Сӗнтӗрвӑрри округӗнчи Шуршӑл ялӗнче ҫӗнӗ космонавтика музейне хӑпартас тӗлӗшпе малалла тӑрӑшаҫҫӗ. Кунти ӗҫ-пуҫ вӗресе кӑна тӑрать — объекта тума куллен 75 ҫын таран хутшӑнать.

Халӗ строительсем ҫуртӑн тӗп кӑшкарне тӑваҫҫӗ, кирпӗч хураҫҫӗ, подвалти пайри пӑрӑхсем вырнаҫтараҫҫӗ. Ҫавӑн пекех ӑшӑ, шыв пӑрӑхӗсем хатӗрлеҫҫӗ, ҫутӑ тата вентиляци енӗпе ӗҫлеҫҫӗ. Пушар хӑрушсӑрлӑхӗ тӗрӗшӗпе те тӑрӑшаҫҫӗ — шыв пухмалли 200 кублӑ икӗ пысӑк пичке вырнаҫтарма ӗлкӗрнӗ.

Ҫӗнӗ музея виҫҫӗмӗш космонавт Андриян Николаев ҫуралнӑ тӑван кӗтесре хӑпартаҫҫӗ. Вӑл республикӑшӑн питӗ пӗлтерӗшлӗ вырӑн пулса тӑрасса шанаҫҫӗ. Чӑваш Республикин Ҫурт-йӗр тӑвас ӗҫ министерствин пӗрлехи заказчик служби ҫурт-йӗре вӑхӑтра тата пахалӑхлӑ туса пӗтерес тӗлӗшпе яланах тӗрӗслесе тӑрать. Музей ӗҫлеме пуҫласан кунта туристсем татах та нумайрах килме пуҫлӗҫ.

Комсомольски округӗнче «Суперасанне» конкурс иртнӗ. Унта «Надежда» клуба ҫӳрекенсем тӗрлӗ конкурсра тупӑшнӑ. Ҫак клуба Тӗп вулавӑш ҫумӗнче йӗркеленӗ.

Конкурса хутшӑннӑ хӗрарӑмсем визит карточкине хатӗрленӗ, пултарулӑх номерне кӑтартнӑ, мӑнукӗсене тутӑр ҫыхса янӑ тата юмах каласа кӑтартнӑ. Ҫавӑн пекех асаннесем кулинари ӑсталӑхӗпе паллаштарнӑ, живопиҫе, литературӑна тата сцена ӑсталӑхне мӗнле пӗлнине кӑтартнӑ.

Суперасанне ятне Нина Яковлевна Зайцева тивӗҫнӗ. Вӑл кӑҫал 80 ҫул тултарать.

«Контактри» сӑн

Шӑмӑршӑ округӗнчи Федоровсем изумруд туя паллӑ тунӑ. Вӗсем 55 ҫул пӗрле пурӑнаҫҫӗ.

Ҫамрӑксем каҫхи шкулта паллашнӑ: Алевтина Петровна унта математика предметне вӗрентнӗ. Аграри университетне пӗтернӗ хыҫҫӑн «Правда» колхозра трактористра тата комбайнерта ӗҫлекен Федор Михайлович вара унта вӗренме пынӑ. Вӑл районти общество ӗҫне хастар хутшӑннӑ: комсомол организацийӗн секретарӗ, райкомра инструктор пулнӑ.

Алевтина Петровна Палтиелте ҫуралнӑ. Педагогика институтӗнчен вӗренсе тухсан шкулта математика предметне вӗрентнӗ.

Федоровсем 2 хӗр ҫуратса ӳстернӗ: Мария тата Вероника. Халӗ вӗсем 3 мӑнук, 1 кӗҫӗн мӑнукпа савӑнса пурӑнаҫҫӗ.

«Контактри» сӑн

Раҫҫей киноактерӗ Максим Лагашкин Ҫӗнӗ Шупашкарти тата Ҫӗмӗрлери шкул ачисемпе тӗлпулу ирттернӗ.

Ку мероприяти «Чтецкие программы» проектпа килӗшӳллӗн иртнӗ. Максим Лагашкин — актер кӑна мар, «Знание» обществӑн лекторӗ те. Ҫӗмӗрлери тата Ҫӗнӗ Шупашкарти шкул ачисем унпа хаваспах тӗл пулнӑ, унӑн лекцине тимлӗн итленӗ.

Максим Лагашкин артист артист ҫулӗ ҫине мӗнле тӑни пирки, тӗллевсемпе ӗмӗтсем патне мӗнле ӑнтӑлмаллине каласа кӑтартнӑ. Унсӑр пуҫне хӑй мӗнле кӗнекесем вулама кӑмӑлланине та асӑннӑ. Юлашкинчен актер шкул ачисем валли ӑсталӑх класӗ йӗркеленӗ.

«Контактри» сӑн

Ҫак кунсенче Улатӑрта ЗАГСра пӗрле 55 ҫул пурӑнакан Шоболовсене чысланӑ.

Борис Константиновичпа Татьяна Ивановна 1969 ҫулта паллашнӑ. Ӑнсӑртран паллашни шӑпа пӳрни пулса тӑнӑ. Майӗпен вӗсен туслӑхӗ юратӑва куҫнӑ. Ҫапла вӗсем 1971 ҫулхи нарӑс уйӑхӗнче пӗрлешнӗ. Вӗсем ывӑлпа хӗр ҫуратса ӳстернӗ. Халӗ вӗсем виҫӗ мӑнукӗпе савӑнса пурӑнаҫҫӗ.

Татьяна Ивановнӑпа Борис Константинович 20 ҫул ытла пӗр ҫӗрте ӗҫленӗ – ҫар савутӗнче тӑрӑшнӑ. Иккӗшӗ те – ӗҫ ветеранӗ.

ЗАГСра чысланӑ чухне мӑшӑр ҫӑмрӑклӑхне аса илсе Мендельсон кӗввипе киленнӗ, пӗр-пӗрне ҫӗрӗ тӑхӑнтартнӑ.

Прокуратура тунӑ сӑн

Кӑҫал юр нумай пулнӑран республикӑра ҫуртсен тӑррисем ҫине-ҫинех йӑтӑнса анчӗҫ. Хальхинче кун пекки Ҫӗрпӳ округӗнчи Кӑнар поселокӗнче пулнӑ.

Унта пуш уйӑхӗн 3-мӗшӗнче ҫӗрле ача пахчин тӑррин пӗр пайӗ ишӗлсе аннӑ. Ҫурт 1973 ҫулта тунӑскер. Ун тӑрринче юр нумай пухӑннӑ. Ҫитменнине, юрӗ нӳрӗ халӗ.

Ҫак ача пахчине 22 шӑпӑрлан ҫӳрет. Тӑрӑ йӑтӑнса аннӑран ашшӗ-амӑшне ачисене вӑхӑтлӑха урӑх шкул умӗнхи пӗлӳ учрежденине яма сӗннӗ. Вырӑнти администраци вара юсав ӗҫӗсене тума контракт алӑ пуснӑ.

Вырӑна район прокурорӗ Евгений Петров ҫитнӗ. Ҫав самант тӗлне тӑрӑран юра, пӑра тасатман пулнӑ. Халӗ тӗрӗсле пырать.

Прокуратура архивӗнчи сӑн

Хӗрлӗ Чутайра ҫурт тӑрринчен юр аннине пула виҫӗ ҫурт газсӑр тата ӑшӑсӑр тӑрса юлнӑ. Халӗ район прокуратури тӗрӗслев ирттерет. «Жилсервис Красночетайский» управляющи компанийӗнчи хӑш сотрудник ҫурт тӑрринчен юр антарма тивӗҫ пулнине тупса палӑртӗҫ.

Ку ӗнер, пуш уйӑхӗн 4-мӗшӗнче, пулса иртнӗ. Ҫурт тӑрринчен юр ансан Ленин урамӗнчи нумай хваттерлӗ виҫӗ ҫурт шар курнӑ: юр харпӑр хутса ӑшӑтмалли системӑн тӗтӗм тухмали вырӑна сиенлетнӗ, ҫавна май унта пурӑнакансем газсӑр тата ҫутӑсар юлнӑ.

Ҫуртсене тӳрех юсав ӗҫӗсене пуҫӑннӑ, хӑш-пӗр хваттерте ӗҫсене вӗҫленӗ ӗнтӗ.

Чӑваш Енӗн Ӗҫ министерствин сӑнӳкерчӗкӗ

Чӑваш Енри нумай ачаллӑ пӗр хӗрарӑм патшалӑх укҫипе ҫӗвӗ мастерскойӗ уҫнӑ.

Хӑйӗн ӗҫне хӗрарӑм темиҫе машинӑран тата ҫине тӑрса ӗҫлес килнинчен пуҫланӑ.

Шупашкарти Марина Николаева патшалӑхпа социаллӑ контракт тума май пуррине илтсен ҫав енӗпе кӑсӑкланма, кирлӗ документсене пухма пуҫланӑ.

Социаллӑ контракта пула вӑл хӑйӗн ӗҫне уҫса ҫемьене тытса тӑмалӑх укҫа ӗҫлесе илет.

Патшалӑх пулӑшнипе хӗрарӑм вӗренӳ центрӗсенчен касса ҫӗлеме вӗренсе тухнӑ. Унтан «Галия» ҫипуҫ хатӗрлес, унӑн дизайнне палӑртас ӑсталӑха хӑнӑхнӑ тата ҫӗвӗҫ енӗпе вӗреннӗ.

Социаллӑ контракт укҫипе Марина промышленность ҫӗвӗ машинисем, оверлок, пӑс генераторӗ, пусма касмалли сӗтел тата кирлӗ фурнитура туяннӑ.

Паян хӗрарӑм хӑйӗн ӗҫне ҫине тӑрсах аталантарать.

«На связи» форумри сӑн

Чӑваш Ене кураксем вӗҫсе килни пирки «Ҫыхӑнура» портал пӗлтернӗ. Вӗсене Ҫӗнӗ Шупашкар хулинче асӑрханӑ.

Портал ӗҫченӗсем кун пирки Геннадий Исаков орнитолога ӑнлантарма ыйтнӑ. «Кураксем вӗҫсе килнех пулмалла, мӗншӗн тесен хулара вӗсен йышӗ ӳснӗ. Ҫак хӗлле кунта нумай кайӑк хӗл каҫнине пӑхмасӑр. Ман шутпа, кураксем вӗҫсе килнӗ теме юрать», — тенӗ Геннадий Исаков.

Вӑл каланӑ тӑрӑх, кураксем пирӗн патра хӗлӗпех пур. Шупашкарта кӑна 100-тен сахал мар хӗл каҫаҫҫӗ. Ҫапах та хуласенче тата ялсенче курак нумай пулнине кура пӗрремӗш парти вӗҫсе килнӗ теме юрать.

Ҫӑлкуҫ: chuvashia.media

Йӗпреҫ округӗнчи Пӑва поселокӗнче культура ҫурчӗн тӑрри ишӗлсе аннӑ. Ҫак пӑтӑрмах пирки округ пуҫлӑхӗ Игорь Семенов хӑйӗн телеграм-каналӗнче пӗлтернӗ. Ку ҫурта 1937 ҫултах туса лартнӑ. Игорь Семенов палӑртнӑ тӑрӑх, ҫурт кивӗ пулин те, пӑтӑрмаха ҫавах сирӗҫ.

Округ пуҫлӑхӗ тӳрех пӑтӑрмах пулнӑ вырӑна ҫитнӗ. Унта вӑл мӗн пур служба ертӳҫисемпе канашлу ирттернӗ. Ҫак тӗлпулӑва район прокурорӗ Василий Николаев та хутшӑннӑ.

Ҫурт таврашне тӳрех картласа хунӑ. Администраци ӗҫченӗсене, библиотекарьсене тата культура ӗҫтӗшӗсене вӑхӑтлӑха урӑх ҫӗре куҫарнӑ. Вӗсене Пӑва поселокӗнчи ача пахчинчи пушӑ пӳлӗмсенче вырнаҫтарнӑ. Унта кӗмелли уйрӑм алӑк пур. Ҫавӑнпа социаллӑ учрежденисен ӗҫӗ пӗр вӑхӑтлӑха та чарӑнса тӑмӗ.

Ҫав хушӑрах ятарлӑ специалистсем культура ҫуртне тӗпчесе тухнӑ. Вӗсен пӑтӑрмах калӑпӑшне тата укҫа-тенкӗ енчен мӗн чухлӗ сиен кӳнине палӑртмалла пулӗ.