Сайта кӗр | Регистраци | Сайта кӗрсен унпа туллин усӑ курма пулӗ
 0.0 °C
Ӗнен сӗчӗ чӗлхе вӗҫӗнче.
[ваттисен сӑмахӗ]
 

Хыпарсен ҫыххи: Республикӑра

Республикӑра

Шупашкарта чи лайӑх таксиста суйланӑ. Ку ята каллех Артур Михайлов тивӗҫнӗ. Иккӗмӗш вырӑна Петр Иванов тухнӑ, виҫҫӗмӗш вырӑна Мария Петрова тивӗҫнӗ.

ЧР Транспорт министерстви пӗлтернӗ тӑрӑх, конкурса 30 ытла таксист хутшӑннӑ. Вӗсем ҫул-йӗр правилисене мӗнле пӗлнине, Чӑваш Ен историне тӗшмӗртнине, авари пулсан пӗрремӗш медпулӑшу мӗнле памаллине тӗрӗсленӗ.

Финала тухнисене укҫан хавхалантарнӑ, парнесем панӑ. Раҫҫей шайӗнчи конкурс Сочире чӳк уйӑхӗн 5-6-мӗшӗсенче иртӗ. Артур Михайлов унта Чӑваш Ен чысне хӳтӗлӗ. Каласа хӑвармалла: пӗлтӗр Артур Сочирен иккӗмӗш вырӑнпа таврӑннӑ.

 

Республикӑра

Ӗнер, юпа уйӑхӗн 5-мӗшӗнче, Чӑваш Ен Строительство, архитектура тата ҫурт-йӗрпе коммуналлӑ хуҫалӑх министерствинче республикӑн тӗп архитекторне, министрӑн ҫумне Александр Шевлягина чысланӑ. Ӑна «Чӑваш Республикин тава тивӗҫлӗ архитекторӗ» ят панӑ.

Чыслава ӗнер йӗркелени ытахальтен мар. Юпа уйӑхӗн 5-мӗшӗнче Пӗтӗм тӗнчери архитектура кунне уявланӑ.

Паллӑ пулӑмпа Александр Шевлягина ӗҫтешӗсем тата Александр Героев министр, ҫавӑн пекех Чӑваш Енри архитекторсен союзӗн пайташӗсем саламланӑ.

Александр Шевлягин 1988 ҫултанпа СССР Архитекторсен союзӗн пайташӗ пулнӑ, 2002-2006 ҫулсенче Чӑваш Енри архитекторсен союзне ертсе пынӑ.

 

Республикӑра

Нумаях пулмасть Шупашкар хулин депутатсен пухӑвӗн депутачӗ Сергей Муравьев Канаш районӗнчи Мӑкӑр ялӗнчи кӗпер патне ҫитсе курнӑ. Сӑмах май, унта ЧР Элтеперӗ Олег Николаев пулнӑ, кӗпер ҫывӑхӗнчи территорие хӑтлӑлатма хушнӑ. Унтанпа темех улшӑнман иккен.

«Кӗпер авариллӗ лару-тӑрура. Ӑна карта тытса ҫавӑрман, ҫавӑнпа унта кирек кам та лекме пултарать. Ҫӳлте ҫынсем ҫемйипех утса ҫӳреҫҫӗ. Хӑйсемшӗн мар пулсан ачисемшӗн хӑть шутлаччӑр», - ҫырнӑ депутат хӑйӗн страницинче.

«Тӗрӗслӗхшӗн Раҫҫей» партире тӑракан Муравьев кӗпер патне щитсем лартма, территорие хӑтлӑлатма сӗннӗ. Унӑн шухӑшӗпе, унта ирӗклӗн кӗрсе ҫӳреме чармалла.

Аса илтерер: авӑн уйӑхӗн 17-мӗшӗнче Мӑкӑр кӗперӗ ҫинчен фотограф ӳксе вилнӗ. Вӑл юрӑҫсем ушкӑнне ӳкернӗ пулнӑ.

 

Республикӑра

«МТС» компани Чӑваш Енри 18 яла, вӗсенчен 15-ӗшӗнче 600-тен сахалрах ҫын пурӑнать, 4G ҫыхӑнӑва ҫитернӗ.

Асӑннӑ сетьпе Йӗпреҫ районӗнчи Чӑваш Тимеш, Вырӑс Тимеш, Ленин Поҫҫолкки; Муркаш районӗнчи Отарккӑ, Шарпаш, Чуманкасси; Вӑрнар районӗнчи Отиккӑвӑ, Кӳстӳмӗр, Ершепуҫ; Патӑрьел районӗнчи Тутар Тимешӗ, Кӗҫӗн Шӑнкӑртам; Хӗрлӗ Чутай районӗнчи Сӗренкасси, Мӑн Этмен, Тумликасси ялӗсем усӑ курайӗҫ. Вӗсенче пурӗ 5 пин ытла ҫын пурӑнать.

Сете ҫавӑн пекех Улатӑр, Ҫӗмӗрле тата Канаш хулисенче сарнӑ. Тӗнче тетелне смартфон, планшет, модем е урӑх хатӗр урлӑ кӗрсен хӑвӑртлӑх ҫеккунтра 75 мегабитпа танлашать.

«МТС» компанин Чӑваш Енри пуҫлӑхӗ Артур Сизов пӗлтернӗ тӑрӑх, ҫулталӑк вӗҫлениччен тата тепӗр 23 тӑрӑха пысӑк хӑвӑртлӑхлӑ интернет ҫитермелле.

 

Республикӑра

Паян Федерацин суд приставӗсен Чӑваш Енри управленийӗн пуҫлӑхӗн ҫӗнӗ ертӳҫипе Денис Борисовпа паллаштарнӑ. Ӑна хальлӗхе тивӗҫе пурнӑҫлама шаннӑ-ха.

Республикӑн Правительствин ҫуртӗнче ҫӗнӗ ертӳҫӗне Министрсен Кабинечӗн Ертӳҫин тивӗҫне пурнӑҫлакан Михаил Ноздряков йышӑннӑ. Ҫӗнӗ ҫынпа Федерацин суд приставӗсен службин директорӗн ҫумӗ — ҫӗршывӑн тӗп суд приставӗн ҫумӗ Денис Фирстов паллаштарнӑ.

Денис Борисов — шалти службӑн аслӑ лейтенанчӗ. Ку тытӑмра вӑл 2002 ҫултанпа ӗҫлет.

Михаил Ноздряков Дениса Борисова чӑваш ҫӗрӗ ҫинче ӑнӑҫлӑ ӗҫлеме ырӑ суннӑ.

 

Республикӑра
russiaedu.ru сайтри сӑн
russiaedu.ru сайтри сӑн

Авӑнӑн 30-мӗшӗнче ҫул-йӗрпе патруль службин ӗҫченӗсем «Приорӑна» чарнӑ. Унччен маларах унти ҫынсем наркотик суту-илӗвӗпе явӑҫни пирки хыпар ҫитнӗ.

Йӗрке хуралҫисем салонра синтетика наркотикӗ тупнӑ, ҫавӑн пекех тараса, пластик кӗленчерен ӑсталанӑ «бульбулятор», пневматика пистолечӗ пулнӑ.

Салонра тӑватӑ ҫын пулнӑ. Чи кӗҫӗнни – 16 ҫулта. «Антидилер» юхӑм хастарӗ пӗлтернӗ тӑрӑх, вӗсенчен пӗри закладка хуракана вырнаҫма палӑртнӑ. Анчах вӑл закладка туса ӗлкӗреймен.

Водитель юнра алкогольпе наркотик пуррипе ҫуккине тӗрӗслеме тест тума килӗшмен. Ӑна правасӑр хӑварӗҫ, 30 пин тенкӗлӗх штрафлӗҫ.

 

Республикӑра

Юпа уйӑхӗн 1-мӗшӗнче Шупашкарта стела уҫӑлнӑ. Ҫав пулӑма республикӑн сывлӑх сыхлав министрӗ Владимир Степанов хутшӑннӑ.

Медицина ӗҫченӗсене асра тытнине палӑртакан стелӑна Шупашкарти Пирогов урамӗнчи 24-мӗш ҫурт ҫине, Республикӑн судпа медицина экспертизин бюровӗн картишӗнче, вырнаҫтарнӑ. Ӑна Тӑван ҫӗршывӑн аслӑ вӑрҫине хутшӑннӑ, чумана, оспӑна, хӑрушӑ ытти инфекцие, ҫавӑн пекех кӑшӑлвируса хирӗҫ вакцинӑсем шутласа кӑларма хутшӑннисене хисеп туса уҫнӑ. Паян «хӗрлӗ зонӑра» ковидпа кӗрешекенсене сума сунине те палӑртнӑ. Ҫамрӑк тухтӑрсен хӑйсен тивӗҫне таса чунпа пурнӑҫламаллине аса илтерекен стела та пулӗ вӑл.

 

Республикӑра
Шӗмшеш ял тӑрӑхӗ
Шӗмшеш ял тӑрӑхӗ

Элӗк районӗнче Прокопьев усламҫа контракта вӑхӑтра пурнӑҫламаншӑн штрафланӑ. Республика прокуратури ӑна 214,4 пин тенкӗлӗх штраф тӳлеттернӗ.

Ведомство пӗлтернӗ тӑрӑх, Прокопьев усламҫӑ виҫӗ урамри ҫула (вӗсем виҫӗ ялта вырнаҫнӑ) юсама контракт илнӗ, анчах палӑртнӑ вӑхӑт тӗлне объектсене туса ҫитереймен. Юсамалли урамсем Элӗк районӗнчи Шӗмшеш ял тӑрӑхӗнче пулнӑ.

Предпринимателӗн ҫулсене ҫурла уйӑхӗн 10-мӗшӗччен юсаса пӗтермелле пулнӑ. Ҫурлан 14-мӗшӗнче прокуратура ӗҫченӗсем объектсене тӗрӗслеме персе ҫитнӗ, анчах ӗҫе вӗҫличчен чылай юлнине асӑрханӑ. Ҫапла май усламҫа РФ КоАПӗн 7.32-мӗш статьян 7-мӗш пайӗпе айӑпланӑ, урӑхла каласан, контрактпа палӑртнӑ ӗҫе пурнӑҫлама пултарайманшӑн. Ку вара юлашкинчен контракт хакӗн 5 проценчӗпе танлашакан штрафпа ҫаврӑннӑ.

Прокуратура пӗлтернӗ тӑрӑх, вӗсен ӗҫченӗсем объектсенче килсе кайнӑ хыҫҫӑн унти ӗҫ хӑвӑртланнӑ.

 

Республикӑра

Чӑваш наци ӑслӑлӑхпа ӳнер академийӗ паян хӑйӗн йышне Чӑваш Енри паллӑ ҫыравҫӑна, поэта, журналиста илнӗ. Сӑмахӑмӑр Николай Ишентей пирки пырать.

Академи пирки ҫакна палӑртмалла: ун йышне таврапӗлӳҫӗсемпе тӗрлӗ тӗпчевҫӗ-ҫыравҫӑсем, ӳнерҫӗсем тата ыттисем кӗреҫҫӗ. Академие 1992 ҫулхи чӳк уйӑхӗн 26-мӗшӗнче йӗркеленӗ. Асӑннӑ пӗрлӗх ӑслӑлӑхпа, ӳнерпе, таврапӗлӳпе, халӑх ӑс-хакӑлӗллӗ ӗҫсемпе, культурӑн тӗрлӗ енӗпе хӑйсен ирӗкӗпе тата тӳлевсӗр ӗҫлекен тата вӗсене аталантаракан ҫынсене пӗрлештерет. Унӑн ертӳҫи — Евгений Ерагин.

Паян академи ертӳҫи Евгений Ерагин Николай Ишентей ҫыравҫа академин хисеплӗ ӗҫченӗ ята пани ҫинчен пӗлтернӗ, ҫавна ӗнентерекен паллӑпа чысланӑ.

 

Республикӑра
ЧПУ санӳкерчӗкӗ
ЧПУ санӳкерчӗкӗ

Эльдар Алиев тата Аллабай Аманмуххаметов – И.Н.Ульянов ячӗллӗ ЧПУн юридици факультечӗн студенчӗсем. Вӗсем Туркменистанран килнӗ.

Ҫурла уйӑхӗнче икӗ каччӑ Хусана хӑнана кайнӑ. Тусӗн хваттерӗ пӗрремӗш хутра вырнаҫнӑ. 21 сехет ҫитсен хайхискерсем пулӑшу ыйтса кӑшкӑрнине илтнӗ. Хӗрарӑма ҫамрӑк арҫын тапӑннӑ-мӗн, ӑна пӑвма пуҫланӑ.

Каччӑсем пушмакӗсене тӑхӑнмасӑрах чӳречерен сикнӗ. Пӗри полицие шӑнкӑравланӑ, тепри хурах хыҫҫӑн чупнӑ.

Студентсем хӗрарӑма ҫӑлнӑ хыҫҫӑн ЧПУна ҫыру килнӗ. Унта хӗрарӑм вӗсене тав туса ҫырнӑ. Нумаях пулмасть Эльдарпа Аллабая аслӑ шкул тав ҫырӑвӗпе чысланӑ.

 

Страницӑсем: 1, 2, 3, [4], 5, 6, 7, 8, 9, 10, 11, 12, 13, 14, ...392
Orphus

Баннерсем

Шутлавҫӑсем

1 Хурал кӗтесӗ (чат)

Ҫанталӑк

Шупашкарта ҫывӑх вӑхӑтра (21.10.2020 03:00) сайра пӗлӗтлӗ ҫанталӑк, атмосфера пусӑмӗ 748 - 750 мм, 0 - 2 градус ӑшӑ пулӗ, ҫил 3-5 м/ҫ хӑвӑртлӑхпа хӗвеланӑҫ енчен вӗрӗ.

Гороскоп

СурӑхВӑкӑрЙӗкӗрешРакАрӑсланХӗрТарасаСкорпионУхӑҫӑТу качакиШывтӑканПулӑсем
Сурӑх: Роман кĕтет сире – хатĕрленĕр. Анчах астăвăр: унăн малашлăхĕ пулас шанчăк пĕчĕк. Хăвăра кăсăклантаракан ĕçпе аталанăр. Ача пирки ĕмĕтленекен çынсемшĕн ăнăçлă тапхăр ку.

Юпа, 21

1960
60
Башири Зариф, чӑваш пурнӑҫне сӑнласа панӑ, чӑваш литературине тӗпчекен тутар ҫыравҫи, сӑвӑҫи, публицисчӗ вилнӗ.
Пулӑм хуш...Пулӑм хуш...

Ыйтӑм

Чӑваш халӑх сайтӗнче цензура пулмалла-и?
Ҫук, хуть те мӗнле материала ирӗклӗн вырнаҫтармалла
Ку ыйтӑва редакци татса памалла
Паллах, пулмалла, унсӑр ӑпӑр-тапӑр япала лартма пулать!
Маншӑн ҫавах
Пулмалла, анчах виҫеллӗ
Эпир Facebook-ра 1370+
 
 
Сайт пирки | Пулӑшу | Статистика
(c) 2005-2018 Chuvash.Org
Сайтри материалсене (ытти ҫӑлкуҫсенчен илнисемсӗр пуҫне) CreativeCommons Attribution-ShareAlike 3.0 лицензипе килӗшӳллӗн усӑ курма пулать. Сайтпа ҫыхӑннӑ ыйтусене кунта ярӑр: site(a)chuvash.org