Муркашра 71 ҫулти арҫын 5 ҫулти ачана машинӑпа таптанӑ.
Чӑваш Енӗн Шалти ӗҫсен министерствин пресс-службинче пӗлтернӗ тӑрӑх, инкек ӗнер, ҫу уйӑхӗн 11-мӗшӗнче, 17 сехетре Коммуналлӑ урам картишӗнче пулса иртнӗ.
5 ҫулхи хӗрачапа кукашшӗ (тен, аслашшӗ-тӗр. Вырӑсла «дедушка» тесе ҫырнӑ) ача пахчинчен таврӑннӑ. Ҫав вӑхӑтра ача ҫине «ГАЗ-2752» автомобиль пырса кӗнӗ. Унӑн рулӗ умӗнче 71 ҫулти арҫын пулнӑ. Суранланнӑ ачана пульницӑна илсе кайнӑ.
Микроавтобус водителӗ инкек вӑхӑтӗнче урах пулнӑ.
Пӗлтӗрхи авӑн уйӑхӗн 25-мӗшӗнче Вӑрнар районӗнчи Мӑн Явӑш ялӗнче 57 ҫулти арҫынна вӗлернине Чӑваш халӑх сайчӗ пӗлтернӗччӗ. Ку преступление кӳрши тунӑ.
Аса илтерер: хайхискерсем темиҫе ҫул вӑрҫӑнса пурӑннӑ-мӗн. Ҫак арҫын хӑйӗн пахчи патне машинӑпа пырайман, мӗншӗн тесен кӳрши ӑна хупласа лартнӑ. Ҫав кун вӗсем каллех хирӗҫсе кайнӑ. Арҫын ҫӗҫӗ ярса тытнӑ та кӳршине 17 хутран кая мар ҫӗҫӗпе чикнӗ. Лешӗ ҫавӑнтах вилсе кайнӑ.
Ҫынна вӗлернӗ арҫын тӗлӗшпе пуҫарнӑ пуҫиле ӗҫе тӗпчесе пӗтернӗ. Кӗҫех суд пулӗ.
Ӗнер Йӑлӑмри М.П. Костина ячӗллӗ вӑтам шкулта Сывлӑх центрӗ уҫӑлнӑ. Кун пирки Федерацин травматологи, ортопеди тата эндопротезировани центрӗн тӗп врачӗ, Чӑваш Ен Патшалӑх Канашӗн депутачӗ Николай Николаев Интаграмра пӗлтернӗ.
Сывлӑх центрӗ уҫӑлнине тухтӑр питӗ кирлӗ те хальхи вӑхӑтри пулӑм тесе хакланӑ. Центрта сиплев физкультурин, массаж, физио- пӳлӗмсем, тӑвар шахти пулӗҫ. Шкулти центра федерацин травматологи центрӗн тӗп врачӗ травматолог-ортопед пырса ачасене тӗрӗслеме пултарассине пӗлтернӗ. «Чӗнсенех кайӗҫ», — хыпарланӑ тухтӑр.
Чӑваш Енпе иртекен «М-7»федераци ҫулӗ ҫинчи инкекре водитель тата икӗ ҫамрӑк пассажир суранланнӑ. Патшалӑхӑн ҫул-йӗр хӑрушсӑрлӑхӗн инспекцийӗнче пӗлтернӗ тӑрӑх, вӗсем хӑрушсӑрлӑх пиҫихиййӗпе ҫыхӑнман.
Ҫул ҫинчи инкек Ҫӗрпӳ ҫывӑхӗнче ӗнер пулса иртнӗ.
Ҫул-йӗр инспекторӗсем палӑртнӑ тӑрӑх, «Скани» водителӗ малта пыракан машина ҫывӑхне пырса кӗнӗ. Вӑл «Рено Сандеро» автомобильпе пырса ҫапӑннӑ. Ҫавна май Чулхула облаҫӗнче пурӑнакан ҫынсем суранланнӑ. Вӗсенчен пӗри – водитель, ҫавӑн пекех — 2005 тата 2007 ҫулсенче ҫуралнӑ пассажирсем.
Ку лайӑх хыпар темелле: иккӗмӗш кун ӗнтӗ Чӑваш Енре кӑшӑлвирусран 1 ҫын вилет. Ҫу уйӑхӗн пуҫланнӑранпа 22 ҫыннӑн пурнӑҫӗ ҫак вируса пула татӑлнӑ. Пандеми пуҫланнӑранпа республикӑра 1388 ҫын вилнӗ.
Паянхи кун тӗлне 24730 ҫын инфекциленнӗ. Вӗсенчен 22561-шӗ сывалнӑ. Юлашки талӑкра 49 ҫын чирленине палӑртнӑ, сывалакансем 65-ӗн пулнӑ.
Паянхи куна илес тӗк, стационарта тата килте амбулатори мелӗпе кашӑлвирусран 781 ҫын сипленет.
Шупашкар хулинче пурӑнакан 40 ҫулти хӗрарӑма упӑшкине вӗлернӗшӗн айӑпласшӑн. Ятарласа вӗлермен-ха вӑл. Малтан хытӑ хӗнесе пӗтернӗ, унтан арҫын вилсе кайнӑ.
Тӗпчевҫӗсем шухӑшланӑ тӑрӑх, ҫу уйӑхӗн 1-мӗшӗнчи каҫхине арӑмӗпе упӑшки Шупашкарти общежитисенчен пӗринче хӑнара пулнӑ. Ӳсӗр хӗрарӑмпа арҫын хушшинче тавлашу сиксе тухнӑ. Хӗрарӑм хӑйӗнчен 8 ҫул аслӑрах упӑшкине пуҫӗнчен тата ытти вырӑнтан тапса-ҫапса пӗтернӗ. Арҫыннӑн пит шӑмми, аяк пӗрчисем ванса-хуҫӑлса пӗтнӗ. Сурансене пула арҫын тепӗр кунхине килӗнчех вилсе кайнӑ.
Хӗрарӑма тытса чарнӑ, ӑна вӑхӑтлӑха хупса хунӑ. Пуҫиле ӗҫе малалла тӗпчеҫҫӗ.
Ӗнер, ҫу уйӑхӗн 3-мӗшӗнче, ирхи 7 сехетре, Ҫӗрпӳ районӗнче мотоциклист инкеке лекнӗ. Вӑл «Молодежный–Патӑрьел–Шӑнар» автоҫулпа пынӑ.
«Авантис» спорт мотоциклӗпе ҫула тухнӑ 26 ҫулти каччӑ хирӗҫ килекен ҫул ҫине астумасӑр тухса кайнӑ, унтан ҫул айккине чӑмнӑ. Ҫанталӑк йӗпе-сапа тӑни те витӗм кӳнӗ-тӗр. Ҫул ҫинчи инкеке пула ҫамрӑк ҫын вырӑнтах вилсе кайнӑ. Вӑл хӑй Красноармейски районӗнчен пулнӑ. Ҫул-йӗр хӑрушсӑрлӑхӗн автоинспекторӗсем пӗлтернӗ тӑрӑх, хӑвӑртлӑха пӑхӑнманшӑн пӗлтӗр каччӑна административлӑ майпа 6 хутчен явап тыттарнӑ.
Шупашкар районӗнчи кашни яла асфальт ҫулпа темиҫе ҫул каяллах ҫыхӑнтарнӑччӗ. Кайран ялти ҫулсене те е асфальт, е вак чул сарма тытӑнчӗҫ. Ҫапах та 21-мӗш ӗмӗрти ырлӑх ҫитмен урамсем те пур-ха. Вӗсенчен пӗринче васкавлӑ пулӑшу машини лакса ларнӑ.
Чирлӗ ҫын патне пынӑ тухтӑрсем автомобильтен анса ҫуран кайнӑ. Утса мар, чупса. Ҫав вӑхӑтра васкавлӑ пулӑшу машинине ялти пӗр тракторист лачакаран туртса кӑларнӑ. Унтан чирлӗ ҫынна тухтӑрсем пульницӑна илсе кайнӑ.
Чӑваш Енре виҫӗ ҫыннӑн кӑшӑлвирусӑн Британи штамӗ пулнине палӑртнӑ. Кун пирки Роспотребнадзорӑн Чӑваш Енри управленийӗн ертӳҫин тивӗҫӗсене пурнӑҫлакан Вера Головач оперштаб ларӑвӗнче пӗлтернӗ.
Тин кӑна республикӑра ҫак вируспа чирлесси чакса пыратчӗ. Халӗ ку кӑтарту тата вӑрахланнӑ. Юлашки эрнере чирлесси 13 процент ӳснӗ, талӑкне 46-60 ҫын инфекциленет.
Кӑшӑлвирус сарӑлассине чакарас тӗллевпе ведомство республика правительствине тата муниципалитетсене массӑллӑ меропряитисене пӑрахӑҫлама сӗннӗ.
Шупашкрати Гагарин урамӗнчи ача-пӑча поликлиники малашне пациентсене ҫӗнӗ адреспа йышӑнма пуҫлӗ. Кун пирки Хулан 2-мӗш пульници пӗлтерет.
ЧР Сывлӑх сыхлавӗн хушӑвӗпе килӗшӳллӗн, Гагарин урамӗнчи ача-пӑча поликлиники Хулан 2-мӗш пульницин йышӗнчен тухӗ. Ҫу уйӑхӗн 1-мӗшӗнчен вӑл Хулари ача-пӑча клиника пульницин «5-мӗш ача-пӑча пульници» пулӗ.
Пӗчӗк пациентсен тепӗр уйӑхран Ленин проспектӗнчи 12-мӗш ҫурта пымалла. Специалистсем вӗсене унчченхи графикпех йышӑнӗҫ. Ҫу уйӑхне ҫырӑннӑ ачасене те ҫавӑн пекех йышӑнӗҫ.
+19.3 °C