Шупашкарта ют ҫӗршыв чӗлхисемпе ҫырнӑ вывескӑсене тупса палӑртас тӗллевпе рейд ирттереҫҫӗ. Тӗрӗслеве Шупашкар хула администрацийӗн предпринимательлӗх тата потребительсен прависене хӳтӗлекен сектор ӗҫченӗсем тухнӑ.
Усламҫӑсем вывескӑсене пырса тивекен ҫӗнӗ саккуна пӑхӑнаҫҫӗ-и? Ҫакна тӗрӗслеҫҫӗ. Кӑҫалхи пуш уйӑхӗн 1-мӗшӗнчен ҫӗнӗ саккун вӑя кӗнӗ. Унпа килӗшӳллӗн, вывескӑсене вырӑсла ҫырмалла, ют чӗлхепе дубликат пек кӑна усӑ курма юрать. Саккуна пӑснӑшӑн должноҫри ҫынсен – 4-20 пин, юридици сӑпачӗсен 100-500 пин тенкӗ штраф тӳлеме тивӗ.
Администраци пӗлтернӗ тӑрӑх, чылай усламҫӑ ҫӗнӗ саккун пирки пӗлет, нумайӑшӗ ҫӗнӗ вывескӑсем хатӗрлет.
Хула администрацийӗн ӗҫченӗсем усламҫӑсене вывескӑсене, реклама материалӗсене, мобильлӗ сарӑмсене тата халӑх тетелӗсенчи страницӑсене тӗрӗслеме сӗнет.
Шупашкар хулинче пурӑнакан, тивӗҫлӗ канӑва тухнӑ мӑшӑр ултавҫӑсене 13 миллиона яхӑн тенкӗ парса янӑ.
Йӑлтах пӗр шӑнкӑравран пуҫланнӑ. Палламан арҫын ӗҫ стажне ҫирӗплетме, паспорт даннӑйӗсене калама ыйтнӑ. Кун хыҫҫӑн вара мӑшӑр патне палламан ҫынсем шӑнкӑравласа тапӑнма тытӑннӑ: «банк ӗҫченӗ», «ФСБ ӗҫченӗ»… Вӗсем мӑшӑра хӑратса пӗтернӗ: паспорт даннӑйӗсемпе ултавҫӑсем шыравра шутланакан, Украинӑна укҫа куҫарса тӑракан ҫын ҫине доверенноҫ тунӑ-мӗн. Упӑшкипе арӑмӗ хӑраса ӳкнипе палламан ҫынсем мӗн каланине йӑлтах туса пынӑ.
Хӗрарӑм пӗр хушӑ иккӗленме те тытӑннӑ-ха. Анчах лешсем каллех хӑратма пуҫланӑ, Украинӑна укҫа куҫарса тӑратӑр тесе айӑпланӑ. Ҫапла мӑшӑра Хусана кайса укҫа-тенке курьера пама ӳкӗте кӗртнӗ.
Кунпа вӗҫленмен-ха истори. Каярахпа палламан ҫынсем пӗр укҫа ҫинче нацистсен лозунгӗ пулнине ӗнентернӗ, пӗтӗм укҫана памалла тесе хушнӑ. Упӑшкипе арӑмӗ пухнӑ укҫине йӑлтах тыттарса янӑ.
Халӗ курьер кам пулнине палӑртаҫҫӗ. Ку тӗслӗх тӗлӗшпе вара пуҫиле ӗҫ пуҫарнӑ.
Чӑваш патшалӑх пукане театрӗн артисчӗ Артем Барабанов ТНТ каналпа кӑтартакан «СашаТаня» камитлӗ сериалта ӳкерӗннӗ.
Пирӗн ентеше 10-мӗш сезонри 26-мӗш серири эпизодри рольте курма пулать. Палӑртса хӑварар: Артем Шупашкар хулинче пурӑнать, Чӑваш патшалӑх пукане театрӗнче 10 ҫул ӗҫлет. Ку таранччен вӑл 30 ытла роле калӑпланӑ. Куракансем ӑна ытларах «Карлсон», «Муму» тата «Ночь перед Рождеством» спектакльсенчи рольсем тӑрӑх пӗлеҫҫӗ.
Вӑхӑтӑн-вӑхӑтӑн Артем Мускава ӳкерӗнме ҫӳрет. Халӗ ав унӑн фильмографийӗнче Раҫҫейре пысӑк рейтинг ҫӗнсе илнӗ проектсенчен пӗри пур.
Социаллӑ сферӑра ӗҫлекенсем паян професси уявне паллӑ тӑваҫҫӗ. Ку отрасльте чун ӑшшине ыттисемшӗн шеллемен ҫынсем сахал мар. Вӗсенчен пӗри — Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрти Александра Смирнова.
Александра Львовна паян пай заведующийӗнче тӑрӑшать. Анчах ку должноҫе хӑйне шанса париччен вӑл социаллӑ ӗҫчен пулса та, ахаль специалистра та тӑрӑшнӑ. Социаллӑ сферӑна Хӗрлӗ Чутай хӗрӗ амӑшне кура суйланӑ. Вӑл вырӑнти ваттисен ҫурчӗн заведующийӗнче ӗҫленӗ.
Паян Александра Львовна ӗҫре ӗлкӗрсе пынипе пӗрлех лайӑх машӑр та, амӑшӗ те, кин те. Вӑл упӑшкипе виҫӗ хӗр ӳстерет. Александра Львовна ачисемпе тата хунямӑшӗпе пӗрле тӗрлӗ конкурса та хастар хутшӑнать.
Чӑваш академи драма театрӗнче сцена ҫине «Ҫӑлӑнӑҫ – юратура (777 пирӗшти)» ҫӗнӗ спектакль кӑларнӑ. Ӑна, театрта пӗлтернӗ тӑрӑх, социаллӑ сферӑра ӗҫлекенсене халалланӑ.
Театрта спектакль умӗн иртнӗ тӗп репетицие Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта пай заведующийӗсенче тӑрӑшакан Надежда Мастеровӑпа Надежда Шикарева кайса курнӑ. Социаллӑ учрежденире пӗлтернӗ тӑрӑх, вӗсене театрта ӗҫлекенсем ятарласа чӗннӗ.
Надежда Анатольевна каланӑ тӑрӑх, спектакль питех те килӗшнӗ. «Ку вӑл пирӗн сферӑра тӑрӑшакансем, ҫын ыратӑвне чӗре витӗр кӑларакансем пиркиех. Спектакле хатӗрлекенсене ку ӗҫшӗн пысӑк тав», — хавхаланса каласа кӑтартнӑ вӑл социаллӑ учрежденин пресс-службине.
«Ҫанталӑк 21» сайт пӗлтернӗ тӑрӑх, ҫуллахи шӑрӑх ҫанталӑк пирӗн пата майӗпен ҫывхарать.
Паян иртенпе уяр пулсан та кӑнтӑрла хыҫҫӑн вырӑнӑн-вырӑнӑн аслатиллӗ ҫумӑр ҫӑвӗ. Ҫапах ку ҫанталӑка ӑшӑтса пыма пӗрре те чӑрмантармӗ. Эрнен иккӗмӗш ҫурринче Шупашкарта термометр кӑнтӑрласерен – 27-29, каҫсерен 14-16 градус ӑшӑ кӑтартӗ. Республикӑра хӑш-пӗр вырӑнта 30 градус таранах шӑрӑх пулӗ. Айлӑмлӑ вырӑнсенче, шыв-шур патӗнче, ирсерен тӗтре карса илӗ. Ҫил тӳлек вӗрӗ, аслатиллӗ ҫумӑр вӑхӑтӗнче кӑна вӑйланӗ. Атмосфера пусӑмӗ нормӑпа килӗшӳллӗн пулӗ.
Малтанлӑха палӑртнӑ тӑрӑх, ҫитес эрнере те шӑрӑх ҫанталӑк пулӗ. Вӑтам сывлӑш температури 20 градуспа танлашӗ. Ку – ҫӗртме уйӑхӗнчи климат норми.
Ҫур уйӑхра Шупашкарта 45 мм ҫумӑр ӳкӗ. Ку — ҫӗртме уйӑхӗн нормин виҫҫӗ тӑваттӑмӗш пайӗ.
Шупашкарти транспорт тата строительство технологийӗсен техникумӗнче Пӗтӗм Раҫҫейри «Профессире чи лайӑххи» конкурспа килӗшӳллӗн иртнӗ «Каменщик» номинацире ҫӗнтерӳҫе палӑртнӑ.
Кӑҫал чи лайӑххин ятне илессишӗн республикӑри ертсе пыракан строительство организацийӗсенче тӑрӑшакан 9 специалист вӑй виҫнӗ. Конкурса хутшӑнакансем теори пӗлӗвне кӑтартнисӗр пуҫне эрешлесе кирпӗч хунӑ: «26» эреш пулса тухнӑ.
Конкурсра «СЗ «Стройтрест №3» АОра ӗҫлекен Алексей Петрянкин мала тухнӑ. Вӑл ку организацире 20 ҫула яхӑн вӑй хурать. 2024 ҫулта вара тӑрӑшса ӗҫленӗшӗн «Чӑваш Республикин тава тивӗҫлӗ строителӗ» ята тивӗҫнӗ.
Иккӗмӗш вырӑна – Юрий Матвеев, виҫҫӗмӗш вырӑна Дмитрий Шагаров тухнӑ.
Финал Шупашкарта авӑн уйӑхӗнче иртӗ. Унта ҫӗнтернӗ специалист Чӑваш Ен чысне Раҫҫей шайӗнче хӳтӗлӗ.
Ырантан, ҫӗртме уйӑхӗн 8-мӗшӗнчен, Шупашкарти юханшыв порчӗ Атӑлӑн сулахай енчи пляжне ҫитекен трамвайчиксем ярӗ.
Вӗсем кунне виҫӗ хутчен ҫула тухӗҫ. Шупашкартан пляжа 10:00, 12:30 тата 17:40 сехетсенче кайма май пулӗ. Каялла трамвайчиксем 10:30, 13:00 тата 18:10 сехетсенче килеҫҫӗ.
Канмалли кунсенче хушма рейс пулӗ: хуларан – 15:00, каялла 15:30 сехетре.
Пӗр билет хакӗ 130 тенкӗ пулӗ. 5-10 ҫулсенчи ачасем валли вара – 65 тенкӗ. 5 ҫул тултарман ачасене тӳлевсӗрех илсе каяҫҫӗ, анчах вӗсем валли пурпӗрех билет илмелле.
Кӑҫал ҫӗнӗлӗх вӑя кӗнӗ: билетсене юханшыв порчӗн сайтӗнче кӑна сутаҫҫӗ, билета ҫула тухмалли кун кӑна илме пулать.
Урамра ҫумӑр ҫӑвать, ҫанталӑк ӑмӑр тата термометр 20 градус ӑшӑран сахалрах кӑтартать тӗк рейссене пӑрахӑҫлаҫҫӗ.
Шупашкарта банкра ӗҫлекен ҫын клиентӑн укҫине вӑрланӑ. Сахал мар – 15 миллион тенкӗ. Халӗ унӑн куншӑн явап тытма тивӗ, ун тӗлӗшпе пуҫиле ӗҫ пуҫарнӑ.
Следстви акӑ мӗн тӗпчесе пӗлнӗ: пӗлтӗр юпа уйахӗн 1-мӗшӗнче банк ӗҫченӗ клиент ятӗнчен хӑйӗн счечӗ ҫине 1 пин тенкӗ куҫарма заявлени ҫырнӑ. Тепӗр кунхине ҫакна никам та асӑрхаманнине ӑнланнӑ та хӑйӗн счечӗ ҫине татах укҫа куҫарнӑ: хальхинче 15 миллион тенкӗ.
Банк ертӳлӗхӗ кун пирки пӗлсен ҫак ҫын клиента укҫана тавӑрса панӑ. Ун тӗлӗшпе пуҫарнӑ пуҫиле ӗҫе кӗҫех Шупашкарти Калинин районӗн сучӗ пӑхса тухӗ.
«Чӑвашрессовпроф» профсоюзсен республикӑри пӗрлештернӗ организацине ертсе пыма Алексей Гурьева суйланӑ.
Шупашкарта асӑннӑ организацин XXXI отчетпа суйлав конференцийӗ иртнӗ. Унта Чӑвашресосвпрофӑн ҫӗнӗ председательне суйланӑ. Алексей Гурьев кандидатурине пӗр ҫын хирӗҫ пулман, пурте пӗр саслӑн пулса уншӑн сасӑланӑ.
Алексей Гурьев унччен организацин председателӗн заместителӗнче тӑрӑшнӑ. 2012-2015 ҫулсенче вӑл «Пӗрлехи Раҫҫей» партин регионти ӗҫ тӑвакан комитечӗн председателӗ пулнӑ. 2019 ҫулта ӑна республикӑн вӗренӳ министрӗн заместителӗн портфельне тыттарнӑ, 2020 ҫулта Чӑваш Ен Элтеперӗн Администрацийӗн ертӳҫин заместителӗнче тӑрӑшма пуҫланӑ.
+20.2 °C