news.mail.ru сайтри сӑн

Шупашкарти арҫын машина туянма тӑрсан ултавҫӑсен тӗлне лекнӗ. Ҫапла вӑл 1,5 миллион тенкӗсӗр тӑрса юлнӑ.

Арҫын машина сутни пирки интернетра пӗлтерӳ тупнӑ та сутуҫипе ҫыхӑннӑ. Хайхискер унпа машинӑна мӗнле туянасси пирки калаҫнӑ. Кун хыҫҫӑн арҫын ӑна машинӑн ҫур хакне куҫарса панӑ та «тимӗр урхамаха» кӗтме пуҫланӑ. Анчах «сутуҫӑ» каллех укҫа ыйтма тытӑннӑ — машинӑна илсе килессипе ҫыхӑннӑ пӑтӑрмахсем сиксе тухнӑ иккен.

Арҫын машинӑна кӗтсе илеймен. Вӑл полицие кайнӑ.

vk.com/wall-211012056_3805 пабликран илнӗ сӑнӳкерчӗк

Чӑваш транспорт управленийӗ 61-мӗш тата 62-мӗш троллейбуссене «Звениговский» аш-какай комбиначӗ патне ҫити ҫӳретме килӗшмен. Асӑннӑ комбинат Ҫӗнӗ Шупашкарти промзонӑра вырнаҫнӑ.

Тӗрӗслемелле мелпе унта троллейбуссем ярса пӑхнӑ, анчах халӑх сахал ҫӳренӗрен парахӑҫлас тенӗ. Ҫитменнине тата предприяти рабочисене хӑйӗн транспорчӗпе турттарать.

Ҫапла вара 61-мӗш троллейбус Шупашкарти Гладков урамӗнчен Ҫӗнӗ Шупашкарти Иваново микрорайонне ҫитет, ь62-мӗш маршрут — Шупашкарти Чапаев ячӗллӗ завод патӗнчен Ҫӗнӗ Шупашкарти Иваново микрорайон патне ҫити.

cap.ru сайтри сӑн

Раштавӑн 20-мӗшӗнче Шупашкарти Хӗрлӗ тӳремре Хӗл Мучи резиденцийӗ алӑкне уҫӗ. Вӑл мӗнле расписанипе ӗҫлени паллӑ.

Резиденци раштавӑн 20-29-мӗшӗсенче 18 сехетрен пуҫласа 20 сехетчен ӗҫлӗ. Раштавӑн 29-30-мӗшӗсенче вара —13 сехетрен пуҫласа 20 сехетчен (15-16 сехетре тӑхтав пулӗ). Раштавӑн 31-мӗшӗнче резиденци 12 сехетрен пуҫласа 16 сехетчен уҫӑ пулӗ.Кӑрлачӑн 1-8-мӗшӗсенче унта 13-20 сехетсенче кайса курма пулать (15-16 сехетре тӑхтав).

Хӗл Мучи патне тӳлевсӗрех кӗртеҫҫӗ.

zyablikovo.mos.ru сайтри сӑн

Ҫӗнӗ ҫулти канмалли кунсенче Шупашкарта фейерверк яма юрамӗ. Ҫапла йышӑннӑ Инкеклӗ лару-тӑру енӗпе ӗҫлекен комисси.

Ку чару раштавӑн 25-мӗшӗнчен пуҫласа кӑрлачӑн 11-мӗшӗччен вӑйра пулӗ. Ҫак тапхӑрта Шупашкарта пушара хирӗҫ режим пулӗ. Шупашкар пуҫлӑхӗ Станислав Трофимов ӑнлантарнӑ тӑрӑх, ҫакна ҫынсене, ҫуртсене, хула инфраструктурине хӑрушсӑрлӑхпа тивӗҫтерес тесе йышӑннӑ.

«Контактра» халӑх тетелӗнчи сӑн

«Фольксваген» машинӑн кустӑрми ҫул ҫинчех тухса ӳкме пуҫланӑ. Хӗрарӑм-водитель ҫул хӗрринче чарӑннӑ та тухса ӳкнӗ болтсене шыранӑ.

Шӑп ҫав вӑхӑтра Иван Пиняевпа Георгий Тихонов полицейскисем Ҫӗнӗ Шупашкартан тухнӑ ҫӗртен иртсе пынӑ. Ҫул хӗрринче машина ларнине, хӗрарӑм темскер шыранине курсан чарӑннӑ.

Инспекторсем хӗрарӑма кустӑрмана улӑштарма пулӑшнӑ. Вӗсем ӑна ҫывӑхри заправкӑна ҫити ӑсатсах янӑ.

pravdapfo.ru сайтри сӑн

Паян, раштавӑн 15-мӗшӗнчен, Шупашкарта елка пасарӗсем ӗҫлеме тытӑннӑ. Вӗсем раштавӑн 31-мӗшӗччен ӗҫлӗҫ.

Пӗтӗмпе 15 вырӑнта чӑрӑш сутаҫҫӗ: Трактор тӑвакансен проспекчӗ («Шупашкар» суту-илӳ ҫурчӗ ҫывӑхӗнче, 45-мӗш тата 71-мӗш ҫуртсем патӗнче), Гагарин урамӗнчи 29-мӗш ҫурт, Ильбеков урамӗнчи 7/2-мӗш ҫурт, Хузанкай урамӗнчи 22-мӗш ҫурт, К. Маркс урамӗнчи 52-мӗш ҫурт, Павлов мичман урамӗнчи 39-мӗш ҫурт, Энтузиастсен урамӗ (31-мӗш ҫурт ҫывӑхӗнче тата «ДК Салют» чарӑну патӗнче), Эльгер урамӗ (фермерсен мини-пасарӗнче), Афанасьев урамӗ (суту-илӳ картишӗнче), Мускав проспектӗнчи 40-мӗш ҫурта («Ахазов урамӗ») чарӑну патӗнче, М. Горький проспекчӗ («Арктика» лавкка патӗнче).

Раштавӑн 20-мӗшӗнче вара Хӗрлӗ тӳремре Хӗл Мучи резиденцийӗ ӗҫлеме тытӑнӗ. Унта тӳлевсӗрех кӗртеҫҫӗ.

cap.ru сайтри сӑн

Ҫӗнӗ ҫулти уявсенче тата канмалли кунсенче Шупашкарта пиротехникӑпа усӑ курассине чикӗлӗҫ. Кун пирки Инкеклӗ лару-тӑрӑва асӑрхаттарас тата пӗтерес енӗпе ӗҫлекен комисси ларӑвӗнче пӗлтернӗ.

Шупашкарта тата Ҫӗнӗ Шупашкарта раштавӑн 25-мӗшӗнчен пуҫласа кӑрлачӑн 11-мӗшӗччен пушара хирӗҫ режим вӑйра пулӗ. Ҫавна май уявсенче пиротехникӑпа ирӗклӗн усӑ курма чарӗҫ. Хальлӗхе ӑҫта тата мӗнле усӑ курма юраманни пирки пӗлтермен.

Иртнӗ ҫулсенче вара ҫак икӗ хулара пиротехникӑпа усӑ курмалли ятарлӑ лапамсем пулнӑ.

cheb.ru сӑнӳкерчӗкӗ

«Чувашия» (чӑв. Чӑваш Ен) санаторири кафене сутса яма шутланӑ.

Унӑн хакӗ – 15 750 000 тенкӗ. «Уралочка» кафе 339.1 тӑваткал метр лаптӑк йышӑнать. Вӑл Йӑламра, Санатори урамӗнче вырнаҫнӑ.

«Чӑваш Ен» Йӑлӑмри Сосновка поселокӗнче вырнаҫнӑ. Ӑна 1977 ҫулта тума пуҫланӑ, 1984 ҫулта хута янӑ.

Шупашкар Ҫӗнӗ ҫула хатӗрленет – кунран-кун капӑрланса пырать. Республика тӳремӗнче тӗп чӑрӑша вырнаҫтарса пӗтернӗпе пӗрех. Ӑна кӑҫал наци стилӗпе капӑрлатаҫҫӗ.

Кӑҫал Ефремов купса бульварӗнче те питӗ илемлӗ – юмахри пекех. Унта 320 пин диодлӑ лампочка ҫакнӑ.

Чукун ҫул вокзалӗ умӗнче чӑрӑш лартнӑ. Аэропорт умӗнче те Ҫӗнӗ ҫул капӑрлӑхӗсем пулӗҫ.

Хулара чӑн-чӑн асамлӑх хуҫаланать. Юр кӑна ҫук.

Ыран, чӳк уйӑхӗн 28-мӗшӗнче, Шупашкарта хӑш-пӗр ҫулпа чылай машинӑна ҫӳреме чарӗҫ. Ҫапла ирхи 7 сехетрен пуҫласа Ача амӑшӗн кунӗпе ҫыхӑннӑ массӑллӑ мероприятисем вӗҫлениччен пулӗ. Ку Ленинград урамне (Воробьев композиторсен урамӗпе хӗресленнӗ вырӑнтан пуҫласа Хӗрлӗ тӳрем таран) пырса тивет.

Ҫак вырӑнта тӳлевлӗ паркинг та ӗҫлемӗ. Ҫавна май Шупашкар хула администрацийӗ маршрута маларах палӑртса хума сӗнет.