Зайцевсен архивӗнчи сӑн

Ҫӗмӗрлери нумай ачаллӑ Зайцевсем Пӗтӗм Раҫсейри «Ҫулталӑкри ҫемье» конкурсра ҫӗнтернӗ. Вӗсем номинацире мала тухнӑ.

Алексейпа Татьяна Зайцевсем пӗлтӗр республика шайӗнче иртнӗ конкурсра ҫӗнтернӗ, халӗ Раҫҫей шайӗнче Чӑваш Ен чысне хӳтӗленӗ. Вӗсем «Нумай ачаллӑ ҫемье» номинацире мала тухнӑ.

21 ҫул пӗрле пурӑнакан Зайцевсем - педагогсем. Вӗсем 4 ывӑлне воспитани параҫҫӗ. Асли Илья - студент. Антон, Мирослав тата Ратомир шкулта вӗренеҫҫӗ.

fondgkh-nso.ru сайтри сӑн

Паян Тӗп банкӑн директорсен канашӗн ларӑвӗ иртнӗ. Унта тӗп ставкӑна пысӑклатма йышӑннӑ. Малашне вӑл 18 процентпа танлашӗ.

Палӑртмалла: директорсен канашӗн ларӑвӗ унччен пӗлтӗр раштав уйӑхӗнче иртнӗ. Ун чухне тӗп ставка 16 процент пулнине палӑртнӑ. Ҫур ҫул вӑл ҫав шайрах тӑнӑ.

Сӑмах май, директорсен канашӗн ларӑвӗ тепрехинче авӑн уйӑхӗн 13-мӗшӗнче иртӗ.

okaygorod.com сайтри сӑн

РФ Ӗҫлев министерстви ҫитес ҫултани чи пӗчӗк ӗҫ укҫин виҫине пысӑклатасшӑн. Ҫавна май саккун проектне хатӗрленӗ.

Министерство 2025 ҫулхи кӑрлач уйӑхӗн 1-мӗшӗнчен чи пӗчӗк ӗҫ укҫин виҫине 22 пин те 440 тенке ҫитерме сӗнет. Ку хальхи виҫерен 16,6 процент пысӑкрах.

Сӑмах май, хальхи вӑхӑтра чи пӗчӗк ӗҫ укҫин виҫи 19 пин те 242 тенкӗпе танлашать.

Кандинский нейросеть сӑнӳкерчӗкӗ

Ҫитес. 2025 ҫулта, Раҫҫейре пурӑнакансем ҫу уйӑхӗнче тӑватшар кун канӗҫ. Ҫакӑн пек проекта ҫӗршывӑн Ӗҫ тата социаллӑ хӳтлӗх министерстви хатӗрленӗ.

Ҫу уйӑхӗн 1-4-мӗшӗсенче тата 8-11-мӗшӗсенче канӗҫ. Ҫӗнӗ ҫул тӗлӗнче 11 кун кантарасшӑн: 2024 ҫулхи раштав уйӑхӗн 29-мӗшӗнчен пуҫласа кӑрлач уйӑхӗн 8-мӗшӗ таран. Кӑрлач уйӑхӗн 9-мӗшӗнче ӗҫе тухӑпӑр. Кун пирки РФ ӗҫ министрӗ Антон Котяков пӗлтернӗ.

t.me/chuv_kray сӑнӳкерчӗкӗ

Чӑваш Енре пурӑнакан Владимир Дряблов амӑшне курма велосипедпа каясшӑн. Хӗрарӑм 1 пин километр ытла аякра, Волгоградра, пурӑнать. Арҫын амӑшне ҫуралнӑ кунпа саламлама велосипедпа ҫитесшӗн. Вӑл каланӑ тӑрӑх, ӑна ашшӗ, асламӑшӗ тата аслашшӗ ӳстернӗ. Амӑшӗ Волгоградра пурӑннӑ, ача ун патне ҫуллахи каникулта ҫеҫ кайма пултарнӑ.

«Аннепе ирттернӗ вӑхӑта эпӗ ӑшшӑн аса илетӗп. Ача чухне велосипедпа ярӑннӑ чухне ун патне хам тӗллӗн ҫитме ӗмӗтленеттӗм», — каласа кӑтартнӑ Владимир. Паян вӑл — ӑнӑҫлӑ юрист, педагог, бокс енӗпе Чӑваш Ен чемпионӗ тата марафонец.

t.me/chuv_kray каналтан илнӗ сӑӳкерчӗк

Шупашкарти Артур Михайлов «Раҫҫейри чи лайӑх такси водителӗ» конкурса хутшӑнса 150 пин тенкӗ укҫана тата «Lada Vesta» автомобиле тивӗҫнӗ.

Мероприяти Хусанта иртнӗ. Унта ҫӗршывӑн 32 регионӗнчи такси водителӗсем хутшӑннӑ. Вӗсем практика тата пултарулӑх конкурсӗсенче ӑмӑртнӑ.

«Кашниех ҫӗнтерессишӗн пынӑ. Мана арӑм хавхалантарни пуринчен ытла вӑй-хал парса пычӗ. Вӑл манпа пултарулӑх конкурсне те хутшӑнчӗ. Атте-аннепе туссем ырӑ суннине те туйса тӑтӑм. Ку конкурсра ҫӗнтерес ӗмӗтпе эпӗ пилӗк ҫул пурӑннӑ», – хавхаланса каласа кӑтартнӑ Артур.

Арҫын республикӑри конкурссенче унччен пӗрре кӑна мар ҫӗнтернӗ, ҫӗршыврисенче те палӑрнӑ. 2019 ҫулта Сочи хулинче вӑл иккӗмӗш вырӑн йышӑннӑ, пӗлтӗр Шупашкарта виҫҫӗмӗш вырӑна тухнӑ.

Белгород облаҫӗнче Чӑваш Енрен килнӗ салтак-контрактник пӗрле служба тухакан ҫар ҫыннисене автоматран пени пирки пӗлтернӗччӗ. Аса илтерер: 29 ҫулти Алексей утӑ уйӑхӗн 11-мӗшӗнче каҫхине виҫӗ салтака автоматран пенӗ. Иккӗшӗ вилнӗ, пӗри аманнӑ. Алексей вырӑнтан тарса ҫухалнӑ. Малтан ун ҫумӗнче Калашников автомачӗ пур тесе пӗлтернӗччӗ, анчах ӑна кайран инҫех мар тупнӑ.

Алексея тытса чарнӑ. Ӑна Белгород облаҫӗнчех тупнӑ. Вӑл салтаксене мӗншӗн пенӗ-ха? Тӗп верси - хӑйне мӗскӗтлетнӗшӗн тавӑрнӑ-мӗн.

Чӑваш Енре пурӑнакан Шишовсен ҫемйине ҫӗршыв Президенчӗ Владимир Путин Мускава пырса курма чӗннӗ.

«Ашшӗ-амӑшӗн мухтавӗ» тата «Мухтавлӑ амӑшӗ» орденсемпе чысланисене Мускава пырса курма ҫӗршыв ертӳҫи ҫу уйӑхӗн 30-мӗшӗнче иртнӗ онлайн-тӗлпулу вӑхӑтӗнче йыхравланӑ. Ҫавсен йышӗнче Ҫӗнӗ Шупашкарти 9 ачаллӑ Шишовсем те пулнӑ.

Ачасен амӑшӗ Ольга Шишова «ФедералПресс» корреспондентне тӗлпулу питех те ӑшшӑн ирсте кайнине пӗлтернӗ май пӗчӗк ачасем валли те, аслисемшӗн те кӑсӑкли нумай пулнине палӑртса хӑварнӑ. Хӗрарӑма Мускав хӑйӗн чиркӗвӗсемпе килӗшнӗ иккен. Эрне хушшинче ҫемье тӗрлӗ экскурсире пулса курнӑ.

Президент валли ҫемье тӑмран кӗнеке евӗр япала хатӗрлесе илсе кайнӑ. Ун ҫине тарӑн та ҫирӗп тымарлӑ, йӗкелсемлӗ, нумай туратлӑ юмана ӳкерсе хунӑ. Ҫийӗнчен тата Владимир Путин калашле, «Раҫҫей — пысӑк ҫемье», — тесе ҫырса хунӑ.

Белгород облаҫӗнче Чӑваш Енри ҫар ҫыннине шыранине пӗлтернӗччӗ. Вӑл пӗрле ҫар службине пурнӑҫлакансене автоматран пенӗ, кайран тарса ҫухалнӑ. Регионта «Перехват» план ирттересси пирки пӗлтернӗ.

Аса илтерер: ӗнер каҫхине 29 ҫулти ҫар ҫынни, Чӑваш Енрен килнӗскер, Белгород облаҫӗнчи ҫар дислокацийӗнче пеме тытӑннӑ. Малтанлӑха пӗлтернӗ тӑрӑх, икӗ ҫын вилнӗ, тепри аманнӑ.

Малтан вӑл пӗрле Калашников автоматне илнине пӗлтернӗ. Ӑна кайран инҫех мар тупнӑ.

«На связи» портал хыпарланӑ тӑрӑх, ку ӗҫе контракт службинчи рядовой Алексей Журавлев, 1995 ҫулта ҫуралнӑскер, тунӑ.

Шупашкарти Артур Михайлов таксистсен конкурсӗнче яланах палӑрнӑ-ха. Кӑҫал вара вӑл Раҫҫей шайӗнче мала тухса тӗп парнене – «Лада Веста» машинӑна – тивӗҫнӗ.

Иккӗмӗш вырӑна Илья Скурихин тухнӑ. Виҫҫӗмӗш вырӑна вара пӗлтӗрхи ҫӗнтерӳҫӗ Лаиза Бадреева йышӑннӑ.

Палӑртмалла: ҫӗнтерӳҫӗсене виҫӗ турпа палӑртнӑ: теори, практика тата пултарулӑх. Кӑҫал ҫӗршыв шайӗнчи конкурса Раҫҫейри 32 таксист хутшӑннӑ.