҫурла уйӑхӗн 18-мӗшӗнче 12 сехетре Шупашкарти кӳлмекре иртӗ. «МиГ-29» самолётсем сехетре 900 километр ытла хӑвӑртлӑхпа вӗҫсе иртӗҫ. Пӗр самолётпа теприн хушши хӑш чух пӗр метртан та пӗчӗкрех пулӗ! Шоу ҫур сехете тӑсӑлӗ.

Асӑннӑ ушкӑн унччен Шупашкарта виҫӗ хутчен пулнӑ. Вӗҫев ушкӑнӗ Шупашкара ҫурла уйӑхӗн 14-мӗшӗнчех килӗ. Вӗсем шкул ачисемпе тӗлпулусем ирттерӗҫ.

Наталия Арсентьеван архивӗнчи тата cap.ru сӑнӳкерчӗкӗсемпе усӑ курса Таисия Ташней хатӗрленӗ коллаж

Культурӑра чылай ҫул тухӑҫлӑ ӗҫленӗшӗн Чӑваш Енри икӗ ҫынна культурӑн тава тивӗҫлӗ ӗҫченӗ ята пама йышӑннӑ.

Ку сума хальхинче Шупашкар муниципаллӑ округӗнчи Тӗп клуб тытӑмӗн хормейстерӗ Наталия Арсентьева тата Комсомольски муниципаллӑ округӗнчи Тӗп клуб тытӑмӗн халӑх театрӗн режиссёрӗ Марина Шумилкина тивӗҫнӗ.

Хушӑва республика ертӳҫи Олег Николаев ӗнер, утӑ уйӑхӗн 29-мӗшӗнче, алӑ пуснӑ.

Татьяна Немцева. tavanen.ru сӑнӳкерчӗкӗ

Обществӑпа ҫыхӑну тытакан тата коммуникаци сферинче цифра проекчӗсене аталантарас енӗпе ӗҫлекен «Диалог Регионсем» организацин (Мускав хули) Чӑваш Республикипе ӗҫлекен пайӗн пуҫлӑхне Татьяна Немцевӑна Чӑваш Республикин Хисеп грамотипе наградӑланӑ.

Татьяна Вячеславовна — истори наукисен кандидачӗ. Хальхи вӑхӑтра вӑл влаҫпа общество ҫыхӑнӑвӗшӗн яваплӑ ӗҫре тӑрӑшать. Чӑваш Енри Регион управленийӗн центрне уҫни виҫӗ ҫул ытла. Унӑн тӗп тивӗҫӗ — ҫынсен ыйтӑвӗсемпе ӗҫлесси. Ҫак ӗҫе асӑннӑ центр «Инцидент Менеджмент» тытӑм тата «Госуслуги. Решаем вместе» (чӑв. Патшалӑх пулӑшӑвӗ. Пӗрле татса паратпӑр) портал урлӑ туса пырать. Центр влаҫ органӗсем халӑх тетелӗсенчи хӑйсен ушкӑнӗсем урлӑ халӑхпа епле ӗҫленине сӑнаса-тӗрӗслесе тӑрать.