Инкеклӗ лару-тӑру министерстви тунӑ сӑн

Паян ирхи 3 сехетре Ҫӗрпӳ муниципаллӑ округӗнчи Михайловка ялӗнче пушар пулнӑ. Ҫулӑм ҫурт тӑррине тӗп тунӑ, шалти отделкӑна сиенлетнӗ. Пушара сӳнтерсен кил хуҫин виллине тупнӑ. Вӑл – 60 ҫулти арҫын.

Палӑртса хӑварар: ҫулталӑк пуҫланнӑ кӑна-ха, республикӑра 41 пушар пулнӑ. Вӗсенче виҫӗ ҫын вилнӗ, 27 ҫынна ҫӑлма май килнӗ. 17 тӗслӗхре пушар кӑмака хутнӑ вӑхӑтра тухнӑ, 11 тӗслӗхре – электрохатӗрсемпе тӗрӗс усӑ курманран.

Тӗнче тетлӗнче тӗрлӗ ҫӑлкуҫ пӗлтернӗ тӑрӑх, тӳлевлӗ М-12 ҫул ҫинчи заправкӑсем патӗнче черетсем пулнӑ. Ҫавна май «Автодор» унта ҫӗнӗ заправкӑсем тӑвас ӗҫе хӑвӑртлатма шантарнӑ.

«Автодор» пӗлтернӗ тӑрӑх, хальлӗхе унта 18 заправка тата 4 контейнерлӑ АЗС ӗҫлет. Пӗтӗмпе – 22 заправка. Ҫӗнӗ ҫул хыҫҫӑнхи каникулта ытларах Муром тата Арзамас патӗнче, Мускава кӗнӗ ҫӗрте черетсем пулнӑ.

Сӑмах май, унччен влаҫ М-12 ҫул ҫинче кашни 50 ҫухрӑмра заправка пулассине пӗлтернӗ. Тӳрех – икӗ енчен.

"Ҫыхӑнура" форумран илнӗ сӑнӳкерчӗк

Шупашкарта ҫуралнӑ каччӑ CS:GO танлаштарӑмӗнче виҫҫӗмӗш ҫул ӗнтӗ тӗнчери чи лайӑх 10 вӑйӑҫӑн шутне лекет.

22 ҫулти Дмитрий sh1ro Соколов Counter-Strike вӑйӑра чи лайӑх 8 вӑйӑҫӑ спиоскӗнче 8-мӗш вырӑн йышӑннӑ.

2021 ҫулта Дмитрий тӗнчери рейтингра тӑваттӑмӗш вырӑн йышӑннӑ, 2022 ҫулта — виҫҫӗмӗш, пӗлтӗр — саккӑрмӗш.

vk.com/chebs_mo сӑнӳкерчӗкӗ

Шупашкар муниципаллӑ округӗнчи Паҫпак ялӗнче пурӑнакан кинемей 100 ҫул тултарнӑ. Унӑн юбилейӗ кӑрлапчӑн 5-мӗшӗнче пулнӑ. Ватӑ ҫынна вырӑнти тӳре-шара «Контактра» страницӑра саламланӑ.

«Хисеплӗ Нина Григорьевна, сире 100 ҫулхипе чунтан саламлатпӑр. Эсир Тӑван ҫӗршывӑн аслӑ вӑрҫи вӑхӑтӗнчи йывӑр саманана тӳссе ирттернӗ, ҫӗршыва аталантарма хӑвӑр тӳпӗре хывнӑ. Эсир ыттисемшӗн тӗслӗх пулса тӑратӑр», — тесе каланӑ постра.

Юбилярӑн хушаматне, шел те, кӑтартман.

Владимир Викторов страницинчен илнӗ сӑнӳкерчӗк

Шупашкар муниципаллӑ округӗнчи Янӑшри вӑтам шкул Михаил Игнатьев ячӗпе хисепленсе тӑма пуҫланӑ. Ҫав ятпа савӑнӑҫлӑ мероприятие ӗнер, кӑрлачӑн 8-мӗшӗнче, ирттернӗ. Кун пирки Шупашкар районӗнчи тӗп пульницӑн тӗп тухтӑрӗ Владимир Викторов «Контактра» пӗлтернӗ.

Мероприятие кӑрлачӑн 8-мӗшӗнче ирттерни ытахальтен мар. 2010-2020 ҫулсенче Чӑваш Енӗн Элтеперӗ пулнӑ Михаил Васильевич ҫав кун ҫуралнӑ. Пурӑннӑ пулсан вӑл ӗнер 62 ҫул тултармаллаччӗ.

Ентешне сума суса Янӑшри шкулта арҫынсен командисен хушшинче волейбол ӑмӑртӑвӗ иртнӗ.

ҪҪХПИ тунӑ сӑн

Хусанти ҫемье Мускавран таврӑннӑ чухне Сӗнтӗрвӑрри ҫул пӑрӑнӑшӗнче чарӑнса ларнӑ. Анчах вӗсене пулӑшма никам та чарӑнман.

Полици ӗҫченӗсем Сергей Федоровпа Александр Данилов вӗсене асӑрхасан чарӑннӑ. Ҫемье шартлама сивӗре пӗр сехет тӑнӑ иккен. Полицейскисем вӗсене хӑйсен машинине лартнӑ та сӳнсе ларнӑ машинӑна ҫывӑхри кафе таран туртса ҫитернӗ. Унта вара ҫемье Хусантан пулӑшу килессе кӗтсе илнӗ.

Ҫемье телеграм-каналта Чӑваш Енри полицейскисене тав тунӑ.

Пермьри «Сатурн-Р-Авто» республикӑри тӳре-шарана 12 «Москвич 6» машинӑпа тивӗҫтерӗ. Фирма виҫӗ аукциона пӗччен кӑна хутшӑннӑ.

Кашни автомобиль 2,9 миллион тенке ларнӑ. 12 машинӑшӑн 34 миллион та 876 пин тенкӗ тӳленӗ.

Палӑртмалла: «Москвич 6» машинӑна 2023 ҫулхи авӑн уйӑхӗнченпе «Москвич» савутра кӑлараҫҫӗ. Сутлӑхра - 2023 ҫулхи юпа уйӑхӗн 12-мӗшӗнченпе.

2024 ҫул пуҫламӑшӗ климат норминчен 11,5 градус сивӗрех пулнӑ. Синоптиксем пӗлтернӗ тӑрӑх, ыран ӑшӑрах пулӗ, 12-14 градус сивӗ тӑрӗ. Анчах ҫил вӑйланнӑран сивӗрех пек туйӑнӗ.

Юнкун каллех сивӗтӗ, термометр 30 градус патнелле ҫывхарӗ. Кӗҫнерникун юр ҫӑвӗ, ҫил-тӑман тухӗ. Эрнекун та вӑл чарӑнмӗ, ҫил вӑйланӗ. Кӗҫнерникун ҫӗрле термометр 15-20 градус кӑтартӗ. Шӑматкун 20 градус сивӗ пулӗ. Ҫӗрле 30 градус таран сивӗтӗ.

Малтанлӑха пӗлтернӗ тӑрӑх, ҫитес эрне пуҫламӑшӗнче самаях ӑшӑтӗ.

Светлана Гордеева страницинчен илнӗ сӑнӳкерчӗк

Геннадий Айхин «Стихотворения» кӗнеки Мускаври «Эксмо» издательствӑра 10 пин тиражпа пичетленсе тухнӑ. Кӗнекене сӑвӑсем ҫеҫ мар, эссесем те кӗнӗ. Унсӑр пуҫне Атӑлҫи тӑрӑхӗнчи халӑх юррисем евӗрлӗ «Поклон – пению» тата «Мир Сильвии» сӑвӑсем кӗнӗ.

Кӗнекене пухса хатӗрленӗ Арсен Мирзаев кӑларӑма малтанласа «День присутствия всех и всего» ят пама шухӑшланине, анчах кӗнеке кӑларакансем ят ытла та вӑрӑм тесе каланине пӗлтернӗ.

21.мвд.рф сӑнӳкерчӗкӗ

Кӑрлач уйӑхӗн 7-мӗшӗнче Ҫӗнӗ Шупашкарта 13 ҫулти хӗрачана машина ҫапса кайнӑ.

Хӗрача 19 сехетре хулари Парк урамӗнчи 35-мӗш ҫурт тӗлӗнче ҫуран ҫӳрекенсене каҫмалли вырӑнпа ҫул урлӑ каҫма тӑнӑ. Ҫав вӑхӑтра ун ҫине «Датсун» автомобиль пырса кӗнӗ. Унтан хӗрача «Лада Калина» машина ҫине сулӑнса кайнӑ.

Пуҫне суранлатнӑ хӗрачана пульницӑна илсе кайнӑ. Ҫӑмӑл автомашинӑсен водителӗсене тӗрӗсленӗ те вӗсем урах пулни палӑрнӑ.