"Чеб.ру" сайтри сӑн

2017 ҫултанпа Шупашкарти Мускав ҫыран хӗррине илемлетме, хӑтлӑлатма тытӑннӑ. Кӑҫал вара ӗҫсене вӗҫленӗ. Ҫак илемлӗ вырӑна Пӗрремӗш каналпа пыракан «Ырӑ ир!» кӑларӑмра кӑтартнӑ.

Мускав ҫыран хӗррине хӑтлӑлатнӑ кӑна мар, вӑл халӗ пӗчӗк тата вӑтам усламсене илӗртекен вырӑн та пулса тӑнӑ. Унта уҫӑлса ҫӳреме, велосипедпа тата самокатпа ярӑнма, шашлӑк ӑшалама, кафере ларма та пулать. Пӗтӗмпе 6 ҫухрӑм тӑршшӗ территорие хӑтлӑх кӗртнӗ.

(с) Мускав хулин ҫутҫанталӑкпа усӑ курассин тата тавралӑха сыхлассин департаменчӗ

Тӗп хулан ҫутҫанталӑкпа усӑ курассин тата тавралӑха сыхлассин департаменчӗ Мускавра ҫӗпӗр урагусне, е вӑрӑм хӳреллӗ уйӑпа — ку тӑрӑхра сайра тӗл пулакан вӗҫен кайӑка асӑрхани ҫинчен пӗлтерет.

Мускавҫутҫанталӑк специалисчӗсем ӑна «Москворецки» ҫутҫанталӑкпа истори паркӗнче курнӑ.

Раҫҫейре ҫак вӗҫен кайӑксен тӗсӗ ытларах Ҫӗпӗрӗн кӑнтӑр тӑрӑхӗнчен пуҫласа Кӑнтӑр-Тухӑҫ Ази таран пурӑнать, тӗп хулана вӑл мӗнле лекнине специалистсем пӗлмеҫҫӗ.

Ведомствӑра палӑртнӑ тӑрӑх, тӗп хулара ҫак кайӑк тӗсне юлашки хут 18 ҫул каялла, 2005 ҫулта, асӑрханӑ пулнӑ.

t.me/chuv_kray/1774 сӑнӳкерчӗкӗ

Шупашкарти 5-мӗш гимназире вӗренекен Дима Еремеев паян «Россия 1» кӑтартакан концета хутшӑнӗ. Концерта Пӗлӳ кунне халалланӑ. Ҫамрӑк ентешӗмӗр унччен Кремль сцени ҫине тухнӑ.

Унта лекес тесен яш кастинга хушӑннӑ. Ӑна Шаман, Лариса Долина, Лев Лещенко, Наташа Королева, Александр Панайотов тата Раҫҫейӗн ытти ҫӑлтӑрӗпе пӗрле хора лекме май килнӗ.

13 ҫулти Дима вокал ӑсталӑхне хулари 1-мӗш шкулӗнчи «5 октав» вокла студийӗнче (педагогӗ – Татьяна Шереметьева) туптать.

Юрий Степанов сӑнӳкерчӗкӗпе тата forum.na-svyazi.ru скриншочӗпе усӑ курса хатӗрленӗ коллаж

«Россия» (чӑв. Раҫҫей) авиакомпанин супреджечӗсенчен пӗрне Шупашкар ятне панӑ.

Асӑннӑ ятпа самолёт 2021 ҫултанпах вӗҫет иккен.

«Раҫҫей» авиокомпани хӑйӗн самолёчӗсене ҫӗршыври хуласен ячӗсене 2016 ҫӳлхи ака уйӑхӗнче пама тытӑннӑ.

Фюзеляжӑн малти пайӗнче, пилотсен кабини айӗнче, хула ятне тата гербне вырнаҫтараҫҫӗ. Самолетӑн сулахай енне вырӑсла ҫырса хунӑ, сылтӑм енне – акӑлчанла.

НТВ телеканал сюжетӗнчи скрин

Паян НТВ телеканалпа Чӑваш Енри Даниэль пирки сюжет кӑтартнӑ. Арҫын ачана пулӑшу кирлӗ.

Ҫулталӑк каялла ача 3-мӗш хутран ӳкнӗ. Темиҫе эрне вӑл комӑра выртнӑ. Кайран тӑна кӗнӗ. Анчах ҫӳллӗшӗнчен ӳкни ахаль иртмен - Даниэлӗн куҫӗ суккӑрланса пырать. Ҫавӑнпа ӑна пӗр тӑхтамасӑр имплант лартмалла. Кун валли вара 2 миллион тенкӗ кирлӗ. Операцие Хусанта тума хатӗр. Амӑшӗн вара ун чухлӗ укҫа ҫук, вӑл 5 ачана пӗчченех ура ҫине тӑратать. Инкек хыҫҫӑн упӑшки ҫемьерен тухса кайнӑ.

Пӗрремӗш каналтан илне сӑн

Пӗрремӗш каналта «Ҫын тата саккун» кӑларӑмра Шупашкарти арҫын пирки каласа кӑтартнӑ. Ӑна тусӗ пӗр эрнере миллион ӗҫлесе илме пултарассипе илӗртнӗ.

Ҫапла арҫын финанс пирамидине лекнӗ. Анчах малтан 180 пин тенкӗ тӑракан алла ҫыхмалли сехет туянмалла-мӗн. Каччӑ ӑна туяннӑ. Анчах тупӑш ӗҫе ытти ҫынна явӑҫтарсан кӑна пулать тенӗ. Ҫапла каччӑ амӑшӗн укҫине вӑйпах илсе ҫав ӗҫе хывнӑ, процентсем илнӗ. Ҫын илсе кил те тупӑш ту - ҫапла каласах тӑнӑ ӑна. «Пӗтӗм тӑван, ҫывӑх ҫын ӗҫе явӑҫсан эпӗ тупӑш илме пӑрахрӑм», - каласа кӑтартнӑ каччӑ. Ҫапла вӗҫленнӗ унӑн «ӗҫӗ».

t.me/pro_cheby сӑнӳкерчӗкӗ

Чӑваш Енри студентка «Мисс топ мира России — 2023» ята ҫӗнсе илнӗ.

«TOP BEST RUSSIA» илем тата ҫулталӑк премийӗн конкурсӗ ҫурла уйӑхӗн 6-мӗшӗнче пулса иртнӗ.

Раҫҫейри конкурса Ҫӗнӗ Шупашкарти Диана Яковлева та хутшӑннӑ. Ҫӗршыври хитре хӗрсен хушшинче вӑл хӑйне тивӗҫлипе кӑтартса панӑ.

Муркаш районӗнчи Ильинка тӑрӑхӗнче ӳсекен чӑваш юманӗ «Раҫҫейри ҫулталӑк йывӑҫӗ» конкурсра ҫӗнтерни пирки хыпарланӑччӗ. Аса илтерер: 372 ҫул ӳсекен юман сасӑлавра чи нумай сасӑ пухнӑ. Ҫавна май пирӗн республика тӗнче стандарчӗсемпе пӑхмалли сертификата тивӗҫӗ.

Чӑваш йывӑҫне паян федераци каналӗпе «Доброе утро» кӑларӑмра кӑтартнӑ. Сюжетра ЧР Элтеперӗ Олег Николаев ватӑ чӑваш юманӗ 69 регионти конкурентсене ҫӗнтернине палӑртнӑ.

gdekartinki.ru сайтри сӑн

«Раҫҫейри ҫулталӑк йывӑҫӗ» конкурса кӗҫех официаллӑ майпа пӗтӗмлетӗҫ. Унта кам ҫӗнтерни вара халех паллӑ.

Чӑваш Енри 372 ҫулти юман чи нумай сасӑ пухса пӗрремӗш вырӑна тухнӑ. Вӑл Муркаш районӗнчи Ильинка тӑрӑхӗнче ӳсет.Уншӑн 21577 ҫын сасӑ панӑ.

Иккӗмӗш вырӑнта - Белгород облаҫӗнчи юман. Виҫҫӗмӗш вырӑнта вара - Питӗрти йывӑҫ.

Аса илтерер: сасӑлава ҫӗршыври 69 ҫутҫанталӑк палӑкӗ хутшӑннӑ. Сасӑлав ҫу уйӑхӗн 1-мӗшӗнче пуҫланнӑ та паян вӗҫленет. Конкурсра ҫӗнтернӗ регион пуҫлӑхне диплом тата «Раҫҫейри ҫулталӑк йывӑҫӗ» астӑвӑм хӑмине парӗҫ. Ҫавӑн пекех ҫӗнтерӳҫӗ-регион йывӑҫа пӑхса тӑмалли сертификата тивӗҫӗ.

Паян Общественноҫпа ҫыхӑну тытас енӗпе ӗҫлекен специалист кунӗ шутланать. Ҫав ятпа пресс-секретарьсене республика Элтеперӗ Олег Николаев республикӑн влаҫ органӗсен официаллӑ порталӗнче саламланӑ.

«Общественноҫпа ҫыхӑну тытас енӗпе ӗҫлекен специалистсен: пресс-секретарьсен, маркетологсен, бренд-менеджерсен, социаллӑ сетьсене тытса пыракан специалистсен нумай пин ҫынлӑ пӗрлӗхӗн представителӗсенчен кашниех хаклама май ҫук пысӑк ӗҫ пурнӑҫлать. Информаци калӑпӑшӗ те, ӑна сарассин хӑвӑртлӑхӗ те ӳссе пыраҫҫӗ - паянхи пурнӑҫ сирӗнсӗр пулма пултараймасть.

Эсир общество шухӑш-кӑмӑлне, компанисен, ҫынсен ырӑ сӑнарне йӗркелетӗр, Чӑваш Республики инвестици хывмашкӑн, туристсемшӗн илӗртӳллӗ, пурӑнма лайӑх регион пулнине ӗнентеретӗр, хамӑрӑн продукципе, пулӑшу ӗҫӗсемпе паллаштаратӑр, тӗллевсене палӑртатӑр, ят-сума ҫирӗплететӗр. Чи кирли вара - граждансемпе коммуникаци йӗркелетӗр, чи кӑткӑс пулӑмсемпе процессем ҫинчен те ӗненмелле тата ансат чӗлхепе каласа паратӑр», — пысӑка хурса хакланӑ республика ертӳҫи.