Шупашкарти аэропорт сӑнӳкерчӗкӗ

Ҫак уйӑхран Шупашкартан Минеральные Воды хулине самолётсем эрнере икӗ хутчен вӗҫме тытӑннӑ.

Аса илтерер: маршрут хыснаран субсидилекеннисен шутне лекнӗрен билетсем ытлашши хаклӑ мар. Пирӗн тӑрӑха Кавказпа сывлӑш ҫулӗпе ҫыхӑнтараканни – «Азимут» авиакомпани.

Хальхи вӑхӑтра самолётсем Шупашкартан Минеральные Воды хулине тата Минеральные Воды хулинчен Шупашкара эрнере икӗ хутчен: тунтикунпа шӑматкунсерен – вӗҫеҫҫӗ. Самолётсем ҫурла уйӑхӗн вӗҫӗччен ҫула илсе тухӗҫ.

Пӗрремӗш канал ӳкернӗ видео скринӗ

Шупашкарти 25 ҫулти Софья Каланова Пӗрремӗш каналпа пыракан «Мужское/Женское» кӑларӑмран пулӑшу ыйтнӑ. Унӑн ашшӗ ӑна тата пӗртӑванне пӗчӗк чухне пӑрахса тухса кайнӑ, тепӗр ҫемье ҫавӑрнӑ. Алимент парӑмӗ 300 пин тенкӗ таран пухӑннӑ.

Халӗ, 20 ҫул иртсен, ҫав арҫын ачисенчен алимент шыраса илесшӗн. Парӑма пула ун патне приставсем ҫӳреҫҫӗ, парӑма татма ҫӗр лаптӑкне туртса илесшӗн-мӗн. Ҫавӑнпа ашшӗ хӗрӗсенчен алимент шыраса илме шутланӑ та.

ШӖМ тунӑ сӑн

Архангельск облаҫӗнче Чӑваш Енри ҫухалнӑ арҫынна тупнӑ. Вӑл унта машинӑпа тиевпе кайнӑ та ҫыхӑнӑва тухма пӑрахнӑ. Тӑванӗсем кун пирки полицие пӗлтернӗ.

Йӗрке хуралҫисем арҫын тиевпе вырӑна ҫитнине палӑртнӑ. Кайран вӑл малалла кайнӑ. Кӗҫех унӑн машинине вӑрман ҫывӑхӗнче тупнӑ. Арҫынна вӑрманта шыранӑ.

Тупнӑ. Вӑл апат ҫименнипе хавшанӑ, ӑна вӑрӑм тунасем ҫыртса пӗтернӗ. Арҫын хӑй ӑҫтине те, кам пулнине те ӑнланман.

Каярахпа вӑл Чӑваш Енрен пулнине, кам иккенне аса илме пуҫланӑ. Ҫул ҫинче унӑн пуҫӗ вӑйлӑ ыратма пуҫланӑ иккен, ҫавӑнпа вӑл тӑна кӗме ҫулран пӑрӑннӑ. Арҫынна илме тӑванӗсем килнӗ.

"Контактри" сӑн

Мускаври ВДНХра иртекен «Раҫҫей» курав-форумра Ҫӗрпӳ муниципаллӑ округӗнче пурӑнакан Маша Александрова хӑйӗн пултарулӑхӗпе тӗлӗнтернӗ.

Маша вырсарни шкулӗнче вӗренет, Сӑнав поселокӗнчи ӳнер шкулне пултарулӑхне туптама ҫӳрет.

Машӑн пиччӗшӗ Евгений Алексанров ятарлӑ ҫар операцийӗнче Паттӑрлӑх орденне икӗ хутчен тивӗҫнӗ, паттӑрла пуҫ хунӑ.

dzen.ru сайтри сӑн

Раҫҫей Ӗҫлев министерстви раштав уйӑхӗн 31-мӗшне официаллӑ майпа канмалли кун тӑвасшӑн. Ведомство палӑртнӑ тӑрӑх, нумай ҫын кун пирки ыйтать.

Анчах кӑҫалах пулмӗ ку. Ӗҫлев министерстви канмалли куна 2025 ҫулта кӗртме сӗнет. Ун чухне раштав уйӑхӗн 31-мӗшӗ юнкуна лекет.

Кӑҫал Раҫҫей ҫыннисем раштавӑн 31-мӗшӗнче ахаль те канӗҫ. Раштавӑн 29-31-мӗшӗсем ӗҫлемелли кунсем пулмӗҫ. Раштавӑн 28-мӗшӗнче, шӑматкун, ӗҫлӗпӗр. Ун вырӑнне раштавӑн 30-мӗшӗнче канӑпӑр. Раштавӑн 31-мӗшӗнче вырсарникуна лекнӗ кӑрлачӑн 7-мӗшӗшӗн канӑпӑр.

"Ҫыхӑнура" форумран илнӗ сӑнӳкерчӗк

Раҫҫей Президенчӗ Владимир Путин Чӑваш Енри икӗ хӗрарӑма каҫарнӑ. Кун пек хушӑва ҫу уйӑхӗн 20-мӗшӗнче алӑ пуснӑ.

Ҫав хӗрарӑмсем Чӑваш Енри юсанмалли учрежденисенче айӑплава ирттернӗ.

Кӑҫалхи пуш уйӑхӗн 8-мӗшӗнче Чӑваш Енри виҫӗ хӗрарӑма каҫарнӑ. Пӗлтӗрхи нарӑс уйӑхӗнче пӗр арҫынна ҫавӑнпек мелпе ирӗке кӑларнӑ. Унччен Владимир Путин 2011 ҫулта Чӑваш Енри виҫӗ ҫынна каҫарнӑ.

t.me/nikamran каналта вырнаҫтарнӑ сӑнӳкерчӗк

Ҫӗнӗ Шупашкар хӗрӗ «ТНТ» телеканалӑн «Титаны» реалити-шоуне хутшӑнать. Кун пирки Телеграмри «Пуринчен малтан. Ҫывӑрса юлмасан» каналта пӗлтернӗ.

Асӑннӑ ҫӑлкуҫра хыпарланӑ тӑрӑх, «унта Раҫҫейри чи вӑйлӑ 99 ҫын чӑн мар ӑс-хакӑл хатӗрленӗ хӑнӑхтарусене пурнӑҫлӗ, ҫав йышра – пирӗн ентешӗмӗр Дарья Нагорная та. Пур хӑнӑхтарӑва та ӑнӑҫлӑ пурнӑҫланӑ атлет чи вӑйли ятне тивӗҫӗ тата 10 млн тенкӗллӗ пулӗ».

Дарья Нагорная – Олимп вӑййисен призерӗ, тӗнче чемпионки тата спорт гимнастики енӗпе тава тивӗҫлӗ спорт мастерӗ.

Чӑваш Енӗн Ӗҫ тата социаллӑ хӳтлӗх министерствин сайтӗнчи сӑнӳкерчӗкӗ

Шупашкарта пурӑнакан ҫичӗ ачаллӑ Васильевсем «Это у нас семейное» (чӑв. Ку вӑл пирӗн ҫемье) Раҫҫей шайӗнчи конкурса хутшӑнаҫҫӗ. Нумаях пулмасть вӗсем ҫурма финала хутшӑннӑ.

Ирина Юрьевнӑпа Владимир Пименович ҫичӗ ача ӳстереҫҫӗ. Асли, Никон, 20 ҫулта; кӗҫӗнни, Анатолий, 2-ре. Вӗсем ашшӗ-амӑшӗн ҫулӗпе кайнӑ – каратэ енӗпе кӗрешсе тӗрлӗ шайра ҫитӗнӳ тӑваҫҫӗ.

Сӑмах май каласан, ачасен амӑшӗ пулас упӑшкипе тренировкӑра паллашнӑ. Халӗ Владимир Пименович Шупашкарти 30-мӗш шкулта тренер-преподаватель пулса ӗҫлет. Вӑл хура пиҫиххине пиллӗкмӗш данне тивӗҫнӗ, каратэ енӗпе тӗнче чемпионӗ. Ирина Юрьевна хӑй вӑхӑтӗнче ҫӑмӑл атлетикӑпа, велоспортпа, каярах каратэ енӗпе кӑсӑкланма тивнӗ. 2019 ҫулта Раҫҫей чемпионатӗнче кӗмӗл призёр пулса тӑнӑ.

Чувашский.край страницӑран илнӗ сӑнӳкерчӗк

Тӑвай районӗнчи Алексей тата Анна Андреевсем хӑйсем ҫемье ҫавӑрнине Мускавра уявлама йышӑннӑ. Вӗсем ҫӗршывӑн тӗп хулинче, унти ВДНХри «Раҫҫей» куравра, мӑшӑрланнӑ.

Туя ҫамрӑксем хамӑр халӑхӑмӑрӑн йӑли-йӗркине пӑхӑнса ирттернӗ.

Ҫамрӑк мӑшӑра пурнӑҫри паллӑ пулӑмпа Шупашкар хулин пуҫлӑхӗн тивӗҫӗсене вӑхӑтлӑх пурнӑҫлакан Владимир Доброхотов саламланӑ. Вӑл вӗсене ҫемьере килӗшӳпе ҫураҫу суннӑ. Шупашкар хулин элемӗллӗ парнепе чысланӑ.

cap.ru сайтри сӑн

Ҫу уйӑхӗн 12-мӗшӗнче Мускавра иртекен «Раҫҫей» куравра Пӗтӗм Раҫҫейри туй фестивалӗ пуҫланнӑ. Ҫав кун унта 151 мӑшӑр хут уйӑрттарнӑ.

Чӑваш Енрен Александр тата Анна Кривовсем пулнӑ. Вӗсем – Елчӗк округӗнчен. Ҫамрӑксем чӑваш наци тумне тӑхӑнса пӗрлешнӗ. Хут уйӑрттарсан вӗсене «Раҫҫей чӗри» ҫулӑма панӑ, туй торчӗ парнеленӗ.

Палӑртмалла: ҫу уйӑхӗн 13-19-мӗшӗсенче туй фестивалӗпе килӗшӳллӗн федераци округӗсен кунӗсем иртӗҫ. Атӑлҫи федераци округӗн кунӗ ҫу уйӑхӗн 16-мӗшӗнче пулӗ. Унта Шупашкарти «Уяв» халӑх фольклор ансамблӗ хутшӑнма палӑртнӑ.