Мускаври Борис Щукин ячӗллӗ театр институчӗ килес ҫул тата тепӗр ултӑ ҫамрӑка вӗренме илме хатӗр иккен. Кун пирки Чӑваш патшалӑх академи драма театрӗ халӑх тетелӗнчи хӑйӗн пабликӗнче пӗлтернӗ.
«Чӑваш патшалӑх академи драма театрӗ сцена ӳнерне юратакан пултаруллӑ яш-кӗрӗме суйласа илсе хатӗрленӳ курсӗ уҫасшӑн. Ҫут ҫанталӑк панӑ тивлете сӳнме ан парӑр, хӗрсемпе каччӑсем, конкурса хутшӑнӑр! Ку — сире шӑпа пӳрнӗ телей!» — хыпарланӑ театрӑн пресс-служби.
Актер факультетӗнче вӗренекенсем общежитире тӳлевсӗр пурӑнӗҫ. Унтан вӗренсе тухсан вӗсене Чӑваш патшалӑх академи драма театрне ӗҫлеме илӗҫ.
Вӗренме кӗрес ӗмӗтлисен 16-21 ҫулсенче пулмалла, чӑвашла пӗлмелле.
Вӗсене театрта авӑн уйӑхӗн 25-мӗшӗнче 14 сехетре тата 28-мӗшӗнче 11 сехетре итлесе пӑхӗҫ. Унта сӑвӑ, халап, монолог, юрӑ вӗренсе каймалла. Мӗнпур хайлав чӑвашла пулмалла.
Тӗплӗнрех ыйтса пӗлес тесен тата итлеве ҫырӑнма 8 (8352) 62-02-21 телефонпа тунтикунтан пуҫласа эрнекун каҫчен, ирхи 9 сехетрен 17 сехетчен, шӑнкӑравламалла.
Ку хайлав Лидия Филиппова журналист-ҫыравҫӑн хӑйӗн ентешне – Ҫеҫпӗл Мишши поэта – халалласа ҫырнӑ иккӗмӗш поэми ӗнтӗ. Пӗрремӗшӗ 2022 ҫулта «Хальхи самана» («Век нынешний») ятпа кун ҫути курнӑ.
Ҫӗнӗ поэмӑна тӑван чӗлхепе пӗрлех вырӑсла (куҫаруҫи Любовь Петрова), акӑлчанла (Надежда Колесникова), украинла (Надежда Лисовая) тата марилле (Дина Рычкова) тӗрӗс тата илемлӗ куҫарма пултарнӑ. Ҫакӑ вулакансен йышне тата та ӳстерме май парать. Сӑмах май, вырӑсла тата акӑлчанла куҫару варианчӗсем виҫҫӗ таранах пулса кайнӑ иккен. Ҫавӑнпа вӗсене уйрӑм кӗнекен кӑларас шухӑш пуррине те пӗлтерчӗ Лидия Ивановна.
Поэмӑра автор Ҫеҫпӗл Мишшин пурнӑҫӗпе пултарулӑхӗн ҫулӗпе утать, Шӑхасанта, Теччӗре, Хусанта, Мускавра, Евпаторире, Харьковра, Киевра, Остерта «пулать», унӑн шӑпине, чун ыратӑвӗне тата хастарлӑхне ӑнланма тӑрӑшать.
«Ҫеҫпӗл йӗрӗпе» поэма - чӑваш литературин хаклӑ еткерӗ пулса тӑчӗ. Вӑл вулакансене Ҫеҫпӗл Мишшин таланчӗпе ҫывӑхрах паллашма, унӑн сӑввисене тарӑнрах ӑнланма хистет.
Поэма хӑйӗн илемӗпе тата шухӑш тарӑнӑшӗпе тыткӑнлать. Лидия Филиппова сӑвӑ йӗркисемпе Ҫеҫпӗл Мишшин чунне уҫса парать, унӑн пурнӑҫ ҫулӗнчи йывӑрлӑхсене, ӗмӗт-шухӑшӗсене вулакан патне ҫитерет.
Ӗнер, авӑн уйӑхӗн 7-мӗшӗнче, Чӑваш патшалӑх оперӑпа балет театрӗ хӑйӗн ҫӗнӗ сезонне Мускаври Е.В. Колобов ячӗллӗ «Ҫӗнӗ опера» театр сцени ҫинче уҫнӑ. Унта Музыка театрӗсен «Видеть музыку» X фестивалӗ иртет иккен.
Шупашкарти театр 65-мӗш юбилей сезонӗнчи А. Петровӑн «Мы хотим танцевать» музыка камитне кӑтартнӑ.
Мускавра пилотсӑр ҫӳрекен трамвайсем пуҫласа ҫула тухнӑ. Вӗсем 10-мӗш маршрутпа, «Щукинская» метро чарӑнуран пуҫласа Таллин урамӗ пуҫланнӑ ҫӗре ҫитеҫҫӗ.
Проектшӑн яваплисем ӗнентернӗ тӑрӑх, пилотсӑр трамвай чарӑнӑва аякранах тата таҫтанах курать, алӑк уҫмаллине, чарӑнмаллине, хӑвӑртлӑха ӳстерсе чакармаллине тата ыттине самантрах ӑнланса илет. Вӑл ҫул-йӗр правилине пӑхӑнать. Маршрута сантиметр таран пӗлет.
Шупашкарти Иван Смелов ТНТпа кӑтартакан «Погоня» экстремаллӑ шоура ҫӗнтернӗ. Вӑл пӗрремӗш вырӑна Никита Джигурдапа пайланӑ.
Иван шоуна камит каҫӗнче сцена ҫине тухнӑ хыҫҫӑн лекнӗ – кастинг-директор видеовизитка хатӗрлеме сӗннӗ. Ҫапла вӑл суйлав витӗр тухнӑ.
Иван палӑртнӑ тӑрӑх, уйрӑмах Никита Джигурдапа калаҫни унӑн асӗнче юлнӑ. Шоура вӑл 457,5 пин тенкӗ выляса илнӗ. Ку укҫапа ҫемйипе тинӗс хӗррине кайма планланӑ.
Палӑртса хӑварар: хальхи вӑхӑтра Иван Мускавра пурӑнать, Шупашкара тӑтӑшах килсе ҫӳрет.
Мускавра, Федераци Канашӗнче, «Семья года» (чӑв. Ҫулталӑк ҫемйи) пӗтӗм Раҫҫейри конкурсӑн йӗркелӳ комитечӗн ларӑвӗ иртнӗ.
Унта «Золотая семья» (чӑв. Ылтӑн ҫемье) номинаци те пур. Унпа 30 ҫул ытла пурӑннӑ мӑшӑрсене чыслаҫҫӗ.
Ку номинацире саккӑр ҫемье палӑрнӑ. Улттӑмӗш вырӑна Шупашкарти Тихоновсем йышӑннӑ.
Иван Александрович тата Валентина Евгеньевна Тихоновсем 32 ҫул пӗрле пурӑнаҫҫӗ. Икӗ хӗрпе виҫӗ ывӑл ҫуратса ӳстернӗ. Кил хуҫи, Иван Александрович, Шӑмӑршӑ районӗнче ҫуралнӑ, Вӑрнарти ял хуҫалӑх техникумӗнчен вӗренсе тухнӑ. Ӗмӗрне тӑван тӑрӑхра ӗҫлесе ирттернӗ. Унӑн мӑшӑрӗ. Шупашкар районӗнче ҫуралнӑ Валентина Евгеньевна та, ҫав заведенире вӗреннӗ. Халӗ Шупашкарти 1-мӗш клиника пульницинче ӗҫлет.
23 ҫулти каччӑ «каҫхи лӗпӗшпе» ҫӗр каҫма шутланӑ та 1 миллион та 300 пин тенкӗсӗр юлнӑ.
Ҫурла уйӑхӗн 23-мӗшӗнче Мускавран Шупашкара килнӗ программист интернет-сайтра ҫӑмӑлттай хӗр шыранӑ, анчах вӑл ултавҫӑсен тӗлне лекнӗ.
Ҫав ҫынсем Шупашкара килнӗ хӑнана икӗ кун улталаса тӑнӑ. Темӗн те пӗр шутласа кӑларса тӗлпулушӑн, таксишӗн укҫа куҫарттарнӑ. Ҫапла ҫӑмӑлттай хӗр кӗтекен йӗкӗт мӗн пур укҫине ултавҫа куҫарса панӑ.
Ку ӗҫ тӗлӗшпе пуҫиле ӗҫ пуҫарнӑ.
Мускаври Пӗчӗк театр артисчӗ тата актёр Владимир Тяптушкин К.В. Иванов ячӗллӗ Чӑваш патшалӑх академи драма театрӗнче хӑнара пулнӑ. Вӑл унта виҫҫӗмӗш хут килнӗ. Артистсем ӑна ҫӑкӑр-тӑварпа кӗтсе илнӗ.
«Ҫӗнӗ тата лайӑх спектакльсем лартма, «Ылтӑн маска» ҫӗнсе илме сунатӑп», — тенӗ Владимир Тяптушкин чӑваш артисчӗсене.
Палӑртмалла: вӑл Елчӗк районӗнчи Аслӑ Таяпа ялӗнче ҫуралнӑ. Ӑна «Склифософский» сериалта ӳкерӗннипе те пӗлеҫҫӗ.
Ҫурла уйӑхӗн 9-мӗшӗнче Мускавра славян ӳнерӗн «Русское поле» (чӑв. Вырӑс уйӗ) регионсем хушшинчи фестивалӗ иртнӗ. Унта чӑваш юррин «Парне» ансамблӗ хутшӑннӑ. Пӗтӗмпе вара Мускавра 62 регионти 1,5 пин артист пулнӑ.
Халӑх пултарулӑхӗн ҫурчӗн коллективӗ «Чи лайӑх хор коллективӗ» номинацире палӑрса «За сохранение региональных певческих традиций» (чӑв. Регионти юрӑ йӑла-йӗркине упраса хӑварнӑшӑн) ятарлӑ премие тивӗҫнӗ.
Коллектив ертӳҫи — Светлана Тяхмусова.
Чӑваш Енӗн маунтинбайк енӗпе пӗрлештернӗ команди Раҫҫейри ҫамрӑксен спартакиадинче ылтӑн медаль ҫӗнсе илнӗ.
Вӗсем ҫӗршыври 13 командӑна парӑнтарса пьедесталӑн чи ҫӳлти картлашки ҫине хӑпарнӑ. Иккӗмӗш вырӑна Мускав облаҫӗн команди тухнӑ. Виҫҫӗмӗш вырӑна вара Мусаври спортсменӗсем йышӑннӑ.
Командӑран уйрӑмах ҫак спортсменсене палӑртмалла: кросс-кантрире 21 ҫухрӑма парӑнтарса ылтӑн медаль ҫӗнсе илнӗ Элина Семенова тата пӑхӑр медале тивӗҫнӗ Алина Карлова, 25 ҫухрӑмлӑ дистанцире 6-мӗш вырӑн йышӑннӑ Никита Петров.
+7.3 °C