Елена Николаева страницинчен илнӗ сӑнӳкерчӗк

Чӑваш Енре Наци театрӗсен конгресӗ иртӗ. Кун пирки К.В. Иванов ячӗллӗ Чӑваш патшалӑх академи драма театрӗн директорӗ Елена Николаева халӑх тетелӗнчи хӑйӗн страницинче пӗлтернӗ.

Кунта сӑмах Наци театрӗсен III конгресӗ пирки пырать. Ӑна ҫитес ҫул Шупашкарта ирттерсшӗн. Кун пирки Питӗр хулинче Чӑваш Енӗн кунӗсем иртнӗ ҫул калаҫса татӑлнӑ иккен.

Елена Николаева хыпарланӑ тӑрӑх, Питӗрте вӑл Чӑваш Ен Элтеперӗпе Олег Николаевпа тата республикӑн культура министрӗпе Светлана Каликовӑпа пӗрле Александринский театрӑн президенчӗпе Валерий Фокинпа тӗл пулнӑ. Шӑпах ҫавӑн чухне конгреса Шупашкарта ирттересси пирки сӑмах хускатнӑ.

Унсӑр пуҫне ку тӗлпулура театрсем пӗр-пӗрин патне гастрольпе ҫитес ыйтӑва та сӳтсе явнӑ.

cap.ru сайтри сӑн

Чӑваш Республикине Калмӑк Республикинчи «Тюльпан» юрӑпа ташӑ ансамблӗ килӗ. Илемлӗх ертӳҫи тата директорӗ — Калмӑк Республикин искусствӑсен тава тивӗҫлӗ ӗҫченӗ Савр Катаев.

Ансамбль авӑн уйӑхӗн 18-мӗшӗнче Чӑваш патшалӑх филармонийӗн сцени ҫине тухса куракансене савӑнтарӗ. Унта, Чӑваш патшалӑх академи юрӑпа ташӑ ансамблӗн сцени ҫинче, Раҫҫейри Халӑхсен пӗрлӗхӗн ҫулталӑкне тата Чӑваш Енри халӑхсен туслӑхӗн ҫулталӑкне халалланӑ мероприятисем малалла пыраҫҫӗ.

Программа питӗ пуян. Коллектив пирӗн пата «ылтӑн фондӗнчи» чи лайӑх юрӑсемпе ташӑсене илсе килет. Хӑнасем вӗсем урлӑ калмӑк халӑхӗпе ҫывӑхрах паллаштарӗҫ. «Ылтӑн фондри» ташӑсен йышӗнче — «Чичрдг», «Зайсангсен ташши» тата «Товшур» ташӑсем.

«Контактра» халӑх тетелӗнчи сӑн

Красноярск крайӗнче пурӑнакансем мероприятие Раҫҫейри халӑхсен пӗрлӗхӗн ҫулталӑкне халалланӑ. Уяв туслӑх картинчен пуҫланӑ. Унта тӗрлӗ халӑх ҫыннисем хутшӑннӑ.

Унтан сцена ҫине Красноярскри чӑваш автономийӗн президенчӗ Геннадий Храмов тата хисеплӗ хӑнасем тухнӑ, пурне те уявпа саламланӑ.

«Чӳклеме яланах анлӑ иртет, унта чунпа савӑнма килеҫҫӗ. Пирӗн округа каллех ҫак уява ирттерме суйласа илни савӑнтарать. Чӑвашсем хӑйсен йӑли-йӗркине типтерлӗ упраҫҫӗ. Эпир пурте пӗрле вара халӑхсен туслӑхӗ янӑравлӑ сӑмахсем ҫеҫ мар, вӑл пирӗн кулленхи пурнӑҫ пулнине кӑтартса паратпӑр. Пӗрле эпир вӑйлӑрах», – каласа кӑтартнӑ Казачински-Пировски округӗн пуҫлӑхӗ Сергей Ивченко.

Ҫавӑнтах наци картишӗсем ӗҫленӗ, чӑвашсен, тутарсен, крешӗнсен, нимӗҫсен, белоруссен тата вырӑссен культурипе, тӗрлӗ наци апат-ҫимӗҫӗпе паллаштарнӑ. Паллах, уяв концертсӑр иртмен. Сцена ҫинче чӑваш, вырӑс, казак тата тутар юррисем янӑранӑ.

ЧР тава тивӗҫлӗ артисчӗ Анатолий Гущин ТНТ телеканалпа кӑтартакан «Пора на завод» сериалта тӗп рольсенчен пӗрне калӑпланӑ. Палӑртса хӑварар: ку сериала 16 ҫултан аслӑраххисем пӑхма пултараҫҫӗ.

Анатолий Гущин сериалта Танич рольне, тӗп героинӗн тӑванне, вылянӑ. Сериала курас килет-и? Вӑл экран ҫине тухиччен вӑхӑт нумаях юлман: ҫурла уйӑхӗн 31-мӗшӗнче 20 сехетре телевизор ҫутма ан манӑр.

Палӑртса хӑварар: Анатолий Гущин 1976 ҫулта Ҫӗнӗ Шупашкар хулинче ҫуралнӑ. Ашшӗ — вырӑс, амӑшӗ – чӑваш. Вӑл Ҫӗнӗ Шупашкарти 10-мӗш шкулта вӗреннӗ. Шкул хыҫҫӑн Анатолий Гущин Мускаври М.С.Щепкин ячӗллӗ театр аслӑ училищине вӗренме кӗнӗ. «Чӑваш Республикин тава тивӗҫлӗ артисчӗ» ята ӑна 2024 ҫулта панӑ. Унӑн пӗрремӗш мӑшӑрӗнчен Елена Шешетинӑран ывӑл пур, иккӗмӗш арӑмӗнчен хӗр ҫуралнӑ.

chgign.ru сӑнӳкерчӗкӗ

Ӗнер Питӗрпе Шупашкар хулисем ҫавра сӗтел ирттернӗ. Ӑна Раҫҫейӗн А.И. Герцен ячӗллӗ патшалӑх педагогика университечӗн Мариински залӗнче йӗркеленӗ. «Объединившие Чувашию и Санкт-Петербург: архитектор П.Е. Егоров и китаевед Н.Я. Бичурин» (чӑв. Чӑваш Енпе Санкт-Петербурга ҫывӑхлатнисем: П.Е. Егоров архитектор тата Н.Я. Бичурин китаевед) ят панӑ ҫавра сӗтеле Чӑваш Енӗн Вӗренӳ министерстви йӗркеленӗ. Ҫавра сӗтеле модератор пулса Чӑваш патшалӑх гуманитари ӑслӑлӑхӗсен институчӗн директорӗ, филологи наукисен докторӗ Юрий Исаев ертсе пынӑ.

Ҫавра сӗтел вӑхӑтӗнче Чӑваш патшалӑх гуманитари ӑслӑлӑхӗсен институчӗн ӗҫченӗ, истори наукисен кандидачӗ Юрий Гусаров тата Кӳкеҫри «Бичурин тата хальхи самана» музей директорӗ Ирина Удалова Бичурин ҫинчен каласа кӑтартнӑ.

Чӑваш патшалӑх гуманитари ӑслӑлӑхӗсен институчӗн ӗҫченӗ, искусствоведени кандидачӗ Антонина Мордвинова тата Питӗрти антропологи тата этнографии музейӗн (Кунсткамера) ӑслӑлӑх ӗҫченӗ Антон Салмин Пётр Егоров архитектор пурнӑҫӗпе ӗҫӗ-хӗлӗпе паллаштарнӑ.

cap.ru сӑнӳкерчӗкӗ

Чӑваш Ен Правительстви республикӑри массӑллӑ информаци хатӗрӗсене субсиди уйӑрса пама йышӑннӑ. Укҫана хыснаран кӑларса тыттариччен хайхисене ятарлӑ проектсем ҫыртарнӑ.

Социаллӑ проектсен конкурсне, тӗрӗссипе, тахҫанах ирттереҫҫӗ. Тӳре-шара ырланисене пурнӑҫа кӗртме укҫа параҫҫӗ. Кӑҫал пӗтӗмпе 19,9 миллион тенкӗ уйӑрса пама йышӑннӑ. Вӑл кӗмӗл 6 организацин 38 медиапроекчӗ валли пулӗ. Республикӑри массӑллӑ информаци хатӗрӗсен материалсене кӑҫал ҫулталӑк вӗҫлениччен кун ҫути кӑтартмалла.

Республика хыснинчен укҫана тивӗҫнисем ҫаксем: «Чӑваш Ен» патшалӑх телерадиокомпанийӗ, Чӑваш Енӗн наци телекуравӗ, «ЮТВ» телеканал, «Хыпар» тата Ҫӗнӗ Шупашкарти «Грани издательство ҫурчӗсем, «Советская Чувашия» хаҫат.

Шупашкарта Чӑваш патшалӑх ӳнер музейӗнче ЧР тава тивӗҫлӗ вӗрентекенӗн, Чӑваш ӳнерҫисен пӗрлӗхӗн тата Раҫҫейри пултарулӑх пӗрлӗхӗн пайташӗн Владимир Разинӑн куравӗ уҫӑлнӑ.

Курава «Пӗчӗк Тӑван ҫӗршыв» проектпа килӗшӳллӗн йӗркеленӗ. Унта ӑстан 100 яхӑн живопись тата графика ӗҫӗсем вырӑн тупнӑ. Вӗсен йышӗнче «Чечеш» картина пур, унта чӑваш хӗрӗн сӑнарне уҫса панӑ. «Жатва. Уй пуҫ» картинӑна та асӑнса хӑвармалла.

Владимир Разина ҫынсем урӑх енӗпе те пӗлеҫҫӗ. Вӑл Ҫӗнӗ Шупашкар хулин пӗрремӗш гербне шухӑшласа кӑларнӑ. Автор хӑй каланӑ тӑрӑх, уншӑн яланах вӗрентекен вырӑнӗнче ҫутҫанталӑк пулнӑ.

Курав авӑн уйӑхӗн 20-мӗшӗччен ӗҫлӗ. Билетсене ҫамрӑксем «Пушкин карттипе» те туянма пултараҫҫӗ.

Ҫитсе курӑр!

«Контактри» сӑн

Мускавран лайӑх хыпар ҫитнӗ! Чӑваш Енри халӑх фольклор ансамблӗ «Укӑлча» Мускав хулинче иртнӗ «Вырӑс уйӗ» юбилейлӑ фестивальте пӗрремӗш степеньлӗ лауреат пулса тӑнӑ. Фестиваль нумаях пулмасть, иртнӗ канмалли кунсенче, пулнӑ.

«Укӑлча» халӑх фольклор ансамблӗ – Ҫӗнӗ Лапсар поселокӗнчен. Пултарулӑх ушкӑнӗ фестивальте авалхи чӑваш туйӗн пайне кӑтартнӑ. Ҫапла вӗсем «Йӑла-йӗрке вӑйӗ» конкурсра чи пысӑк наградӑна тивӗҫнӗ.

Палӑртса хӑварар: ансамбле 1988 ҫулта йӗркеленӗ. 1999 ҫулта вӑл халӑх ятне тивӗҫнӗ. Хальхи вӑхӑтра ансамбле Алевтина Щитинина ертсе пырать. Коллектива тӗрлӗ професси ҫыннисем ҫӳреҫҫӗ – вӗсене пурне те чӑваш культурине юратни пӗрлештерет.

Вера Иванова сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗнче тӗрлӗ пултарулӑх ушкӑнӗ чылай. Хӑшӗсене юрлама ҫӳреҫҫӗ, теприсене — ташлама, виҫҫӗмӗшӗсене — алӑ ӗҫӗ тума. Асӑннӑ ушкӑнсене ҫӳрекенсем — тивӗҫлӗ канури хастар ватӑсем.

Центрӑн виҫӗ структура подразделенийӗнчен пӗри К. Иванов урамӗнче вырнаҫнӑ. Унта «Лайӑх кӑмӑл» ташӑ ушкӑнӗ пур. Ватӑсем ташлаҫҫӗ ҫеҫ мар, куракан умне тухмалли хитре сцена тумтирне те хӑйсемех ҫӗлеҫҫӗ.

Светлана Романова тата Галина Иванова нумаях пулмасть «Хурӑн» ташӑ валли тум ҫӗленӗ.

Машина тӑвакансен техникумӗнчен вӗренсе тухсан Светлана Романова Трактор заводӗнче ӗҫленӗ. Паян вӑл ал ӗҫӗпе аппаланать, салтаксене те пулӑшать.

Галина Иванова малтан ача пахчинче воспитательте ӗҫленӗ, кайран тиртен калпак ҫӗлеме хӑнӑхса вӗренсен ательере тӑрӑшнӑ.

https://vk.ru/wall-210944455_8257 сӑнӳкерчӗкӗ

Чӑваш Енри тата тепӗр тӑватӑ ҫынна «Чӑваш Республикин культурӑн тава тивӗҫлӗ ӗҫченӗ» хисеплӗ ят панӑ. Документа республикӑн влаҫ органӗсен официаллӑ порталӗнче вырнаҫтарнӑ.

Вӗсенчен иккӗшӗ — ӳнер шкулӗсен преподавателӗсем. Вӗсем: Эдуард Волчков тата Светлана Карамаликова. Эдуард Владимирович Куславккари ача-пӑча ӳнер шкулӗнче преподавательте тӑрӑшать, Светлана Ильинична — Елчӗкри ача-пӑча ӳнер шкулӗнче.

Шупашкарти Филипп Лукин ячеллӗ ача-пӑча 5-мӗш музыка шкулӗнче ӗҫлекен Оксана Рузавина та хисеп ятне тивӗҫнӗ. Вӑл та, эпир маларах асӑнса хӑварнисем пекех, преподаватель.

Пысӑк хисепе тивӗҫнисенчен йышӗнче музей ӗҫченӗ те пур. Вӑл — Ольга Кушманова. Ольга Геннадьевна — Чӑваш наци музейӗн маркетинг тата культурӑпа вӗренӳ ӗҫӗн пайӗн заведующийӗ.