Паян, ҫу уйӑхӗн 2-мӗшӗнче, Чӑваш Ене пирӗн экс-президент, РФ Федераци Канашӗн председателӗн пӗрремӗш ҫумӗ Николай Федоров ӗҫлӗ визитпа килнӗ. Вӑл полици ӗҫӗ-хӗлӗпе паллашнӑ, министерствӑн ҫӗнӗ зданийӗсене кӗрсе курнӑ.

Чӑваш Енри полици ӗҫӗпе Николай Васильевича Сергей Неяскин министр паллаштарнӑ. Вӑл йӗркене пӑсасран мӗнле профилактикӑсем ирттерни пирки, республикӑри ҫынсене хӑрушсӑрлӑхпа тивӗҫтерни ҫинчен каласа кӑтартнӑ.

ЧР ШӖМӗн ҫӗнӗ икӗ зданийӗ Шупашкарти Карл Маркс урамӗнче 45-мӗш ҫуртра тата Дзержинский урамӗнчи 4-мӗш ҫуртра вырнаҫнӑ. Вӗсене пӗлтӗрхи раштав уйӑхӗнче уҫнӑ. Николай Федоров ҫав ҫуртсене ҫитсе курнӑ. Вӑл шалти ӗҫсен органӗсен музейӗнче тата экспертпа криминалистика центрӗн музейӗнче ҫӗнӗ хатӗр-хӗтӗре хакланӑ.

Шупашкарти ҫӑмрӑк мӑшӑр канма каймашкӑн путевка туяннӑ чухне шӑнман пӑр ҫине ларса юлнӑ. Хайхискерсем ака уйӑхӗн 19-мӗшӗнче полици уйрӑмне ҫитсе пулӑшу ыйтнӑ.

34 ҫулти хӗрарӑмпа 37-ри арҫын Абхазире канма шухӑшланӑ. Вӗсем тӗнче тетелне кӗрсе Хура тинӗс хӗрринче вырнаҫнӑ пансионатра пӳлӗм тара пани пирки вуласа пӗлнӗ. Ҫамрӑк мӑшӑр ҫав ҫын патне шӑнкӑравланӑ, калаҫса татӑлнӑ хыҫҫӑн ӑна 64 пин тенкӗ куҫарса панӑ.

Ӑс кайран ҫеҫ пырса кӗнӗ ҫав. Укҫа куҫарнӑ хыҫҫӑн вӗсем ыттисем ҫав ҫын пирки мӗн ҫырнине вуланӑ. Ултавҫӑ иккен!

Халӗ пуҫиле ӗҫ пуҫарасси пирки шухӑшлаҫҫӗ. Полицейскисем асӑрхануллӑрах пулма ыйтаҫҫӗ.

Пуш уйӑхӗн 25-мӗшӗнче Кемӗрте хӑрушӑ пушар пулнӑ хыҫҫӑн Раҫҫейӗпех пушар хӑрушсӑрлӑхне тӗрӗслеҫҫӗ. Ултавҫӑсем тӗлӗрмеҫҫӗ: ҫакӑнпа усӑ курса пуясшӑн.

Ака уйӑхӗн 6-мӗшӗнче Канаш хулинче палламан ҫын вырӑнти хӑна ҫурчӗн директорӗ патне шӑнкӑравланӑ та хӑйӗнпе пушар инспекцийӗн ӗҫченӗ тесе паллаштарнӑ. Унтан вӑл 20 пин тенкӗпе пушар хӑрушсӑрлӑхӗн докуменчӗсене хатӗрлесе пама шантарнӑ. Директор ырӑ мар сиснӗ те кун пирки полицие пӗлтернӗ.

Палӑртмалла: ку Чӑваш Енре пӗртен-пӗр тӗслӗх мар. Халӗ лару-тӑрӑва тӗпчеҫҫӗ.

Аса илтерер: Кемӗрте суту-илӳ центрӗ ҫуннӑ, унта 64 ҫын вилнӗ. Инкек хыҫҫӑн Раҫҫейри суту-илӳ центрӗсене тата ытти учреждение тӗрӗслеме пуҫланӑ.

Сар.ru сӑнӗ

Раҫҫей Шалти ӗҫсен министерствин Шупашкар хулинчи управленине паянтан ҫӗнӗ пуҫлӑх ертсе пырӗ. Ку пукана Владимир Хориков полковник йышӑннӑ.

Раҫҫей ШӖМӗн Шупашкарти управленийӗ пӗлтернӗ тӑрӑх, хулари йӗрке хуралҫисене ҫӗнӗ пуҫлӑхпа Чӑваш Енӗн шалти ӗҫсен министрӗн ҫумӗ Александр Смирнов паллаштарнӑ. Ҫак должноҫа йышӑниччен 50 ҫулти Владимир Хориков Коми Республикин йӗрке хуралӗнче ҫулталӑк вӑй хунӑ, ҫынна хирӗҫле тунӑ преступленисене уҫса паракан уйрӑм пуҫлӑхӗн ҫумӗ пулнӑ. Унччен малтан вара тӑван тӑрӑхӗнче — Мари Республикинче — тимленӗ. 1991 ҫулта Йошкар-Олари шалти ӗҫсен управленийӗн уголовлӑ шырав уйрӑмӗн оперуполномоченнӑйне вырнаҫнӑ та Мари Эл йӗрке хуралӗнче иртнӗ ҫулхи пуш уйӑхӗччен тӗрлӗ должноҫра тӑрӑшнӑ.

Суд йышӑнӑвне пурнӑҫлакан приставсем Вӑрмар районӗнчи арҫынран сунарҫӑ пӑшалне туртса илнӗ. Хайхискер банк умӗнче пысӑк парӑма кӗнӗ. Кун пирки «Мой город Чебоксары» (чӑв. «Ман хула Шупашкар») портал хыпарлать.

Суд приставӗсен федераци службин Чӑваш Енри управленийӗ пӗлтернӗ тӑрӑх, суд приставӗсем патне банк умӗнче 180 пин тенкӗ парӑма кӗнӗ арҫын тӗлӗшпе пуҫарнӑ ӗҫ ҫитнӗ. Ҫавна пурнӑҫласа приставсем ухтару тунӑ, кивҫенрен тухайман арҫыннӑн килӗнче пулнӑ пӑшала туртса илнӗ. Пакунлисем ӑна вырӑнти полици уйрӑмне управа панӑ.

Палӑртса хӑвармалла, халӗ специалистсем пӑшал хакне палӑртаҫҫӗ. Енчен те парӑмҫӑ банка укҫа хывмасан хайхи пӑшала аукцион ирттерсе сутӗҫ, укҫине вара банка куҫарса парӗҫ.

Пуш уйӑхӗн 25-мӗшӗнче ир-ирех Куславккари Комаровская урамӗнче пӗр ҫуртра пушар тухнӑ. Раципе кун пирки пӗлтернӗ чухне полицейскисем пӗр ҫемье патӗнче пулнӑ, упӑшкипе арӑмӗ хушшинчи ӑнланманлӑха уҫӑмлатнӑ. Ун чухне ирхи 3 сехет пулнӑ.

Ҫурт ҫунни пирки пӗлсен полицейскисем часрах унта кайнӑ. Кӳршисем ҫунакан пӳртре кил хуҫисем пулнине каланӑ. Анчах никам та ҫулӑм ӑшне кӗме хӑяйман. 29 ҫулти полици лейтенанчӗ Антон Кирбитов вара хӑраса тӑман – кӗрт ашса ҫурт патне пынӑ, чӳречене штакетникпе ҫапса ҫӗмӗрнӗ.

Антон Кирбитов шала кӗрсен диван ҫинче ҫын ларнине курнӑ. Йӗри-тавра ҫуннӑ. Вӑл хӗрарӑма ярса тытнӑ, урамалла туртнӑ. Анчах лешӗ ним те ӑнланман. Ӑна урама илсе тухма кӳршисем пулӑшнӑ.

Полицейский ҫунакан пӳрте иккӗмӗш хут кӗнӗ. Анчах ун чухне йӑлтах ҫуннӑ, 60-ти арҫынна тупма май килмен. Унӑн виллине пушара сӳнтернӗ хыҫҫӑн тупнӑ.

Пушартан ҫӑлнӑ 56 ҫулти хӗрарӑм халӗ хӑйне йӗркеллех туять. Ӑна пульницӑна илсе кайман.

2016 ҫулхи кӗркунне Комсомольски районӗнче пурӑнакан 50 ҫулти арҫыннӑн телефонӗ ҫине палламан номертен СМС-ҫыру килнӗ. Вӑл ӑна уҫса вуланӑ, кӗҫех картти ҫинчен 8 пин тенкӗ ҫухалнӑ.

Ҫырура сиенлӗ компьютер программи пулнӑ-мӗн. Арҫын укҫа ҫухални пирки полицие пӗлтернӗ. Уголовлӑ шырав управленийӗн ӗҫченӗсем ҫав ҫырӑва кам янине тупса палӑртнӑ. Вӑл – Сахалин облаҫӗнче пурӑнакан 27 ҫулти арҫын. Ӑна хӑйсен регионӗнче те сиенлӗ программӑсем сарнӑшӑн явап тыттарнӑ.

Ҫак арҫынна следстви изоляторне хупнӑ. Вӑл миҫе ҫыннӑн укҫине вӑрланине полицейскисем тӗпчӗҫ.

Шупашкарти «Ярмӑрккӑ» суту-илӳ комплексӗнче «Вӗри кукӑль» киоск ӗҫӗ-хӗлне чарса лартнӑ. Ӑна «Юрма» тара панӑ. Киоск икӗ эрне ӗҫлемӗ.

Киоска «Ярмӑрккӑпа» «Юрма» агрохолдинг хуҫинчен Узбекистанра ҫуралса ӳснӗ арҫын тара илнӗ. Вӑл вара хӑйӗн ентешне ӗҫлеме илнӗ. Анчах лешӗн кирлӗ документсем пулман.

Полици ҫав киоска тӗрӗсленӗ. Унта самса сутакан узбека та асӑрханӑ. Каярахпа ҫакӑ та тӑрӑ шыв ҫине тухнӑ: унӑн Раҫҫейре ӗҫлемешкӗн ирӗк пулман.

Постановлени илнӗ хыҫҫӑн суд приставӗсем киоска хупса хунӑ. Ӑна 15 кун тӗрӗслесех тӑрӗҫ.

Раҫҫей шалти ӗҫсен министерствин Етӗрне районӗнчи уйрӑмӗн ҫӗнӗ пуҫлӑхне ҫирӗплетнӗ. Районӑн тӗп полицейскийӗн тивӗҫӗсене малашне Василий Белов пурнӑҫласа пырӗ. Кун пирки «Ӗҫ ялавӗ» хаҫат сайчӗ хыпарлать.

Василий Геннадьевич ҫак таранччен Раҫҫей ШӖМӗн Ҫӗмӗрлери муниципалитетсен хушшинчи уйрӑмӗн Хӗрлӗ Чутай районӗнчи пайӗн пуҫлӑхӗн ҫумӗ пулнӑ. Хӑй вара Улатӑр районӗнче ҫуралса ӳснӗ, авланнӑ, икӗ ача ашшӗ.

Районти полици ӗҫченӗсене ҫӗнӗ пуҫлӑхпа Чӑваш Енӗн шалти ӗҫсен министрӗн ҫумӗ Александр Смирнов паллаштарнӑ. Ҫавӑн пекех Василий Белова район администрацийӗн пуҫлӑхӗ Андрей Софронов, район прокурорӗ Юрий Фуражников тата Етӗрнери районсен хушшинчи следстви уйрӑмӗн ертӳҫи Николай Яковлев малашнехи ӗҫре ӑнӑҫу суннӑ.

Ҫӗрпӳ хулинче пурӑнакан 34 ҫулти арҫыннӑн явап тытма тивӗ. Хайхискер арӑмӗ ваннӑйӗнче ҫаппа-ҫарамас ҫӑвӑннине видео ӳкернӗ. Куншӑн хӑйне явап тыттарасси пирки шухӑшламан-ши?

РФ Следстви комитечӗн Чӑваш Енри следстви управленийӗ пӗлтернӗ тӑрӑх, пӗлтӗрхи ака уйӑхӗнче ҫак ниҫта та ӗҫлемен арҫын ваннӑйне кӗсье телефонне варттӑн вырнаҫтарнӑ, видео ӳкермеллине ҫутнӑ. Телефон хайхи арӑмӗ ванна кӗнине ӳкернӗ.

Хӗрарӑм хӑйне телефон ҫине ӳкернине кӑҫалхи нарӑс уйӑхӗнче ҫеҫ пӗлнӗ. Кун пирки ӑна упӑшки каланӑ. Ҫав вӑхӑталла вӗсем уйрӑлнӑ пулнӑ. Анчах арӑмӗ «видеооператор» пултарулӑхне хакламан, видео пирки полицие пӗлтернӗ.

Халӗ пуҫиле ӗҫе малалла тишкереҫҫӗ. Арҫынна куншӑн пысӑк штраф тӳлеттерме е ӗҫлеттерсе явап тыттарма пултараҫҫӗ.