Халӗ пур ҫӗрте те электрон пулӑшӑва сарма тӑрӑшаҫҫӗ. РФ Пенси фончӗн Чӑваш Енри уйрӑмӗ те пурнӑҫран юлмасть. Нумаях пулмасть унта пенси илме электрон меслетпе ҫыру ямалли йӗркене пурнӑҫа кӗртнӗ.

Ҫӗнӗ йӗрке епле ӗҫленине чи малтан фонд хӑй тӗрӗслесе пӑхнӑ. Асӑннӑ фондӑн Улатӑр хулинчи уйрӑмӗнче ӗҫлекен, тивӗҫлӗ канӑва тухма хатӗрленекен ҫын хӑйне пенсие кӑларма электрон меслет пулӑшнипе ыйтса ҫырнӑ.

Ҫӗнӗлӗхе халиччен ҫӗршыври 24 регионта пурнӑҫа кӗртнӗ. Ҫав шутра — пирӗн тӑрӑхра та. Ку меслет пенсие банк е почта урлӑ илсе тӑрассине суйлама та май парать. Чи кирли — килте компьютер тата тӗнче тетелне тухма май пурри.

Ҫырӑва www.pfrf.ru сайта кӗрсе «Страхланнӑ ҫыннӑн уйрӑм пӳлӗмӗ» текен ҫӗртме регистрациленмелле. Сӑмах май, паролӗ — патшалӑх пулӑшӑвӗ кӳрекен пӗрлехи порталти евӗрех.

«Чӑваш Республикин ҫул-йӗр управленийӗ» хысна учрежденине «Ҫул-йӗр хӑрушсӑрлӑхне ӳстерессипе тата видеофиксаци тытӑмне ӗҫлеттерекен дирекци» ятлӑ организаципе пӗрлештернӗ.

Юлашкичнен калани те хысна предприятийӗ шутланнӑ. Вӑл ҫул ҫинче видеокамерӑсем вырнаҫтарассипе ӗҫленӗ.

Чӑваш Енӗн Транспорт тата ҫул-йӗр министерствин пресс-служби ик учреждение пӗрлештерни ҫул ҫинче ирттерекен ӗҫ пахалӑхне тата ҫул-йӗр хӑрушсӑрлӑхне ӳстерессипе ҫыхӑнтарать-ха. Ҫапах та сӑлтавӗ вӑл кӑна та мар пулӗ. Ҫул-йӗрпе ҫыхӑннӑ икӗ учреждение пӗр тӗвве пӗрлештерни укҫа-тенке перекетлеме те май паратех-тӗр. Ара кун пек чухне пуҫлӑхсен, бухгалтерсен йышне те чакараҫҫех пулӗ. Ҫул-йӗр ҫинче ҫӳрекенсемшӗн кун пек йышӑну туни пӗрех-ха: чи кирли - ҫул ҫинче йӗрке пултӑр кӑна.

Шупашкар районӗнчи суда пӗр кунхине пӗр класс шкул ачи пухӑннӑ. Турра шӗкӗр, тем айӑпа кӗнипе мар. Кӗнтелем евӗр те чӗнмен вӗсене.

Ҫӗнӗ Шупашкарти 12-мӗш вӑтам шкулта 11-мӗш класра вӗренекен яшсемпе пикесене суд ларӑвне итлеме чӗннӗ. Кун пеккине шкул ачисене право воспитанийӗ парас тӗллевпе йӗркеленӗ.

Суд ларӑвӗ хыҫҫӑн ачасемпе Шупашкар район прокурорӗн ҫумӗ А.П. Иванов тата Шупашкар район сучӗн ертӳҫин ҫумӗ Р.Г. Кудряшова тӗлпулнӑ. Прокурорпа тӳре пирӗн ҫӗршывра суд тата правӑна сыхлакан тытӑмсем епле ӗҫлени пирки каласа кӑтартнӑ.

Суда пынӑ ачасем валли ӗҫлӗ вӑйӑ та йӗркеленӗ. Ачасене прокурор, хӳтӗлевҫӗ, суд ӗҫӗне хутшӑнакан ытти ҫын евӗр пулса лару ирттернӗҫи туса пӑхнӑ. Шкулта вӗренекенсем унта кӑсӑкланса хутшӑннӑ.

«Хыпар» Издательство ҫурчӗ районсене тухса ҫӳрес йӑлана малалла тӑсать. Нумаях пулмасть калем ӑстисем Комсомольски районне ҫитнӗ.

Хыпарҫӑсем культура керменӗнче хаҫат-журнал тусӗсемпе тӗл пулнӑ, тӗрлӗ ыйтусене сӳтсе явнӑ.

Каҫалсем тӗлпулу кӑсӑклӑ та тухӑҫлӑ иртни пирки ӗнентереҫҫӗ. Район администрацийӗн пуҫлӑхӗ Михаил Афанасьев чи малтанах район хаҫатне «Каҫал ене» тата «Хыпара» алла илнине пӗлтернӗ.

«Хыпар» ИҪ директорӗ-тӗп редакторӗ Валери Туркай «Хыпара» содержани енчен пуянлатнине, дизайнне улӑштарнине, унта тӗрлӗ ыйту хускатма тӑрӑшнине каласа кӑтартнӑ. Вӑл «Хыпар» хаҫат кашни килтех пулмалли пирки ҫирӗппӗн каланӑ.

Тӗлпулура К.Осокина, В.Вахтеркина юрӑҫсем юрӑсемпе илемлетнӗ.

Сӑнсем (7)

Прокуратура тытӑмӗнче кадр улшӑнӑвӗсем пулса иртни пирки эпир пӗлтернӗччӗ. Ун пекки ҫак кунсенче РФ Следстви комитечӗн Чӑваш Енри управленийӗнче те пулса иртнӗ. Управленинче хӑйӗнче мар. Унӑн районсенчи пайӗсенче.

Ҫӗмӗрлери районсем хушшинчи пая (кунта Улатӑрпа Ҫӗмӗрле хулисем, Улатӑр, Вӑрнар, Пӑрачкав, Ҫӗмӗрле районӗсем кӗреҫҫӗ) малашне юстици подполковникӗ Александр Гаврилов ертсе пырӗ. Пуҫлӑх пуканне шанса париччен вӑл Етӗрне районӗнчи пайра пуҫлӑхӑн ҫумӗ пулса тӑрӑшнӑ.

Етӗрне районӗнчи пай (кунта Элӗк, Хӗрлӗ Чутай, Муркаш тата Етӗрне районӗсем кӗреҫҫӗ) пуҫлӑхӗн ҫумӗ пулма Сергей Васильев юстици подполковникне лартнӑ. Унччен вӑл Следстви управленийӗнче уйрӑмах пӗлтерӗшлӗ ӗҫсене тӗпчекен иккӗмӗш пайӑн аслӑ тӗпчевҫи пулнӑ.

Карпова тунӑ сӑн

Ака уйӑхӗн 6-мӗшӗнче «Пирӗн пурнӑҫ» район хаҫачӗн редакцине пичет ӗҫӗн ветеранӗсем, штатра тӑман корреспондентсем пухӑнчӗҫ. Тӗлпулӑвӑн сӑлтавӗ район тӗкӗрӗн сумлӑ юбилейӗ пулчӗ — хаҫат 85 ҫул тултарчӗ. Аса илмелли, сỹтсе явмалли, тишкермелли чылай пулчӗ пухӑннисен.

Тӗрлӗ ҫулсенче тӗп редакторта тимленӗ Николай Павлович Барышниковпа Михаил Александрович Чемашкин, чылай ҫул хушши район хаҫатӗнче вӑй хунӑ Семен Егорович Ванюшин, Ираида Сергеевна Самылкина, Светлана Петровна Князькова асаилӳсен ҫӑмхине сỹтнӗ май салам сӑмахӗсене те каларӗҫ. Александр Петрович Трофимов, Геннадий Александрович Савельев, Светлана Вячеславовна Яруткина, Галина Вячеславовна Зотова, Валерий Константинович Романов, Анатолий Алексеевич Тихонов (Ӗмӗт), Матвей Семенович Кораков обществӑлла корреспондентсем те район хаҫатне вӑрӑм кун-ҫул сунса саламланӑ май малалла та райхаҫатпа туслӑ пулма шантарчӗҫ. Район хаҫачӗн тӗп редакторӗ Алина Оринова район хаҫачӗн аталанӑвӗнче пухӑннисен тỹпи пысӑк пулнине каларӗ, пурне те Тав ҫырӑвӗсем тата парнесем парса чысларӗ.

Пӗтӗм Раҫҫейри халӑх фрончӗн Чӑваш Енри уйрӑмӗн хастарӗсем вӗри шыв хакӗ пирки иккӗленеҫҫӗ. Кун пирки регионти штаб элчи Светлана Лясина пӗлтернӗ. Халӑх фрончӗ ӑшӑ шывпа тивӗҫтерекенсем ҫавӑн хакне самай ӳстерме пултарнине тупса палӑртнӑ-мӗн. Ку вӑл шыв температурине виҫекен термометрсем улталанипе ҫыхӑннӑ иккен.

Вӗри шыв хакӗ пӗлтӗрхи кӑрлачӑн 1-мӗшӗнчен тытӑнса икӗ пайран тӑрать: сивӗ шывран (ӑна кубла метрпа виҫеҫҫӗ) тата ӑшӑ энергийӗнчен (Гкал).

Чӑваш Енӗн Стандартизаци, метрологи тата тӗпчев центрӗ термометрсене пӑхнӑ та ҫавсен пӗр пайӗ икӗ градуса кӑтартнине асӑрханӑ. Температурӑна тӗрӗс палӑртма градусӑн пӗчӗк пайӗ те пӗлтерӗшлине шута илсен кун пек хатӗрпе усӑ курма тӑхтаса тӑмалла пек. Унсӑр пуҫне хайхи термометрсем 1 градус таран тӗрӗс мар кӑтартаҫҫӗ иккен.

Ӑшӑ шыва виҫекен термометрпа коммерци тӗллевӗпе усӑ курни саккунлипе саккунсӑррине халӑх фрончӗн хастарӗсем Чӑваш Ен ертӳҫисене тӗрӗслеме ыйтаҫҫӗ. Вӗри шывпа ӑшӑшӑн тӗрӗс е тӗрес мар тӳлеттернине те тӗрӗслеттересшӗн-мӗн вӗсем.

Ака уйӑхӗн 7-мӗшӗнче Улатӑр хулинче тата районӗнче аварие пула газ пама пӑрахни пирки Чӑваш халӑх сайчӗ пӗлтернӗччӗ.

Инкек пула ун чухне 10,3 пин ҫурт ҫутҫанталӑк газӗсӗр тӑрса юлнӑччӗ. Авари 13 сехет те 25 минутра пулнӑ. Мӑкшӑ Республикинчи «Ардатов» ятлӑ газ валеҫекен станци тӗлӗнче пӑрӑх сиенленнӗ-мӗн те «Улатӑр-1» станцие кӗрекен объектсем шар курнӑ.

Инкеке яваплисем ҫийӗнчех сирме шантарнӑ пулин те хӑвӑрт кӑна юсама йывӑртарах ҫав ӗнтӗ. Чулхула облаҫӗнчен ятарлӑ бригада та пырса ҫитнӗ, анчах Инкеклӗ ӗҫсен министерстви газ пама тепӗр куннех пама тытӑнасса шантарни пурнӑҫа кӗреймен. Ҫапла вара Улатӑр хула администрацийӗнче ӗҫе акан 9-мӗшӗсӗр пӗтерме май килмест тени тӳрре килнӗ. Инкек ӗнер каҫхине кӑна сирсе пӗтернӗ.

Аслӑ Ҫӗнтерӳ ҫывхарнӑ май ветерансем валли парнесем хатӗрлеҫҫӗ. Ҫу уйӑхӗн 3-12-мӗшӗсенче Тӑван ҫӗршывӑн Аслӑ вӑрҫин ветеранӗсем тата сусӑрӗсем тӗрлӗ транспортпа тӳлевсӗр ҫӳреме пултараҫҫӗ.

Унта автобуссем кӑна мар, пуйӑссем, авиа- тата юханшыв транспорчӗсем кӗреҫҫӗ. Ветеранпа пӗрле тепӗр ҫын, ӑна илсе ҫӳрекенни, тӳлевсӗр кайма пултарать.

Чӑваш Енре кӑна мар, унӑн тулашӗнче те тӳлевсӗр ҫӳреме май пулӗ. Хальлӗхе пӗлтернӗ тӑрӑх, 14 фронтовик Мускаври, Питӗрти, Севастопольти, Волгоградри уяв мероприятийӗсене хутшӑнма кӑмӑл тунӑ. Ветерансене вокзала та илсе ҫитерӗҫ.

ЧР транспорт министрӗ Владимир Филиппов пӗлтернӗ тӑрӑх, тӳлевсӗр ҫӳрес тесен кассӑсене пымалла. Унта кирлӗ документсене хатӗрлӗҫ. Кун валли Тӑван ҫӗршывӑн Аслӑ вӑрҫин участникӗ, сусӑр пулнине ӗнентерекен удостоверени, паспорт кирлӗ. Ветеранпа илсе ҫӳрекен ҫыннӑн паспорчӗ те кирлӗ.

Акан 27-мӗшӗнчен пуҫласа "Ҫӗнтерӳ ҫырӑвӗ" акци иртӗ. Ҫав кун тӗп хуламӑрти аслӑ тата вӑтам пӗлӳ паракан вӗренӳ заведенийӗсенче Ҫӗнтерӳ сехетне йӗркелеҫҫӗ, волонтерсен корпусӗн хастарӗсем студентсене вӑрҫӑ тематикиллӗ тата Ҫӗнтерӗвӗн сумлӑ юбилейне халалланӑ хӑтлавсемпе паллаштарӗҫ.

Тӑван ҫӗршывӑн аслӑ вӑрҫинче ҫапӑҫнӑ аслӑ ӑрури тӑванӗсем патне ҫамрӑксем «Ҫӗнтерӳ ҫырӑвӗ» ҫырӗҫ. Виҫкӗтеслӗ ҫырусенче вӗсем хӑйсем тӑван кӗтесӗшӗн, республикӑшӑн, ҫӗршывшӑн тата Аслӑ Ҫӗнтерӗвӗн сумне упраса хӑварассипе мӗн тунипе паллаштарӗҫ.

Ҫырӑва А4 форматлӑ хут ҫине ҫырмалла, ят-хушамата, ӑҫта вӗреннине е ӗҫленине палӑртмалла, ӑна кам ячӗпе шӑрҫаланине кӑтартмалла. Ҫырусене нимеҫӗсем (волонтерсем) пухӗҫ, тишкерме-пӗтӗмлетме федерацири нимеҫӗсен штабне ҫитерӗҫ.