Пӗрре ирхине Ҫӗнӗ Шупашкарта хӗрача амӑшне вӑратнӑ: вӑл хӑйне япӑх туять-мӗн, хӑстарать. Хӗрарӑм пӳртре газ шӑрши кӗнине туйнӑ. Аялти хутра ҫывӑракан тепӗр 5 ачи те газпа наркӑмӑшланма пултарнине тӳрех шутласа илнӗ.
Чи малтан вӑл васкавлӑ медпулӑшу чӗннӗ. Хӗрарӑм тухтӑрсем ҫитиччен пӗтӗм чӳречене уҫнӑ. Анчах 4-14 ҫулсенчи хӗрачасем пурпӗрех газ сывласа ӗлкӗрнӗ. Вӗсен сывлӑхӗ йывӑр пулнӑ. Пӗррери хӗрача ыттисенчен сахалрах сиенленнӗ.
Халӗ ачасем хӑйсене лайӑхах туяҫҫӗ, Республикӑри ача-пӑча клиника пульницинче сипленеҫҫӗ.
Шупашкар районӗнчи арҫын ачисемшӗн алимент тӳлемен. Халь унӑн куншӑн ҫур ҫул патшалӑха ӗҫлесе татма тивӗ. Унӑн шалӑвӗн 5 процентне патшалӑх валли тытса юлӗҫ. Ҫапла йышӑннӑ суд.
Арҫын икӗ ачишӗн алимент тӳлесе пыманнипе малтан административлӑ майпа явап тытнӑ. Кайран та вӑл тӳрӗ ҫул ҫине тӑман. Ҫапла унӑн алимент парӑмӗ 1,3 миллион тенкӗ пухӑннӑ.
Паян, ака уйӑхӗн 26-мӗшӗнче, Чулхула облаҫӗнчи Лысково районӗнче пулнӑ аварире 7 ҫын шар курнӑ. Шел те, вӗсенчен виҫҫӗшӗ вилнӗ. Иккӗшӗ – Чӑваш Енри хӗрарӑмпа ача.
«Лада» водителӗ тата «Киа» пассажирӗ авари вырӑнӗнчех сывлама пӑрахнӑ. 7 ҫулти арҫын ача вара пульницӑра вилнӗ. Ҫавӑн пекех Чӑваш Енри тепӗр ача тата икӗ арҫын аманнӑ. Вӗсем Чулхулари клиникӑра сипленӗҫ.
Патӑрьел районӗнчи пӗр ялта 12 ҫулти хӗрача тарзанка ҫинче ярӑнса ӳкнӗ те тӑнне ҫухатнӑ. Юрать, ҫав вӑхӑтра Республикӑри катастрофа медицинисен центрӗн ӗҫченӗ Дина Якупова иртсе пынӑ. Вӑл хӗрача ӳкнине курнӑ. Ача ҫӗр ҫинче хускалмасӑр выртнӑ. Хайхискер икӗ минутлӑха тӑнне ҫухатнӑ.
Дина Якупова хӗрача патне чупса пынӑ, тӳрех васкавлӑ медпулӑшу чӗннӗ. Ҫав вӑхӑтра вӑл ачан сывлӑхне тӗрӗслесе тӑнӑ. Фельдшерсем хӗрачана Республикӑри ача-пӑча клиника пульницине ӑсатнӑ.
И.Я. Яковлев калавӗсем тӑрӑх хатӗрленӗ инсценировкӑсен конкурсӗ иртнӗ. Ӑна Чӑваш Республикин Вӗренӳ институчӗ йӗркеленӗ. Вӑл пуш уйӑхӗн 16-мӗшӗнчен пуҫласа ака уйӑхӗн 17-мӗшӗччен пынӑ. Унта пахчисемпе шкул ачисем хутшӑннӑ.
Конкурса Чӑваш Енри, Тутар Республикинчи, Ульяновск облаҫӗнчи 173 ача хутшӑнса хӑйсен пултарулӑхне кӑтартса панӑ.
Ҫӗнтерӳҫӗсемпе призёрсене дипломсемпе чыслама, конкурса хутшӑннисене сертификат парса хавхалантарма йышӑннӑ.
Тӑвай районӗнчи Турикас Тушкилти ача пахчинче агролаборатори уҫӑлнӑ. Ӑна ял хуҫалӑх производителӗ Сергей Илларионов пулӑшнипе пуҫарнӑ. Усламҫӑ сӗт туса илессипе ӗҫлет.Кунашкал лаборатори республикӑра пӗрремӗш хут уҫӑлнӑ.
Агролабораторире ачасем ял хуҫалӑхӗпе паллашаҫҫӗ.
Палӑртмалла: ку проекта республикӑри мӗнпур районти 150 ытла фермер, аграри хутшӑннӑ.
Амӑшӗпе ачи Шупашкарти Граждан урамӗнчи 5-мӗш ҫурт ҫывӑхӗнче уҫӑлса ҫӳренӗ чухне чутах инкеке лекмен. Вӗсене пирӗштисем сыхланӑ тейӗн.
Вӗсем акан 18-мӗшӗнче каҫхине уҫӑлса ҫӳренӗ. Тӑрук вӗсенчен темиҫе сантиметрта кирпӗч катӑкӗсем ӳкнӗ. Хӗрарӑм часрах ачана подъезд тӑрри айне, хӳтте, йӑтса кайнӑ.
Ҫав ҫуртра 12-мӗш хутра специалистсем кондиционер вырнаҫтарнӑ иккен.
Ҫӗртме уйӑхӗн 1-мӗшӗнчен тин ҫуралнӑ ачасене наци тӗрриллӗ парне пама тытӑнӗҫ. Ку кӑҫал кӑрлачӑн 1-мӗшӗ хыҫҫӑн ҫуралнӑ пепкесене те пырса тивет.
Мӗнле парне парӗҫ? Ку тӗллевпе ятарласа сасӑлав ирттерни пирки пӗлтернӗччӗ. Сасӑлава пӗтӗмлетнӗ, мӗнле парне парассине суйланӑ.
Чылайӑшӗ 1-мӗш парнешӗн сасӑланӑ. Ун йышне тӗрӗллӗ пододеяльник, простынь тата наволочка кӗреҫҫӗ.
«Йӗп ҫинчи хӗвел» велоюхӑм хастарӗсем черетлӗ велосезона уҫнӑ. Туслӑ йыш велосипед ҫине ларса СССР лётчик-космонавчӗн Андриян Николаевӑн тӑван тӑрӑхне, Сӗнтӗрвӑрри районӗнчи Шуршӑла, ҫитсе килнӗ. Велочупӑва хастарсем Космонавтика кунне халалланӑ.
Велоюхӑм ертӳҫи Николай Плотников халӑх тетелӗнчи хӑйӗн страницинче пӗлтернӗ тӑрӑх, «Шупашкар — Ҫӗнӗ Шупашкар — Шуршӑл» маршрутпа 200-е яхӑн ҫула тухнӑ. Вӗсенчен чи кӗҫенни 7 ҫулта пулнӑ, чи асли — 81-ре.
Велосипедпа ҫула тухнисене вырӑнти тӳре-шара кӗтсе илнӗ. Шупашкартан пырса ҫитнисене музейпа паллаштарнӑ, концерт кӑтартнӑ.
Ҫанталӑк ӑшӑтнӑ май республикӑра сӑвӑссем те вӑраннӑ. Паянхи кун тӗлне 5 ҫын пульницӑна сӑвӑс ҫыртнӑ хыҫҫӑн медпулӑшу илме пынӑ.
Роспотребнадзор пӗлтернӗ тӑрӑх, шар курнисен йышӗнче Шупашкар арҫынни тата ача пур. Пӗлтӗр ҫак вӑхӑт тӗлне 3 ҫын сӑвӑс ҫыртнипе пульницӑна пулӑшу ыйтма пынӑ.
Палӑртмалла: пӗлтӗр боррелиозпа 20 ҫын чирленӗ. Унран вакцина ҫук.
+12.5 °C