Маска тӑхӑнман ҫынсене мобильлӗ ушкӑнсем ятарлӑ приложенире шута илсе пыраҫҫӗ. Йӗрке пӑсакансене шута илме Чӑваш Енри IT-специалистсем пӗрлехи тытӑм хатӗрленӗ.
«Мобильлӗ ушкӑнсен маршрутне вырӑнти пуҫлӑхсем йӗркелеҫҫӗ. Йӗркене пӑсакансене тупса палӑртсан ятарлӑ приложенире шута илме, сӑн ӳкерчӗксем вырнаҫтарма пулать. Ҫавӑ судра усӑ курма та кирлӗ», — тесе ӑнлантарнӑ Чӑваш Ен информаци политикин министрӗ Михаил Анисимов.
Мобильлӗ приложенипе пурин те ӗҫлеме тӑрӑшмалла. Лайӑххипе Етӗрне, Красноармейски районӗсене, Улатӑр, Шупашкар тата Ҫӗнӗ Шупашкар хулисене палӑртнӑ, начаррипе — Шӑмӑршӑ, Ҫӗмӗрле, Комсомольски районӗсене тата Ҫӗмӗрлепе Канаш хулисене.
Чӑваш Енре 10 кунра 26 ҫын кӑшӑлвируса пула пурнӑҫран уйрӑлнӑ. Паянхи кун тӗлне тепӗр 3 ҫын вилни пирки пӗлтернӗ. Ҫапла ку таранччен 139 ҫыннӑн пурнӑҫӗ татӑлнӑ.
Юлашки талӑкра республикӑра 58 ҫын чирленӗ, 108 ҫын сывалнӑ. Эпидеми пуҫланнӑранпа 9782 ҫын инфекциленнӗ, вӗсенчен 8306-шӗ сывалнӑ. Хальхи вӑхӑтра 1337 ҫын кӑшӑлвирусран килте амбулатори мелӗпе е пульницӑра сипленет.
Чӑваш Енре кӑшӑлвирус сарӑлнин индексӗ 1,06-па танлашать.
Ҫӗрпӳ районӗнче 46 ҫулти усламҫӑна суд тунӑ. Ӑна ҫыннӑн сывлӑхне йывӑр сиен кӳнӗшӗн, асӑрханмасӑр вӗлернӗшӗн явап тытарнӑ.
Пӑтӑрмах 2019 ҫулхи юпа уйӑхӗн 1-мӗшӗнче сиксе тухнӑ. Арҫын Ҫӗрпӳ районӗнче, «Атӑл» М-7 ҫул ҫинче, кафе тытнӑ. Ӑна 44 ҫулти пӗр арҫын тӗрлӗ ӗҫ пурнӑҫласа пулӑшнӑ. Арҫын ӗҫре ӳсӗр пулнӑ. Ҫавӑншӑн усламҫӑ тарӑхса кайнӑ, иккӗшӗн хушшинче харкашу сиксе тухнӑ. Унтан вӑл алли-урине ирӗке янӑ. Рабочие вӑл 30 хутран кая мар тапса-ҫапса пӗтернӗ. Йывӑр суранланнӑ арҫын киле кайма тухсан ҫул ҫинче вилсе кайнӑ.
Суд усламҫӑна 7 ҫуллӑха ирӗкрен хӑтарма йышӑннӑ. Ӑна ҫирӗп режимлӑ колоние ӑсатасшӑн. Суд приговорӗ хальлӗхе саккунлӑ вӑя кӗреймен.
Паян та Чӑваш Енре кӑшӑлвирусран ҫын вилнине палӑртнӑ. Ҫапла пурнӑҫран уйрӑлнисен йышӗ 136 ҫынна ҫитнӗ. Кун пирки федераци информаци центрӗ пӗлтерет.
Юлашки талӑкра 58 ҫын чирленӗ, 40 ҫын сывалнӑ. Ку таранччен республикӑра 9724 ҫын инфекциленнӗ, вӗсенчен 8198-шӗ сывалнӑ. Хальхи вӑхӑтра 1390 пациент килте амбулатори мелӗпе е пульницӑра сипленет.
Республикӑра кӑшӑлвирус сарӑлнин индексӗ 1,07-пе танлашать.
Тепӗр икӗ ҫыннӑн пурнӑҫеӗ кӑшӑлвируса пула татӑлнӑ. Палӑртмалла: республикӑра юпа уйӑхӗн 20-мӗшӗнченпе кашни кунах инфекцие пула вилнисене шута илеҫҫӗ. Пӗр кун 4 ҫын таранах пулнӑччӗ. Ҫапла вилнисен йышӗ 135 ҫынна ҫитнӗ.
Ку таранччен 9666 ҫын кашӑлвируспа чирленӗ, вӗсенчен 8158-шӗ сывалнӑ. Ку 84,4 процентпа танлашать. Хальлӗхе 1373 ҫын килте е пульницӑра сипленет. Юлашки талӑкра 99 ҫын сывалнӑ, 60 ҫын чирленӗ.
Кӑшӑлвирус сарӑлнӑран Роспотребнадзор маска режимне вӑйлатнӑ. Малашне общество вырӑнӗсенче кӑна мар, ҫын нумай пулакан вырӑнта та маска тӑхӑнмалла. Ку парковкӑсене, лифтсене те пырса тивет.
Кӑшӑлвирус сарӑлнӑ май Варнар районӗн тӗп пульници малашне инфекциленнисене йышӑнма тытӑнӗ. Ытти пациентӑн пулӑшу ыйтма урӑх районти пульницӑсене кайма тивӗ.
Юпа уйӑхӗн 26-мӗшӗнченпе Вӑрнар районӗн тӗп пульницин стационар корпусӗ ковид-госпиталь пек ӗҫлеме тытӑннӑ. Кӑшӑлвируспа чирлисене ҫавӑнта сиплеҫҫӗ.
Хальлӗхе ача кӗтекен хӗрарӑмсен Ҫӗмӗрлери пульницӑна кайма тивӗ. Хирурги енӗпе Канашри пульницӑна ҫитмелле.
Шупашкарта тата тепӗр инфекци корпусӗ тӑвасшӑн. Вӑл Республикӑн клиника пульницин тытӑмӗнче пулӗ. Хальлӗхе проект тӑвассине пӗлтернӗ. Укҫа-тенке республика хыснине иккӗмӗш хутчен улшӑну кӗртнӗ чух пӑхса хӑварнӑ.
Республикӑн вице-пермьерӗ — финанс министрӗ Михаил Ноздряков пӗлтернӗ тӑрӑх, ҫӗнӗ корпус тума 19,3 миллион тенкӗ кирлӗ пулӗ, ҫав шутран 11,7 миллион тенкине кӑҫал уйӑрӗҫ.
Сӑмах май, кӑшӑлвируспа, ӳпке шыҫҫипе, тӗрлӗ вирус чирӗпе аптӑракансем юлашки вӑхӑтра сахал мар. Ҫавна май пульницӑсенче хушма вырӑнсем йӗркелемелле. Ҫапла тума республика Элтеперӗ Олег Николаев паян Правительство ҫуртӗнче министрсемпе тата ытти тӳре-шарапа ирттернӗ канашлура яваплисене хушнӑ.
Чӑваш Енре кӑшӑлвирусран ҫине-ҫинех вилеҫҫӗ. Ҫак каварлӑ вируса пула пурнӑҫран уйрӑлакансем кашни кунах пулаҫҫӗ. Хальхинче – виҫҫӗн.
Стопкоронавирус.рф портал пӗлтернӗ тӑрӑх, республикӑра вируса пула пурнӑҫран уйрӑлнисен йышӗ 133 ҫынна ҫитнӗ. Ӗнер кӑна 130 ҫынччӗ.
Пӗр талӑкра 56 ҫын инфекциленнине палӑртнӑ. Пандеми пуҫланнӑранпа Чӑваш Енри 9606 ҫын кӑшӑлвируспа чирленӗ. Вӗсенчен 8059-шӗ сывалнӑ. Хальхи вӑхӑтра 1414 ҫын вирусран сипленет. Юлашки талӑкра 33 пациент кӑшӑлвируса парӑнтарнӑ.
| ЮПА | 26 |
Ҫӗрпӳ районӗнчи Нӗрӗш ялӗ ҫывӑхӗнче ӗнер икӗ машина ҫапӑннӑ. Вӗсенчен пӗрин рульне правасӑр арҫын тытса пынӑ.
Пӑтӑрмах 16 сехет те 5 минутра пулса иртнӗ. Малтанласа шухӑшланӑ тӑрӑх, «ВАЗ-2111» автомобиль «Лада Хрей» машинӑна ҫул паман. «ВАЗ-2111» рулӗ умӗнче водитель удостоверенийӗсӗр 55 ҫулти арҫын пулнӑ.
Икӗ машина ҫапӑнсан водительсем ҫеҫ мар, «Лада Хрей» автомобильте ларса пынӑ хӗрарӑм тата виҫӗ ача аманнӑ. Вӗсем 8, 14 тата 17 ҫулсенче пулнӑ. Вӗсене тухтӑрсем вырӑнтах пулӑшнӑ.
Инкек сӑлтавне специалистсем палӑртӗҫ.
Чӳк уйӑхӗн 4-мӗшӗнче — Халӑх пӗрлӗхӗн кунӗнче — пирӗн республикӑра Чӑваш Енри халӑхсен фестивальне ирттерме палӑртса хунӑ. Анчах кӑшӑлвируспа ҫыхӑннӑ лару-тӑру кӑткӑссине шута илсе ӑна йӗркелемӗҫ. Ҫакӑн пирки паян Правительство ҫуртӗнче иртнӗ канашлура сӑмах хускатнӑ.
Республикӑн культура, национальноҫсен ӗҫӗсен тата архив ӗҫӗн министрӗн тивӗҫне пурнӑҫлакан Светлана Каликова фестивале ирттермелли вырӑна палӑртассипе ҫине тӑнине пӗлтернӗ-ха. Анчах Чӑваш Ен Элтеперӗ Олег Николаев эпидемиологи лару-тӑрӑвӗ ҫинчен аса илтернӗ май мероприятие каярах вӑхӑта куҫарма сӗннӗ. Сӑмахран, Чӑваш Республикин Конституцине йышӑннӑ кун — чӳк уйӑхӗн 30-мӗшӗнче — йӗркелеме пулать. Е Раҫҫей Конституцийӗн кунӗнче.
+13.3 °C