Ҫурла уйӑхӗ вӗҫлениччен Хусанпа Мускав хушшинче хушма пуйӑс ҫӳрӗ. Ку йӑлтах - ҫулҫӳревҫӗсемшӗн меллӗ пултӑр тесе.
Ҫул ҫинче вӑл Владимир, Дзержинск, Чулхула, Канаш хулисенче, Вӑрмар поселокӗнче тата Симӗс Долта чарӑнӗ.
Пуйӑс Мускаври Ярославль вокзалӗнчен утӑ уйӑхӗн 25, 28-мӗшӗсенче, ҫурла уйӑхӗн 1, 4, 8, 11, 15, 18, 22, 25, 29-мӗшӗсенче 21 сехет 15 минутра тапранса кайӗ. Хусана тепӗр кун 12 сехет те 54 минутра ҫитӗ.
Пӗтӗм Раҫҫейри "Шкул умӗнхи чи лайӑх вӗренӳ организацийӗ" конкурса пӗтӗмлетнӗ. Вӑл Питӗр хулинче иртнӗ.
Конкурсра Шупашкарти ача пахчисем те малти вырӑнсене йышӑннине палӑртма кӑмӑллӑ. Тӗп хулари 11-мӗш, 15-мӗш, 19-мӗш, 162-мӗш, 182-мӗш ача пахчисем чи лайӑххисен йышне кӗрсе диплома тата медале тивӗҫнӗ.
Чӑваш халӑх артистки Елена Иовлева паян тин кӑна "Россия 1" телеканалпа эфира тухнӑ "Песни от всей души" кӑларӑмра пулнӑ. Ӑна Андрей Малахов ертсе пырать.
Вӑл "Финн полькине" чӑвашла куҫарнӑ, ӑна эфирта куракансен умӗнче юрланӑ. Ҫавӑн пекех Елена Иовлева ташласа та кӑтартнӑ. Вӑл куракансене хӑйӗн пурнӑҫӗпе кӗскен паллаштарнӑ.
РФ Ӗҫлев министерстви 2024 ҫулта мӗнле кантарасси пирки йышӑну проектне хатӗрленӗ.
Ҫӗнӗ ҫулти каникул раштавӑн 30-мӗшӗнче пуҫланса карлачӑн 8-мӗшӗнче вӗҫленӗ. Нарӑсӑн 23-мӗшӗ – эрнекун, ҫапла 3 кун канӑпӑр. Пушӑн 8-мӗшӗ те эрнекуна лекет, 3 кун ӗҫлеме тивмӗ.
Ака уйӑхӗнче юлашки эрне 6 ӗҫ кунӗллӗ пулӗ. Ҫапла ҫу уйӑхӗн 1-мӗшӗнчи уявра 4 кун кантарӗҫ. Ҫӗнтерӳ кунӗнче 4 кун ӗҫлемелле мар.
Ҫӗртмен 12-мӗшӗ – юнкун, 1 кун канмалла. 6 ӗҫ кунӗллӗ эрне чӳк пуҫламӑшӗнче пулӗ. Чӳкӗн 3-4-мӗшӗсем – кану кунӗсем.
Раштав уйӑхӗнче 29-31-мӗшӗсенче канӑпӑр.
Раҫҫей Почти чӑвашсене ҫутта кӑларнӑ Иван Яковлев ҫуралнӑранпа 175 ҫул ҫитнине халалласа конверт кӑларнӑ. Кӗҫех вӗсем сутлӑха тухмалла.
Конверт ҫине Иван Яковлев сӑнне тата «Букварь для чувашъ с присоединением русской азбуки» кӗнеке хуплашкине сӑнланӑ.
Сӑмах май, 2021 ҫулта Раҫҫей почти Сӑр тата Хусан хӳтӗлев чиккисене чавнӑ ҫынсене халалланӑ конвертсем кӑларнӑ.
Пӗчӗк хуласенче тата истори пӗлтерӗшлӗ тӑрӑхсенче хӑтлӑх кӗртме пулӑшакан Пӗтӗм Раҫҫейри конкурса кӑҫал Чӑваш Енри икӗ хула хутшӑнӗ: Канаш тата Сӗнтӗрвӑрри.
Канашри проектра чукун ҫул вокзалӗ тата автовокзал хушшинчи территорие хӑтлӑх кӗртме сӗннӗ. Унта информаци стенчӗ, ярмӑрккӑ лапамӗ, кафе пулмалла.
Сӗнтӗрвӑрринче вара "Патша тӑвӗ" проекта пурнӑҫласшӑн. Проектра палӑртнӑ тӑрӑх, Атӑл хӗррине ҫав ту таранах илем кӗртесшӗн.
Заявкӑсене ҫӗртме уйӑхӗн 1-мӗшӗччен йышӑнаҫҫӗ. Конкурса ҫурла уйӑхӗнче пӗтӗмлетӗҫ.
"Раҫҫей 1" телеканалпа пыракан "Песни от всей души" кӑларӑма пирӗн ентеш Евгений Суханов хутшӑнӗ. Ӑна эфирта ыран, ҫу уйӑхӗн 21-мӗшӗнче, 18 сехетре курма май пулӗ.
Сӑмах май, кӑларӑма хутшӑнкансем пысӑк сӗтел хушшине пухӑнаҫҫӗ, пултарулӑхӗ, ӗмӗчӗсем пирки калаҫаҫҫӗ. Ҫав хушӑрах вӗсем халӑх юррисене тата хитсене шӑрантараҫҫӗ.
Палӑртмалла: Евгений Суханов - Улатӑр хулинчен.
Ҫу уйӑхӗн 12-мӗшӗнче Мускаври «Хӗвелтухӑҫ» станцире «Аслӑ Ҫӗнтерӳ сӑнӗсем» экспозици уҫӑлӗ. Унта Совет Союзӗн 70 Паттӑрӗ кӗрӗ. Ҫав шутра пирӗн ентеш Агриппина Алексеевна Янович та пулӗ. Вӑл 98 ҫулта.
Агриппина Алексеевна – Элӗк районӗнчи Тури Татмӑш ялӗнчен. 17 ҫулта чухне ӑна Троцк хулине мобилизациленӗ, унта медсестрана вӗреннӗ.
Ҫӗнтерӗве вӑл Кенигсбергра кӗтсе илнӗ. Ӑна «Ҫапӑҫура кӑтартнӑшӑн» медальпе чысланӑ.
Ӗнер "Раҫҫей 1" телеканалта эфира тухнӑ "Сто к одному" кӑларӑма Ҫӗнӗ Шупашкарти вӗрентекенсем хутшӑннӑ. Вӗсем "Йошкар-Ола" командӑра кӗрешнӗ.
Пирӗн ентешсем, Ҫӗнӗ Шупашкарти лицейри вӗрентекенсем, кӳршӗ республикӑри хаҫат ӗҫченӗсене 312:264 шутпа ҫӗнтернӗ.
Чӑвашсен федераци наци культурин автономине малашне Леонид Черкесов мар, Раҫҫей Геройӗ, Чӑваш Енӗн хисеплӗ ҫынни Николай Гаврилов ертсе пырӗ. Ҫӗнӗ ҫынна Шупашкарта иртнӗ отчетпа суйлав съездӗнче палӑртнӑ.
Леонид Черкесов автономие 2017 ҫултанпа ертсе пынӑ. Унччен ку должноҫра Геннадий Федоров пулнӑ.
Палӑртмалла: Чӑваш Ен тулашӗнче 300 пин ытла чӑваш пурӑнать.
+17.3 °C