cap.ru сайтри сӑн

Чӑваш Енре пурӑнакансем этнографи диктантне ҫырма чӗнеҫҫӗ. Акци чӳк уйӑхӗн 1-8-мӗшӗсенче иртӗ.

Диктанта икӗ мелпе ҫырма пулать: ятарлӑ лапама ҫите е онлайн мелпе. Иккӗмӗш варианта суйласан национальнаяполитика.рф сайта кӗмелле.

Шупашкарта диктанта Чӑваш наци музейӗнче (чӳкӗн 1-мӗшӗнче 11 сехетре), Туслӑх ҫуртӗнче (чӳкӗн 5-мӗшӗнче 11 сехетре) ҫыртарӗҫ. Онлайн мелпе диктант ҫыракансене сертификата тӳрех параҫҫӗ. Пӗтӗмлетӗве вара раштавӑн 12-мӗшӗнче тӑвӗҫ.

Палӑртса хӑвармалла: пӗлтӗр акцие Чӑваш Енре пурӑнакан 26 649 ҫын хутшӑннӑ.

petkrep.ru сайтри сӑн

Ҫӗрпӳ округӗнчи хӗрарӑм сывлӑхӗ хавшасан ӑрӑмҫӑ патне кайнӑ та шар курнӑ, аяк пӗрчине хуҫнӑ. Кайран вӑл ҫав ӑрӑмҫӑран суд урлӑ 100 пин тенкӗ шыраса илнӗ.

Ку 2024 ҫулхи ҫурла уйӑхӗнче пулнӑ. Сеансра ӑрӑмҫӑ унӑн ҫурӑмӗ тӑрӑх утма, аякран аяк ҫине ҫавӑрма тытӑннӑ. Хӗрарӑм темӗн ыратнине туйсан чарӑнма ыйтнӑ. Унтан сеансшӑн укҫа тӳленӗ те тухса кайнӑ.

Каярахпа пульницӑра вӑл аяк пӗрчи хуҫӑлнине пӗлнӗ. Судра ӑрӑмҫӑ айӑпне йышӑнман. Ҫапах суд хӗрарӑм енче пулнӑ.

«Контактри» сӑн

Вӑрнар округӗнчи Кивҫурт Енӗш ялне белоруссем килнӗ. Ахальтен мар. Ку ялта Совет Союзӗн Паттӑрӗ Степан Илларионов ҫуралса ӳснӗ. Ӑна Беларуҫри Бешенкович районӗнчи Галыни ялӗнче тӑванлӑх масарӗ ҫинче пытарнӑ. Ҫакӑ ҫыхӑнтарать икӗ яла.

Белоруссем Паттӑрӑн ятне асра татса Астӑвӑм скверӗнче чечек хунӑ, ҫавӑн пекех Степан Илларионовичӑн музей-ҫуртне кӗрсе курнӑ.

uslugi.yandex.ru сайтри сӑн

13 ҫулти арҫын ача самокат арендӑна илнӗ те ӑна сӳтнӗ, пайӗсене вӑрманта пытарнӑ.

Арҫын ача ӑна малтан подъездра тытнӑ, кайран, хӑраса ӳксен, вӑрмана илсе кайнӑ.

Вӑл электросамоката ашшӗн даннӑйӗсемпе тара илнӗ. Хуҫи, кикшеринг компанийӗн пуҫлӑхӗ, самокат ҫухалсан полицие пынӑ. Вӑрра тӳрех тупнӑ. Ӑна шута илнӗ.

Халӑх тӗтелӗсенче Кӳкеҫри «Крепыш» ача пахчинчи видео сарӑлма тытӑннӑ. Унта физкультура инструкторӗ ачасене алӑран кӑнттаммӑн тытса сӗтӗрни курӑнать.

Кун пекки унта пӗрре кӑна мар пулнӑ иккен. Видео ҫинче ку хӑш кун пулса иртнисем паллӑ.

Шупашкар районӗн прокуратури ҫак тӗслӗх тӗлӗшпе тӗрӗслев пуҫарнӑ. Ку ӗҫе вырӑнти хӑйтытӑмлӑх тата йӗрке органӗсене те явӑҫтараҫҫӗ.

yaltch.cap.ru сӑнӳкерчӗкӗ

Елчӗкре ҫемье кафи уҫнӑ. Кун пирки вырӑнти муниципалитет сайтӗнче хавхаланса та хавасланса пӗлтернӗ. Мӗншӗн тесен ҫав вырӑн ҫынсем валли канма тата тӗл пулма кӑмӑллӑ вырӑн пулса тӑрасса шанаҫҫӗ.

Обществӑлла апатланӑвӑн ҫӗнӗ заведенийӗ уҫӑлни ачасемпе ҫемьесемшӗн питех те лайӑх тесе шухӑшлаҫҫӗ. Кафере харӑсах 80 ҫын апатланма пултарать. Интерьер хӑтлӑ та килти евӗр-мӗн.

Муниципалитет тӑрӑхӗн пуҫлӑхӗ Леонард Левый Алексей Александров усламҫа кафе уҫнӑ ятпа саламланӑ май хӑй пырса ҫитнӗ.

forum.na-svyazi.ru сайтра вырнаҫтарнӑ сӑнӳкерчӗк

Чӑваш Енре 88 автобус туянма палӑртнӑ, ҫав шутран ҫурри пӗчӗк класлисем.

Ӗнер Чӑваш Енӗн Транспорт министерстви Чӑваш транспорт управленийӗ лизингпа 33 автобус тата 10 троллейбус туянма хатӗрленни пирки пӗлтернӗ. Халӗ республикӑн Правительствинче пысӑк класлӑ 10 автобус кӑҫал туянассине пӗлтернӗ, 2025-2026 ҫулсенче пӗчӗк класлӑ 45 автобус тата ватам класлӑ 33 автобус илесшӗн. Ун валли пурӗ 1,87 миллиард тенкӗ уйӑрма палӑртнӑ, ҫав шутран 1,3 миллиардне республика хыснинчен, ыттине — хысна мар ҫӑлкуҫран.

Ҫӗнӗ транспорт Шупашкарпа Ҫӗне Шупашкарта ӗҫлӗ.

раження й ві stock.adobe.com сайтри сӑн

Ҫитес ҫултан Чӑваш Енре яла ӗҫлеме каякан тренерсене хавхалантарма тытӑнӗҫ: вӗсене 1 миллион тенкӗ парӗҫ.

2026 ҫултан Чӑваш Енре «Земство тренерӗ» программ ӗҫлеме пуҫлӗ. Унпа килӗшӳллӗн, 50 пин ҫынран сахалрах пурӑнакан ял-салана ӗҫлеме каякан тренерсене патшалӑх 1 миллион тенкӗ парӗ.

Ку программӑпа усӑ курас тесен условисем пур: тренерӑн физкультурӑпа спорт енӗпе аслӑ е вӑтам професси пӗлӗвӗ пулмалла. Юлашки курсра вӗренекен студентсем те вӗренӳ заведенийӗ ходатайство тунипе ку программӑпа килӗшӳллӗн яла ӗҫлеме каймашкӑн пултараҫҫӗ. 1 миллион тенке илнӗ специалистӑн ялта сахалтан та 5 ҫул ӗҫлеме тивӗ.

culture.ru сайтри сӑн

Чӑваш Енре нумай ҫемьеллӗ ачасене 300 пин тенкӗ парӗҫ. Ӑна виҫҫӗмӗш е ун хыҫҫӑнхи ачасем ҫуралсан тивӗҫӗҫ. Ку 2025 ҫулхи кӑрлачӑн 1-мӗшӗ хыҫҫӑн ҫуралнӑ ачасене пырса тивет.

Ку пулӑшӑва сахал тупашлӑ ҫемьесем, ашшӗ-амӑшӗ 35 ҫултан иртмен пулсан, тивӗҫме пултарӗҫ.

Ку йышӑвнӑва паян ЧР Министрсен Кабинечӗн ларӑвӗнче ҫирӗплетнӗ. Вӑл 2025-2028 ҫулсенче вӑйра пулӗ. Кӑҫал 300 ҫемьене пулӑшма палӑртнӑ, ку тӗллевпе 30 миллион тенкӗ пӑхса хунӑ.

tv.pgtrk.com сайтри сӑн

Преступленисен йышӗ чакнӑ, анчах вӑрланӑ укҫа хисепӗ ӳснӗ. Ҫапла пӗлтерет республика прокуратури.

Кӑҫал 9 уйӑхра Чӑваш Енре пурӑнакансем ултавҫасене 780 миллион ытла тенкӗ куҫарса панӑ. Шел те, кунашкал преступленисене уҫӑмлатас шанчӑк пӗчӗк, мӗншӗн тесен чылай чухне палламан ҫынсем ют ҫӗршывсенчен шӑнкӑравлаҫҫӗ.

Хальхи вӑхӑтра дропперсем (ултавҫӑсем ҫак ҫынсем урлӑ ӗҫлеҫҫӗ) тӗлӗшпе суда тавӑҫсем тӑратаҫҫӗ. Паянхи кун 219 ӗҫ (пӗтӗмпе 61,5 млн тенкӗ шыраса илме) пӑхса тухасса кӗтет.