Ҫӑлкуҫ: cap.ru

Чӑваш Республикин команди патшалӑх сборнӑйӗ йышӗнче сӑрт-ту ҫулӗсенчи спорт туризмӗ енӗпе иртнӗ тӗнче шайӗнчи чемпионатра виҫҫӗмӗш вырӑн йышӑннӑ.

Чӑваш Республикинчен ҫак ӑмӑртӑва Григорий Львов, Максим Шарыпкин, Федор Ильин, Виктор Краснов тата Надежда Краснова хутшӑннӑ. Вӗсем Тянь-Шаньти Кӑрсӑс ту хырҫинче йӗркеленӗ йывӑрлӑх енчен 6-мӗш шайра тӑракан ҫула парӑнтарнӑ.

«Маршрута йӗркелес тата ӑна тивӗҫлӗн парӑнтарас енӗпе нумай ӗҫ тунӑ: тем тесен те кашни спортсмен вӑй-хал, техника тата кӑмӑл-сипет тӗлӗшӗнчен хайӑх аталанмалла. Йывӑрлӑх енчен улттӑмӗш шайра тӑракан маршрутсем – ҫак спортӑн чи йывӑр тӗсӗ, 3 эрне хушши тӑсӑлакан маршрутра спортсменсем хӑйсем ҫине тата юлташсем ҫине кӑна шанма пултараҫҫӗ. Чӑваш Республикин спорт туризмӗ енӗпе йӗркеленӗ наци команди 2018 ҫултанпа спорт туризмӗн «сӑрт-ту маршручӗ» дисциплининче Раҫҫей тата тӗнче шайӗнче иртекен ӑмӑртусенче ӑнӑҫлӑ хутшӑнса лайӑх кӑтартусем кӑтартать. Пирӗн ушкӑнсем 7 ҫул хушши Тӗнче чемпионачӗсенче, Раҫҫейри чемпионатсемпе кубоксенче ҫӗнтерӳҫӗ тата призер пулса тӑраҫҫӗ, сӑрт-ту туризмӗ енӗпе чӑваш шкулӗ ҫӳллӗ шайра пулнине тивӗҫлӗн кӑтартса параҫҫӗ», — палӑртнӑ Чӑваш Республикин Спорт туризмӗн федераци президенчӗ Владимир Атачкин.

Малалла...

"Контактри" сӑн

Чӑваш Енре питӗ сайра тӗл пулакан хурт-кӑпшанка тупса палӑртнӑ. Ӑна Леонид Егоров биолог «Чӑваш вӑрманӗ» паркра тупнӑ.

Livilla ulicis ҫулҫӑ ҫинче пурӑнакан хурт-кӑпшанкӑ йышне кӗрет. Унашкаллине Чӑваш Енре хальччен асӑрхаман. 20 ҫул каялла ун пеккине Мускав облаҫӗнче тупнӑ. Чӑваш Енре тупни – ҫӗршывӗпе иккӗмӗш тӗслӗх.

Ӑсчахсен шухӑшӗпе, республикӑра ку хурт-кӑпшанкӑ тупӑнни климат улшӑннипе ҫыхӑннӑ. Тӗпчев кӑтартӑвӗсене ӑслӑлӑх журналӗнче пичетленӗ.

"Контактри" сӑн

Сӗнтӗрвӑрри хулинче автошкул директорӗ хӗрарӑма машинӑпа ҫапса хӑварнӑ. Вӑл тӑванӗн ачипе «зебра» урлӑ каҫма тӑнӑ.

«Рено Дастерпа» пыракан хӗрарӑм тавралла лайӑх курӑнсан та «зебра» патне ҫывхарнӑ чухне хӑвӑртлӑха чакарман, хӗрарӑм ҫине пырса кӗнӗ. Вӑл вӑйлах суранланнӑ. Юрать, хӑть ача шар курман.

Автошкул директорӗ тӗлӗшпе пуҫарнӑ пуҫиле ӗҫе суда ярса панӑ.

"Контактри" сӑн

Республикӑри ача-пӑча клиника пульницин тухтӑрӗсем пӗчӗк ачасене магнитлӑ конструктор илче памалла марри пирки асӑрхаттараҫҫӗ. Ӑна ҫӑтса янӑ тӗслӗх нумайланнӑ.

Пӗчӗккисем, уйрӑмах 3 ҫула ҫитменнисем, вӗтӗ теттене хӑвӑрт ҫӑтса яраҫҫӗ – аслисем асӑрхаса та ӗлкӗреймеҫҫӗ. Чи хӑрушши – магнитсем организмра та пӗр-пӗрин патнелле туртӑнаҫҫӗ. Ку пурнӑҫшӑн хӑрушӑ.

Пульницӑри тухтӑрсем 2 ҫулти ачан организмӗнчен 13 магнитлӑ шарик тата батарейка кӑларнӑ.

"Контактри" сӑн

Республикӑра «Ветеринари чиперкки» конкурс иртнӗ. Унта 17 ветеринар хутшӑннӑ. Кашниех видео- тата фотохӑтлавпа паллаштарнӑ, хӑйсен ӗҫӗ пирки каласа кӑтартнӑ, ыйтусене хуравланӑ.

Ҫӗнтерӳҫӗ ятне Екатерина Чучулина тивӗҫнӗ. Вӑл Шупашкарти ветеринари станцинче ӗҫлет. «Ветеринари – чун ӗҫӗ», – тет вӑл.

Кунсӑр пуҫне призерсене 8 номинацире палӑртнӑ.

Хисеплӗ ватӑсем канашлаҫҫӗ

Шупашкарта Наци вулавӑшӗн пӳлӗмӗнче Чӑваш Республикинчи "Ваттисен тӗп канашӗ" ("Центральный совет старейшин") обществӑлла пӗрлешӗвӗн черетлӗ ларӑвӗ иртнӗ. Ертӳҫи - Карягин Федор Александрович, географ-эколог. Чи малтанах Василий Кервен ҫыравҫӑна Александр Пушкин хайлавӗсене ӑнӑҫлӑ куҫарнӑшӑн Ылтӑн медаль ҫӗнсе илнӗ ятпа саламларӗҫ. Трак енре туризм еплерех аталанса пыни ҫинчен, Пӗтӗм тӗнчери туризмпа тараватлӑх индустрийӗн 31-мӗш куравне хутшӑнни тата вӑл епле иртни ҫинчен Красноармейски вӑтам шкулӗн вӗрентекенӗ, таврапӗлӳҫӗ Виталий Михайлов каласа кӑтартрӗ.

Тӗп канаш пайташӗсене ачасем тӑван чӑваш чӗлхипе сахал калаҫни те, ача сачӗсемпе шкулсенче чӗлхене вӗрентес ӗҫ-пуҫ еплерех пыни те хумхантарчӗ.

Ларура Чӑваш енри хисеплӗ ватӑсем малашне тумалли ӗҫсене те палӑртса хӑварчӗҫ.

ШӖМ тунӑ сӑн

Хӗрлӗ Чутайра хӗрӗнкӗ хӗрарӑм полицейскисенчен тарма хӑтланнӑ.

Вӑл руль умӗнче ларнӑ чухне машинӑна итлеттереймен – йывӑҫа пырса ҫапӑннӑ. Ку каҫхине пулнӑ. Салонра унӑн 9 уйӑхри ачи те ларнӑ.

Хайхи хӗрарӑм машинине, ачине пӑрахса хӑварса тарма хӑтланнӑ. Анчах ӑна йӗрке хуралҫисем хӑваласа ҫитнӗ, ун тӗлӗшпе административлӑ протокол ҫырнӑ. Хӗрарӑм пирки опека органне те пӗлтернӗ.

"Контактри" сӑн

Тӑвай муниципалитет округӗнчи пӗр ялта хӑйне евӗр ҫурт пур. Кун пирки «Контактра» халӑх тетелӗнчи «Pro Янтиково» ушкӑн пӗлтернӗ.

Ҫав ҫурта кил хуҫисем Раҫҫей ялавӗнчи тӗссемпе илемлетнӗ: хӗрлӗ, кӑвак тата шурӑ. Ҫапла ҫурт ялав пекех курӑнать.

Ахӑртнех, унта Тӑван ҫӗршыв патриочӗсем пурӑнаҫҫӗ.

"Контактри" сӑн

Улатӑр тӑрӑхӗнче пурӑнакан Марина Михайловна чире пула ӗҫлеме пӑрахнӑ. Вӑл – 60 ҫулта. Укҫи ҫитсе пымасть. Пӳрте хутса ӑшӑтас тесе вӑл кӑмакара мӗн ҫунать – ҫавна пуҫтарса ҫӳренӗ.

Марина Михайловна Улатӑрти комплекслӑ центртан пулӑшу ыйтнӑ. Пулӑшу хӑвӑртах ҫитсен питех те тӗлӗннӗ вӑл. Ӑна «Операция бабушка» фонд пулӑшнӑ. Темиҫе эрнеренех килӗ умне 5 кубла метр хурӑн вутти килсе выртнӑ.

Академи драма театрӗн сӑнӳкерчӗкӗ

Пуш уйӑхӗн 21-мӗшӗнче К.В.Иванов ячӗллӗ Чӑваш патшалӑх академи драма театрӗнче РСФСР искусствӑсен тава тивӗҫлӗ ӗҫченне Леонид Никонорович Родионова тата СССР халӑх артистне Алексей Константинович Ургалкина халалланӑ пултарулӑх каҫӗ иртнӗ.

Культура учрежденийӗн халӑх тетелӗнчи ушкӑнӗнче пӗлтернӗ тӑрӑх, «тӗлӗнмелле кӑмӑллӑ аса илӳсем, архиври видеосем, спектакльсен сыпӑкӗсем янӑранӑ теарта». Астӑвӑм каҫне камсем пырса ҫитнине кӗске хыпарта пӗлтермен,театрӑн сайтӗнче те ун пек хыпара курмарӑмӑр.