Республикӑри ҫӳп-ҫап илсе тухакан организацире ӗҫлекен ҫын суранланнӑ. Кун тӗлӗшпе пуҫиле ӗҫ пуҫарнӑ.

Следстви комитечӗн Чӑваш Енри следстви органӗсем хыпарланӑ тӑрӑх, нарӑс уйӑхӗн 18-мӗшӗнче вӑл ҫӳп-ҫап контейнерне машинӑна тӑкмашкӑн ҫаклатнӑ. Анчах лешӗ персе аннӑ. Ҫыннӑн сулахай енчи пичӗн шӑммисем хуҫӑлса пӗтнӗ.

Ҫӳп-ҫап контейнерӗ юсавсӑр пулнӑ иккен. Организацин должноҫри ҫыннисем ӑна вӑхӑтра улӑштарман.

Хальхи вӑхӑтра следстви пырать, ӗҫ-пуҫа малалла уҫӑмлатаҫҫӗ.

"Про Город" сайтӗнчен илнӗ сӑн. Сергей Петров тунӑ видео скринӗ.

Паян ҫӗрле Шӑмӑршӑра пурӑнакансем темӗн кӗмсӗртетнӗ сасӑпа вӑранса кайнӑ. Шыв башни ӳкнӗ-мӗн.

Паян республикӑра ҫил вӑйланнӑ. Башня шӑпах ӑна пула ӳкнӗ. Чӑннипе, башня кивелни пирки шӑмӑршӑсем ҫуллах калаҫнӑ. Вӑл трос ҫинче кӑна тытӑнса тӑнӑ, кӑштах ҫил тухсанах силленнӗ.

«Вӑт ҫапла пӗтӗм Шӑмӑршӑ йӑтӑнать», — тет башня ӳкнине видео тунӑ ҫын.

Аса илтерер: паян Красноармейски районӗнчи Кивӗ Йӗкӗт ялӗнче ҫил пӗр ҫынсен теплицине йӑтса кӳршисем патне вӗҫтерсе кайнӑ.

Владимир Живов сӑнӳкерчӗкӗ

Ӗнер, чӳк уйӑхӗн 12-мӗшӗнче, Питӗр хулинчи чӑвашсем Улаха пуҫтарӑннӑ. Мероприяти Калинин районӗнчи 7-мӗш вулавӑшра иртнӗ.

Питӗрти чӑваш хастарӗсем наци культурин фестивальне 13-мӗш хут ӗнтӗ пухӑнаҫҫӗ.

Ӗнер вӗсем Алиса Шарпаева ӑста хатӗрленӗ чӑваш эрешӗсемпе тумӗсене кӑтартнӑ. Иван Миронов ертсе пынипе хатӗрленӗ «Улах» музыкӑпа театр постановки те куракансене килӗшнӗ. «Парне» фольклор ансамблӗ, «Иван тата Алиса» пултарулӑх дуэчӗ, юрӑсен авторӗ тата композитор Надежда Кириллова та Улаха хӑйсен пултарулӑхӗпе илемлетнӗ-пуянлатнӑ.

Ачасен ӗҫӗсене тӗрӗсленӗ самант. Зинаида Михайлова страницинчен илнӗ сӑнӳкерчӗк

Чӳк уйӑхӗн 11-мӗшӗнче Трак енри шкулсенче вӗренекенсем (пурӗ 39 ача) чӑваш чӗлхипе тата литературипе регион олимпиадине хутшӑннӑ. Ку хыпара Зинаида Михайлова «Контактра» пӗлтернӗ.

«Паллах, ыйтусене тӗрӗс хуравлама тӑван чӗлхепе литературӑна лайӑх пӗлни, юлашки ыйтура палӑртнӑ темӑна уҫса пама кашниех хӑйӗн шухӑш ҫӑмхине сӳтсе пырса сочинени ҫырса пама пултарни питӗ кирлӗ. Чӑваш чӗлхине юратса вӗренекен ачасем олимпиада ӗҫӗсене тӑрӑшса пурнӑҫлани, ытларах балл пухса ҫӗнтерӳҫӗ ята илни савӑнтарать», — хыпарланӑ Зинаида Михайлова.

«Пятница» телешоувӗнчен илнӗ скриншот

Ҫӗмӗрле каччи Максим Мачкасин «Пятница» телеканал кӑтартакан «Битва шефов» телешоуна хутшӑннӑ. Чӑваш Енри повар хутшӑннӑ кӑларӑм эфира чӳк уйӑхӗн 7-мӗшӗнче тухнӑ.

Константин Ивлев тата Ренат Агзамов шеф-поварсем хӑйсен командисене чи пултаруллисене суйласа илсе тӗрлӗ апат хатӗрлеҫҫӗ.

Максим Мачкасин телекӑларӑма Ҫӗмӗрле тата Белгород хулисен ячӗпе хутшӑннӑ. Максим повара вӗренсе тухнӑ хыҫҫӑн Ҫурҫӗре тухса кайнӑ иккен. Унта ӗҫ тупма йывӑртан урам шӑлаканта тӑрӑшнӑ. Белгород хулинче вара вӑл ресторана вырнаҫма пултарнӑ. Халӗ Максим мангал ҫинче какай ӑшалать. Унӑн стейкӗсемпе шашлӑкне ҫынсем юратса ҫиеҫҫӗ.

«Кухньӑра эпӗ питӗ кӑмӑллӑ ҫын. Мана Пупсик теҫҫӗ», — тенӗ Максим.

pg21.ru сайтран илнӗ сӑнӳкерчӗк

Паян пирӗн тӑрӑхра вӑйлӑ ҫил алхасассине синоптиксем малтанах пӗлтерчӗҫ-ха. Инкеклӗ ӗҫсен министерстви ҫынсене СМС-ҫырусем те ярса панӑччӗ. Паян, чӳк уйӑхӗн 13-мӗшӗнче, ҫил ҫеккунтра 20-22 метр хӑвӑртлӑхпа вӗрессине систернӗччӗ.

Красноармейски районӗнче, ав, вӑйлӑ ҫил пӗрисен пахчинчи теплицӑна илсе ывӑтнӑ, чӳрече кантӑксӗсене ватнӑ. Кун пирки массӑллӑ информаци хатӗрӗсенчен пӗрне пӗлтерекен тупӑннӑ, сӑмахне ӗнентерме сӑнӳкерчӗк ярса панӑ.

«Ирхине пахчана тухрӑмӑр та теплица кӳршӗсен картине ҫитсе выртнӑ, чӳрече кантӑкне ватнӑ», — пӗлтернӗ Кивӗ Йӗкӗт ҫынни.

21.мвд.рф сӑнӳкерчӗкӗ

Чӳк уйӑхӗн 12-мӗшӗнче ирхи 5 сехет тӗлӗнче «Атӑл» М–7 автоҫул ҫинче инкек пулса иртнӗ. Шупашкар районӗнчи Апаш ялӗ тӗлӗнче «Хёндай-Туксон» кроссовер тырӑ тиенӗ «КамАЗ» автомобильпе пырса ҫапӑннӑ.

Ҫӑмӑл машина рулӗ умӗнче Чулхула облаҫӗнче пурӑнакан 34 ҫулти арҫын пулнӑ.

Ҫул-йӗр инспекторӗсем малтанласа шухӑшланӑ тӑрӑх, кроссовер водителӗ дистанцие пӑхӑнман.

Эрех ӗҫмен-и тесе икӗ водителе те тӗрӗсленӗ — вӗсем урах пулнӑ.

Чулхула облаҫӗнче пурӑнакан арҫынна пульницӑна ӑсатнӑ, унта ӑна тухтӑрсем малтанхи пулӑшу кӳнӗ хыҫҫӑн сипленме килне янӑ.

almode.ru сайтри сӑн

11.11.2022. Ӗнер ҫакӑн пек кун пулнӑ. Хисепсем хитре тесе республикӑра эрнекун нумай ҫемье ҫавӑрнӑ. Канмалли кун пулманнине пӑхса тӑман.

Чӳкӗн 11-мӗшӗнче Шупашкарта 24 мӑшӑр пӗрлешнӗ.

"Хитре хисеплӗ кун ҫӗнӗ ҫемьесемшӗн лайӑх паллӑ пултӑр", - тенӗ тӳре-шара.

cap.ru сӑнӳкерчӗкӗ

Етӗрне районӗн пуҫлӑхӗн пуканне урӑх ҫын йышӑннӑ. Вӑл - Станислав Трофимов. Унччен Станислав Шупашкар хула администрацийӗн ҫамрӑксен тата общество аталанӑвӗн пайӗн пуҫлӑхӗ те пулнӑ. Юлашки вӑхӑтра ЧР Патшалӑх Канашӗн Общество канашӗн председателӗнче вӑй хунӑ.

29 ҫулти ҫамрӑка депутатсем пӗр саслӑн пулса суйланӑ. Станислав Трофимов Красноармейски ялӗнче 1992 ҫулта ҫуралнӑ. Тӑван тӑрӑхӗнче пурӑннӑ чухнех общество ӗҫне хастар хутшӑннӑ. Вӑл - "Пӗрлӗхлӗ Раҫҫей" парти пайташӗ, регионти политканашӗн президиумне кӗрет.

chuvashia.sledcom.ru сӑнӳкерчӗкӗ

Шупашкар районӗнче Питтукасси ялӗнчи кафе патӗнче кӑҫалхи ҫурла уйӑхӗн 18-мӗшӗнче икӗ арҫын хирӗҫсе кайнӑ.

Шупашкарта пурӑнакан 44 ҫулти арҫын хӑйӗн пӗлӗшӗпе тем пайлайман. Ӳсӗрскер ӑна вӗлерес тенӗ. Вӑл килне кайса ҫӗҫӗ йӑтса килнӗ. Унпа вӑл 39 ҫулти пӗлӗшне тӗрлӗ ҫӗртен 8 хутран кая мар чиксе пӗтернӗ. Шар курни инкек вырӑнӗнчех вилсе кайнӑ.

Ҫынна вӗлернӗ арҫын тӗлӗшпе РФ Пуҫиле кодексӗн 105-мӗш статйин 1-мӗш пайӗпе ӗҫ пуҫарнӑ. Пуҫиле ӗҫе Шупашкар районӗнчи суда ярса панӑ.