Демьян Семёнов. chgtrk.ru видеовӗнчен илнӗ сӑнӳкерчӗк

Демьян Семёнов журналист, Чӑваш Республикин культурӑн тава тивӗҫлӗ ӗҫченӗ, политика тата патшалӑх деятелӗ, пурӑннӑ пулсан паян, утӑ уйӑхӗн 10-мӗшӗнче, 85 ҫул тултармаллаччӗ. «Чӑваш Ен» ПТРК пӗлтернӗ тӑрӑх, ҫавна халалласа унӑн тӑванӗсем, ӗҫтешӗсемпе юлташӗсем асӑну каҫне пухӑннӑ.

Демьян Филиппович Етӗрне районӗнчи Мӑн Явӑш ялӗнче ҫуралнӑ. Чӑваш патшалӑх педагогика институтӗнче тата Партин аслӑ шкулӗн журналистика факультетӗнче вӗреннӗ. «Коммунизм ялавӗ» (хальхи «Хыпар») хаҫат редакцийӗнче тӑрӑшнӑ ҫулсенче литература сотрудникӗнчен пуҫласа тӗп редактора ҫитнӗ.

1988-мӗш ҫулта ӑна КПСС Чӑваш обкомӗн секретарьне суйланӑ. Чӑваш Ен Патшалӑх Канашӗн редакципе издательство пайӗнче 11 ҫул тӑрӑшнӑ. Чӑваш Республикин Журналистсен союзӗн правленине 5 ҫул ертсе пынӑ.

Демьян Семёнова Ӗҫлӗх Хӗрлӗ Ялавӗ орденӗпе, тӗрлӗ медальпе тата Хисеп грамотисемпе чысланӑ.

«Про Город» сайтри сӑн

Республикӑра хӑш-пӗр вырӑнта паян ҫумӑр ҫурӗ. Шупашкар районӗнче пурӑнакансем «Про Город» хаҫата пӗлтернӗ тӑрӑх, Шӗнерпуҫ ялӗнче пӑр ӳкнӗ. Ку 15 сехет ҫурӑра пулнӑ.

«Пӑрӗ путене ҫӑмарти пысӑкӑш, шултрараххи те пур», - пӗлтернӗ ҫынсем.

Ҫав вӑхӑтра Ҫӗнӗ Шупашкарта чашлаттарсах ҫумӑр ҫунӑ. Ҫил те вӑйланнӑ, Винокуров урамӗнчи 10-мӗш ҫурт патӗнчи суту-илӳ палаткисене илсе ывӑткаланӑ. «Пике» фабрика патӗнче вара хурӑн ҫул ҫине персе аннӑ.

Шупашкарти «Садовый» микрорайонти шкул пирки нумай калаҫаҫҫӗ. Хӑҫан пулӗ вӑл?

Ӗҫ вӗҫлентӗр тесе ЧР Министрсен Кабинечӗн резерв хыснинчен 344 миллион та 93,8 пин тенкӗ уйӑрнӑ.

Сӑмах май, ҫӗртме уйӑхӗн 19-мӗшӗнче подрядчикпе тунӑ килӗшӗве пӑрахӑҫланӑ. Хальлӗхе ҫӗннине тупман. Ҫапах ку тивӗҫе Чӑваш Енри ипотека корпорацине шанма пултараҫҫӗ текен сас-хура пур.

21.mchs.gov.ru сайтран илнӗ сӑнӳкерчӗк

Ҫулталӑк пуҫланнӑранпа пирӗн республикӑра 15 ҫын шыва путса вилнӗ. 15 ҫынтан пиллӗккӗшӗ — ачасем.

Шӑматкун, утӑ уйӑхӗн 8-мӗшӗнче, 16 сехет те 30 минутра 39 ҫулти арҫын пурнӑҫӗ татӑлнӑ. РФ Инкеклӗ ӗҫсен министерствин Чӑваш Енри управленийӗнче пӗлтернӗ тӑрӑх, шар курнӑ Улатӑр арҫынни ӳсӗр пулнӑ тесе шухӑшлаҫҫӗ.

Специалистсем шывра асӑрхануллӑ пулмалли пирки аса илтереҫҫӗ, ятарлӑ вырӑнсенче ҫеҫ шыва кӗме сӗнеҫҫӗ.

соцпомощник.рф сӑнӳкерчӗкӗпе усӑ курнӑ

Чӑваш Ен Элтеперӗн Администрацийӗнче тӑрӑшнӑ Александра Бочкарёвӑна ӗҫрен кӑларнӑ. Александра Сергеевна Ҫамрӑксен политикин управленийӗн пуҫлӑхӗнче тӑрӑшнӑ.

Республика ертӳҫи Олег Николаев утӑ уйӑхӗн 7-мӗшӗнче алӑ пуснӑ йышӑнура хӗрарӑма ӗҫрен мӗншӗн кӑларнине каламан. Документа республикӑн влаҫ органӗсен официаллӑ порталӗнче паян вырнаҫтарнӑ.

Ҫамрӑксен политикин управленийӗн пуҫлӑхӗ пулма Иван Филиппова ҫирӗплетнӗ. Иван Михайлович унччен Элтепер пулӑшуҫинче тӑрӑшнӑ.

t.me/nikamran канала вырнаҫтарнӑ сӑнӳкерчӗк

Чӑваш ҫамрӑкӗсен «Сӑвар» пӗрлешӗвӗн ертӳҫи Олег Цыпленков ертсе пынипе чӑвашсем чунҫӳреве тухса кайнӑ. Кӑҫал хастар ентешӗмӗрсем Дагестана ҫитӗҫ.

Ырӑ йӑлана темиҫе ҫул каяллах Олег Цыпленков пуҫарса янӑ. Инҫе ҫула тухнӑ йыш чӑвашлӑхпа ҫыхӑннӑ паллӑ вырӑнсенче чарӑнӗ.

«Чунҫӳрев» сӑмаха ахальтен шухӑшласа кӑларман. Вӑл чун ыйтнипе ҫул-ҫӳреве тухнине пӗлтерет. Ҫав ҫула тухнисем «чунташ» ята илеҫҫӗ.

Аякри ҫула тухнӑ йышра — чӑвашлӑхпа кӑсӑкланакансем. Вӗсем тӑван халӑхӑмӑрӑн сӑваплӑ вырӑнӗсене ҫитсе кураҫҫӗ.

Ҫанталӑк ӗнер кӑна уҫӑлтарчӗ, паян каллех шӑрӑх тата пӑчӑ. Анчах ыранах ӑшӑрах тумтире туртса кӑларма тивӗ.

Сивӗ фрончӗ юнашарах. Ыран кӑнтӑрла 14-19 градус кӑна ӑшӑ пулӗ. Ҫӗрле вара – 9-11 градус. Ҫитменнине, ҫурҫӗр-хӗвеланӑҫ енчен вӗрекен ҫил вӑйланӗ. Эрне тӑршшӗпех ҫапла пулӗ.

Канмалли кунсем тӗлне 22-24 градус таран ӑшӑтӗ, ҫил лӑпланӗ.

artmuseum.ru сайтри сӑн

Ӳнер музейӗн директорӗ малашне те Геннадий Козлов пулӗ. Хушӑва ЧР Элтеперӗ Олег Николаев алӑ пуснӑ.

Ҫу уйӑхӗн вӗҫӗнче ӑна ку должноҫрен кӑларнӑ. Ахӑртнех, ку контракт вӗҫленнипе ҫыхӑннӑ. Иртнӗ эрнере вара Ӳнер музейӗн директорне ҫирӗплетнӗ. Ку пукана каллех Геннадий Козлов йышӑннӑ.

Геннадий Васильевич Тӑвай районӗнчи Вӑрманхӗрри ялӗнче ҫуралса ӳснӗ. Чӑваш патшалӑх ӳнер музейӗн директорӗнче вӑл 20 ҫул ӗҫленӗ. Вӑл – ЧР тава тивӗҫлӗ ӳнерҫи.

t.me/pro_cheby сӑнӳкерчӗкӗ

Республикӑмӑрӑн тӗп хулинчи илемлӗ вырӑнсемпе киленес вырӑнне хӑшӗсем пуҫтахланса ҫӳреҫҫӗ. Шупашкарта такамсем Атӑл хӗрринчи бинокле ватнӑ. Ӑна ватнипех ҫырлахман, унӑн линзине вӑрланӑ. Кун пирки Телеграмри каналсенчен пӗринче паян ирпе пӗлтернӗ.

Те пуҫтахланас тенӗ ӗнтӗ вӗсем, те бинокль килӗшмен, те бинокльти линзӑна куҫ хывнипе ҫапла хӑтланнӑ.

Апла-и, капла-и, пуҫтахсене тытсан вӗсене явап тыттарасси куҫкӗрет.

«Про Город» сайтри сӑн

Утӑ уйӑхӗн 2-мӗшӗнче 18 сехет те 20 минутра ҫамрӑк арҫын «Медик» коллектив садӗнче секаторпа пӳрнине татса илнӗ. Васкавлӑ медпулӑшӑва шӑнкӑравланӑ та диспетчен пулӑшма хиреҫленӗ, Шупашкарти васкавлӑ медпулӑшу пульницине хӑй тӗллӗн ҫитме каланӑ.

Анчах арҫын Ишлее ҫити кӑна хӑрах алӑпа руле тытса ҫитейнӗ. Унта вӑл ҫул-йӗр патрулӗнчен пулӑшу ыйтнӑ. Арҫын юн нумай ҫухатнине кура вӗсем ӑна хӑйсен машинине лартнӑ та Шупашкара илсе кайма тухнӑ. Анчах ҫул ҫинче васкавлӑ мудпулӑшу машинине курнӑ та чарнӑ. Фельдшер пӗрремӗш медпулӑшу панӑ.