t.me/nikamran каналтан илнӗ сӑнӳкерчӗк

Чӑваш Енӗн финанс министрӗн ҫӗнӗ заместитель. Ку должноҫре Марина Загребаева ӗҫлеме тытӑннӑ.

Марина Загребаева 2004-2005 ҫулсенче ҫав должноҫре тӑрӑшнӑ-ха. Ун хыҫҫӑн вӑл Куславкка районӗн администрацийӗнче, Финанс министерствинче ӗҫленӗ.

2016-2022 ҫулсенче ял хуҫалӑх министрӗн ҫумӗ пулса тимленӗ. Халӗ ҫав хӗрарӑм каллех республикӑн Финанс министерствинче тимлеме тытӑннӑ.

Шупашкарти Чӑваш тӗррин музейӗнче пуш уйӑхӗн 17-мӗшӗнче «КӖЛЕТ. Обыденная и обрядовая стороны клети» ятлӑ курав уҫӑлӗ. Курав музейӑн этнографи коллекцийӗнчи япаласемпе паллаштарӗ.

Кӗлет — чӑваш кил-ҫуртӗнчи уйрӑм хуралтӑ. Чылай чухне ӑна тӑватӑ стеналлӑ пураран тунӑ. Унта хресчен апат-ҫимӗҫ, тыр-пулпа ҫӑнӑх, савӑт-сапапа япаласем упранӑ. Вӗсене ҫӳпҫере тытнӑ. Ҫулла кӗлетре каннӑ.

«Кӗлет» сӑмах чӑваш чӗлхине вырӑссенчен кӗнӗ.

Чӑвашсем качча каякан хӗре туй умӗнхи кун кӗлетре тумлантарнӑ.

culture.cap.ru сӑнӳкерчӗкӗ

Шри-Ланкӑра вырӑс чӗлхине вӗрентекен центр уҫӑлӗ. Ӑна чӑвашсене ҫутта кӑларма нумай тӑрӑшнӑ Иван Яковлев ятне парӗҫ.

Чӑвашсене паллӑ вӗрентекенӗ ҫуралнӑранпа 175 ҫул ҫитнине халалласа ирттермелли мероприятисене йӗркелессишӗн яваплӑ комитет ҫак эрнере ларӑва пуҫтарӑннӑ. Ларӑва РФ Патшалӑх Думин депутачӗ Анатолий Аксаков ертсе пынӑ. Унта мероприятисен планне сӳтсе явнӑ.

Ака уйӑхӗн 17-21-мӗшӗсенче РФ Патшалӑх Думинче Иван Яковлев ҫуралнӑранпа 175 ҫул ҫитнӗ ятпа курав та уҫӗҫ.

cap.ru сӑнӳкерчӗкӗ

Трубина Мархви ҫуралнӑранпа 135 ҫул ҫитнӗ май «Асӑнмалӑх, савӑнмалӑх» викторина иртӗ.

Чӗмпӗрти чӑваш шкулӗнче вӗреннӗ, РСФСР шайӗнче Ленин орденне тивӗҫнӗ учителӗн тата чӑвашла ҫыракан малтанхи хӗрарӑм писательницӑсенчен пӗрин «Мучар», «Асӑнмалӑх, савӑнмалӑх», «Ача чухнехи» ятлӑ хайлавӗсем уйрӑмах паллӑ. Ҫыравҫӑ 1888 ҫулхи авӑн уйӑхӗн 2-мӗшӗнче Куславкка районӗнчи Куснар ялӗнче ҫуралнӑ. Вырӑнти 7 класлӑ шкулта ачасене вырӑс чӗлхипе литературине 30 ҫула яхӑн вӗрентнӗ.

Пуштуйӑхӗн 1-мӗшӗнчен пуҫласа ака уйӑхӗн 30-мӗшӗччен вӑл «Асӑнмалӑх, савӑнмалӑх» регионсем хушшинчи викторина иртӗ.

Ӑна Трубина Мархви ячӗллӗ ҫемье вулавӗн центрӗпе Чӑваш чӗлхипе литературин учителӗсен ассоциацийӗ, И.Н. Ульянов ячӗллӗ Чӑваш патшалӑх университечӗ тата

«Тантӑш» хаҫат ирттереҫҫӗ.

cap.ru сӑнӳкерчӗкӗ

Республикӑн клиника онкологи диспансерӗнче хырӑм ай пырӗнче усал шыҫӑ пуррипе ҫуккине палӑртма ҫӗнӗ йышши меслетпе усӑ кураҫҫӗ.

Асӑннӑ меслет ультрасасӑпа эндоскоппа ҫыхӑннӑ. Ҫав мел эндосонографи (эндоУЗИ) ятлӑ. Кӑҫалхи икӗ уйӑхра ҫав меслетпе 13 ҫынна тӗрӗсленӗ.

Тӗрӗслеве организма пӗтӗмӗшле наркоз тунӑ хыҫҫӑн ирттереҫҫӗ иккен. Пӗр ҫынна тӗрӗслеме 1,5-2 сехет иртет.

cap.ru сӑнӳкерчӗкӗ

Чӑваш Ене Донбаспа Херсон тӑрӑхӗнчен куҫса килнӗ 20 ҫемье хваттерлӗ пулнӑ. Пирӗн патра ҫапла майпа 20 ҫемьери 31 ҫын тӗпленнӗ. Патшалӑх вӗсене ҫурт-йӗр сертификачӗсем валеҫсе панӑ. Ҫурт-йӗр сертификатне туянма вӗсем хӑйсем кӑмӑл тунӑ. 20 ҫемьене ҫурт-йӗр сертификачӗ илме хыснаран 63,5 млн тенкӗ уйӑрса панӑ.

Сертификат илме заявленисене нумай ӗҫ пурнӑҫлакан центрсенче те, патшалӑх пулӑшӑвӗсен порталӗнче йышӑнаҫҫӗ.

Ют регионта 14 миллион тенкӗ сертификат илнисенчен 5 ҫемье пирӗн патра хваттер туянма кӑмӑл тунӑ.

"Про Город" сайтри сӑн

Паян Ҫӗрпӳ районӗнче «Ҫӗрпӳ мормышки» иртнӗ. Вӑл – пулӑҫсен тупӑшӗвӗ.

Пулӑ тытма юратакансем Кӑнар ял тӑрӑхӗнче пухӑннӑ. Вӗсем пӗр мормышкӑллӑ, пӗр йӗплӗ хӗллехи вӑлтапа пулӑ тытнӑ. Ӑмӑрту 3 сехете тӑсӑлнӑ.

Ҫӗнтерӳҫӗсене виҫе номинаципе палӑртнӑ: чи малтан пулӑ тытакан, чи пысӑк пулӑ тытакан, чи опытлӑ пулӑҫ. Ытти номинаци те пулнӑ. Мала тухнисене дипломпа, парнепе хавхалантарнӑ.

"Про Город" сайтри сӑн

Ӗнер, пуш уйӑхӗн 10-мӗшӗнче, 18 сехет те 3 минутра Шупашкарти «Ҫӗнӗ хула» микрорайонта чутах ҫын ҫине ҫутӑ юпи ӳкмен. Вӑл урампа пынӑ вӑхӑтра икӗ юпа пралук-качки йӑтӑнса аннӑ. Юрать, ҫын тарса ӗлкӗрнӗ.

Ҫутӑ юпине трактор юр тастанӑ чухне ҫаклатнӑ-мӗн. Юпасем ӳкни видеокамера ҫине лекнӗ. Хула администрацийӗ пӗлтернӗ тӑрӑх. Вӗсене пуш уйӑхӗн 17-мӗшӗччен улӑштарӗҫ.

cap.ru сӑнӳкерчӗкӗ

Пуш уйӑхӗ пуҫланнӑранпа Чӑваш Енре 9 ҫын пӳрт тӑрринчен ӳкнӗ. Кун пирки катастрофа медицинин тата васкавлӑ медпулӑшу центрӗ пӗлтерет.

Шар курнӑ ҫынсем 40-80 ҫулсенче. Вӗсене пурне те, тӑххӑрӑшне те, пульницӑна илсе ҫитернӗ. Пӗрисем шӑммине хуҫнӑ, теприсен пуҫ мими чӗтреннӗ.

Ӗнер тухтӑрсем икӗ ҫын патне ҫитнӗ. 40 ҫулти арҫын тата 66-ри хӗрарӑм пӳрт тӑрринчен юр антарнӑ чухне ӳкнӗ. Хӗрарӑмӑн аяк пӗрчисем, пӗҫҫи хуҫӑлнӑ. Арҫын вара ӳксен тӑнне ҫухатнӑ.

https://vk.com/wall-35906750_198026 сӑнӳкерчӗкӗ

Пуш уйӑхӗн 15-мӗшӗнче Шупашкар районӗнчи Ишлейри Пултарулӑх ҫуртӗнче (Совет ҫуртӗнчи 52-мӗш ҫурт)

куҫман пурлӑха регистрацилемешкён документсене вырӑна тухса йышӑнӗҫ.

Росреестрӑн управленийӗн тата Шупашкарти муниципалитет округӗн специалисчӗсем ҫынсене ирхи 9 сехет те 30 минутран пуҫласа 14 сехетчен йышӑнӗҫ.  

Шупашкар районӗнче кадастр учӗтне илнӗ, анчах вӗсене Росреестрта патшалӑх регистрацийӗ витӗр кӑларман ҫӗр лаптӑксем, уйрӑм ҫуртсем, дачӑсем нумай.

Тӗплӗнрех ыйтса пӗлмелли телефон номерӗсем – 8 (83540) 2-40-82 (Павел Дочинец, Шупашкар муниципалитет округӗн ҫӗр хутшӑнӑвӗсен пайӗн пуҫлӑхӗ), 8 (83540) 2-55-00 (Галина Кушникова, Ишлейри территори пайӗн тӗп специалист-эксперчӗ).