Юлашки вӑхӑтра ҫакӑ савӑнтарать: кӑшӑлвирусран пӗр талӑкра чирлекенсем те, вилекенсем те майӗпен сахалланса пыраҫҫӗ. Паян валли тепӗр 5 ҫын вируса парӑнтараймасӑр пурнӑҫран уйрӑлнӑ.
Ку таранччен республикӑра пурӑнакан 19995 ҫын кӑшӑлвируспа инфекциленнӗ. Вӗсенчен 18040-шӗ сывалнӑ. Паянхи кун тӗлне 916 ҫын кӑшӑлвируса пула вилнӗ. Инфекциленнисен 4,6 проценчӗ каварлӑ чире парӑнтарайман.
Юлшки талӑкра 87 ҫын инфекциленнӗ. Сывалакансем 81 ҫын пулнӑ. Аса илтерер: республикӑра кӑшӑлвирусран хӳтӗленмелли прививка тума пуҫланӑ, пӗтӗмпе 35 пункт йӗркеленӗ. Шупашкарти виҫӗ суту-илӳ центрӗнче вакцинаци тума палӑртнӑ.
Ӗнер, нарӑс уйӑхӗн 5-мӗшӗнче, 16 сехет те 30 минутра, «Шупашкар-2» станци тӗлӗнче, «М-7» ҫул ҫинче икӗ автомашина ҫапӑннӑ.
Чӑваш Ен Шалти ӗҫсен министерствин пресс-службинче малтанласа пӗлтернӗ тӑрӑх, «ВАЗ-2110» автомобиль Мускав енне кайнӑ. Тахӑш самантра вӑл руле пӑрса янӑ та автомобильсем хирӗҫ килекен ҫул ҫине тухса кайнӑ. Унта вӑл «Нива» машинӑпа ҫапӑннӑ.
«Вуннӑмӗшӗн» водителӗпе пассажирӗ, ҫавӑн пекех «Нивӑн» икӗ пассажирӗ суранланнӑ. «Нивӑн» водителӗ тухтӑрсенчен пулӑшу ыйтман.
Ҫул ҫинчи инкек сӑлтавне специалистсем палӑртӗҫ.
Кӳршӗ регионсен чиккине ҫывӑх пурӑнакансем 112 номерпе шӑнкӑравласан Мари Эле лекни пирки ҫынсем каланӑ. Ҫавна май васкавлӑ медпулӑшу чӗнмелли тепӗр номер пирки пӗлтереҫҫӗ. Вӑл – 41-98-60.
Кунашкал номере астуса юлма йывӑртарах. Ҫавӑнпа васкавлӑ медпулӑшӑвӑн пресс-служби ӑна телефон ҫине ҫырса хума сӗнет. Районтан шӑнкӑравлас тӑк 8(8352) номере хушмалла.
112 номерпе шӑнкӑравласа кӳршӗ региона тухни пирки унччен ЧР Элтеперӗ Олег Николаев та каланӑ. Ку ыйтӑва вӑл ЧР информполитика министрне татса пама хушнӑ.
Шупашкар районӗнчи тӗп пульницӑра кӑшӑлвируспа чирлисене стационарта сиплеме пӑрахӗҫ. Тӗрӗсрех каласан, унчченхи ӗҫ режимӗ патне таврӑннӑ май пульница малтанхилле ӗҫлеме тытӑнӗ. Кун пирки паян иртнӗ кӑшӑлвируспа кӗрешес енӗпе ӗҫлекен оперштабӑн ларура республикӑн сывлӑх сыхлав ӗҫ министрӗн тивӗҫне пурнӑҫлакан Алексей Кизилов пӗлтернӗ.
«Ҫӗнӗ кӑшӑлвирус инфекцийӗпе Шупашкар район пульницине вырттарассине паян вӗҫлӗпӗр», — тенӗ вӑл.
Кӑшӑлвируспа чирлекенсене йышӑнма маларах Ҫӗнӗ Шупашкарти медицина центрӗнче, Ҫӗнӗ Шупашкарти хула пульницинче, Канашри тӗп район пульницинче, Вӑрнар районӗнчи пульницӑра пӑрахнӑ.
Хальхи вӑхӑтра 14 медицина организацийӗнчее кӑшӑлвируслисем валли 2400 ытларах койка пӑхса хӑварнӑ.
Шупашкарта «Мега Молл», «Каскад», «Мадагаскар» суту-илӳ центрӗсенче кӑшӑлвирусран прививка тума май пулӗ. Кун пирки кӑшӑлвирус сарӑлассипе кӗрешекен оперштаб ларӑвӗнче ЧР сывлӑх сыхлавӗн министрӗн пӗрремӗш ҫумӗ Алексей Кизилов пӗлтернӗ.
Палӑртмалла: Чӑваш Енре вакцинаци тумалли 35 пункт ӗҫлӗ. Ку эрне вӗҫӗччен тепӗр 10 уҫма палӑртнӑ. Ҫав шутра – ҫӳлерех асӑннӑ суту-илӳ центрӗсенче те.
Вакцинаци тумалли пунктсем йӗркелес тӗлӗшпе Чӑваш Ен Атӑлҫи федераци округӗнче 12-мӗш вырӑн йышӑнать. Паянхи кун тӗлне Чӑваш Енре 6698 ҫын кӑшӑлвирусран прививка тунӑ.
Нарӑс уйӑхӗн 5-мӗшӗнче ҫурҫӗр тӗлӗнче Шупашкар районӗнче ҫул ҫинчи инкек пулса иртнӗ. Унта юрҫӳренпе автомобиль ҫапӑннӑ.
Чӑваш Енӗн Шалти ӗҫсен министерствинче малтанласа пӗлтернӗ тӑрӑх, юрҫӳрен хирӗҫ пыракан ҫул ҫине астумасӑр тухса кайнӑ. Унта вӑл «Лада Веста» машинӑпа ҫапӑннӑ. Шупашкар хулинче пурӑнакан 36 ҫулти арҫын инкек вырӑнӗнчех вилнӗ, унӑн пассажирне, Шупашкар районӗнче пурӑнакан 36-ри арҫынна, пульницӑна ӑсатнӑ. Ҫапӑннӑ хыҫҫӑн юрҫӳрен хыпса илнӗ.
Ҫӑмӑл автомобилӗн 22 ҫулти водителӗ аманман. Вӑл Вӑрнар районӗнчен пулни паллӑ. Вӑл хӑрушсӑрлӑх пиҫиххипе ҫыхӑннӑ. Ҫул-йӗр правилине пӑснӑшӑн пӗлтӗр ӑна темиҫе хут та явап тытарнӑ.
Чӑваш Республикин Вӗренӳ институчӗ Шупашкар хулин хавшак сывлӑхлӑ ачасене пӗтӗмӗшле пӗлӳ паракан 2-мӗш шкулӗпе пӗрле «Хавшак сывлӑхлӑ ачасене чӑваш чӗлхипе литератури вӗрентес уйрӑмлӑхсем» ӑслӑлӑхпа практика конференцийӗ ирттерӗ. Вӑл нарӑс уйӑхӗн 19-мӗшӗнче пулӗ. Конференцие Тӗнчери халӑхсен тӑван чӗлхе кунне халаллӗҫ.
Конференци программине ҫак ыйтусемпе докладсем кӗртме палӑртнӑ: «Хавшак сывлӑхлӑ ачасене чӑваш чӗлхипе литературине вӗрентмелли майсемпе мелсем»; «Хавшак сывлӑхлӑ ачасен этнокультура компетецине йӗркелесси»; «Хавшак сывлӑхлӑ ачасене вӗрентмелли хальхи технологисем».
Конференцие хутшӑнма тӗпчевҫӗсене, аслӑ тата вӑтам шкул преподавателӗсене йыхравлаҫҫӗ.
Паян тепӗр 6 ҫын кӑшӑлвирусран вилнӗ. Ӗнер ку хисеп 5-пе танлашнӑччӗ. Ку таранччен республикӑра 905 ҫын кӑшӑлвируса пула пурнӑҫран уйрӑлнӑ. Кӑҫал кӑна вирус 348 ҫыннӑн пурнӑҫне татнӑ.
Юлашки талӑкра 88 ҫын чирленӗ. Сывалакансем 77-ӗн пулнӑ. Ку таранччен пӗтӗмпе 19817 ҫын инфекциленнӗ. Вӗсенчен 17884-шӗ сывалнӑ.
Палӑртмалла: кӑшӑлвируса пула ҫын вилесси нарӑс уйӑхӗн 2-мӗшӗнче чакма пуҫланӑ. Унччен талӑксерен 9-13 ҫын вилнӗ.
Вӑрнарти васкавлӑ медпулӑшу фельдшерӗсем 68 ҫулти арҫыннӑн пурнӑҫне ҫӑлнӑ. Вӑл чӗрепе аптӑраса ӳкнӗ, 01 номерпе шӑнкӑравласа пӗлтернӗ.
Фельдшерсем вырӑна ҫитсен арҫыннӑн миокард инфаркчӗ пулнине палӑртнӑ. Пӗрремӗш медпулӑшу панӑ вӑхӑтра пациент тӑнне ҫухатнӑ, сывлама пӑрахнӑ.
Фельдшерсем чӗрине реанимаци тума тытӑннӑ, дефибрилляци тунӑ. Кӗҫех вӗсем тӑрӑшнипе пациент тӑна кӗнӗ, сывласа янӑ. Арҫынна Шупашкарти кардиологи диспансерне илсе ҫитернӗ.
Чӑваш Ене кӑшӑлвиурсран хӳтӗленмелли вакцинӑн тепӗр патийӗ ҫитнӗ. Хальхинче 12 пин ытла доза илсе килнӗ.
Вакцина ятарлӑ морозильниксенче упранать, унта 18 градус сивӗ. Сӑмах май, республикӑра кӑшӑлвирусран прививка тумалли 35 объект хатӗрленӗ. Ку ыйтупа кашни районтах больницӑна ҫитме май пур, унта прививка тӑвӗҫ. Е вакцинацие 112 номерпе шӑнкӑравласа, Патшалӑх пулӑшӑвӗсен порталне кӗрсе ҫырӑнма пулать. Е регистратурӑна шӑнкӑравласа ҫитмелле.
Кӳрсе килнӗ вакцина «Фармаци» патшалӑх предприятийӗнче упранать. Ҫитес кунсенче ӑна пульницӑсене валеҫӗҫ.
+18.3 °C