Чӑваш Ен Элтеперӗ кӑшӑлвирусран хӑҫан прививка тӑвассине пӗлтернӗ. Олег Николаев прививкӑна паян тесен паян тутарма хатӗррине ӗнентернӗ, анчах вакцинаци витӗр тухас текенсем республикӑра йышлӑран черет вӑрӑм имӗш. Кунсӑр Элтеперӗн ӗҫ нумай, унта-кунта тухса кӗме палӑртнӑ.
«Прививка хыҫҫӑн врачсен тӗрӗслесе тӑмалла. Вакцинациччен тухтӑрсен тӗрӗслемелле», — тенӗ республика ертӳҫи. Ун валли вӑхӑт кирлине палӑртнӑ.
Олег Николаев привикӑна нарӑс уйӑхӗнче тутарма палӑртнӑ иккен. Ун чухне Элтеперӗн командировкӑсем вӗҫленӗҫ.
Пандеми пуҫланнӑранпа Чӑваш Енре кӑшӑлвируса пула 702 ҫыннӑн пурнӑҫӗ татӑлнӑ. Юлашки талӑкра 12 ҫын каварлӑ вируса пула вилнӗ.
Паянхи кун тӗлне 17955 ҫын инфекциленнӗ. Вӗсенчен 16154-шӗ сывалнӑ. Юлашки талӑкра 78 ҫын чире парӑнтарнӑ, 109 ҫын кӑшӑлвирус ҫаклатнӑ.
Аса илтерер: нумаях пулмасть республикӑна кӑшӑлвирусран хӳтӗленмелли вакцинӑн тепӗр партийӗ килнӗ. Хальлӗхе хӗрлӗ зонӑри тухтӑрсене, вӑраха кайнӑ чирпе нушаланакансене прививка тӑваҫҫӗ. Кӗҫех массӑллӑ вакцинаци пуҫланмалла.
Юлашки талӑкра республикӑра тепӗр 13 ҫын кӑшӑлвирусран вилнӗ. Пандеми пуҫланнӑранпа кун пекки пулманччӗ-ха. Пӗр талӑкра 10, 11, 12 ҫын вилнӗччӗ. Кӑрлач уйӑхӗнче кӑшӑлвирус 162 ҫыннӑн пурнӑҫне татнӑ.
Ку таранччен каварлӑ вируса пула 690 ҫын вӑхӑтсӑр вилнӗ. Паянхи кун тӗлне республикӑра 17846 ҫын инфекциленнӗ. Вӗсенчен 16076-шӗ сывалнӑ. Юлашки талӑкра 105 ҫын вирус ҫаклатнине палӑртнӑ. 73 ҫын кӑшӑлвирусран сывалнӑ.
Сӑмах май, Чр сывлӑх сыхлавӗн министрӗ Владимир Степанов пӗлтернӗ тӑрӑх, республикӑра койкӑсен 33 проценчӗ пушӑ.
Паян республикӑра 10, 11 пациент мар пурнӑҫран уйрӑлнӑ. Хальхинче 12-шӗн пурнӑҫӗ татӑлнӑ. Кун пирки федераци инормаци центрӗ пӗлтерет.
Вилнисен йышӗ халӗ 677 ҫынна ҫитнӗ. Паянхи кун тӗлне 17741 ҫын инфекциленнӗ. Вӗсенчен 16003-шӗ сывалнӑ. Пӗр талӑкра 101 ҫын кӑшӑлвируспа чирленӗ. 78 пациент сывалнине палӑртнӑ.
Палӑртмалла: ҫулталӑк пуҫланнӑранпа 149 ҫын кӑшӑлвируса пула вилнӗ. Кӑрлач уйӑхӗнче икӗ эрнере вара 97 ҫын пурнӑҫран уйрӑлнӑ. Ку, хальхипе танлаштарсан, 1,5 хут сахалрах. Хальхи вӑхӑтра 1061 пациента тухтӑрсем сӑнаса тӑраҫҫӗ. Вӗсен кӑшӑлвирус диагнозӗ ҫирӗпленнӗ.
Ҫак кунсенче ҫынсем урамра шӑнса пӑсӑлнӑ тӗслӗхсем йышланнӑ. Вӗсенчен хӑшӗсем ӳсӗр пулнӑ.
Кӑрлач уйӑхӗн 12-мӗшӗнче васкавлӑ пулӑшу машинисен сакӑр ҫын патне ҫитме тивнӗ.
Ҫӗмӗрле районӗнче 79 ҫулти арҫын картишне тухсан ӳкнӗ те тӑрайман. Икӗ сехет выртнӑ вӑл. Кайран ӑна тӑванӗсем асӑрханӑ, тухтӑрсене чӗнсе илнӗ. Канаш районӗнчи 62 ҫулти хӗрарӑм кил хушшине тухсан пуҫ ҫаврӑннипе ӳкнӗ. Ҫитменнине вӑл ӳсӗр пулнӑ. Сивӗре 4 сехет выртнӑ. Унӑн ал сыппине тӑм илнӗ. Канаш хулинче 29 ҫулти арҫын пушмак тӑхӑнмасӑрах ӳсӗр пуҫпа урам тӑрӑх утнӑ.
Республикӑн катастрофа медицинин тата васкавлӑ медпулӑшу центрӗнче пӗлтернӗ тӑрӑх, шар курнисем – 29-89 ҫулти ҫынсем.
Вӑйӑран вӑкӑр тухать тесе ваттисем тӗрӗсех асӑрхаттараҫҫӗ. Ҫӗнӗ ҫул уявӗ тӗлӗнче пиротехникӑна пула шар куракансем кашни ҫулах тупӑнаҫҫӗ. Кӑҫал та ҫаплах.
Канаш районӗнче пурӑнакан 32 ҫулти арҫын пӳрнине тата ал сыппине ыраттарнӑ. Инкек петарда чӗртме хӑтланнӑ чух пулса иртнӗ. Шупашкарта 42 ҫулти хӗрарӑм ӗҫрен таврӑннӑ чух шар курнӑ. Ун тӗлне петарда сирпӗнсе ӳкнӗ. Хӗрарӑм ик урине те пӗҫертсе янӑ.
Кӑрлачӑн 2-мӗшӗнче Улатӑрта 9 ҫулти ача аллинче петарда ҫурӑлса кайсан сулахай алли аманнӑ. Ҫав кунах Сӗнтӗрвӑрри хулинче 13-ри арҫын ача петардӑпа куҫне пӗҫертсе янӑ.
Паянхи кун тӗлне каллех тепӗр 11 пациент кӑшӑлвирусран вилнӗ. Ҫапла майпа ку таранччен республикӑра 665 ҫын ҫак каварлӑ вируса пула пурнӑҫран уйрӑлнӑ. Кӑрлач пуҫланнӑранпа 137 пациент чире парӑнтарайман.
Паянхи кун тӗлне 17640 ҫын инфекциленнӗ. Вӗсенчен 15925-шӗ сывалнӑ. Юлашки талӑкра 95 ҫын кӑшӑлвируспа чирленӗ. Сывалакансем 78 ҫын пулнӑ.
Палӑртмалла: ҫак кунсенче кӑшӑлвирусран хӳтӗленмелли вакцинӑн тепӗр дози Чӑваш Ене килнӗ. Хальхинче 2 пин доза кӳрсе килнӗ.
Паян, кӑрлач уйӑхӗн 12-мӗшӗнче, Ҫӗрпӳ районӗнче ҫул ҫинче инкек пулнӑ. Хальхинче ҫул ҫинче ӗҫлекен рабочисем шар курнӑ.
Пӑтӑрмах ирхи 10 сехет тӗлӗнче пулнӑ. Малтанласа шухӑшланӑ тӑрӑх, «LADA Granta» автомобиль астумасӑр «КамАЗпа» ҫапӑннӑ, унтан ҫул ҫинче ӗҫлекен рабочисем пырса кӗнӗ. Ҫӑмӑл машина рулӗ умӗнче 21 ҫулти каччӑ пулнӑ. Инкекре аманнӑ икӗ рабочие тухтӑрсен пулӑшӑвӗ кирлӗ пулса тухнӑ.
Чӑваш Енӗн Шалти ӗҫсен министерствинче пӗлтернӗ тӑрӑх, ҫул ҫинчи инкек сӑлтавне специалистсем тишкерӗ.
Чӑваш Енре кӑшӑлвируса пула вилекенсен шучӗ Раҫҫейри вӑтам кӑтартуран икӗ хут пысӑкрах. «Ҫыхӑнура» порталта пӗлтернӗ тӑрӑх, кӑрлачӑн 10-мӗш тӗлне пирӗн ҫӗршывра 100 пин ҫын пуҫне вилеслӗх 42,13 пулнӑ. Ҫав вӑхӑтрах пирӗн республикӑра ку кӑтарту — 51,97.
Чирлекенсенчен миҫе ҫын вилнине илсен, пирӗн тӑрӑхра ку цифра 3,65-пе танлашать, Раҫҫейре — 1,80.
Иртсе кайнӑ талӑкра пирӗн республикӑра каллех тепӗр 10 ҫын вилнӗ. Кӑшӑлвирус пандемийӗ пуҫланнӑранпа усал чир Чӑваш Енри 643 ҫын пурнӑҫне татнӑ. Ку вӑл, паллӑ ӗнтӗ, официаллӑ статистикӑна ӗненсен.
Паян, кӑрлач уйӑхӗн 10-мӗшӗнче, Шупашкар районӗнче икӗ ҫӑмӑл машина ҫапӑннӑ, вӗсенчен пӗринче ача ларса пыни паллӑ.
Инкек кӑнтӑрла, 12 сехет тӗлӗнче, Урай Макаҫ ялӗ тӗлӗнче пулнӑ. Пӑтӑрмаха «Лада Гранта» тата «ВАЗ-2115» машинӑсем ҫакланнӑ.
Машинӑсенчен пӗрин водителӗ тата салонти хӗрача суранланнӑ. Анчах вӗсем, Турра шӗкӗр, ҫӑмӑл суран ҫеҫ илнӗ. Ҫакӑн пирки «Про Город» кӑларӑма ҫул ҫипчи инкеке асӑрханӑ ҫын пӗлтернӗ.
Инкек вырӑнне васкавлӑ пулӑшу машини тата пушар сӳнтерекен машина пырса ҫитнӗ.
-1.7 °C