Ку уйӑхра эрнере пилӗк кун ӗҫлекенсен вӑраха тӑсӑлакан канмалли кунсем пулӗҫ. Вӑл Тӑван ҫӗршыв хӳтӗлевҫин кунӗпе ҫыхӑннӑ.
Уяв кӑҫал эрнекуна лекет. Ҫапла майпа эрнекунран вырсарникунччен, нарӑс уйӑхӗн 23-25-мӗшӗсенче, канӑпӑр. Уяв умӗнхи ӗҫ кунӗ, нарӑсӑн 22-мӗшӗ, кӗске пулӗ – киле 1 сехет маларах кайма юрать.
Пуш уйӑхӗнче те ҫавӑн пекех кану кунӗсем пулӗҫ. Ун чухне 8-10-мӗшӗсенче, эрнекунран пуҫласа вырсарникунччен, кантарӗҫ.
Ырантан, нарӑс уйӑхӗн 1-мӗшӗнчен, Раҫҫейре амӑшӗн капиталӗн виҫи ӳсет. Ӑна 7,4 процент таран индексаци тӑвӗҫ.
Амӑшӗн капиталне 2020 ҫултанпа пӗрремӗш ачашӑн та пама пуҫланӑ. Нарӑсӑн 1-мӗшӗнчен вӑл 630,4 пин тенкӗ пулӗ /халӗ – 586,9 пин тенкӗ/. Иккӗмӗш ачашӑн вара 834 пин тенкӗ парӗҫ /халӗ 775,6 пин тенкӗ/.
Пӗрремӗш ачашӑн амӑшӗн капиталне илнӗ тӗк иккӗмӗш ача ҫуралсан 202,6 пин тенкӗ тӳлӗҫ.
РФ Патшалӑх Думин депутачӗсем нумай ҫул пурӑнакан мӑшӑра, ҫавра ҫул тӗлне, преми пама сӗннӗ. Ку тӗллевпе саккун проектне хатӗрленӗ.
Документра палӑртнӑ тӑрӑх, 20 ҫул пурӑнакан мӑшӑра – 20 пин, 25 ҫул пурӑнакансене – 25 пин, 70 ҫул кун кунлакансене 70 пин тенкӗ парасшӑн. Анчах ҫак тапхӑрта мӑшӑрӑн уйрӑлмалла мар.
Юбилей ҫулӗнче мӑшӑртан пӗри вилнӗ пулсан премие пӗри илме пултарать. Заявление юбилей пулнӑ хыҫҫӑн икӗ уйӑх иртиччен памалла. Саккуна ырласан вӑл утӑ уйӑхӗн 1-мӗшӗнчен вӑйра пулӗ.
Чӑваш Енри Семеновсен ҫемйи Мускава «Раҫҫей» курав-форума каяссине пӗлтернӗччӗ. Ӗнер унта «Тӑвансем - юратнӑскерсем» форумӑн юлашки кунӗ пулнӑ. Унта РФ Президенчӗ Владимир Путин килсе Раҫҫейри Ҫемье ҫулталӑкне уҫнӑ.
Семеновсем форумра пирӗн регионпа паллаштарнӑ, Чӑваш Енри паллӑ вырӑнсем пирки каласа кӑтартнӑ. Вӗсене ятарлӑ парнепе хавхалантарнӑ.
Аса илтерер: Николайпа Алевтина 5 ачана воспитани параҫҫӗ.
РФ Президенчӗ Владимир Путин «Ялти учитель» программӑна 2030 ҫулччен тӑсма йышӑннӑ.
Аса илтерер: чылай регионта ҫак программӑпа усӑ куракансене 1 миллион тенкӗ параҫҫӗ, Инҫет Хӗвелтухӑҫӗнче - 2 миллион тенкӗ. Ку укҫапа кирек мӗнле те усӑ курма пулать. Ялти тухтӑр программӑпа 55 ҫула ҫитменнисем усӑ курма пултараҫҫӗ. Вӗсен ялта 5 ҫул ӗҫлемелле.
Раҫҫее Турцирен, Азербайджанран ҫӑмарта кӳрсе килеҫҫӗ. Вӗсем хамӑрӑннинчен йӳнӗрех, анчах тутипе пирӗнни пек мар, урӑхларах. Ҫакна техника ӑслӑлӑхӗсен докторӗ Александр Ишевский «Лента.ру» сайта каласа кӑтартнӑ.
Вӑл каланӑ тӑрӑх, усӑлӑхӗ тӗлӗшпе вӗсен уйрӑмлӑх ҫук. Анчах ҫӑмарта хӑй те, тути те расна пулнине асӑрхамасӑр хӑвараймӑн. Пӗрремӗшӗнчен, сарри тӗлӗнтерме пултарать: шупка е ытла сарӑ. Унӑн тути те хӑйне евӗр. Ку чӑхсене мӗнпе тӑрантарнинчен килет. Тӗслӗхрен, пулӑ йышши апат ҫитернӗ тӗк ҫӑмартана пӗҫерсен те пулӑ тути пур.
Ют ҫӗршывсенчи ҫӑмарта калӑпӑшӗпе те расна, ҫавӑнпа вӗсене категорие уйӑрмасан та пултараҫҫӗ.
Кӑрлач уйӑхӗн 5-мӗшӗнче Раҫҫее Турцирен 19 тонна ҫӑмарта кӳрсе килнӗ. Пӗтӗмпе - 316800 ҫӑмарта. Ку - иккӗмӗш парти. Пӗрремӗш партие кӑрлачӑн 3-мӗшӗнче кӳрсе килнӗ. Ун чухне те ҫавӑн чухлех тонна пулнӑ.
Турцирен кӳрсе килсе Раҫҫейри лавккасенче ҫӑмарта хакне чакарасшӑн тата дефицита пӗтересшӗн. Ҫӑмартана чикӗ леш енчен илсе килнӗ чухне унра сиенлӗ тата усӑ курма юраман япаласем пуррипе ҫуккине тӗрӗслеҫҫӗ.
Аса илтерер: юлашки вӑхӑтра Раҫҫейри лавккасенче ҫӑмарта хакӗ палӑрмаллах ӳснӗ.
Кӑрлачӑн 4-мӗшӗнче Мускаври ВДНХра иртекен «Раҫҫей» курав-форумра Аркадий Иринӑна качча тухма ыйтнӑ. Каччӑ - Мускавран, Чӑваш Енри аслӑ шкулта вӗреннӗ, хӗр - Шупашкартан. Вӗсем ЧР Экономика министерствинче ӗҫленӗ чухне паллашнӑ.
Каччӑ хӗре ахальтен мар ҫак вырӑнта ылтӑн ҫӗрӗ тӑхӑнтартса мӑшӑрӗ пулма ыйтнӑ. Мӗншӗн тесен шӑпах вӗсем ӗҫлекен пай хальхи вӑхӑтра экспозицие хутшӑнать.
Кӑрлач уйӑхӗн 1-мӗшӗнчен РФ Патшалӑх Думин депутачӗсен хамӑр ҫӗршывра туса кӑларнӑ машинӑсемпе ҫӳреме пуҫламалла. Унсӑрӑн Патшалӑх Думи вӗсене бензин расхучӗшӗн тӳлеме пӑрахӗ.
«Известия» хаҫат пӗлтернӗ тӑрӑх, ҫитес ҫултан иномаркӑпа ҫӳрекен депутатсенчен бензин расхучӗшӗн илмелли документсене йышӑнма пӑрахӗҫ. Анчах РФ Промышленноҫ министерстви списокра хӑш-пӗр иномарка маркисене хӑварӗ.
Раҫҫейре ҫӑмарта хакланни пирки унччен пӗлтернӗччӗ. «Amur.life» сайт хыпарланӑ тӑрӑх, хӑш-пӗр регионта ӑна пӗрер сутма пуҫланӑ.
Паянхи кун Крымра пӗр теҫетке ҫӑмарта 200 тенкӗ тӑрать. Ытла хаклӑ пулнӑран ӑна пӗрер сутаҫҫӗ, пӗри 20 тенкӗ тӑрать. Эренпурпа Новосибирскра пӗр ҫӑмартана 11,5 тенкӗпе сутаҫҫӗ.
Аналитиксемпе тӗрлӗ тӗрӗслев органӗсем каланӑ тӑрӑх, ҫӑмарта хакӗ кайӑк-кӗшӗк грипне, электроэнерги хакланнине пула ӳснӗ.
+17.3 °C